‘Me, Jehovah, I be your God, wey dey teach you the thing wey go make life better for you.’
SONG: 117, 114
1, 2. (a) How Jehovah Witness people take dey look Bible? (b) Which part for Bible you dey like to read?
JEHOVAH WITNESS people really like Bible. Bible dey help us when we get problem and e dey give us hope. Na from Bible we dey learn many many things wey dey help us for life. (Rom. 15:4) We no dey see Bible as book wey people just use their sense write, but we dey see am as God Word.—1 Thess. 2:13.
2 All of us get the part for Bible wey dey always sweet us to read. Some dey like the part wey talk about Jesus story because this part dey teach us the kind person wey Jehovah be. And na the way wey Jesus live im life make us know. (John 14:9) People like the part wey dey talk about the things wey Jehovah talk sey go happen wey never happen. One of dem na book of Revelation wey dey talk about ‘the things wey go soon happen.’ (Rev. 1:1) And who fit talk sey e never learn one better thing from the book of Proverbs or Psalms? Yes, we fit talk sey true true Bible na book wey everybody suppose read.
3, 4. (a) How we dey feel when we see all the different different book wey Jehovah give us? (b) Which people we carry for mind write some of our book dem?
3 Because we really like Bible, that one dey make us like all our book. E be like that because na from Bible we dey carry wetin we dey write inside all our book. We dey happy to get all this book because we know sey na part of the better better things wey Jehovah dey give us. Another thing be sey as we dey read the book dem, our mind go dey for the things wey concern God and our faith go dey strong.—Titus 2:2.
4 We dey write many of our book for all Jehovah Witness people. But e get some of the book wey be sey na only some people we carry for mind write dem. E get some wey be for young people and some wey be for mama and papa. People wey no be Jehovah Witness fit gain well well from the things wey dey our website. All this plenty things wey Jehovah don give us dey make us remember wetin Jehovah talk for Bible sey, ‘better food go dey for everybody.’—Isa. 25:6.
5. Wetin dey make Jehovah happy with us?
5 Many of us dey wish sey we get more time to read our Bible and all this book dem. Make we get am for mind sey Jehovah dey happy if we dey use our time well—to read Bible every day and to do personal study. (Eph. 5:15, 16) But because we no dey too get chance to fit read all of dem, e get something wey fit happen. Wetin be that?
6. Which kind thinking fit make us miss advice wey dey some of the many many things wey Jehovah don give us?
6 One bad thing be sey, we fit miss the better advice wey dey inside some of our book because we feel sey e no concern us. For example, you fit dey think sey some part for Bible no really concern you or sey some of the book no be for people wey dey your age. Wetin this kind thinking fit cause? E fit make us just look the book small, comot eye or we fit no even read am at all. If we dey do like that, we fit miss something wey fit help us. Wetin we fit do so that this kind thing no go happen to us? Make we remember sey na Jehovah dey give us all this better things. Na wetin make am use prophet Isaiah tell us sey: ‘Me, Jehovah, I be your God, wey dey teach you the thing wey go make life better for you.’ (Isa. 48:17) Make we see three things wey go help us fit gain from all the better better things wey Jehovah dey give us, whether na for Bible or for our different different book dem.
WETIN FIT HELP US GAIN?
7. Why e good to read Bible with free mind?
7 Read Bible with free mind. Na true sey e get some people wey dem carry for mind write some part for Bible. But e good make we no forget sey ‘na God spirit dem take write everything wey dey inside Bible.’ (2 Tim. 3:16) Na wetin make e good to use free mind read Bible. One brother talk sey: “When I dey read Bible, I dey try make I no forget sey e get plenty advice wey I fit get from the part wey I dey read.” E still talk sey: “Na this one dey help me put mind for wetin I dey read.” E good make we dey pray sey make Jehovah give us free mind and help us to fit see the advice wey dey the part for Bible wey we want read.—Ezra 7:10; read James 1:5.
8, 9. (a) As we dey read Bible, which kind question we fit ask ourself? (b) Wetin 1 Timothy 3:2-7 dey teach us about the kind person wey Jehovah be?
8 Ask yourself question. If you dey read any part for Bible, e good make you stop small, come ask yourself this kind question: ‘Wetin this place dey tell me about the kind person wey Jehovah be? How I fit do wetin I learn? How I fit use am help another person?’ This kind question go help us fit enjoy our Bible reading and we go learn plenty things. For example, think about wetin Bible talk sey person wey want be elder for congregation suppose do. (Read 1 Timothy 3:2-7.) As many of us no be elder for congregation, the first time wey we read this place for Bible, we fit think sey e no concern us. But if we use the question wey we don talk about for this paragraph, we go see sey wetin this place talk fit help all of us for our life.
9 Wetin this place dey tell me about the kind person wey Jehovah be? Wetin Jehovah talk for here show sey, e want make elders be people wey dey serve am well. E want make dem get better character so that brothers and sisters for congregation go fit dey do things like dem. E no want make dem dey treat people wey dey congregation anyhow because na im Pikin blood e take save dem. (Acts 20:28) E no want make we dey fear but e want make we happy because e don put us for elders hand. (Isa. 32:1, 2) When we look all this one, e help us know sey Jehovah really get us for mind.
10, 11. (a) How we fit use wetin dey 1 Timothy 3:2-7 for our life (b) And how we fit use am take help other people?
10 How I fit do wetin I don learn? E good make elder dey take time look wetin this place talk because e go help am know how e fit take better im character. Person wey want be elder, go use wetin this place talk take check imself so that e fit dey do wetin Bible talk for there. (1 Tim. 3:1) True true, all of us wey dey serve Jehovah suppose know wetin dey this verse because na the kind character wey Jehovah want make all im servant get dey there. For example, Jehovah no want make im people dey make wahala and e want make dem dey use their sense well. (Phil. 4:5; 1 Pet. 4:7) As elders dey try make dem fit dey do this things, dem go be example for all of us and our faith go be like their own.—1 Pet. 5:3; Heb. 13:7.
11 How I fit use am help another person? We fit use wetin we don read for 1 Timothy 3:2-7, take help our Bible student and other people. That verse show how elders for congregation take different from pastor for church. This verse fit still help us see sey no be small work our elders dey do so that dem fit dey direct us well. And if we dey take time think this matter, e go make us dey respect dem. (1 Thess. 5:12) And the more we dey respect dem, the more dem go dey happy to do the work.—Heb. 13:17.
12, 13. (a) How we fit use our book dem and other things take do research? (b) Give one example of how research fit help us sabi some things wey no easy to quick know.
12 Dey do research. To do research, na to use the different different book and other things wey we get take find answer to this kind question:
Who write this part for Bible?
Which place and which time e write am?
E get any special thing wey happen the time wey e dey write this part?
This kind question fit help us sabi some things wey no easy to quick know.
13 For example, Ezekiel 14:13, 14 talk sey: ‘If any land sin or e do wetin I hate, I go show am pepper. I go make sure sey e no see food chop, and I go make sure sey nothing go grow for there. I go finish all the people and animal wey dey there. “Even if this three people—Noah, Daniel, and Job—dey there, na only dem no go die because dem dey do wetin good,” na wetin Jehovah the Oga wey high pass talk.’ If we do research we go see sey na around 612 years before dem born Jesus, Ezekiel write this thing. That time, Noah and Job don die tey tey. But because dem serve God well, e still dey remember dem. Na only Daniel never die. E even be like sey e dey around 20 years that time. But Jehovah talk sey Daniel good for im eye like Noah and Job. Wetin we fit learn from this one? Jehovah dey see and e sabi all the people wey dey serve am well, even if dem be young people.—Ps. 148:12-14.
GAIN FROM THE DIFFERENT DIFFERENT THINGS WEY JEHOVAH DEY GIVE US
14. Wetin dey some of the book wey we write for young people, and how we fit gain if we read dem? (Go check the first picture.)
14 As e be sey we dey gain if we dey read and dey study everything wey dey Bible, na so e go still be if we dey use everything wey Jehovah don give us to make our faith strong. Make we see some example. Book for young people. Many of the book wey we dey write this days na for young people.  Some of the book dey talk about wetin go help young people fit manage the problem wey dem dey get for school. As dem dey grow, their body dey change; this one fit still be problem. Some of our book fit help dem manage this problem. Wetin we fit gain if we read dem, even if we no be young people? E go help us remember sey e no easy for our young brothers and sisters wey dey congregation to fit serve Jehovah well. And that one go come help us know how we fit help dem.
15. Why e good make other people for congregation still dey read the book dem wey be for young people?
15 Many of the topic wey dey this book for young people no be only for dem. Why e be like that? Na because all of us must talk about wetin we know for Bible, we must control ourself, and we must make friend with better people. And if we want watch film or read any book, make e be better one. We go see this kind topic for the different different book wey we write for young people. So, you think sey e go make sense if people for congregation dey feel sey dem too big to read things wey we write for young people? E no go make sense at all! Na true sey we write this book for young people, but that one no mean sey other people no fit read am, because all the advice wey dey inside na from Bible. And the advice wey dey Bible fit help everybody.
16. Which other good thing our book dem dey do for young people?
16 Our book no just dey help young people manage their problem, but e still dey make their faith strong so that dem go be Jehovah friend. (Read Ecclesiastes 12:1, 13.) This one mean sey true true, other people for congregation fit gain from the book dem. For example, the Awake! wey we write for April 2009, carry one topic wey be “Young People Ask . . . How Can I Make Bible Reading Enjoyable?” For inside, we write some things wey fit help person enjoy im Bible reading. We write dem put for the box wey person fit use scissors cut comot, come put am for inside im Bible so that e fit use am when e dey read Bible. Na only young people this topic help? One sister wey dey 24 years, wey don marry and wey don get pikin talk sey: “To read Bible dey hard me well well, but I come try follow wetin dey this topic. Now, I dey like am when I dey read my Bible and I don see how all the book for Bible take agree. To read Bible never sweet me like this before.”
17, 18. How we go gain if we dey read our book and other things wey be sey no be Jehovah Witness be the main people wey we carry for mind write dem? Give one example.
17 Book dem for people wey no be Jehovah Witness. Na since 2008 we start to enjoy the Watchtower wey we dey study for meeting. The main people wey we carry for mind write this Watchtower na Jehovah Witness. But what of the one wey be sey na people wey no be Jehovah Witness be the main people wey we write am for? We go fit gain if we dey read this one too? Make we take one example. Think am sey you invite person come meeting and e come. You go happy, no be so? But as the brother wey dey platform dey give im talk, you come dey think about the person wey you invite come. You dey wonder whether the person really understand wetin e dey hear and whether e go fit change im life. This one come make you like the topic more.
18 This kind thing fit still happen to us if we dey read the book wey be for people wey no be Jehovah Witness. For example, we write the Watchtower wey we dey give people wey no be Jehovah Witness the way dem go take sabi wetin dey inside, and everything wey we write for inside na from Bible. Na so e still be with the ones wey dey our jw.org website. Some of dem dey the part wey be “Bible Questions Answered” and “Frequently Asked Questions.” If we dey read this things, e go make us sabi the truth wey dey Bible more. E fit still help us learn new new way to take teach people truth for Bible when we dey preach. Na so Awake! still be. E dey help us to really get strong mind sey God dey. E still dey help us fit tell other people about wetin we don learn from Bible.—Read 1 Peter 3:15.
19. How we go take show Jehovah sey we happy for the things wey e dey give us?
19 True true, e clear sey Jehovah don give us many many advice from Bible and other things wey fit make life better for us. (Matt. 5:3) Make we no stop to use everything wey Jehovah don give us. Na that one go show sey we really happy for the things wey Jehovah dey teach us—things wey go make life better for us!—Isa. 48:17.
^  (paragraph 14) Some of the book dem na Questions Young People Ask—Answers That Work, Volume 1 and 2, and the different different “Young People Ask” topic wey we fit see for only our website.