WETIN YOU FOR DO?
Just think am sey: Tim and im friend dey play ball. As dem dey play, Tim kick the ball go up, na so the ball go break their neighbor window.
If you be Tim, wetin you for do?
WAIT! THINK AM WELL
YOU FIT DO THREE THINGS:
Blame another person.
Tell your neighbor wetin happen, and tell am sey you go pay.
You fit like to choose number 1. But e get better reason why e good to dey gree sey you make mistake—whether you break person window or do any other thing.
THREE REASON WHY E GOOD TO GREE SEY YOU MAKE MISTAKE
Na the correct thing to do.
Bible sey: ‘We want make sure sey everything wey we dey do na the right thing.’—Hebrews 13:18.
People dey quick forgive person wey gree sey e do mistake.
Bible sey: ‘Person wey dey cover im sin no go succeed, but na who dey confess am and change im way dem go pity.’—Proverbs 28:13.
The one wey better pass be sey, e dey make God happy.
Bible sey: ‘Jehovah hate person wey im way no clean, but na who dey do wetin right go be im better friend.’—Proverbs 3:32.
Karina wey dey 20 years, try hide paper wey police use charge am because of over speed make im papa no see am. But e no fit hide am forever. Karina sey: “After one year, my papa see the paper, and I enter big trouble!”
Wetin we learn? Karina sey: “If you hide your mistake, e no go only make am worst, you go suffer am later later!”
HOW YOU GO TAKE LEARN FROM YOUR MISTAKE
Bible sey: ‘Many times all of us dey make mistake.’ (James 3:2, wetin dey under) As we don learn, you go show sey you no dey carry shoulder up and sey you mature if you dey gree sey you make mistake—and na the right thing to do be that.
Another way na to learn from the mistake wey you make. One girl wey im name na Vera talk sey: “I dey always try to learn something from any mistake wey I make, and I dey allow wetin I learn help me be better person so that I no go do am again.” Make we see how you go fit do wetin Vera talk.
You use your papa bicycle come spoil am. Wetin you go do?
No talk anything and dey pray make your papa no see am.
Tell your papa wetin happen.
Tell your papa wetin happen but sey na another person fault.
You fail for exam because you no read. Wetin you go do?
Sey the exam hard.
Gree sey na you cause am.
Vex sey your teacher no like you.
Remember the two example wey dey up, try think sey na you be (1) your papa and (2) your teacher. How your papa and your teacher go feel if you gree sey you make mistake? If you cover your mistake, how dem go feel?
Now think about the mistake wey you make last year and answer all this question.
Wetin be the mistake? Wetin you do when the mistake happen?
I hide am.
I blame another person.
I gree sey na me do am.
If you no gree sey na you do am, how you feel later?
I happy—No body know!
My mind dey judge me—I for talk true.
How you think sey you for do am wey e go better pass?
Wetin you learn from your mistake?
WETIN YOU THINK?
Why some people no dey gree sey dem make mistake?
Which kind eye people go take look you if you dey cover your mistake? Which kind eye people go take look you if you gree sey na you do am?—Luke 16:10.