1, 2. Wetin Jehovah want for family?

NA JEHOVAH arrange the first marriage. Bible tell us sey e make the first woman, come carry am give Adam. Adam happy no be small, na im make am talk sey: ‘At last, see the bone wey come from my bone and the flesh wey come from my flesh. Dem go call this one woman, because dem take am from man.’ (Genesis 2:22, 23) This one show sey Jehovah want make family dey happy.

2 The truth be sey, many family today no dey happy at all. But Bible get many advice wey fit make family happy.—Luke 11:28.

WETIN GOD WANT MAKE HUSBAND DEY DO?

3, 4. (a) How God want make husband dey treat im wife? (b) Why e good make husband and wife dey forgive each other?

3 Bible talk sey make husband love im wife and dey show sey e value am. Abeg read Ephesians 5:25-29. This one mean sey husband go dey treat im wife well, e go dey protect am, dey care for am and e no go do wetin go pain am.

4 But wetin husband go do when im wife make mistake or do wetin e no like? Bible talk sey: ‘Make una continue to dey love una wife and make una no dey over vex for dem.’ (Colossians 3:19) E good make husband still dey remember sey im dey make mistake sometimes. So if e want make God forgive am, e must ready to forgive im wife. (Matthew 6:12, 14, 15) When husband and wife dey forgive each other, their marriage go sweet and dem go dey happy.

5. Why e good make husband value im wife well well?

 5 Jehovah want make husband value their wife well well. E good make husband dey put eye for ground to know wetin im wife need. This thing wey we dey talk na serious matter. Because if husband no dey treat im wife well, Jehovah fit no answer im prayer. (1 Peter 3:7) Jehovah no like man pass woman, e like anybody wey dey show sey e love am, whether na man or woman.

6. Wetin e mean for husband and wife to be ‘one person’?

6 Jesus talk sey husband and wife ‘no go be two person again, but one person.’ (Matthew 19:6) So e no good make husband or wife leave each other go sleep with another person, or do anything wey fit spoil their marriage. (Proverbs 5:15-21; Hebrews 13:4) Bible talk sey make husband and wife no dey use sex suffer each other. (1 Corinthians 7:3-5) Make husband get am for mind sey: ‘Person no dey hate imself but e dey chop well and sofri take care of imself.’ So make husband love im wife and dey show sey e value am. The truth be sey, wetin women like pass na make their husband dey carry dem like egg.—Ephesians 5:29.

WETIN GOD WANT MAKE WIFE DEY DO?

7. Why family need person to dey direct things?

7 For things to dey go well for family, e need person wey go dey direct things so that everybody go dey do things together. For 1 Corinthians 11:3, Bible talk sey as Christ be the head of every man, na so man take be the head of woman, and na so God take be the head of Christ.

8. How wife go take show sey e dey respect im husband well well?

8 E no get husband wey no dey make mistake. But if wife dey support wetin im husband talk and dey use all im mind join hand to make am work, everybody for the family  go gain. (1 Peter 3:1-6) Bible talk sey make wife dey ‘respect im husband well well.’ (Ephesians 5:33) But what if the husband no dey follow im wife serve Jehovah? The wife still need to dey respect am well well. Bible talk sey: ‘Una wey be wife, make una dey respect and obey una husband, so that if any of dem no dey serve God, dem fit change because of their wife character even if their wife no talk anything, because dem don see sey una dey live clean life and una dey respect dem well well.’ (1 Peter 3:1, 2) So, if the wife get better character, that one fit help im husband understand wetin e believe and stop to dey disturb am.

9. (a) Wetin wife go do if e no agree with wetin im husband talk? (b) Wetin Titus 2:4, 5 tell wife to dey do?

9 What if the wife no agree with wetin im husband talk? E good make the woman sofri tell am wetin dey im mind with respect. For example, e get one time wey Sarah talk something wey Abraham no like, but Jehovah tell am sey make e ‘do wetin’ im wife talk. (Genesis 21:9-12) E hard for husband wey dey serve Jehovah to talk sey e want do  wetin e know sey God no like. So if wetin e talk no bad, im wife need to support am. (Acts 5:29; Ephesians 5:24) Better wife dey settle down take care of im family. (Read Titus 2:4, 5.) And when im husband and children see the way e dey care for dem, e go make dem love am and respect am more.—Proverbs 31:10, 28.

How Sarah take show women example of how to be better wife?

10. Explain wetin fit make husband and wife leave each other, or end their marriage?

10 If small problem dey marriage, many husband and wife dey quick run leave each other or end the marriage. But Bible no support that one, e talk sey make wife no pack leave im husband and make husband no pack leave im wife. (1 Corinthians 7:10, 11) E get some kind serious matter wey fit make husband and wife stop to dey stay together but no be something wey person dey hurry do. Husband and wife fit end their marriage? Bible show sey the only thing wey fit make husband and wife end their marriage na if one of dem go sleep with another person.—Matthew 19:9.

WETIN GOD WANT MAKE PAPA AND MAMA DEY DO?

Jesus na better example wey everybody for family fit copy

11. Wetin be the best thing wey you fit do for your children?

11 E good make papa and mama dey spend time with their children. Your children need you, and the best thing wey you fit do for dem na to teach dem about Jehovah.—Deuteronomy 6:4-9.

12. Wetin papa and mama go do to protect their children?

12 Na bad things full this world wey Satan dey control, and e dey bad more more. E get some people wey want do bad things to our children, dem fit rape dem or spoil dem. E dey hard some papa and mama to talk to their children about this matter, but e no suppose be like that. Papa and mama need to warn their children about this kind people  and tell dem wetin dem go do to run from this kind people. Papa and mama, make una dey protect una children. *1 Peter 5:8.

13. How papa and mama go take dey teach their children?

13 Na papa and mama work to teach their children how dem go dey behave. But how you go take teach your children? Na true sey e good make we dey correct our pikin when dem do bad, but e no good make we dey over beat dem or dey shout for dem anyhow. (Jeremiah 30:11) So  make you no punish your children as the thing wey dem do take vex you. No let wetin you dey tell dem ‘be like knife wey dem take chuk person.’ E go pain dem well well. (Proverbs 12:18) Teach your children to know why e good make dem dey hear word.—Ephesians 6:4; Hebrews 12:9-11; check Endnote 30.

WETIN GOD WANT MAKE CHILDREN DEY DO?

14, 15. Why e good make children dey obey their papa and mama?

14 Jesus dey always do wetin im Father want, even when e hard for am. (Luke 22:42; John 8:28, 29) Jehovah want make children dey obey their papa and mama.—Ephesians 6:1-3.

15 E fit hard you sometimes to do wetin your papa and mama talk, but get am for mind sey when you dey obey dem, e go make dem happy and Jehovah self go happy with you. *Proverbs 1:8; 6:20; 23:22-25.

Wetin go help young people stand their ground when other people want make dem do bad things?

16. (a) Wetin Satan dey do to make young people do bad thing? (b) Why e good make you dey make friend with people wey dey serve Jehovah?

16 Satan fit use your friend or other young people make you do bad things. E know sey e fit hard for you to sey no if your friends want make you do bad things. For example, e get one time when Jacob pikin wey dem dey call Dinah go make friend with people wey no dey worship Jehovah. Wetin later happen cause wahala for am and im family. (Genesis 34:1, 2) So if you dey make friend with people wey no dey serve Jehovah, dem fit make you do wetin Jehovah no like. This one fit cause serious wahala for you, and for your family, and e no go make God happy. (Proverbs 17:21, 25) If you no want enter this kind wahala, e  good make you dey make friend with only people wey dey serve Jehovah.—1 Corinthians 15:33.

YOU FIT MAKE YOUR FAMILY HAPPY

17. Wetin everybody for family need to dey do?

17 If everybody for family dey follow wetin God talk, dem go dey happy and dem no go dey cause problem for theirself. So if you be husband, love your wife well well and dey carry am like egg. If you be wife, dey respect your husband well well and dey carry yourself down for am and make you try be like the better wife wey Proverbs 31:10-31talk about. If you be papa or mama, dey teach your pikin make e love God. (Proverbs 22:6) If you be papa, dey handle your family ‘well.’ (1 Timothy 3:4, 5; 5:8) If you be pikin, make you dey obey your papa and mama. (Colossians 3:20) Remember sey all of us for family dey do wetin each other no like sometimes, so if you do wetin make another person vex, sofri tell am sey make e no vex. We don see am sey Bible tell us wetin everybody for family go dey do to make im family happy.

^ par. 12 You fit learn other things wey go help you know how to protect your children for chapter 32 of the book Learn From the Great Teacher, na Jehovah Witness people print am.

^ par. 15 If papa and mama tell their pikin make e do wetin God hate, the pikin no need obey dem.—Acts 5:29.