Ji'phna kxtee me'jwe

Me'jwe menu je'zte

Kxtee nyaafxte me'jwe

Jeuwa Kaaji'yusa

nasa yuwe

Kaapiyaˈjwe zxikweˈsxtxis

 PEˈLA 5

Samuel baaçxtewa vxitne Jeuwa wẽdxnisaˈs

Samuel baaçxtewa vxitne Jeuwa wẽdxnisaˈs

Wala leeˈçx khwẽˈy Samuel selpiine Dxus tabernaculote. Txãa tabernáculoteneta Jeuwaˈs selpiiyã uˈjwe. ¿Jiyu wẽejega Samuel kĩh yũuçxa kik kxtee uˈpsayu? Nawa txãa paapẽynisaˈs jiyu wẽeçxa, njĩˈjaˈs khwẽˈy jiyuka. Txãa Anane yaseyu.

Ana baaçxtewa luuçx jiˈphuwaˈjaˈsçxaane yahkx, nawa luuçx jiˈphuyã ãjaˈsameeneyu. Txajuˈ Jeuwa yakh puutx weˈwna pẽhyne: “Meen puˈçxhinega ũˈkwes”. Khĩiçxa naˈjĩne: “ũˈkwe luuçx jiˈphuçxa, txãa tabernáculo selpiiyã kaajan, saˈ kxtee ĩtxi fxiˈzekahn”. Txãˈjĩte Jeuwa wẽseˈjne Ana puutx weˈwnis, açyu luuçx jiˈphuyã ãjaˈne. Açyu txãa luuçxaˈsyu Samuelne yase kiˈp. Tekh meeçxa pahz añone jiˈphuçtene, Ana txãjx weˈwnis kxtey yũune, khĩiçxa tabernáculo kxtee jxũun uˈjne Dxusaˈs selpiikhan.

Txãa tabernáculo jiˈphune paal txãayu Elíne yaseyu. Jeˈz zxik piçthakxsayãne jiˈphsayu, kxtee mjĩisaneta yũu. Kxtee tabernaculoteneta Jeuwaˈs selpiisa yũu, kxtee nasa uˈpsa wala ewyũuwaˈj jiˈphuneta. Nawa Elí zxikweˈsxa ewmeeyũun ũstewa Samuelyu uynane uˈju. ¿Samuel ewmeesa vxitmaak, txaawẽˈsx naˈwẽy? ¿Idxa masũhuga?... kĩhwa ewmeesaˈs vxitmeene, Samuel kxtey yũune Jeuwa wẽdxnisaˈs, ney weˈsx maˈwneta kaapiyaˈj txaˈwẽy vxitne.

¿Elí kĩh kik yũu jiˈphu? ¿Majiigigk Elí txãjx zxiktxis yuˈkxpehymak?... ¡Yuˈkxpehymeene! Elí zxikweˈsxa mjĩiyã ãjawaˈjsameenetayu txãa tabernaculote. Nawa Eli kxtey yũumeene. Açyuˈ Jeuwa wala ũusxaçxane Elíyakh vxiteˈ zxikweˈsx yakh txaˈwẽy.

Jeuwa jxkaahne Samuelaˈs Elíˈs ptaˈsxya

Kus dehn ũste wẽseˈjne paˈyaste. “¡Samuel!” jĩn. Txãayu Elí taˈsxte tudçxane uˈj, nawa Elíyu: “Adxa kĩhwa paˈyameet” jĩne. Jeˈzus kxsuste wẽseˈjne txãas paˈyaste. Tekh ũste paˈyane, açyuˈ Elíyu Samuelaˈs naˈjĩne: “Kiˈkin paˈyate, pass: ‘Adxa wẽseˈj ũsthu, meen weˈw Jeuwaˈ”. Samuel kxtey yũute Jeuwa naˈjĩne: “Eliˈs idx  yatte weˈsxtxis jxuka kastigayn jĩne ewmeeyũu paˈka”. Nawa ¿Samuelaˈs thẽy maakyũu txãw weˈwya kaathe Elíˈs? ¿Masũhuga?... Wala thẽy yũune. Samuel wala ũukhna ptaˈsxne. Nawa Jeuwa jxkaahnisaˈs nwẽseˈjne Elíˈs ptaˈsxne. Dxus weˈwni kxtey yũune: txajuˈ eˈs yãha, Elí vxiteˈ txãjx zxikweˈsxa uuneta.

Samuel kaajiyunisate wala piyaˈjnaˈw. Nawa wala uyne nasa ewmee yũun ũste, nawa Jeuwa weˈwnisaˈs txãa kxtey yũune. ¿Idxwa vxitmagk? ¿Samuel naˈwẽy Jeuwaˈs nwẽseˈjyã ãjaˈmaak? Kxtey yũute, Jeuwa wala wẽt yaakxina idx yakh, mamá vxiteˈ táta txaˈwẽy.

MEEN DXUS EÇTE LEYWE: