Skip to content

Skip to secondary menu

Skip to table of contents

Resioning er a Jehovah

Palauan

Ungil Chais el Mla er a Dios!

 SUOBEL 5

Ngerang a Moktek er a Dios el kirel Tia el Chutem?

Ngerang a Moktek er a Dios el kirel Tia el Chutem?

1. Ngera uchul me a Dios a milebii tia el chutem?

A Jehovah a milebii tia el chutem el mesterir a rechad me ngdelengcheklir. Sei a uchul me tirke el kot el obekel el Adam me a Eva a dimlak lobeob el mo kiei er a eanged e le Dios a kiltmeklii el kirir a rechanghel. (Job 38:4, 7) A Dios a bai milekedengcheklii a kot el chad er a paradis el okedongall el sers er a Eden. (Genesis 2:15-17) A Jehovah a milsang ngii me a rengelekel a techall el mo oldeu a rengrir er a diak a ulebengelel el klengar el ngar tia el chutem.Monguiu er a Psalm 37:29; 115:16.

Sera kot el uchul, e ngdi mle ta el sers er a Eden a paradis. Tirke el kot el obekel a mle kirir el omechell e mekekii tia el chutem. Cherengel a taem, e ngmle kirir el mengetmokl er tia el chutem el rokir e rullii el mo paradis. (Genesis 1:28) Me tia el chutem a kmal diak bo lemetemall e bai di melemolem el delengcheklir a rechad.Monguiu er a Psalm 104:5.

2. Ngera uchul me tia el chutem a diak el paradis er chelechang?

A Adam me a Eva a dimlak lolengesenges er a Jehovah a uchul me ngultebedeterir er a sers. Me seikid e ngmlo diak a paradis, e dirkak a chad el sebechel el rullii tia el chutem el lmuut el mo paradis. Seikid el taem el mei er chelechang, e tia el chutem a ngar cheungel a chederdellir a remekngit el chad.Monguiu er a Genesis 3:23, 24.

A Jehovah ngmla obes er sel dimla moktek er ngii el kirel a klechad? Ngkmal diak! Ngii a olab a bek el klisiich e blechoel el oltaut a uldesuel. (Isaia 45:18) Me ngulterekokl el mo olutii sel dimla blekerdelel a klechad.Monguiu er a Psalm 37:11, 34.

3. Ngmekerang e lmuut el mo er ngii a Paradis?

Tia el chutem a lmuut el mo Paradis er a temel a omengederederel a Jesus el King. Ngar sel mekemad el Armakedon, e a Jesus a mo mengetakl er a rechanghel er a Dios el mo olekngemed er tirke  el rokui el omtok er a Dios. E a uriul e ngmo mengelebus er a Satan el kirel a 1,000 el rak. A rechedal a Dios a mo suobel er tia el mekemad e le Jesus a mo omekrael e omekerreu er tir. Te mo oldeu a rengrir er a diak a ulebengelel el klengar el ngar tia el Paradis el chutem.Monguiu er a Ocholt 20:1-3; 21:3, 4.

4. Ngmo diak a ringel er oingerang?

A Dios ngmo olekngemed a mekngit el ngar tia el chutem er oingerang? A Jesus a milsaod er a “olechotel” sel taem el lekeda ulebongel. Aike el tekoi el duubech er chelechang a lolemolem e ngsebechel el mo uchul a okngemedel a klechad, e aika el tekoi a dirrek el ochotii el kmo kede kiei er a taem er a “ulebongel er a beluulchad.”Monguiu er a Mateus 24:3, 7-14, 21, 22.

Sel taem el longedereder a Jesus el ngar er a eanged el 1,000 el rak, e ngmo olekngemed a rokui el ringel er tia el chutem. (Isaia 9:6, 7; 11:9) Me a Jesus a mo King e dirrek el mo Ngarbab el Prist e mo ousubes a kngterir tirke el betik a rengrir er a Dios. Me a leuaisei, e ngokiu a Jesus, e a Dios a mo olekngemed a secher me a cheluodel me a kodall.Monguiu er a Isaia 25:8; 33:24.

5. Te rua techang a mo kiei er a Paradis?

Ngar er a Blil a Ongdibel, e ke mo medengelterir a rechad el betik a rengrir er a Dios e sorir el mesuub a rolel e ngsebechir el odeuir a rengul

A rechad el olengesenges er a Dios a mo kiei er a Paradis. (1 Johanes 2:17) A Jesus a uldureklterir a rultirakl er ngii el mo osiik er a remedemedemek a rengrir el chad e mo olisechakl er tir er a rolel e te nguu a kengei er a Dios. Me chelechang, e a Jehovah a mengetmokl er a rebetok el miliol el chad el kirel a klengar el ngar er a Paradis er tia el chutem. (Sefania 2:3) Ngar er a Blil a Ongdibel er a Resioning er a Jehovah, e a rechad a mesuub el mo ungil el bechiil el sechal me a ungil el bechiil el redil e dirrek el mo ungil el chedam me a chedil. A rengalek me a redemerir me a rederrir a dmak el mengull er a Dios e mesuub er a rolel e ngsebechir el ngmai a klungiolir er a ungil chais.Monguiu er a Mika 4:1-4.

 

MOSUUB A LMUUT EL BETOK

Ngerang Mera el Lolisechakl a Biblia?

Ngera Telbilel a Dios el kirel a Beluulechad?