Skip to content

Skip to secondary menu

Skip to table of contents

Resioning er a Jehovah

Palauan

Nger er a 10 el Ker el Kerrir a Rengeasek

 6 EL KER

Ngmekera e Mo Sebechek el Oltngakl a Orimel er a Resechelik?

Ngmekera e Mo Sebechek el Oltngakl a Orimel er a Resechelik?

A UCHUL ME NGKLOU A ULTUTELEL

Sel bo lulterekokl a rengum me a uldesuem e ngmo sebechem el di kau el mtebechelii a klengar er kau, me ngdiak mkengei er a rebebil me bo lomekrael er a klengar er kau.

KE MO MEKERANG?

Ka molatk er tiang: A reteru el ngalek er a skuul a merael el bedul a Brian, me ngkmal mla mo ouedikel a rengul. Ngmla mo eru el taem er chelecha el sandei el lolasem lorrimel er ngii el mo melamech a dekool. Me chelechang e tiang a mocha ongedei el taem el loruul el uaisei.

A ta er tirka el buik a kmo:

“Ngdi kau el tang? Hall e kuchotii a sechelim.”

Ngmesaod er a tekoi el “sechelim,” e kora meruul a medal el bedulngii e mocha otungii a chimal er a bokket er ngii, e odersii a klalo el mo er a Brian.

A Brian a mesa dekool el loldars er ngii ngika el buik, e mengal mo ouedikel a rengul.

Me a Brian a dmu el kmo: “Ak mla subedau el kmo ngdiak . . .”

E ngike el ta er a buik a kmo: “Ke mera el bedektall!”

Me a Brian a mlo mesisiich a rengul e kmo: “Ngdiak bedektall!”

Me ngii el buik a mlo mengaichiklang er a Brian e mekekokil el dmu el kmo: “Di mnguu.”

Me ngike el buik el oba dekool a mo er medal a Brian e mengelulau er ngii el kmo: “Ngkmal diak ki bo mouchais. Ngdiak a chad el mo medengei.”

Oleko ke mle Brian, e ke mo mekerang?

 KA MOMDASU!

Tirka el buik, te mle ungil el medengelii a tekoi el loruul er ngii? Te mera el mlo ungil el melilt a tekoi el bo loruul? Nglocha diak. Ngbai sebeched el mesang el kmo te di meruul a tekoi el rebebil a mla mengesuseu er tir el mo meruul. Me ngsorir el melemolem el nguu a kengei er a rechad me te kongei er tir me te omekrael er tir.

Me oleko ke mlo chelebangel er a osisiu el blekeradel, e ngmekerang e mo sebechem el ngiltii a ngodech el rael e dirrek el mo sebechem el oltngakl a orimel?

  1. MOLEBEDEBEK

    A Biblia a kmo: “A medengei a tekoi el chad a mo mesa tellemall a le mei e oibngii er ngii, e ngdi diak lomdasu el chad a di mong, e a uriul e ng ouuchel er a rengul.” ​—Osisechakl 22:3.

    Ngsebeched el di mereched el mtebengii a chetituokel el tekoi. El ua tiang, oleko ke merael e mesterir a rekldibel el ngalek er a skuul el melamech a dekool. E ngsebechem el melatk er a mondai el sebechel el mo duubech e kutmeklau el kirel.

  2. MOMDASU

    A Biblia a kmo: “Mkerekikl ma ukltkel a rengmiu di le bliochel.”​—1 Petrus 3:16.

    Di lekau loker el kmo, ‘Ngmo uangera uldesuek oleko ak melemolem el teloi er tia el seked?’ Ngmera el tekoi, nglocha sebechem el nguu a kengei er tirka el chad el telkib el taem. Engdi ngmo uangera uldesuem er a uriul? Ke mera el kongei el tomellii a chisem, e le ngdi soam el mereng a rengrir a rengalek el mdak el skuul?​—Exodus 23:2.

  3. MOLILT

    A Biblia a kmo: “A ungil a uldesuel chad a kerekikl.”​—Osisechakl 14:16.

    A ngii di el omelilt el moruul, me kau a di mo kirem el chelebangel er a telemellel a omelilt el mrirellii. A Biblia a ouchais el kirir a rechad el ua Josef me a Job me a Jesus el tir a riruul a ungil el omelilt. Ngdirrek el ouchais el kirel a Kain me a Esau me a Judas el tir a mle mekngit el melilt a tekoi el lurruul. Me kau, ke mo mekerang?

A Biblia a oterekeklii el kmo ngkired el meruul a tekoi el ultuil er a klaumerang er kid. (Psalm 37:3) Me a lsekum ke mla mtebengii a mo telemellel a tekoi e dirrek el mla oterekeklii a rengum, e ngmo dmeu a rengum e le ngmo beot er kau el smodau er a resechelim el ngii sebechel el mo uchul a omeksullem.

Lako bekikl, e ngdiak el belkul a kmo ngkirel el mo kemanget a omesodem el mo er a resechelim el lorrimel er kau. A di telkib el omesodem me a mesisiich el nger er kau el kmo NGDIAK, a ungiang. Me a lechub e ngsoam lomeketakl er a tekingem e ngsebechem el dmu el kmo:

  • “Ngchetik!”

  • “Ngak a diak chad er a ilechang!”

  • “Lak muaisei, e kungil medengelkak!”

A kot el ungil rolel a sel bo lulterekokl el mesisiich a nger er kid. Obo muaisei e ngmo mechas a rengum er tir sel di lemereched el mo cheroid er kau!

 CHELEBANGEL A OMELENGUUL

Me sel mkengei el morimel er a resechelim e ke mo ua robot el tir a omtebechel er kau

Ke mo mekerang sel lolenguul er kau a rechad? Ke mo mekerang sel ledu el kmo, “Ngerang, ke medakt?” Momtab er tia el kmal beot el rolel a orimel. Ngmekera omonger? Ngar er ngii a eru el rolel.

  • Ngsebechem el kongei er a omelenguul. (“Nguaisei, ak mera el medakt!” E smodii a uchul me ke medakt.)

  • Ngsebechem lotngeklii a orimel. E smodii a uchul me ngdiak mkengei er tir, e meltii a orimel el mo bedul tir. (“Ak ulemdasu el kmo, ke medengelii a kngtil a omelamech el dekool!”)

Engdi a lsekum e te di melemolem el melenguul er kau, e ngbai ungil a omorael! Lak mobes, a omolemolem el kiei e nglmuut el mo mesisiich a orimel. E a omorael, e ke meketeklii el kmo ngdiak mkengei el mechititerir me lolodech er a ungil blekerdelem.

Ngmera el tekoi, ngdiak el sebechem el chemiis er a orimel. Engdi ngsebechem el melilt a tekoi el moruul, e smodau, e dirrek el di kau el mtebechelii a uldesuem. E le mera er ngii, a omelilt a kmal di mo ultuil er kau!​—Josua 24:15.