Skip to content

Skip to secondary menu

Skip to table of contents

Resioning er a Jehovah

Palauan

Ungil Chais el Mla er a Dios!

 SUOBEL 13

Ngerang a Mo Duubech el Mo er a Klechelid?

Ngerang a Mo Duubech el Mo er a Klechelid?

1. Ngdi ungil a rokui el klechelid?

Te ngar er ngii a remelemalt a rengrir el chad el ngar er a bek el klechelid. Ngdmeu a rengud el medengei el kmo a Dios a omes er chouaitirka el chad e omekerreu er tir. Engdi ngklengiterreng, e le rechad a mla ousbech aika el klechelid el meruul a mekngit el tekoi. (2 Korinth 4:3, 4; 11:13-15) Me a doltirakl a chais, e a bebil el klechelid a teloi er a tekoi er a terrorism, me a okodellir a rechad, me a mekemad, me a mekngit el omeruul el mo er a rengalek. Tiang a mera el uchul a kngtil a rengrir a ruumerang er a Dios!Monguiu er a Mateus 24:3-5, 11, 12.

A mera el klechelid a mengebkall er a Dios, engdi a klsuul el klechelid a diak lodeuir a rengul. Ngolisechakl a tekoi el diak el ngar er a Biblia, el uldimukl er a klsuul el osisechakl el kirel a Dios me a rulekoad. Nguaisei, engdi a Jehovah a soal a rechad a bo lodengelii a klemerang el kirel.Monguiu er a Olisechakl 9:5, 10; 1 Timothy 2:3-5.

2. Ngerang a mo duubech el mo er a klechelid?

Ngdmeu a rengud e le Dios a diak el mecheblad er aike el klechelid me a omerellir el meruul er tir el ua lebetik a rengrir er ngii, engdi mera er ngii e ngbai betik a rengrir er a beluulechad er a Satan. (Jakobus 4:4) A Tekingel a Dios a omekedong a rokui el klsuul el klechelid el kmo ng “Kloul Babilon.” (Ocholt 17:5, Beches el Testament) A Babilon a sel mats el lulemuchel a klsuul el klechelid er ngii er a uriul er a Ieleb er a taem er a Noah. Ngdi kmedung, e a Dios a mo okngemed aika el klechelid el mengeblad e omekcharm er a klechad.Monguiu er a Ocholt 17:1, 2, 16, 17; 18:8.

Nguaisei, engdi a Jehovah a dirkak lobes er a remelemalt a rengrir el tir a ngar er a chelsel a klsuul el klechelid el meliuekl er a beluulechad. Ngoltobed er chouaitirka el chad er a klsuul el klechelid el oeak a lolisechakl er tir er a klemerang.Monguiu er a Mika 4:2, 5.

 3. Ngera kirir el meruul a remelemalt a rengrir el chad?

A mera el klechelid a oldak er a rechad

A Jehovah a omekerreu er a rechad el sorir el mo medengelii a klemerang e dirrek el sorir el meruul a ungil. Me ngmengelechel er tir el mo tuobed er a klsuul el klechelid. Tirke el chad el betik a rengrir er a Dios a kongei el melodech er a klengar er tir me bo lodeuir a rengul.Monguiu er a Ocholt 18:4.

A remelemalt a rengrir el chad er a irechar a mle dmeu a rengrir el rongesii a ungil chais el mla er a rechapostol. E a Jehovah a ulsisecheklterir el kirel a klengar el ngar er ngii a deurreng er ngii, me a moktek er ngii, me a dirrek el omelatk el kirel a ngar mederir el klebesei. Te milecherei a kmal ungil el kerebai el kired er chelecha el taem, e le sera lerengesii a ungil chais e te ngiluu a Jehovah el mo kot er a chelsel a klengar er tir.Monguiu er a 1 Thesalonika 1:8, 9; 2:13.

A Jehovah a outkeu er tirke el tuobed er a klsuul el klechelid el me soiseb er a cheldellir a rechad el mengull er ngii. Me a lsekum e ke kongei er tia el okedong er a Jehovah, e ngmo er ngii a deleuill er kau me ngii, e mo chedal a telungalek el tir a mengull er ngii e kaubltikerreng, e dirrek el mo nguu a diak a ulebengelel el klengar.Monguiu er a Markus 10:29, 30; 2 Korinth 6:17, 18.

4. Ngmekerang a Dios e mo merkii a deurreng er a beluulechad?

A merekung el okngemedel a klsuul el klechelid a kmal ungil chais. Ngmo uchul a deurreng me a ulengull er a klechad. Ngmo diak el lluut a klsuul el klechelid el mengeblad e loleakl er a rechad. A rokui el chad a mo kiei el ta rengrir e mengull er a di ta el mera el Dios.Monguiu er a Ocholt 18:20, 21; 21:3, 4.