Apostle Paul talk sey Jehovah ‘no go let anything wey pass our power tempt us.’ (1 Cor. 10:13) This one mean sey Jehovah dey first check the kind problem wey we fit bear and choose the one wey we go face?
For example, one brother wey im pikin kill imself talk sey: ‘Before my pikin kill imself, Jehovah first see am sey me and my wife go fit bear am? Na God sey make e happen because we fit bear am?’ We get any reason to believe sey Jehovah dey control the kind things wey dey happen for our life like that?
If we check wetin Paul talk for 1 Corinthians 10:13 again, we go see sey Bible no give us any reason to believe sey Jehovah dey first check the kind problem wey we fit bear, then choose the one wey we go face. Make we see four reason why we talk like that.
(1) Jehovah dey let us do wetin we want. E want make we choose wetin we go use our life do. (Deut. 30:19, 20; Josh. 24:15) If we choose wetin good, Jehovah ready to direct us. (Prov. 16:9) But if we choose wetin bad, we go ready to face wetin go come out of am. (Gal. 6:7) If to sey Jehovah dey choose the kind problem wey we dey face, we go really fit talk sey Jehovah dey let us do wetin we want?
(2) ‘Something wey we no plan for fit happen to us anytime’ and Jehovah no go stop am. (Eccl. 9:11) Bad things wey fit make us suffer or die, fit happen to us anytime and anywhere. Jesus talk about 18 people wey die because house fall on top dem. E no talk sey the house fall on top dem because God want make dem die. (Luke 13:1-5) E go make sense to think sey before bad thing happen, God don choose who go die and who no go die?
(3) Wetin Satan tell Jehovah for Job 1:9-11, concern all of us. Remember wetin Satan talk. E sey we no dey serve Jehovah with better mind and we go leave Jehovah when we dey face problem. (Job 1:9-11; 2:4; Rev. 12:10) So, if Jehovah no dey allow us face some kind problem because e know sey we no go fit bear am, that one no show sey wetin Satan talk na true?
(4) Jehovah no need to know everything wey go happen to us before e happen. If na true sey Jehovah dey choose the kind problem wey we go face before e happen, that one mean sey e must know everything about our tomorrow. But Bible no talk like that. Na true sey God fit know our tomorrow. (Isa. 46:10) But Bible help us know sey Jehovah dey select the things wey e want know. (Gen. 18:20, 21; 22:12) Even though sey God get the power to know our tomorrow, e no dey use am anyhow. So, because of the kind person wey e be, e dey let us do wetin we want.—Deut. 32:4; 2 Cor. 3:17.
Wetin Paul come mean when e talk sey: ‘God . . . no go let anything wey pass una power tempt una’? Paul dey tell us wetin Jehovah dey do for us when we dey face problem, no be before we face problem. * Paul dey help us know sey no matter the problem wey we dey face for this life, Jehovah go help us if we trust am. (Ps. 55:22) This thing wey Paul talk dey make our mind come down. And na two main things make am talk am.
(1) The problem wey we dey face don happen to ‘another person before.’ Our problem na something wey other people don first face or dey face. Na problem wey we go fit bear—if we trust God. (1 Pet. 5:8, 9) For 1 Corinthians 10, Paul dey talk about wetin Israel people face when dem dey wilderness. (1 Cor. 10:6-11) Dem no face problem wey other people never face before. And any of dem wey dey serve Jehovah well fit bear the problem dem. Paul talk am four times sey ‘some of dem’ no hear word. E pain us sey some of dem do wetin no good because dem no trust God.
(2) ‘God no dey fail.’ The wey God take treat Israel people show sey e no dey ever leave ‘people wey love am and wey dey do wetin e talk.’ (Deut. 7:9) E still show sey God dey always do wetin e promise. (Josh. 23:14) This one help us know sey people wey love Jehovah, and wey dey do wetin e talk fit dey sure of two things when dem dey face wahala: (1) God no go allow their problem big sotey dem no fit bear am, and (2) ‘e go help’ dem.
How Jehovah take dey help people wey trust am when dem dey face problem? Na true sey if Jehovah want comot the problem, e go fit. But remember wetin Paul talk, e sey: ‘Jehovah go help una make una fit bear am.’ So Jehovah dey give us wetin we need to fit bear the problem wey we dey face. Make we see some of the way wey Jehovah take dey help us:
E dey ‘make our mind come down anytime wey we dey wahala.’ (2 Cor. 1:3, 4) Jehovah dey use Bible, im holy spirit and the things wey Governing Body dey give us take make our mind come down.—Matt. 24:45; John 14:16, ftn., Rom. 15:4.
E fit use im holy spirit take direct us. (John 14:26) When problem come, God holy spirit go fit help us remember wetin Bible talk and the advice wey dey inside. And this one go help us do the correct thing.
E fit use im angel take help us.—Heb. 1:14.
E fit use our brothers and sisters take help us. Wetin dem talk and do fit ‘help’ us well well.—Col. 4:11, ftn.
So wetin be the meaning of wetin Paul talk for 1 Corinthians 10:13? Jehovah no dey choose or select the kind problem wey we go face. But when we dey face problem, we know sey: If we use all our mind take trust Jehovah, e no go ever allow the problem big pass wetin we fit bear. E ready to always help us so that we fit bear am. This one dey make our mind come down!
^ par. 2 The Greek word ‘tempt’ fit mean ‘problem’ or to ‘test’ person.