Skip to content

Skip to secondary menu

Skip to table of contents

Resioning er a Jehovah

Palauan

Ungil Chais el Mla er a Dios!

 SUOBEL 2

Ngtechang a Dios?

Ngtechang a Dios?

1. Ngera uchul me ngkired el mengull er a Dios?

Ngike el mera el Dios a Ulemeob a rokui el tekoi. Ngdimlak a uchelel e kmal diak lebo er ngii a ulebengelel. (Psalm 90:2) Ngii a uchul a ungil chais el ngar er a Biblia. (1 Timothy 1:11) Ngii el milskid a klengar a uchul, me ngdi ngii el tang a kired el mengull er ngii.Monguiu er a Ocholt 4:11.

2. Ngua ngerang a blekerdelel a Dios?

Ngdirkak a chad el mla mesa Dios e le ngdiak a bedengel el rruul er a tech me a rasech, me ngkuk ngarbab er aike el ngar el blebelel el kiei er tia el chutem. (Johanes 1:18; Psalm 11:4) Engdi ngsebeched el mo medengei a blekerdelel a Dios el oeak a blebelel. El uai tiang, aike el bek el bedengel a rodech me a bung el ngar er ngii, a ochotii a bltkil a rengul me a llemesel a rengul. E a klungel tia el melidiul me a chutem a ochotii a klisichel.Monguiu er a Rom 1:20.

Ngsebeched el suub a lmuut el betok el kirel a Dios el oeak sel donguiu er a Biblia. El uai tiang, ngouchais er kid el kirel aike el soal me aike el chetil, me a omerellel el mo er a rechad, me aike el tekoi el loruul er a chelsel a kakerous el blekeradel.Monguiu er a Psalm 103:7-10.

3. A Dios ngngar er ngii a ngklel?

A Jesus a dilu el kmo: “Demmam el ngar a eanged: Bo le modanges a chedaol ngklem.” (Mateus 6:9) Alta e ngbetok a dial a Dios, engdi ngdi chimong a ngklel. Ngar er a bek el omelekoi, e ngkakerous a rolel a dolekoi er ngii. Ngar er a tekoi er a Belau, e kede melekoi er ngii el kmo “Jehovah.” Engdi a rebebil er a rechad a melekoi er ngii el “Yahweh.”Monguiu er a Exodus 3:14, 15, momes er a footnote.

A ngklel a Dios a bla lotebedii er a betok el Biblia e mla mtechir er a dui el Rubak me a lechub e ng Dios. Engdi sera lemeluches a Biblia, e a ngklel a Dios a luluusbech er ngii el bekord el 7,000 el  taem. A Jesus a uluuchais er a ngklel a Dios er sera lolisechakl er a rechad el kirel a Dios.Monguiu er a Hebru 2:12.

4. A Jehovah ngomekerreu er kid?

A Dios a uai ngika el betik a rengul el chedam el meruul a tekoi el di mo uchul a klungioled

Aika el betok el ringel el lechelebangel a rechad, ngolechotel a kmo a Jehovah a diak lomekerreu er kid? A rebebil er a rechad a melekoi el kmo a Dios a omekcharm er kid e le ngsoal el melasem er kid, engdi tiang a klsuul el tekoi.Monguiu er a Jakobus 1:13.

A Dios a mla msa chad a llemeltel el melilt aike el bo loruul. Me kid kede oba omereng el saul el kirel a ilmekled el melilt el mo mesiou er a Dios? (Josua 24:15) A rebetok a melilt el mo meruul a mekngit el mo er a rebebil a uchul me a rechad a chuarm. A Jehovah a mekngit a rengul sel lomes a chouaika el chelebirukel el omeruul.Monguiu er a Genesis 6:5, 6.

A Jehovah a Dios el kmal omekerreu er kid me ngsoal a bo ledeu a rengud er a klengar. Ngdi kmedung e ngmo choroid a ringel e okngemedeterir tirke el uchul a ringel. Me nguaisei, engdi ngngar er ngii a ungil el uchul e ngomechei a ringel me ngngar er ngii el tedeb el taem. Kede mo mesuub el kirel tiang el ngar er a 8 el Suobel.Monguiu er a 2 Petrus 2:9; 3:7, 13.

5. Ngmekerang e sebeched el lmuut el mo kmeed er a Dios?

A Jehovah a mengemedaol er kid el mo kmeed er ngii el oeak sel doluluuch el mo er ngii. Ngsemeriar er a derta me a derta er kid. (Psalm 65:2; 145:18) Ngdirrek el kongei el ousubes a kngtid. Ngungil el medengei sel dolasem el meruul a tekoi el odeuir a rengul, alta e ngmo diak el sebeched el meruul el uaisei a lebebil er a taem. Me alta e ngdiak demecherrungel, engdi ngsebechel mo er ngii a kmes el deleuill er kid me a Dios.Monguiu er a Psalm 103:12-14; Jakobus 4:8.

A Jehovah a milskid a klengar a uchul me ngkired el mo betik a rengud er ngii el kuk ngaruchei er a ngii di el chad. (Markus 12:30) Me sel molecholt er a bltkil a rengum el mo er a Dios el oeak sel mosuub a lmuut el betok el kirel e moruul a soal, e ke lmuut el mo kmeed er ngii.Monguiu er a 1 Timothy 2:4; 1 Johanes 5:3.