Ji'phna kxtee me'jwe

Me'jwe menu je'zte

Kxtee nyaafxte me'jwe

Jeuwa Kaaji'yusa

nasa yuwe

Dxus jiˈpha ewsa tuutheˈjni

 PEˈLA 9

Yatte weˈsxyakh wãtwãt fxiˈzeya ãjaˈyã ¿maˈw?

Yatte weˈsxyakh wãtwãt fxiˈzeya ãjaˈyã ¿maˈw?

1. ¿Kĩh yũuçxa ptaamwa jiˈphtxkx?

Jeuwa wala ewsa tuutheˈjene kweˈsxjĩi. Dxus eç ptaˈsxik Dxusa iimeh wãtwãt fxiˈzesana, txãjxçxane wẽdxi nweˈsxweˈsxtxis txaˈwẽy wãtwãt fxiˈzekan (1 Timoteo 1:11). Jeuwane ptaamuwaˈjaˈs vxit. Ptaamute wala ewsana, txãwçxa neyweˈsx puˈçxhya ãjaˈyã kaapiyan ew uˈjukan zxikweˈsxtxis. Cristoyakh ihjaˈda uˈjusa Dxusaˈs nwẽseˈjsa kĩhte uˈphsaçxawa ptaamuçxayũu, nasa jxkaahnisaˈs nwẽseˈjwa jiˈphyã. Thegwe Dxus eçte Lucas 2:1, 4, 5.

Jeuwa wedxne bakaçxtewa nes ũskan ptaamsa wãt fxiˈzekan, Dxusa ptxuuthasuçmeene nmiˈweˈsx wẽdxi jiˈphyã nyuuthẽˈjaˈs, açaˈ ptaamuyãçxa kazx yũuwa jiˈphmeeyã vxiteyakh (Hebreos 13:4). Ptaamsaweˈsx txuuteniˈs Dxusa açene (Malaquías 2:16). Nawa nmiˈ maakyũu nyuuthẽˈj maakyũu kazx yũute, Dxusa txuuteniˈs kaaskhẽwjuna. Thegwe Dxus eçte Mateo 19:3-6, 9.

2. ¿Ptaamwçxa maˈw fxiˈzewa jiˈphtxkx?

Jeuwa vxitne piçthẽˈj vxiteˈ uˈyna kaaptaamuçxa jaˈday puˈçxhwa jiˈphyã (Mateo 19:4, 5). Nmi thẽgu jiˈphna txãjx nweˈsxaˈs puuçna Dxuste kaapiyan. Nmiˈyũu wala nyuuthẽˈjaˈs wẽdxna puˈçxhwa jiˈphna, jeˈzi wala zxiçxkwe weˈwe jiˈphyã. Jxuka ptaamsaweˈsxa ãhmeekwesanetkhaˈw txãjx thẽysaˈ jiˈphun ũsnetkhaˈw, nawa ewyũuçxa yũu wãtwãt fxiˈzenaˈw. Thegwe Dxus eçte Efesios 4:31, 32; 5:22-25, 33 vxiteˈ 1 Pedro 3:7.

 3. Ptaamsa thẽysa jiˈphçxa ¿txuuteyaa ãjaˈmatx?

Idxa thẽysa jiˈphunega ptaamuniyãju, açyuˈ jeˈzi wẽdxna phewjxa ãjaˈnekwe (1 Corintios 13:4, 5). Ptaamsaweˈsx thẽysa jiˈphun ũste Dxus eça kĩhwa txuutekajaçmee. Thegwe Dxus eçte 1 Corintios 7:10-13.

4. ¿Dxusa kĩhkx wẽdxi kweˈsx zxikweˈsxjĩi?

Jeuwa wẽdxine zxikweˈsx wãtwãt fxiˈzekahn. Piçthaˈjkxweˈsxtxis wala yuhkxpeˈjene. Jeuwa wẽdxine ew uˈjukhan maˈwneta idx neyweˈsx kaapiya (Colosenses 3:20). Jeuwa wẽdxine txãas selpiikahn txãjx zxikaˈs txaˈwẽy wãtwãt fxiˈzekhan. Thegwe Dxus eçte Mateo 19:13-15; 21:15, 16 vxiteˈ Efesios 6:1, 2.

5. ¿Maˈw yũuçxa neyweˈsx puˈçxhya ãjaˈtxkx wãt fxiˈzekahn?

Neyweˈsx wala mjĩi jiˈphnetkhaˈw luuçxjĩi ew jxpeeˈjya (1 Timoteo 5:8). Açaˈ iˈkweˈsx zxikweˈsx wãtwãt fxiˈzekahn, idxa kaapiyaˈja jiˈphnega Dxusaˈs jiyukahn txãwçxa Dxuste utxaaya ãjaˈna (Deuteronomio 6:4-7). Nawa idx khwẽˈy Dxusaˈs wẽdxi jiˈphnega, txãwçxa zxikweˈsxwa wẽdxna uˈjweyã Dxusaˈs. Nawa idxa kaapiyaˈjwa jiˈphnega Dxus eçte açaˈ txãwçxa ew uˈjuyã. Thegwe Dxus eçte Efesios 6:4 vxiteˈ 2 Timoteo 3:15.

Neyweˈsx wala wẽçxaneta zxikweˈsx wãtwãt yahkxte. Txaˈwẽy yukxpeje jiˈphuyã zxikweˈsx ewmeeyũute, txãwçxa ew uˈjuya piyayã (Proverbios 22:15). Nawa zxikaˈs ptxuukaajaçmee. Thegwe Dxus eçte Colosenses 3:21.

Jeuwa kaajiˈyusa wala eç kutxiˈjni jiˈphyã, Dxus eçte pakweˈwe jiyuçxayuˈ wãtwãt fxiˈzeya ãjaˈnekwe. Thegwe Dxus eçte Santiago 1:25.

 

PEENA PAKWE

Idx yatteweˈsx wẽt fxiˈzeya ãjaˈyã

Ptaamsaweˈsx wẽt fxiˈze wẽeçxa Dxusaˈs pakwewe

Jez papẽynisaˈs puˈçxhya ãjana idx ptaamuuyãt wẽt ũsya.

Idx yatteweˈsx wẽt fxiˈzeya ãjaˈyã

Thẽysaˈs phewuˈjni

Ptaamsa thẽysaˈs pdxiipu ãjateyu çxhãçxha wẽt ũsyã ãjayã.