Skip to content

Skip to secondary menu

Skip to table of contents

Resioning er a Jehovah

Palauan

Nger er a 10 el Ker el Kerrir a Rengeasek

 9 EL KER

Ngkirek el Oumerang el Kmo Kede Mla er a Mongkii el Mei?

Ngkirek el Oumerang el Kmo Kede Mla er a Mongkii el Mei?

A UCHUL ME NGKLOU A ULTUTELEL

A lsekum a uldasu el kmo kede mla er a mongkii el mei a klemerang, e ngmo diak a mera el moktek er a klengar. Engdi a lsekum kede oumerang el kmo ngmera el ngar er ngii a ulemeob, e ngsebeched el metik a nger er a ker el kirel a klengar me a ngar er medad el taem.

KE MO MEKERANG?

Ka molatk er tiang. A Alex a kmal rrau a rengul, e le ngmle blechoel el oumerang er a Dios me a blebelel. Engdi chelecha el sils, e a sensei er ngii er a biology a kmal mle mesisiich a tekingel el mesaod el kmo ngkmal klemerang a uldasu el kmo kede mla er a mongkii el mei, e tiang a obeketakl el okiu a omerriter er a tekoi er a science. Me a Alex a kmal diak el soal a rechad a bo lomdasu el kmo ngkebelung me ngdi ngii el melatk el kmo, ‘A lsekum a re scientist a mla tirterii el kmo kede mera el mla er a mongkii el mei, e ngera llemeltek el mo mengetiit er tir?’

Oleko ke mle Alex, e ke mo kongei e le ngellechukl er a textbook el kmo kede mla er a mongkii el mei?

KA MOMDASU!

A rechad el kaititekangel a blechoel el mereched el mesaod er a klaumerang er tir, e a mera er ngii te diak lodengelii a uchul me te oumerang er ngii.

  • A rebebil a oumerang er a ulemeob, e le tir el mlosisechakl er ngii er a chelsel a ikelesia er tir.

  • E a rebebil a oumerang el kmo kede mla er a mongkii el mei, e le te silubii er a skuul.

 ELOLEM EL KER EL BO DOSAOD

A Biblia a kmo: “A bek el blai a ngar ngii a chad el meruul, e ngdi Dios a ngii a meruul a rokui el tekoi.” (Hebru 3:4) Tiang mera el tekoi?

A uldasu el kmo ngdimlak a Ulemeob a kmal klebelung el tekoi el di ua sel domdasu el kmo, a blai a di mle ngii el mo dechor el dimlak a omekedechor er ngii

ULDESUIR A RECHAD: A rechad omdasu el kmo, a rokui el tekoi el ngar er a melidiul me a chutem a di mle ngii el duubech el ulekiu a kmung ngerang el ulebuu.

1. Ngtechang me a lechub e ngerang a mlo uchul e ngulebuu?

2. Ngerang a melemalt el tekoi? A rokui el tekoi, ngdi mle ngii el duubech me a lechub e ngar ngii a ulemeob?

ULDESUIR A RECHAD: A rechad a mlo er ngii el okiu a charm.

3. A lsekum a rechad a mlo er ngii el okiu a mongkii, e ngera uchul me ngkmal klou a klekakerous er a llemesir a rechad me a mongkii?

4. Ngera uchul me ngmo lmuut er aike el kmal mekekerei el ngar el bleob a kmal mengasireng a blebelel?

ULDESUIR A RECHAD: Ngmla obeketakl el kmo a rechad a mera el mla er a mongkii el mei.

5. A chad el oumerang er tia el tekoi, ngmera el mla tirterii el kmo ngklemerang?

6. Ngtela ildisir a rechad el oumerang el kmo kede mla er a mongkii el mei, e le tir el rirenges el kmo a rokui el mellomes a rengrir el chad a oumerang er tia el tekoi?

“Oleko ke merael er a chelsel a chereomel el mo metik er a kmal klebokel el blai, e ngmo uangera uldesuem, ke melekoi el kmo, ‘Tia mera el klebokel! Aika el kerrekar a locha rirebet el kmal di mlo er aike el bek el urebetellel me ngmeteketek tia el blai.’ Ngkmal diak el sebechel uaisei, tiang a diak el sebechel el tekoi. Me ngera uchul me kede oumerang el kmo, a rokui el tekoi el ngar er a melidiul me a chutem a di mle ngii el duubech?”​—Julia.

“Ka molatk er tiang. Oleko chad a ouchais er kau el kmo ngar er ngii a ulebuu er a chelsel a basio el meruul a babier, me a ink er a babier a di mlo bechesechusem er a kboub me a tenzio, e tia mlo uchul e ngmlo sebechel el meluches a dictionary. Ke mo oumerang er tia el tekoi?”​—Gwen.

 NGERA UCHUL ME KEDE OUMERANG EL KMO NGAR ER NGII A DIOS?

A Biblia a melisiich er kid el mo ‘merriter a rokui el tekoi.’ (1 Thesalonika 5:21) El belkul a kmo, a klaumerang er kid er a Dios a diak di lultuil er a

  • DI ULDESUED (Ak kuk di omdasu el kmo, ngar er ngii a lmuut el ngarbab el klisiich)

  • KLAUMERANG EL LOLISIICH A REBEBIL (Ngak a kiei er a beluu el mesisiich a tekoi er a klechelid er ngii)

  • ORIMEL (A klaumerang er ngak a mla er a rechad er a blik el mei me ngkirek el di oltirakl er ngii)

Ngbai kirel el ngar er ngii a ungil el uchul a klaumerang er kau.

“Sel kngar er a classroom e kurrenges er a sensei el mesaod er a rolel a loureor a bedengel a chad, e ngkmal mo ulterekokl a renguk el kmo ngmera el ngar ngii a Dios. E le bek el meklou el mo lmuut er a mekekerei el klekedellel a bedenged a ngar er ngii a urerel el rokui, e diak dolechesuar a rolel a loureor. Me ngbelkul a kmo, ngkmal diak a chad el sebechel el mo cherrungel el mtebengii a rolel a loureor!”​—Teresa.

“Sel kisa kmal metongakl el blai, me a klou el diall, me a lechub a mlai, e ak mo melatk el kmo, ‘Ngtecha mirruul er tiang?’ A omerellel a mlai a ousbech er a remellomes a rengrir el chad el meruul er ngii, el ua tiang, ngkmal betok a mekekerei el klekedall el kirel el mo ungil el oureor el rullii tia el cherrungel el mlai el mo merael. Me a lsekum a mlai a mla er ngii a chad el meruul er ngii e ngbelkul a kmo kid a rechad a mla er ngii a ulemeob er kid.”​—Richard.

“A cherengel a taem el kusuub a tekoi er a science, e ngrullak el mo diak kuumerang el kmo kede mla er a mongkii el mei. . . . Ak bai mo omdasu el kmo, ngmeringel er kid el mo oumera el kmo kede mla er a mongkii el mei, e bai kmal beot el bo doumerang el kmo ngar er ngii a Ulemeob.”​—Anthony.

TEKOI EL SEBECHEM EL MELATK

Cherengel aika el betok el rak el omerriter, e ngkirir a re scientist el mla mo ta uldesuir el kirel a uldasu el kmo kede mla er a mongkii el mei. Me a lsekum e ngdiak el sebechel el mo tang a uldesuir el kirel tia el tekoi, e kid a omes er tir el kmo te kmal meduch er a urerir, e ngmo duubech a ker el kmo, kede cheleuid a lsekum e ngmo rrau a rengud el kirel a klaumerang el lolisiich er ngii?