1 Mosi 18:1-33

18  Nau da HAH hott sich gvissa zumm Abraham an di baym fumm Mamre in di hitz fumm dawk diveil es eah in di deah funn sei tent kokt hott.  Da Abraham hott ufgegukt un hott drei mennah ksenna nayksht bei eem shtay. Vo eah si ksenna hott is eah funn di tent deah kshprunga fa si ohdreffa. Eah hott sich nunnah gebikt uf da bodda,  un hott ksawt, “Mei Hah, vann ich gnawt kfunna habb in dei awwa, dann gay nett an deim gnecht fabei.  Losset samm vassah gebrocht sei es diah eiyah fees vesha kennet, un roowet unnich em bohm.  Ich gay un grikk samm broht so es diah eich uf frisha kennet. Noch sellem kennet diah viddah on gay, nau es diah eiyah gnecht gepsucht hend.” Si henn no ksawt, “Du vi du ksawt hosht.”  No is da Abraham kshvind nei in da tent zu di Sara ganga, un hott ksawt, “Kshvind, grikk drei daylah funn fei mayl, shaffʼs uf, un bakk samm broht.”  No is da Abraham naus zumm fee kshprunga, un hott en goot, yung hamli raus glaysa un hottʼs zu sei gnecht gevva. Eah hott sich gedummeld faʼs rishta.  No hott eah samm buddah un millich gnumma, unʼs hamli es gebutshaht voah un hottʼs fannich si ksetzt unnich em bohm. Diveil es si gessa henn, hott eah nayksht bei eena kshtanna unnich em bohm.  No henn si een kfrohkt, “Vo is di Sara, dei fraw?” Eah hott ksawt, “Datt drinn im tent.” 10  No hott da HAH ksawt, “Ich zayl fashuah viddah zrikk kumma zu diah dess zeit neksht yoah, un meikʼs, di Sara soll en glay boovli havva.” Di Sara voah am abheicha an di deah fumm tent, vo hinnich eem voah. 11  Nau da Abraham un di Sara voahra oahrich ald; di Sara voah fabei di eld es si kinnah havva hott kenna. 12  Di Sara hott no glacht zu sich selvaht un hott ksawt, “Noch demm es ich ald binn un mei mann aw ald is, soll ich nau noch blesiah havva?” 13  No hott da HAH ksawt zumm Abraham, “Favass hott di Sara glacht un ksawt, ‘Soll ich geviss en kind havva vann ich ald binn?’ 14  Is ennich ebbes zu hatt fa da HAH? An dee zeit neksht yoah kumm ich viddah zrikk, un di Sara soll en sohn havva.” 15  Avvah di Sara hottʼs falaykeld un hott ksawt, “Ich habb nett glacht,” veil see sich kfeicht hott. Avvah eah hott ksawt, “Yoh, du hosht glacht.” 16  No sinn di mennah uf kshtanna un henn nunnah geyyich Sodom gegukt. Da Abraham is mitt eena gloffa fa si fatt shikka. 17  No hott da HAH ksawt, “Vee kann ich fumm Abraham halda vass ich du zayl, 18  siddah es eah geviss en grohs un mechtich folk sei zayld, un deich een zayla awl di leit un lendah funn di eaht ksaykend vadda? 19  Ich habb een raus groofa so es eah sei kinnah, un sei haus-halding noch eem lanna dutt fa da vayk fumm HAH halda bei du vass gerecht un goot is. Dess is so es da HAH du kann fa da Abraham vass eah ksawt hott.” 20  No hott da HAH ksawt, “Es greishes funn Sodom un Gomorra is grohs un iahra sinda sinn oahrich shlimm un shveah. 21  Ich gay nau nunnah un gukk moll ebʼs so shlimm is es dess greishes vo zu miah kumma is, un vann nett, dann vays ichʼs.” 22  Di mennah henn sich gedrayt un sinn geyyich Sodom ganga, avvah da Abraham is fannich em HAH shtay geblivva. 23  Eah is nayksht zu eem ganga un hott ksawt, “Zaylsht du di gerechta umbringa mitt di ungerechta? 24  Vass vann fuftzich gerechti leit in di shtatt sinn? Zaylsht du si umbringa un da blatz nett shpeahra fa da sayk funn di fuftzich gerechta vo drinn sinn? 25  ʼSis goah nett vi dich fa so en ding du—fa di gerechti umbringa mitt di ungerechta, es vann di gerechta un di ungerechta gleicha veahra. Dess is goah nett vi dich! Sett nett da Richtah funn di gans veld du vass recht is?” 26  Da HAH hott no ksawt, “Vann ich fuftzich gerechti leit finn in di shtatt funn Sodom, dann shpoahrich da gans blatz fa iahra sayk.” 27  No hott da Abraham ksawt, “Ich habb mich unnah-gnumma fa shvetza zumm Hah even vann ich yusht shtawb un esh binn. 28  Vass vann yusht fimf vennichah es fuftzich drinn sinn? Daytsht du di shtatt fadauva fa fimf vennichah?” Un eah hott ksawt, “Ich zayl di shtatt nett fadauva vann ich fimf un fatzich finn.” 29  Da Abraham hott no viddah kshvetzt zu eem un hott ksawt, “Vass vann yusht fatzich kfunna sinn datt?” Un eah hott ksawt, “Ich zaylʼs nett du fa di sayk funn fatzich.” 30  No hott eah ksawt, “Oh Hah, sei nett zannich mitt miah; loss mich shvetza. Vass vann yusht dreisich kfunna sinn datt?” Un eah hott ksawt, “Ich zaylʼs nett du vann ich dreisich finn datt.” 31  Un eah hott ksawt, “Ich habb mich unnah-gnumma fa shvetza zumm Hah; vass vann yusht zvansich kfunna sei kenna?” Eah hott ksawt, “Ich zayl si nett fadauva fa di sayk funn zvansich.” 32  No hott eah ksawt, “Oh Hah, sei nett zannich mitt miah; ich vill yusht may aymol shvetza. Vass vann yusht zeyya kfunna sei kenna datt?” Un eah hott ksawt, “Ich zayl si nett fadauva fa di sayk funn zeyya.” 33  Un vo eah faddich voah shvetza mitt em Abraham, hott da HAH falossa. No is da Abraham viddah zrikk haym ganga.

Footnotes