Skip to content

Skip to secondary menu

Skip to table of contents

Resioning er a Jehovah

Palauan

Ungil Chais el Mla er a Dios!

 SUOBEL 7

Ngerang a Rengedel a Dios?

Ngerang a Rengedel a Dios?

1. Ngerang a Rengedel a Dios?

Ngera uchul me a Jesus a kot el ungil el King? MARKUS 1:40-42.

A Rengedel a Dios a kabelment el ngar er a eanged. Ngmo mtechei aika el rokui el kabelment er a rechad e mo kutmeklii a soal a Dios el ngar er a eanged me a chutem. Tiang a mera el ungil chais e le ngdi kmedung e ngii el Renged a mo kutmeklii sel lousbech er ngii a rechad el ngii a ungil el kabelment. Ngmo oldak er a rokui el chad el kiei er tia el chutem.Monguiu er a Daniel 2:44; Mateus 6:9, 10; 24:14.

A renged a kirel el ngar er ngii a king er ngii. Me a Jehovah a mla tutkii a Ngelekel el Jesus Kristus el mo King er a Rengedel.Monguiu er a Ocholt 11:15.

2. Ngera uchul me a Jesus a kot el ungil el King?

A Ngelekel a Dios a kot el ungil el King e le ngbekokuii e kmal soal a llemalt. (Johanes 1:14) E dirrek el ngar er ngii a klisichel el olengeseu er a rechad e le ngngar er a eanged e mo mengedereder er tia el chutem. A uriul er a lemokiis e ngngilasech el mo er a eanged e dilengchokl er a kadekmel a chimal a Jehovah e milengiil el mo nguu a dereder. (Hebru 10:12, 13) Me a uriul e a Dios a milsang a klisiich el mo mengedereder.Monguiu er a Daniel 7:13, 14.

3. Te rua techang a mo mengedereder el obengkel a Jesus?

Ngar er ngii a cheldellir a rechad el okedongall el “remechedaol,” el tir a mo mengedereder el obengkel a Jesus el ngar er a eanged. (Daniel 7:27NW) Tirke el mle kot el mengilt el chedaol a tirke el blak a rengrir el apostol er a Jesus. Me a Jehovah a dirk melemolem el melilt er a reblak a rengrir el sechal me a redil er chelechang el tir a mo uldimukl er tirke el mechedaol. Tir a dirrek  el mo mekiis er a kodall el mo kiei er a eanged el uai a Jesus.Monguiu er a Johanes 14:1-3; 1 Korinth 15:42-44.

Te tela el chad a mo er a eanged? A Jesus a ulemekedong er tir el “kekerel delebechel.” (Lukas 12:32) A ildisir a mo 144,000, e tir a mo mengedereder er a beluulechad el obengkel a Jesus.Monguiu er a Ocholt 14:1.

4. Ngerang a dilubech er a lomuchel el mengedereder a Jesus?

A Rengedel a Dios a ulemuchel el mengedereder er a rak er a 1914. * A kot el tekoi el lurruul er ngii a Jesus er a bo el King a uldikii a Satan me a remekngit el anghel er ngii el mei er a chutem. Me a Satan a kmal mlo kesib a rengul me ngulemuchel a uldikel er tia el chutem. (Ocholt 12:7-10, 12) Seikid el taem el me er chelechang, e ngkmal mla mo betok a mondai er a klechad. A klaumekemad, bosech er a kall, bekoiueiuul el rakt me a desiu a uldimukl er a tekoi el “olechotel” a kmo ngdi kmedung e a Rengedel a Dios a mo sumechokl a rokui el tekoi.Monguiu er a Lukas 21:7, 10, 11, 31.

5. Ngera ngmengetmokl er ngii a Rengedel a Dios?

Ngoeak a ureor er a berkel a klumech er a beluulechad el rokir, e a Rengedel a Dios a oldak er a klou el seked er a rechad er a rokui el beluu. A rebetok el miliol el medemedemek a rengrir el chad a mla mo chederedall er a Jesus. A Rengedel a Dios a mo omekerreu er tir sel bo lolemall er tia el mekngit el blekeradel er a beluulechad. Me a rokui el chad el sorir el ngmai a klungiolir er a Rengedel a Dios a kirir el mesuub el mo chederedall er a Jesus.Monguiu er a Ocholt 7:9, 14, 16, 17.

Ngar er a chelsel a 1,000 el rak, e a Rengedel a Dios a mo kutmeklii sel dimla moktek er a Dios el kirel a klechad. Seikid el taem, e tia el chutem el rokir a mo paradis, e a Jesus a lmuut el olutii tia el Renged el mo er a Demal. (1 Korinth 15:24-26) Ngngar er ngii a chad el soam el mo ouchais er ngii el kirel a Rengedel a Dios?Monguiu er a Psalm 37:10, 11, 29.

 

^ par. 6 A lsoam a lmuut el omesodel a ulaoch er a Biblia el kirel a rak er a 1914, e momes er a 247-249 el llel a babier el Ngerang Mera el Lolisechakl a Biblia?