Jump go wetin dey inside

Jump go another thing wey dey for here

Jump go wetin dey inside this book

Jehovah Witness People

Nigerian Pidgin

Wetin Bible Dey Teach Us?

 CHAPTER SIX

Wetin Dey Happen to Person Wey Die?

Wetin Dey Happen to Person Wey Die?

1-3. If person die, which kind question people dey ask, and how some religion take dey answer am?

GOD promise us for Bible sey time dey come when people no go die again. (Revelation 21:4) For Chapter 5, we learn sey na Jesus sacrifice go make us fit get life wey no go end. But now, people still dey die. (Ecclesiastes 9:5) So one important question wey we fit ask na, wetin dey happen to person wey don die?

2 Na when person wey we like well well die, na that time we go know sey this question dey important. Na that time we fit come dey ask sey: ‘Where e go? E dey see us? E go fit help us? We go ever see am again?’

3 Different different religion get their own way wey dem take dey answer this question. Some dey teach sey if good person die, e go go heaven, but if bad person die, e go go hellfire. Some people believe sey if person die, e go turn to spirit and go dey stay with im family members wey don die. But some believe sey if person die and dem don judge am, e go come back to life as another person or animal.

4. Wetin many religion dey make people believe?

4 The different different religion no dey teach the same thing, but na one rope tie all of dem because dem dey make people believe sey human being no dey really die. Dem dey make people believe sey e get wetin dey inside person wey no dey die. Na true?

 WHERE DO WE GO WHEN WE DIE?

5, 6. Wetin dey happen to person wey don die?

5 Jehovah know wetin dey happen to people wey die, na im make am tell us sey when person die, im life don end. For person to die mean sey everything about im life don end. So person wey don die no dey fit think or feel anything. * If person die, e no dey see, e no dey hear, and e no dey think anything again.

6 King Solomon talk sey: ‘people wey don die no sabi anything at all.’ Person wey don die no dey fit love or hate people. And dem no fit work, plan, learn, or think for inside grave. (Read Ecclesiastes 9:5, 6, 10.) And for Psalm 146:4, Bible talk sey person wey don die, no dey think anything at all.

WETIN JESUS TALK ABOUT PERSON WEY DON DIE

Jehovah make human being make dem enjoy life wey no go end

7. Wetin Jesus talk about person wey die?

7 When Lazarus wey be Jesus friend die, Jesus come tell im disciple sey: ‘Lazarus our friend don go sleep.’ Jesus no mean sey na rest e dey rest. Jesus later talk sey: ‘Lazarus don die.’ (John 11:​11-​14) Jesus dey look person wey die like person wey dey sleep. Jesus no talk sey Lazarus dey heaven or with im family member wey don die. And e no talk sey Lazarus dey suffer for hellfire or sey dem don born am as person or animal. But e just be like sey Lazarus dey deep sleep. For other Bible verse, Jesus still talk the same thing. Before Jesus bring Jairus pikin come back to life, Jesus talk sey: ‘E no die but e dey sleep.’​—1 Corinthians 15:6.

8. How we take know sey God no make us to dey die?

8 When God make Adam and Eve, e get am for mind  sey dem go die later? No! Jehovah make dem so that dem go enjoy life wey no go end, wey sickness no dey. When Jehovah make human being, e put am for their mind make dem like to live forever. (Ecclesiastes 3:​11) No papa and mama go like make their pikin old and die, na so e still be with Jehovah, e no want make we old and die. But as God make us to live forever, why we come dey die?

WHY WE DEY DIE?

9. Why we fit talk sey wetin Jehovah tell Adam and Eve make sense?

9 When Adam dey inside garden of Eden, Jehovah tell am sey: ‘You fit chop belleful from the fruit of any tree  wey dey the garden. But make you no chop from the tree wey dey make person sabi wetin good and wetin bad, because the day wey you chop am, you must die.’ (Genesis 2:9, 16, 17) Wetin Jehovah tell Adam no hard to do, and Jehovah get the right to tell Adam wetin e suppose do and wetin e no suppose do. If dem do wetin Jehovah tell dem, e mean sey dem respect Jehovah as their King. E still mean sey dem happy for all the things wey Jehovah don give them.

10, 11. (a) How Satan take make Adam and Eve do wetin Jehovah sey make dem no do? (b) Why Adam and Eve no go fit talk sey wetin dem do na mistake?

10 The bad thing be sey Adam and Eve no gree do wetin Jehovah want. Satan ask Eve sey: ‘Na true sey God talk sey make una no chop fruit from any tree wey dey for the garden?’ Eve answer am sey: ‘We fit chop fruit from all the tree wey dey the garden. But God don talk about the fruit for the tree wey dey center of the garden sey: Make una no chop am, no, make una no touch am, if una chop am, una go die.’​—Genesis 3:1-3.

11 Na im Satan talk sey: ‘Una no go ever die. Because God know sey the day wey una chop am, una eye go open and una go be like God, come sabi wetin good and wetin bad.’ (Genesis 3:4-6) Satan want make Eve dey think sey e go fit choose by imself wetin e suppose do and wetin e no suppose do. No be only that one o! Satan still lie about wetin go happen to Eve if e do wetin Jehovah sey make dem no do. Satan talk sey Eve no go ever die. Na im Eve chop the fruit come give some to im husband. Adam and Eve know sey Jehovah no want make dem chop the fruit. When dem chop am, dem choose to do wetin God sey make dem no do. As dem chop am, dem show sey dem no get respect for their Papa wey dey heaven wey love  dem well well. Dem no get any reason wey fit make dem talk sey na im make dem chop am!

12. Why the thing wey Adam and Eve do bad well well?

12 E bad well well sey our first papa and mama, Adam and Eve no respect the God wey make dem! How you go feel if after you suffer train two children, boy and girl, dem no come dey hear word again, dem come dey do anyhow, dey even fight you? E no go pain you?

Na sand sand God take make Adam, when e die, e still turn to sand sand

13. Wetin Jehovah mean when e tell Adam sey: ‘you go turn to sand sand when you die’?

13 When dem do wetin God sey make dem no do, dem come loss the chance to enjoy life wey no go end. Jehovah tell Adam sey: ‘You be sand sand and you go turn to sand sand when you die.’ (Read Genesis 3:19.) That one mean sey e go come be sand again, like sey e never come life before. (Genesis 2:7) After Adam sin e come die, e no go anywhere.

14. Why we dey die?

14 If to sey Adam and Eve do wetin God talk, dem for still dey alive. When dem chop the fruit, dem come sin and as time dey go dem come die. Sin be like one bad sickness wey we get from Adam and Eve. All of us carry sin come from our mama belle, na im make we dey die. (Romans 5:12) But that one no be  wetin God get for mind for us. God be no want make human being dey die, na im make Bible call death ‘enemy.’​—1 Corinthians 15:26.

THE TRUTH GO FREE US

15. If we know the truth about wetin dey happen to people wey don die, how e go take free us?

15 If we know the truth about wetin dey happen to people wey don die, e go free us from many believe wey no be true. For Bible we learn sey body no dey pain person wey don die, and e no dey vex. We no fit talk to dem, and dem no fit talk to us. We no go fit help people wey don die, and dem no go fit help us. Dem no go fit do us anything, so why we go dey fear dem? But many religion dey teach people sey people wey don die dey live for another place. And sey people wey dey alive go fit help people wey don die, if dem pay priest or people wey dem dey call man of God. But if we know the truth about wetin dey happen to people wey don die, we go know sey that one na big lie.

16. Which lie many religion dey teach about people wey don die?

16 Satan dey use fake religion lie to people make dem believe sey people wey don die still dey alive. For example, some dey teach sey if person die, e get wetin dey inside im body wey dey live for another place. Na wetin your religion dey teach you be that, or dem dey teach you wetin Bible talk? Satan dey use lie draw people comot from Jehovah side.

17. Why hellfire believe na insult to Jehovah?

17 Wetin many religion dey teach na to put fear for people mind. For example, some dey teach sey bad people go suffer for hellfire, and their suffer no go end. This lie na insult to Jehovah. E no go ever allow people suffer  like that! (Read 1 John 4:8.) How e go do you for body if you see person wey put im pikin hand for fire because the pikin do bad thing? You no go talk sey the person wicked? And you go want make that kind person be your friend? Na that kind eye Satan want make people take dey look Jehovah!

18. Why we no suppose fear people wey don die?

18 Some religion dey talk sey, when person die, e go turn to spirit. That kind religion want make people believe sey na better thing to dey respect and fear people wey don die. Because dem believe sey the person spirit get the power to help im friends and cause wahala for im enemy. Many people believe that lie. Dem dey fear people wey don die and dey worship dem instead of Jehovah. Remember sey people wey don die no know anything at all, so we no suppose dey fear dem. Na Jehovah make us, and na im be the true God. So, na only Jehovah we suppose worship.​—Revelation 4:11.

19. If we know the truth about people wey don die, how e go take help us?

19 When we know the truth about people wey don die, e go free us from all the lie wey dem dey teach for different different religion about people wey don die. This truth don help us know the better better things wey Jehovah don promise us and how our tomorrow go take better.

20. Wetin we go talk about for the next chapter?

20 For Bible time, one man wey be God servant, wey im name na Job ask one question sey: ‘If person die, e go fit come life again?’ (Job 14:14) People wey don die go really fit come life again? The answer wey God give us for Bible go make our mind come down. We go talk about am for the next chapter.

^ par. 5 Some people believe sey if person die, im soul or spirit no dey die. If you want know more, check Endnote 17 and 18.