Ji'phna kxtee me'jwe

Me'jwe menu je'zte

Jeuwa Kaaji'yusa

nasa yuwe

¿Wẽdxmag isasaˈs jiyuya?

¿Wẽdxmag isasaˈs jiyuya?

¿Nawa kĩhkx isasa? Maii nasa wala jxthuhthesaˈs yayjxpaapẽyneta. Baaçxçxa idxa txaˈwẽy yaˈypaapẽyga:

  • ¿Dxusa kweˈsxtxis wẽdximak?

  • ¿Baaçx eenteçxa pçuumak puii walasa vxiteˈ pxthaa yũunisa?

  • ¿Uuniyãju kĩhçxaˈ vxitya ãjaˈmatx?

  • ¿Uusaweˈsxa kiˈkin ĩtxi yũuyã ãjaˈmatx?

  • ¿Kweˈsxa maˈw puutx weˈwwaˈj jiˈphkxthaˈw Dxus yakh?

  • ¿Maˈw wẽt fxiˈzewaˈjaˈs uyuukxthaˈw?

¿Idxa kĩhte pakwegig naa paapẽynisatxis? Mazkwẽ eçwa ũsyã paasna. Nawa isameena. Vxiteweˈsxwa ãçxhkhey paasuneta, nawa eˈsuyu kiˈkin phewuˈjuneta jiˈphu.

Nawa teeçx libro ũsna isasa paaswa. Jesucristo naˈjĩne puutx weˈw txãjx neyna: “Iidx kaapiyaˈjniˈ kaypubaˈjwaˈjsameˈ” (Juan 17:17). Ãçxh txãa isasa Dxus eçna. Kwekwete paapẽynisatxis ptaˈsxik.

 ¿Dxusa kweˈsxtxis wẽdximak?

¿KĨH YŨUÇXAKIK NAA PAAPẼYNISA KASEˈJE? Naa kiwete ewmeesaçxa utan ũste, txãwte fxiˈzen ũsthaˈw. Mazkwẽ Dxusaˈs selpiisa kaapiyan ũsyã pxthaa yũunisaˈs Dxusne txãw yũu sũhuneta.

DXUS EÇA KAAPIYAˈJAK. Dxusa baaçx yuhwa ewmeesaˈs vxituçmeene. Job 34:10 naˈjĩk: “¡Ewmeesaˈs vxitune sũhwameena Dxus isasa, saˈ Dxus çxhãçxhasa kĩhwa ewmeesa vxitya ãjaˈmeena!”. Dxusa wẽdxçxa, wala ewsa peesuna nasaweˈsxjĩi, txãa paˈka, Jesús kaapiyajak Dxus yakh puutx weˈwya: “Kweˈsx Tata cielute ũssaIdxaˈ bagaçxtewa jxtuhthe nes yuuneˈga. Iidx jxkaahwaˈj enaˈsçxáathaˈw ũythasuˈ,Naa kiwete idx maˈwẽneˈga jxthãasuˈ txãˈsnaçxáa kxtey tee yuu cielute naˈwẽy” (Mateo 6:9, 10). Isateyu Dxusa kweˈsxtxis wala wẽdxine, kweˈsxjĩi ĩtxi fxiˈzekhan wala ewsa dukhne kxtey yũukhan (Juan 3:16).

Thegwe Génesis 1:26-28; Santiago 1:13, vxiteˈ 1 Pedro 5:6, 7.

¿Baaçx eenteçxa pçuumak puii walasa vxiteˈ pxthaa yũunisa?

¿KĨH YŨUÇXAKIK NAA PAAPẼYNISA KASEˈJE? Txãa puii walasu nasa maakweçxa uun ũsyã. Txãa paˈkanetkhaˈw pxthaa yũu.

DXUS EÇA KAAPIYAˈJAK. Dxusa puii walasaˈs jxuka pebana. Khĩiçxa ewsaˈs jxũun paˈjana txãa jxkaahniyãju, nasa “kĩhwa puii walas piyameeyã”, txajuˈ “txãa espadaˈs mjĩiwaˈj yuphteˈjeyã kĩhwa vxituyã naa kiwete” (Isaías 2:4). Txaˈwẽy Dxusa pxthaa yũunisaˈs jxuka pebana. Dxus eça naˈjĩk nasaweˈsxtxis: “Saˈ cielujũ sus naˈjĩna weˈweni wẽseˈth:—Mtheg, ãçxhaˈ Dxusaˈ nasaa ksxavxyte ũsaˈ txãaweˈsx yakh fxiˈzeyaˈ, açaˈ nasaˈ Dxus jĩi yuutxna. Dxusaˈ txãaweˈsx Dxus yuuyaˈ txãaweˈsx yakh fxiˈzena. Txãasa Dxusaˈ kĩh nxusniijũwa jxuka nweˈwena, açaˈ peena yuˈ uuwaˈjmée yuuna. Ũˈnewaˈj enwa paˈjmeena, nxus weˈwewaˈjwa paˈjmeena, akasawa paˈjmeena, txãa paˈgatey nyafxíi fxiˈzeni enaˈ skhẽwku jĩˈk” (Revelación [Apocalipsis] 21:3, 4).

Thegwe Salmo 37:10, 11; 46:9, vxiteˈ Miqueas 4:1-4.

¿Uuniyãju kĩhçxaˈ vxitya ãjaˈmatx?

¿KĨH YŨUÇXAKIK NAA PAAPẼYNISA KASEˈJE? Txãa Dxus selpiisa kaapiyaˈjatx kakwe uuniyãju vxyaasamee kaseˈjn uˈjwek jĩtx. Maii nasa naˈjĩntxi weˈwe uusa kĩhmeewa vxitya ãjaˈyã ĩtxisatxis jiitx, meeçxa Dxusa ewmeesatxis pkxuune ipxkhe akhna pxthaa yũukhan.

DXUS EÇA KAAPIYAˈJAK. Uuyãçxa kĩhwa yũuyã ãjaˈmeeyã. Eclesiastés 9:5 naˈjĩk “uuniyãju txaawẽˈsxa kĩhwa yaakiçmeeneta”. Jiyuyawa ãjaˈmeeyã, kĩhwa yũuyã ãjaˈmeeyã, kĩhwa ĩtxisatxis puˈçxhya ãjaˈmeeyã (Salmo 146:3, 4).

Thegwe Génesis 3:19 vxiteˈ Eclesiastés 9:6, 10.

 ¿Uusaweˈsxa kiˈkin ĩtxi yũuyã ãjaˈmatx?

¿KĨH YŨUÇXAKIK NAA PAAPẼYNISA KASEˈJE? Jxukasaythaˈw wẽt ĩtxi fxiˈze wẽeje kweˈsx nasa wẽdxsa yakh. Txãajĩiçxathaˈw kiˈkin kweˈsx uusatxis uywẽeje.

DXUS EÇA KAAPIYAˈJAK. Mazkwẽ nasawa uusa ũsyã kiˈkin ĩtxi yũuyã. Jesus najĩne “Txãˈwẽ Dxus Nçxiˈk weˈweni pthũuseteˈ, uusaaweˈsxaˈ pedaniijũ kasehwaˈj en paˈjana” (Juan 5:28, 29). Nasaweˈsx naa kiwete uuseçxa naa kiwete zxiçxkwe yũun kaahte wẽt ũssuyã, txaˈwẽy nyaafxte Dxus maˈwne yahkxni jiˈphu txaˈwẽy (Lucas 23:43). Nasaweˈsx Dxusaˈsçxa selpiin ũssa baakaçxtewa ĩtxi fxiˈzeyã, baaçx yuhwa ãçaˈmee ũssuyã txaˈwẽy. Dxus eça naˈjĩk: “Kuˈle uˈjusa naa kiweˈs jiˈphuyã ãjaˈyã, saˈ ĩtxi fxiˈzeyã baakaçxtewa naa kiwete” (Salmo 37:29).

Thegwe Job 14:14, 15; Lucas 7:11-17, vxiteˈ Hechos 24:15.

¿Kweˈsxa maˈw puutx weˈwwaˈj jiˈphkxthaˈw Dxus yakh?

¿KĨH YŨUÇXAKIK NAA PAAPẼYNISA KASEˈJE? Jxuka Dxusaˈs selpiisa, Dxus yakh puutx weˈweneta. Maii nasa txãa puutx weˈwnisaˈs Dxusa wẽseˈjeçmeene sũhuneta.

DXUS EÇA KAAPIYAˈJAK. Jesús naˈjĩk Dxus yakh puutx weˈwçxa txãˈsjiiçxa peena weˈwna ũswaˈjmeena. Naˈjĩk: “Dxus yakh puutx weˈweççxaˈ, lxisasáa naˈwẽ txãˈsnaíiçxáa kuh us peenana ũswaˈjmeˈ” (Mateo 6:7). Dxusaˈs wẽseˈj jxthãasçxa txãa maˈwne wẽdxi, txaˈwẽy yũuwa jiˈphnetkhaˈw. Txãw yũu wẽeçxa kweˈsxa piyawa jiˈphnetkhaˈw txãa kxtey yũunisaˈs. Khĩiçxa txãw puutx weˈwwaˈjna. “Açaˈ txãˈwẽ yaakxsatxiˈ Dxusaˈ pasuˈk, naˈjĩk”, 1 Juan 5:14.

Thegwe Salmo 65:2; Juan 14:6, 14, vxiteˈ 1 Juan 3:22.

¿Maˈw wẽt fxiˈzewaˈjaˈs uyuukxthaˈw?

¿KĨH YŨUÇXAKIK NAA PAAPẼYNISA KASEˈJE? Maii nasa vxu yakh kĩhwa jiˈphuçxa wẽt fxiˈzen sũhuneta, txãasaneta kĩhwa wala jiˈphu wẽeje. Nawa txãa jiˈphçxawa kĩhwa wẽt fxiˈzeçmeeneta.

DXUS EÇA KAAPIYAˈJAK. Jesús ptaˈsxku maˈw wẽt fxiˈzewaˈjtewa, txãa naˈjĩne: “Wala yuh weçxa yujaˈ Dxusaˈs peejxçxa pakwesáa yakhaˈ” (Mateo 5:3). Wẽeçxan fxiˈze wẽeçxa jeˈz jwed piyawa ũsna: wala Dxus yuwes piyawaˈj jiˈphnetkhaˈw, saˈ Dxus wẽdxnisaˈs kxtey yũuwaˈjna. Txãa isasa Dxus eçte ũsna, txãas jiyute puˈçxhina txhitxhya kĩh jxthuhthesatewa. Txaˈwẽy Dxus eç puˈçxhine kweˈsxtxis thxithxya wẽt wẽeçxan fxiˈzewaˈjaˈs (Lucas 11:28).

Thegwe Proverbios 3:5, 6, 13-18, vxiteˈ 1 Timoteo 6:9, 10.

 Naa 6 paapẽynis Dxus eça paasku. ¿Peena jiyu wẽejega? Idxwa “txãˈwẽ yũusaˈ Dxus jxkaahna ũsnite uˈkaya ãjawaˈjsataˈ”, txãwte peena jiyu wẽejega. Idxa maˈwẽn yũu yaˈpaapẽynega, Dxusa kĩh yũuçxa ewmeesa vxiteˈ pxthaa yũunisaˈs kaskhẽwçxa ũski, saˈ kweˈsxtxis wẽdxçxa kĩh yũuçxa txãw yũu. Meeçxa idxa wejxkwe jiyu wẽejenega, maˈw yũuçxa yatteweˈsxa wejxkwe wẽt fxiˈzetxki. Dxus eça jxuka paasune naa paapẽynisatxis.

Nawa maii nasayu piyaya wẽdxiçmeeneta. Maii nasa Dxus eçaˈs wala thẽyna sũhuneta piyawaˈj. ¿Wẽdxmag puˈçxh wẽete Dxus eça piyaya?

Jeuwa Kaajiˈyusa puˈçxhiyã ¿Qué enseña realmente la Biblia? nmeehte. Txãa eç yakh kaapiyaˈjayã —nasa wala een jimeesa uˈpyã txaawẽˈsxjĩina—. Nmeehte idxa jxpaˈkaya ãjaˈnega Dxus eç yakh piyaya kĩhte uˈpsaçxawa vxu paˈkamee. Jeuwa kaajiyusaweˈsx kĩhte uˈpsatewa kaapiyaˈjya uˈjweyã. Mazkwẽ nasawa Dxus eç yakh piyan ũsyã, Jeuwa kaajiyusaweˈsx yakh jxuka piyan ũssa isasaˈs Dxus eçte uyneta.

Idxwa isasaˈs piyaya ãjaˈnega wala jxthuhthesaˈs. Isasa puˈçxhine nasa isxĩiniju kaaseˈjyã, txaˈwẽy puˈçxhne wẽt wẽeçxan fxiˈzewaˈjaˈs. Jesús naˈjĩne: “Ewsaˈs jiyuneˈkwe, açaˈ txãa ewsa ewmeesajũ nweˈwena jĩteˈ” (Juan 8:32).