Skip to content

Skip to secondary menu

Skip to table of contents

Resioning er a Jehovah

Palauan

Nger er a 10 el Ker el Kerrir a Rengeasek

 8 EL KER

Ngera el Tekoi a Kirek el Mo Medengei el Kirel a Chad el Lolterebek?

Ngera el Tekoi a Kirek el Mo Medengei el Kirel a Chad el Lolterebek?

A UCHUL ME NGKLOU A ULTUTELEL

Bek el rak, e a rebetok el miliol a moterebek me a lechub e te morimel el mo bad lobengkel a chad, e ileakl a rengeasek a kmal chuarm er tia el tekoi.

KE MO MEKERANG?

A Annette a di mlo medengei el kmo ngera dubechang er sel taem el chad a ngiluu el tilechii er a chutem. Ngdmu el kmo: “Ak mlo er a tkurrebab el klisichek el oldubech, e mesebek er ngii, e melasem el oldiu, e melik e mengertall er ngii. Engdi sera bo kulechesuar er a oles el ruskak, engdi mlo diak el sebechek el mekerang.”

Ke mo mekerang oleko ke mo chelebangel er tia el tekoi?

KA MOMDASU!

Alta e ke ungil el kltmokl e kmal kerekikl sel morael a leklebesei, engdi a mekngit el tekoi a di sebechel el duubech er a ngii di el taem. A Biblia a kmo, “A re bekerurt a diak di le blechoel el mo kot er a klaidesachel, ma re bekeu a diak di le blechoel el mo mesisiich er a mekemad. A re mellomes a diak di le blechoel el ngar ngii a kelir, ma re beketechiir el chad a diak di le blechoel el mo merau, ma re dachelbai a diak di le blechoel el ngosechekl el mor a ngarbab el deruchall. A taem ma techall a mor a re bek el chad.”​—Olisechakl 9:11.

A remekekerei el dil el ua Annette a modechelakl er a rengodech el chad. E a rebebil a modechelakl er a rechad el lodengelterir me a lechub e te chedal a telungalek er tir. A Natalie a di mle 10 a rekil e a ngeasek el buik el kiei el kmeed er a blil a ulterebekii. Me ngdilu el kmo: “Ak kmal mlo imis el medakt e merur me ngdimlak kuuchais er a ngii di el chad.”

 NGDIAK EL KNGTIM

Ngkmal dirk mekngit a uldesuel a Annette el kirel a tekoi el dilubech el mo er ngii. Ngdmu el kmo: “Ngbek el kesus el di kulatk er tia el tekoi. Ak melatk el kmo, nglocha mle kirek el lmuut el smisichak el okeuad er ngii. Engdi sera lreskak, e ak kmal mlo imis el medakt me ngdi mlo diak el sebechek el mekerang. Engdi ak di omdasu el kmo, nglocha mle kirek el lmuut el okeuad er ngii.”

A Natalie a dirrek el dirk chuarm a uldesuel, e le ngdmu el kmo: “Ngdimlak el kirek el omdasu el kmo, ngdiak a ngera el sebechel el duubech. A rechad er a blik a ulemeklatk er ngak me a sister er ngak el kmo, sel ki moilil er rikl e ngkiram el di dmak el terung, engdi ngdimlak kurrenges. Ak melatk el kmo, ngomerellek a uchul me ngmlo sebechel ngika el tonari er ngak el tomellak. Me a tekoi el dilubech a kmal mlo klou a telemellel er a telungalek er ngak, me a kumdasu el kmo ngak a uchul tia el klou el klengiterreng. E tiaikid sel kmal omekringel er a uldesuek.”

A lsekum ke di ua uldesuel a Annette me a lechub a Natalie, e lak mobes el kmo, ngike el mloterebek a dimlak lekengei er tia el tekoi. A rebebil a rullii tia el tekoi el mo ua le kebekakl, el mesaod el kmo a rengalek el sechal a di uaisei a omerellir me a lechub e te kmo ngike el mloterebek a mle soal tia el tekoi. Engdi ngkmal diak a chad el kirel el moterebek. Me a lsekum ke mloterebek e lak momdasu el kmo ngkngtim!

Nguaisei, ngbeot el tekoi sel sekum a chad a dmu er kid el kmo “ngdiak el kngtim” engdi ngmeringel el bo doumerang er tia el tekoi. A rebebil a diak louchais a uldesuir el kirel a tekoi el dilubech me ngchuarm a uldesuir, e dirrek el mo blechoel el mekngit a uldesuir el di kirir. Engdi a ker a kmo ngmo klungiolel techang sel di mluk, ngkau me a lechub e ngike el millemall er kau? Molatk el kmo, ngmo uchul a klungiolem sel mouchais el kirel a tekoi el dilubech.

MOUCHAIS ER A TEKOI EL DILUBECH

A Biblia a mesaod el kmo, sera lesal mlo chuarm a uldesuel a Job e ngdilu el kmo: “Ak di mo dmu ikel mekngit er a renguk, ma ikel metacherbesul er a uldesuek.” (Job 10:1) Ngdirrek el sebechel el mo uchul a klungiolem sel moruul el uaisei. Mongedecheduch er a chad el moumerang el kmo ngsebechel el ngosukau el kirel a tekoi el dilubech, e dirrek el ngosukau el lmuut el smisichii a uldesuem me a rengum.

A lsekum a ringelel a uldesuem a kmal meringel er kau, e kele lungil el molengit a ngeso e mouchais er a chad el kirel.

A Annette a kmal oumerang er tia el tekoi. Ngdmu el kmo: “Ak uluuchais er ngike el kmal sechelik me ngurremelak el mo mengedecheduch er a remechuodel el Kristiano er a ongdibel er ngak. Me ngkmal ungil a renguk e le ak kilengei el mong. Te milengoit a taem el dengchokl e omeklatk er ngak er a tekoi el ksal uluusbech er ngii. Te dilu el kmo, a tekoi el dilubech a kmal diak a ta el lekngtik.”

A Natalie a uluuchais er a rechad er a blil el kirel a tekoi el dilubech. Me ngdmu el kmo: “Te kmal ngilsukak e millisiich er ngak el mo sebechek el mesaod er ngii el tekoi, e tiang a kmal ngilsukak me ngmlo diak el sal mekngit a renguk e lemekngit a uldesuek el kirel.”

A Natalie a dirrek el miltik a ongelaod el okiu a nglunguuch me ngdilu el kmo, “Sel kululuuch el mo er a Dios e ngkmal ngosukak, el ileakl aike el taem el kmal mo meringel er ngak el mengedecheduch er a chad el ouchais a uldesuek. Sel kululuuch e ngsebechek el di dmu rokui el tekoi el ngar er a renguk, me ngkmal rullak el mo budech a renguk e chelellakl a uldesuek.”

Kau me ngdirrek el sebechem el mo medengei el kmo ngar er ngii a “belsechel omekungil.” (Olisechakl 3:3) Molisiich er a uldesuem me a rengum e bo mungil mechiuaiu. E a ngaruchei er a rokui el tekoi, e bo multuil er a Jehovah el ngii a Dios er a rokui el ongelaod.​—2 Korinth 1:3, 4.

 A LSEKUM E NGMLA MO SEBECHEL EL MO ER NGII A SECHELIM EL SECHAL

A lsekum ke ngalek el redil el morimel el mo meruul a mekngit, e ngkmal sebechem el dmu el kmo, “Lak muaisei!” me a lechub e ke dmu el kmo, “Lak morutech er ngak!” Lako medakt e le kau el bekikl a bo lechetil el obengkem. A lsekum e ngchoitau e ngbelkul a kmo, ngdiak lerredemelel a melemolem el obengkem! Kau a rredemelel a mo obengkel a chad el ochotii a omengull el kirel a omellach el moltirakl, e dirrek el kerekikl el omekerreu er a bedengem.

KER EL KIREL A SEXUAL HARASSMENT

“Ngar er a skuul, e a rengalek el sechal a oltamet er a okul a bra er ngak e melekoi a mekngit el tekoi, el ua ledu el kmo ngkmal mo ungil a renguk sel bok bad el obengterir.”​—Coretta.

Omomdasu, e tirka el buik te

  1. Omekako er ngii?

  2. Olengamech er ngii?

  3. Sexually harass er ngii?

“Ngar er a chelsel a bus, e a ta el buik a omuchel el melekoi a mekngit el tekoi el bedul ngak e me orreked er ngak. Me ak cholebedii a chimal e dmu er ngii el kmo bom cheroid. Me ngellomel er ngak el di uak kora kebelung el chad.”​—Candice.

Ngera uldesuem, omomdasu e ngika el buik ngmekera er a Candice?

  1. Omekako er ngii?

  2. Olengamech er ngii?

  3. Sexually harass er ngii?

“Tia el mlo merek el rak, e a ta el buik a di melekoi el kmo ngsoal ngak e soal el mo obengkek, alta e ak mle blechoel el dmu er ngii el kmo ngchetik. A lebebil er a taem e ngmelaiu er a chimak, me ak dmu er ngii el kmo lak muaisei, engdi ngdi melemolem el meruul er ngii. E a ta el taem, e ak terrob el melechet a oecherek e ngmei el cholebedii a idekel a btik.”​—Bethany.

Ngera uldesuem, ngika el buik:

  1. Omekako er ngii?

  2. Olengamech er ngii?

  3. Sexually harass er ngii?

A melemalt el nger er aika el edei el ker a 3.

Ngera klekakerous er a sexual harassment me a olengamech me a lechub a omekako?

A sexual harassment a omeruul el di oltirakl er a uldesuel a di ta el chad. Me ngii el chad a di melemolem er a soal a rengul alta ngmla moterekokl el kmo ngike el ta er a chad a chetil.

A sexual harassment a oberaod el tekoi el sebechel el mo uchul e ngmoterebek a chad.