1 Mosi 30:1-43

30  Nau vo di Rachel ksenna hott es see kenn kinnah havva kann fa da Jakob, is see jealous vadda funn iahra shveshtah. No hott see ksawt zumm Jakob, “Gebb miah kinnah, adda ich shtaub.”  No is da Jakob zannich vadda mitt di Rachel un hott ksawt, “Binn ich vi Gott; veah hott dich kalda funn kinnah havva?”  No hott see ksawt, “Do is mei mawt, di Bilha. Gay nei un shlohf mitt iahra, so es see kinnah uf mei shohs du kann, un ich kinnah havva kann deich see.”  No hott see eem di Bilha gevva fa en fraw un da Jakob hott kshlohfa mitt iahra.  Di Bilha is uf em family vayk vadda un hott en kind grikt fa da Jakob.  No hott di Rachel ksawt, “Gott hott mei sach gricht, hott mei shtimm keaht un miah en boo gevva.” Fasell hott see een Dan kaysa.  Di Bilha, di Rachel iahra mawt, is viddah uf em family vayk vadda un hott em Jakob da zvett boo gevva.  Di Rachel hott no ksawt, “Ich un mei shveshtah henn kshtreit geyyich nannah mitt en grohsah shtreit, un ich habb gebodda.” No hott see een Naphthali kaysa.  Vo di Lea ksenna hott es see kenn kinnah may havva kann, hott si iahra mawt, di Silpa, zumm Jakob gevva fa en fraw. 10  Un di Lea iahra mawt, di Silpa, hott en boo grikt fa da Jakob. 11  Di Lea hott ksawt, “Vee gliklich,” un see hott een Gad kaysa. 12  Di Lea iahra mawt, di Silpa, hott no em Jakob da zvett boo gevva. 13  No hott di Lea ksawt, “Ich binn fraylich, un di veibsleit zayla mich ksaykend haysa.” No hott see een Asser kaysa. 14  An di zeit funn di vaytza-eahn is da Ruben naus inʼs feld ganga un hott leeb-ebbel kfunna. Eah hott si rei gebrocht zu sei maemm di Lea. No hott di Rachel ksawt zu di Lea, “Gebb miah samm funn dei boo sei leeb-ebbel.” 15  Avvah see hott ksawt zu iahra, “Voahʼs nett genunk es du mei mann vekk gnumma hosht? Vitt du nau mei boo sei leeb-ebbel aw nemma?” No hott di Rachel ksawt, “Eah kann shlohfa mitt diah dinohvet vann du miah dei boo sei leeb-ebbel gebsht.” 16  Sellah ohvet vo da Jakob rei kumma is funn di feldah is di Lea naus ganga een ohdreffa un hott ksawt, “Du musht shlohfa mitt miah dinohvet. Ich habb dich gekawft mitt mei boo sei leeb-ebbel.” No hott eah kshlohfa mitt iahra selli nacht. 17  Gott hott di Lea abkeicht. See is uf em family vayk vadda un hott iahra fimfdah boo katt fa da Jakob. 18  No hott di Lea ksawt, “Gott hott miah mei lohn gevva veil ich mei mawt zu meim mann gevva habb.” No hott see een Isachar kaysa. 19  No is di Lea viddah uf da family vayk vadda un hott iahra sexdah boo katt fa da Jakob. 20  Di Lea hott no ksawt, “Gott hott miah en goot kshenk gevva. Mei mann vatt nau bei miah bleiva veil ich eem sex boova gevva habb.” No hott see een Sebulon kaysa. 21  Shpaydah hott see en maydli katt un hottʼs Dina kaysa. 22  No hott Gott an di Rachel gedenkt, hott see abkeicht un hott gmacht es see kinnah havva hott kenna. 23  See is no uf em family vayk vadda un hott en boovli grikt. No hott see ksawt, “Gott hott mei shohm vekk gnumma funn miah.” 24  See hott een Joseph kaysa, un hott ksawt, “Ich hoff da HAH gebt miah noch en boo.” Da Jakob Vatt Reich Deich Da Laban 25  Noch demm es di Rachel da Joseph katt hott, hott da Jakob zumm Laban ksawt, “Shikk mich vekk, so es ich an mei ayknah blatz un in mei ayya land gay kann. 26  Gebb miah mei veivah un mei kinnah, dee es ich dich gedeend habb difoah. No gayn ich uf mei vayk. Du vaysht vi feel eahvet es ich gedu habb fa dich.” 27  Avvah da Laban hott ksawt, “Loss mich gnawt finna in dei awwa un du nett gay. Ich habb auskfunna es da HAH mich ksaykend hott deich dich.” 28  Un eah hott no veidah ksawt, “Sawk vass dei lohn sei soll, un ich gebbʼs zu diah.” 29  Avvah da Jakob hott ksawt zu eem, “Du selvaht vaysht vi ich kshaft habb fa dich un vi goot es dei fee gedu hott unnich miah. 30  Du hosht nett feel katt eb ich kumma binn, unʼs is als may vadda biss nau hosht du feel. Da HAH hott dich ksaykend deich alles es ich gedu habb. Avvah nau, vass veyyich miah? Vee soll ich seiya fa mei aykni family?” 31  No hott da Laban ksawt, “Vass soll ich diah gevva?” Un da Jakob hott ksawt, “Du solsht miah nix gevva. Avvah vann du dess ay ding dusht fa mich, dann hald ich oh acht gevva uf dei fee un ivvahʼs vatsha. 32  Loss mich deich dei fee gay heit un awl di blakkichi shohf, di shvatzi lemmah, un awl di blakkichi gays raus laysa. Dee sella mei lohn sei. 33  Du kansht no shpaydah sayna eb ich eahlich voah mitt mei lohn vann du naus kumsht. Ennichah gays es nett blakkich is un ennich lamm es nett shvatz is, vannʼs bei mei fee is, dann kansht duʼs fanemma es ichʼs kshtohla habb.” 34  Da Laban hott ksawt, “Goot, loss es sei vi du ksawt hosht.” 35  Avvah sellah dawk hott da Laban awl di shtrayfichi un blakkichi gays-bekk, awl di anra gays es nett ay kollah voahra, un awl di shvatza shohf raus glaysa un hott si zu sei boova gevva fa acht gevva uf si. 36  Un si sinn drei dawk veit vekk ganga fumm Jakob, un da Jakob hottʼs ivvahricha fumm Laban sei fee kfeedaht. 37  No hott da Jakob greeni bablah, hazel un keshta shtekka gnumma un hott si veis shtraymich gmacht bei shtrayma funn di rinn abzeeya. Dess hottʼs veisa in di shtekka raus gebrocht. 38  Eah hott di shtraymichi shtekka fannich di vassah-drohwa gedu voʼs fee kumma is drinka, so es si drawwich vadda datt. 39  ʼS fee is drawwich vadda fannich di shtekka un henn yungi grikt is shtraymich, shekkich un blakkich voahra. 40  Da Jakob hott di lemmah funnanah kalda un hottʼs ivvahrich fee gmacht geyyich di shtraymicha un di shvatza drayya im Laban sei drubb. Eah hott sei ayya fee vekk kalda un hottʼs nett mitt em Laban sei fee gedu. 41  Un vann di shteikshta fumm fee am drawwich vadda voahra, hott da Jakob di shtekka fannich si gedu an di drayk, so es si drawwich vadda nayksht an di shtekka. 42  Avvah vannʼs fee shvach voah hott eahʼs nett datt nei, so voahʼs shvach fee em Laban unʼs shteik fee em Jakob. 43  So in demm vayk is da mann ivvah di maws reich vadda, un hott feel fee, mawda un gnechta, un kamayla un aysla katt.

Footnotes