Skip to content

Skip to secondary menu

Skip to table of contents

Resioning er a Jehovah

Palauan

Nger er a 10 el Ker el Kerrir a Rengeasek

 1 EL KER

Ngak ak Techang?

Ngak ak Techang?

A UCHUL ME NGKLOU A ULTUTELEL

Sel bo mungil el medengelkau me aike el tekoi el moumerang, e ngosukau el mo ungil el melilt a tekoi el bo moruul sel bo mchelebangel a orimel.

KE MO MEKERANG?

Ka molatk er tiang: A Karen el kmal dirk ngeasek a ngar er a party el dirkak bo lengelakl er a 10 el bung, e ngrongesii a ngerel a chad el lodengelii.

“Ngera me ke di dechor er tilechang?”

A Karen a ulebult e mesa sechelil er a Jessica el beldoel a teblo el butiliang. Ngmle medengei el kmo aikang a rrom. A Jessica a uldersii a chimo er ngii el mo er a Karen e dmu el kmo: “Kau a klunga el dil me ngdirrek el mla mo sebechem el milil, adang ngmekerang?”

A Karen a mle soal el kotouar, engdi ngika el Jessica a sechelil me ngdimlak el soal a bo lomdasu el kmo, ngii el Karen a metitur el milil. Me a lmuut el tang, a Jessica a ta er a kot el kedung el ngalek, me a lsekum e ngmelim, e ngbelkul a kmo ngdiak el sal mekngit a tekoi el loruul er ngii. Tiaikid a rirellii a Karen el mo omdasu el kmo, ‘Tiang a di ilumel, ngdiak leua dolai a mekngit el kar.’

Omko ke mlo chelebangel er tia el osisiu el blekeradel el ua Karen, e ke mo mekerang?

KA MOMDASU!

Ngkirem el omuchel el mo ungil el medengelkau a lsekum e ngsoam el mo ungil el melilt a tekoi el bo moruul er a chelsel chouatia el blekeradel. A belkul a tekoi el kmo, mo ungil el medengelkau, a melekoi el kirel aike el tekoi el moumerang me aike el meklou a ultutelel el tekoi. Ngokiu tia el klemedengei, e ngmo sebechem el omekrael er a klengar er kau me ngdiak mkengei er a rebebil me lomekrael er kau.​—1 Korinth 9:26, 27.

Ngmekerang e mo ultebechel a rengum? Ngkmal lungil sel momuchel el onger aika el ker el beldukl er iou.

 1 NGERANG A KLISICHEK?

Ngmo ulterekokl a rengum sel bo modengei aike el sebechem el remuul me ngsmisichii a rengum.

KEREBAI ER A BIBLIA: A apostol el Paulus a milluches el kmo: “A lta e ak ngesonges er omengedecheduch, e ngdi diak a kngesonges er ngii er a ikel kudengei.” (2 Korinth 11:6) Me ngokiu a klemedengei er ngii er a Bades, e a Paulus a mle sebechel el melemolem el mesisiich el mo lmuut er aike el taem el rechad a millasem er ngii. Ngdimlak el bechei a mekngit el tekingir me longitechut er a klaumerang er ngii.​—2 Korinth 10:10; 11:5.

MORRITER ER KAU: Mluches aike el tekoi er iou el sebechem el remuul.

Chelechang, e mosaod er sel kmal ungil el blekerdelem. (El ua tiang, ke bekokuii? ke bekururau? ngsebeched el ultuil er kau? ke olab a taem?)

2 NGERANG A CHELITECHETUK?

Alta bombatel a kmal mesisiich el klekedall, engdi a lsekum a bebil el omechelel a chemert, e ngsebechel el meloched. Me a blekerdelem me aike el tekoi el moumerang a sebechel el mo mekngit, a lsekum e ke mechei a chelitechetum me ngomtebechel er a klengar er kau.

KEREBAI ER A BIBLIA: A Paulus a mle medengei a chelitechetul me ngmilluches el kmo: “Ngak a dmeu a renguk er a llechul a Dios er sel kmal chelsel a renguk. E ngdi kmetik er a kuk tar a blekeradel el ngar ngak el oureor, el ngii el blekeradel a omtok er sel llach el ungil er a renguk. Me ng rullak mak kelebus er a llach er a klengit.”​—Rom 7:22, 23.

MORRITER ER KAU: Ngera el chelitechetum a kirem el melasem el mo omtebechel?

 3 NGERANG A TURREKONG ER NGAK?

Kau, ke ngmasech er a taxi e dmu er a chad el omekall me ngdi omekall el olekngemed a cheluchul el di diak a uchul a omerollel? Tiang a kmal klebelung el tekoi e dirrek el kmal mo meringel a cheral a taxi!

Ngera ke suubii er tiang? A turrekong a omekrael er a klengar er kau me ngulterekokl a omerollem. E le ngar er ngii a obo er ngii e mla kutmeklau el mong.

KEREBAI ER A BIBLIA: A Paulus a milluches el kmo: “Ngak a diak krurt el ua lak lulterekokl a kbedul ngii.” (1 Korinth 9:26, BT) Me a Paulus a riruul a turrekong er ngii e uleltaut er a bai lebechei a tekoi me ngdi ngii el duubech.​—Filipi 3:12-14.

MORRITER ER KAU: Mluches a edei el turrekong el soam el mo oltaut er chelecha el merael mei el rak.

4 NGERANG A KLAUMERANG ER NGAK?

Sel bo lulterekokl a rengum el mo oltirakl aike el tekoi el moumerang, e ke mo ua kerrekar el mesisiich a risel me ngdiak lemuukel er a mesisiich el eolt

A lak a klaumerang, e ngmo diak el ulterekokl a rengum. El ua bukitang el mengodech a chiro er ngii sel bo el bereked er a ta er a bedengel a bad. Me kau a mo mengodech a blekerdelem el oltirakl er a resechelim, e tiang a ochotii el kmo kau a diak molecholt er sel mera el blekerdelem.

Me ngdi osisiu, a lsekum a omerellem a oltirakl er a klaumerang er kau, e ke olecholt er sel mera el blekerdelem, el diak di moltirakl aike el loruul a rebebil.

KEREBAI ER A BIBLIA: A profet el Daniel er a ledirk lengeasek, e ng “tilbir er a rengul” el mo olengesenges a llechul a Dios, alta e ngmle cheroid er a telungalek er ngii. (Daniel 1:8) Me ngokiu tiang, e a Daniel a mle ulterekokl a klaumerang er ngii. Me a Daniel a kiliei el oltirakl er a klaumerang er ngii.

MORRITER ER KAU: Ngerang a klaumerang er kau? El ua tiang: Ke oumerang er a Dios? E ngera uchul? Ngera el tekoi a oterekeklii a rengum el kmo ngar er ngii a Dios?

Ke oumera el kmo a llechul a Dios a mo uchul a klungiolem? E ngera uchul?

Me a leuaisei, e ngsoam el mo ngerang, ngmo ua llel a kerrekar el mesebesebek er a eolt, me a lechub e ngsoam el mo ua mesisiich el kerrekar el diak lemuukel sel lemei a mesisiich el eolt? Tiang a mo ngosukau el mo onger er a ker el kmo, Ngak ak techang?