Skip to content

Skip to secondary menu

Skip to table of contents

Resioning er a Jehovah

Palauan

Molemolem el Ngar er a Bltikerreng er a Dios

 13 EL BLIONGEL

Aike el Ungil el Klebesei el Louketui a Dios

Aike el Ungil el Klebesei el Louketui a Dios

“Molasem el mesuub el kmo ng ngeral tekoi odeuir a rengul a Rubak.”EFESUS 5:10.

1. A Jehovah ngmengurs er a rua techang el mo kmeed er ngii, e ngera uchul me ngkirir el melemolem el klekar?

A JESUS a dilu el kmo, a re “meral meluluuch ra Chedam” a mo “meluluuch loba reng ma klemerang, ma Chedam chosiik er tirikel uaisei el meluluuch.” (Johanes 4:23, BT) Me sel lebetik er chouaitirka el chad a Jehovah, e ngmengurs er tir el mo kmeed er Ngii me a Ngelekel, el di ua lurruul er sera lebetik er kau. (Johanes 6:44) Me tiang a kmal ileakl el techall el kired! Me nguaisei, engdi tirke el betik a rengrir er a klemerang er a Biblia a kirir el melemolem el “mesuub el kmo ng ngeral tekoi odeuir a rengul a Rubak,” e le Satan a kmal meduch el mengeblad er a rechad.Efesus 5:10; Ocholt 12:9.

2. Ngua ngera uldesuel a Jehovah el mo er a rechad el oldak er a mera el omengull me a klsuul?

2 Ka molatk a tekoi el dilubech er a lengar er a uchul a Rois el Sinai a rechad er a Israel, e lolengit er a Aron el mo meruul er a chederir. A Aron a kilengei e mlo rullii a kolt el ngelekel a kerbou, e milengedecheduch el ua lolekoi el kmo tiang a omtechei er a Jehovah e le ngdilu el kmo: “A klukuk e ng mor ngii a mur el odengesel a RUBAK.” Me a Jehovah ngkilengei er tia el omeruul, el luleldak er a mera el omengull me a klsuul? Ngdiak, e le ngmilekodeterir a 3,000, el tir a milengull er tia el bleob el chelid. (Exodus 32:1-6,  10, 28) Ngera kede suubii er tia el tekoi? A lsoad el melemolem el ngar er a bltikerreng er a Dios, e ngkmal diak el kired el ‘merutech a ikel demokebai er ngii el tekoi,’ e bai mo blak a rengud el mengull er Ngii el diak dechelsechusem er a ngii di el tekoi el louketui.Isaia 52:11; Esekiel 44:23; Galatia 5:9.

3, 4. Ngera uchul me ngkired el kerekikl el melatk a omellach er a Biblia el kirel a siukang me a ungil el klebesei er a beluulechad?

3 Ngklengiterreng, e le uriul er a lemad a rechapostol el tir a milerrob a ultekengel a mera el osisechakl, e tirke el leko te Kristiano el dimlak el sorir a klemerang er a Biblia a ulemuchel el meruul a siukang me a ungil el klebesei er tirke el milengull a ngodech el chelid, e dilu el kmo aikang a ungil el kirir a Rekristiano. (2 Thesalonika 2:7, 10) Me sel monguiu el kirel a bebil er aika el ungil el klebesei e ngmo sebechem el omtab el kmo aikang a di melisiich a uldasu er tia el beluulechad, el diak el uldesuel a Dios. A oumesingd el ungil el klebesei el loruul a rechad a melisiich a ngelbesel a klechad me a dirrek el klsuul el osisechakl me a tekoi er a olai, el ngii a olengchelel a “kloul Babilon.” * (Ocholt 18:2-4, 23, BT) Me lak mobes el kmo, a Jehovah a ulemes a mekngit el omerellir tirke el milengull a ngodech el chelid er a irechar, el ngii a dirk telengtengil a betok el siukang me a ungil el klebesei er chelechang. Me ngulterekokl el dirk chetil aika el tekoi el me lmuut er chelechang. Me a uldesuel a kirel el dirk klou a ultutelel er kid.2 Johanes 6, 7.

4 Kid, a remera el Kristiano a medengei el kmo ngar er ngii a ungil el klebesei el louketui a Jehovah. Me ngkmal kired el mo mengeroid er kid er aika el tekoi.  A dmolech el omerriter er kid er a uchul me a Jehovah a ouketui aika el ungil el klebesei, a smisichid me ngmo sebeched el mengeroid er kid er a ngii di el tekoi el mo tomellii a deleuill er kid me a Dios.

A KURISMAS A BECHES EL NGKLEL A OMENGULL EL MO ER A SILS

5. Kede mekerang e medengei el kmo a Jesus a dimlak lemechell er a December 25?

5 Ngdiak a omesodel a Biblia el kirir a rechad el milengedaol er a tanziobi er a Jesus, e diak a medengelii a temel a cherellel. Engdi kede medengei el kmo ngdimlak lemechell er a December 25, el ngii a temel a kelekolt er sel beluu. * A Lukas a milsaod er sel taem er a lemechell a Jesus el kmo, te “mlar ngii a re bebil el mengkar a sib el mlar a ked er a klebesei.” (Lukas 2:8-11) Engdi ngar er a ulebengelel a December e ngklou a chull me a yuki er a Bethlehem, me a sib a mla er a chelsel a blil, me a remengkar a dimlak el sebechir el ngar er a ked er a klebesei. Me a lmuut el tang, a Josef me a Maria a mlo er a Bethlehem e le Kaiser Augustus a mle soal a lemengai a ulecherengelir a rechad el rokui. (Lukas 2:1-7) Me ngkmal dimlak el sebechel a Kaiser el oldurech er a rechad el tir a chetirir el chederedall er a Rom el mo merael el mo er a rekebelurir er a temel a kelekolt.

6, 7. (a) Ngera uchetemel a betok el omeruul el meketmokl er a temel a Kurismas? (b) Ngera klekakerous er a rechad el merous a bresent er a temel a Kurismas me a omerellir a remera el Kristiano?

6 A Kurismas a diak lemengai a uchetemel er a Biblia, e ngbai mengai er aike el chedaol sils er a rechad el milengull a ngodech el chelid, el ua sel Roman  Saturnalia el ngii a chedaol sils el kirel a Saturn el leko ngchelid er a sers. Me a doltirakl er a New Catholic Encyclopedia, e tirke el milengull er a chelid el Mithra a milengedaol er a December 25 e le te ulemdasu el kmo ng “cherellel a mesisiich el sils.” Tia el babier a dirrek el dmu el kmo: “A rechad a ulemuchel el mengedaol er a Kurismas er sel taem el betok el chad er a Rom a mle blak a rengrir er sel klechelid el mengull er a sils,” el ngii a bekord el 300 el rak er a uriul er a kodellel a Kristus.

A remera el Kristiano a meruul a tekoi el okiu a bltikerreng

7 Ngar er a temel tia el ungil el klebesei e tirka el milengull a ngodech el chelid a kerous a bresent e mirruul a meklou el blengur. Me aika el omeruul a dirrek el mlo telengtengil a Kurismas. Engdi a rebetok el mirrous a bresent er a temel a Kurismas er a irechar a di ua rebetok er chelechang, el tir a diak loltirakl a omesodel a 2 Korinth 9:7 el kmo: “Ta ma tal chad lolengeseu el oltirakl er a telbilel a rengul, e lak lomai er a rengul el ua ia le mlorimel; ele Dios a soal ngikel ungil a rengul e olengeseu.” Me a remera el Kristiano a merous a bresent er a ngii di el taem el bltkil a rengrir a uchul, e diak longerechir er a rechad el mo omtechei a sulir. (Lukas 14:12-14; monguiu er a Rellir 20:35.) Ngdirrek el kmal dmeu a rengrir e le ngdikea lemechesang er aike el betok el omengetmeklel a temel a Kurismas, e dirrek el dikea belsir el kirel tia el ungil el klebesei el uai a rebetok el chad.Mateus 11:28-30; Johanes 8:32.

8. Tirke el chad el milsuub a btuch, te ullab a bresent el mo er a tanziobi er a Jesus? Ka mosaod.

8 Engdi a rebebil a mo dmu el kmo, tirke el chad el milsuub a btuch te kora mlo er a tanziobi er a Jesus el ullab a bresent? Ngdiak el uaisei, a bresent el lullab el  mong a di mle olechotel a omengull er tir el mo er a klou a ultutelel el chad. E tia el omeruul a mle siukang er a rechad er aika el beluu er a irechar. (1 King 10:1, 2, 10, 13; Mateus 2:2, 11) Me a mera er ngii, ngdimlak bo lomes er ngii er sel kesus er a lemechell. Sel taem er a lebong, e a Jesus a mla mo betok el bilel e ngar er a blai, el dikea el tolechoi el ngar er a ongolel a charm.

A OMESODEL A BIBLIA EL KIREL A TANZIOBI

9. Ngera dilubech er aike el tanziobi el medung er a Biblia?

9 Me alta e a cherellel a ngalek a uchul a klou el deurreng, engdi ngdiak a ta el taem el dechiuii er a Biblia a omesodel a tanziobi er a remesiungel a Dios. (Psalm 127:3) Me nguaisei, engdi ngar er ngii a omesodel a Biblia el kirir a reteru el chad el milengedaol a tanziobi  er tir, el Farao er a Ekipten me a Herodes Antipas. (Monguiu er a Genesis 40:20-22; Markus 6:21-29.) Me ngar er aika el eru el tanziobi e ngdilubech a mekngit el tekoi. Ngar er sel tanziobi er a Herodes Antipas e ngmilengai a bdelul a Johanes el Chad er a Techolb.

10, 11. Ngmle uangera uldesuir a rekot el Kristiano el kirel a tanziobi, e ngera uchul?

10 Sel The World Book Encyclopedia a milsaod el kmo: “A rekot el Kristiano a . . . ulemdasu el kmo te  di tirke el mengull a ngodech el chelid a mengedaol a tanziobi.” El ua tiang, a rechad er a Gris er a irechar a uluumerang el kmo a derta el chad a ngar er ngii a deleb el milsang er a lemechell e mlo ngerechelel el omekerreu er ngii. Me a doltirakl er a babier el The Lore of Birthdays, e ngika el deleb a “ngar er ngii a ileakl el deleuill er ngii me ngike el chelid el uluutanziobi er sel sils el lemlechell er ngii ngike el chad.” A tanziobi a dirrek el chelsechusem er a omerellir tirke el omlaoch el ousbech a blechebechel a btuch er sel temel a cherellel a chad.

11 Me nguaisei, engdi ngdiak di el tiaikid a uchul me a remesiungel a Dios er a irechar a dimlak longedaol a tanziobi. Ngdirrek el klaumerang er tir a uchul me ngdimlak loruul aika el tekoi. E ngera uchul? Tirkang a mle ngariou a rengrir el chad, me ngdimlak lomes er sel sils er a cherellir el kmal klou a ultutelel el kirir el mengedaol er ngii. * (Mika 6:8; Lukas 9:48) Te bai uleldanges er a Jehovah e mirreng a sulel e le ngii a uchul a klengar er tir. *Psalm 8:3, 4; 36:9; Ocholt 4:11.

12. Ngmekerang a sils el demad er ngii e kuk ungil er a sils er a cherelled?

12 Sel lemad a blak a rengul el mesiungel a Dios, e ng ngar er a omeltkel a Dios me ngulterekokl el mo okisii er a kodall. (Job 14:14, 15) A Olisechakl 7:1 a  kmo: “A ungil chisel a chad a kuk ungil er a mekreos el chilt, me sel sils el le mad er ngii a kuk ungil er sel sils el le mlechell er ngii.” Me a ‘ungil chised’ a belkul a kmo kede oba kengei er a Dios el blakerreng er kid a uchul. Ngdirrek el ungil a domtab el kmo, a di ta el tekoi el kirir a Rekristiano el mengedaol er ngii er a bek el rak a diak el cherellel a chad, e ngbai kodellel a Jesus, el “ungil chisel” el obengkel a Dios a di ta el rolel e ngsebeched el mo suobel.Lukas 22:17-20; Hebru 1:3, 4.

A EASTER A OMENGULL EL KIREL A CHELID ER A CHEROLL

13, 14. Ngera uchetemel aike el siukang er a Easter?

13 Alta e a rechad a dmu el kmo a Easter a chedaol sils el mengedaol er a okisel a Jesus, engdi a mera er ngii e ngbai mengai a uchetemel er a klsuul el omengull. A tekoi el Easter a losaod er ngii a rebebil el kmo ngmlengai er a Eostre me a lechub e ng Ostara, el ngii a redil el chelid er a ngesechel a sils me a temel a omelalem er a rechad er a England er a irechar. E milekerang a ngais me a usangi e mo chelsechusem er a Easter? A Encyclopædia Britannica a mesaod er a ngais el kmo, “ngmerael a chisel el olengchelel a beches el klengar me a okiis,” me a usangi a di mla olengchelel a cheroll er a irechar el mei. Me a leuaisei, e a Easter a rolel a omengull el melisiich a tekoi er a cheroll, engdi a rechad a mla rullii el mo sils er a omengedaol er a okisel a Kristus. *

 14 Me a Jehovah ngsoal a rechad a bo longedaol er a okisel a Ngelekel el okiu sel lolisiich aika el mekikiongel el olengchelel a cheroll? Ngkmal diak! (2 Korinth 6:17, 18) E a mera er ngii, a Biblia a diak a ta el lekengei er kid me a lechub e loldurech er kid el mo mengedaol er a okisel a Jesus. Me a rechad el mengedaol er a okisel el ousbech er a Easter a kmal diak loldeu er a rengul a Dios.

A HALLOWEEN A KMAL KIKIONGEL

15. Ngera uchetemel a Halloween, e ngera uchul me a rechad a mengedaol er ngii er a October 31?

15 A Halloween a lomes er ngii a rechad el ungil el klebesei el chelsechusem er ngii a witches me a goblins me a lmuut el bebil er a kdekudel el tekoi. Me a rechad a meruul er tia el ungil el klebesei er a October 31, e tiang a mlengai a uchetemel er a tekoi el lurruul er a irechar a rechad er a Celt el tir a chad er a Britain me a Ireland. Ngar er sel temel a orakiruu el kot el kmeed er a November 1 e tirka el chad a milengedaol er a Samhain el belkul a kmo “Ulebengelel a Temel a Kleald.” Te uluumerang el kmo, seikid el taem e ngmengubet sel orars el omii er a beluulechad me a belurir a rebladek, me tirke el ungil me a remekngit el chelid a mo omais er a beluulechad. Te dirrek el ulemdasu el kmo a delbengir a rechad a liluut el mo remei er a rekeblirir, el uchul me a rechederir a ngmai a kall me a ilumel e otobed er rikl el melasem el oldeu a rengrir tirka el bldekir. Me a rengalek er chelechang el oubail a bilel a witch me a deleb e merael a obliil el meruul er a tekoi el trick or treat a diak lodengei el kmo te melemolem a omeruul el mileketmokl er a temel a Samhain.

 BO LEKLIKIID A MERENGEL A CHEBECHIIELEM

16, 17. (a) Ngera uchul me ngkirir a Rekristiano el melatk el mo bechiil el mo merriter a siukang el meketmokl el kirel a merengel a chebechiil? (b) Ngkirel el mo uangera uldesuir a Rekristiano el kirel a omeruul el omidokl a beras me a lmuut el bebil er a klalo?

16 Ngdi kmedung e ngmo “diak lluut el mo morenges a ngerir a re melibuk a chebechielir el sechal ma redil” er a chelsel a kloul Babilon. (Ocholt 18:23) E ngera uchul? A kloul Babilon a mo nguemed e le ta er a uchul a ngii el chelsechusem er a tekoi er a olai el sebechel el mengidokel a chebechiil el omuchel er a sils er a merengel a chebechiil.Markus 10:6-9.

17 Ngkakerous a siukang er a bek el beluu. A rechad a omes a bebil er aika el siukang el diak el mekngit, engdi aikang a mengai a uchetemel er a klsuul el omengull el omeklusech er tirke el mo bechiil me tirke el mo er a merengel a chebechiielir. (Isaia 65:11) El ua tiang, ngar er a bebil el beluu e a rechad a omidokl a beras me a lmuut el bebil er a klalo er a temel a merengel a chebechiil. Tia el siukang a locha ulemuchel e le rechad a ulemdasu el kmo a kall a sebechel el meruul a rengrir a remekngit el chelid me lak lolemall er tirke el mo bechiil. Me a lmuut el tang, a di mla belkul a beras a kmo ngmelisiich a cheroll, me a deurreng, me a kemanget el klengar. Me ngbleketakl el kmo, tirke el sorir el melemolem el ngar er a bltikerreng er a Dios a mo mengeroid er tir er a chouaika el mekikiongel el omeruul.Monguiu er a 2 Korinth 6:14-18.

18. Ngera el omellach er a Biblia a kirir el melatk er ngii a rechad el mengetmokl el kirel a merengel a chebechiielir me a lechub e te mo er a merengel a chebechiil?

18 A remesiungel a Jehovah a dirrek el mengeroid  er tir er a lmuut el bebil er a mekngit el omeruul el meketmokl er a temel a merengel a chebechiil el sebechel el tomall a ukltkir a rebebil. El ua tiang, tirke el mengedecheduch er a temel a blengur a diak el kirir el melekoi a mekngit el ngellakel, me a lechub e te dmung me a lechub e te meruul a tekoi el sebechel el omekrur er tirke el mo bechiil me a rebebil. (Osisechakl 26:18, 19; Lukas 6:31; 10:27) Ngdirrek el diak loruul a kmal meklou e meringel a cheral el blengur el mo uchul e te di meruul a chisir. (1 Johanes 2:16) Me a lsekum ke mengetmokl el kirel a merengel a chebechiielem, e lak mobes el kmo a Jehovah a soal a bo lungil tia el sils er kau me ngmo dmeu a rengum sel bo molatk er ngii er a uriul. *

A TEKOI EL TOASTING NGDI UNGIL EL KIRIR A REKRISTIANO?

19, 20. Ngera omesodel a ta el babier el kirel a tekoi el toasting, e ngera uchul me ngdiak lungil el kirir a Rekristiano?

19 Ngar er a bebil el beluu e a rechad a olab a kebengir el mui er a ilumel el mo kaisesiuekl e melekoi a tekoi er a temel a merengel a chebechiil me a lmuut el bebil er a tekoi. A 1995 el International Handbook on Alcohol and Culture a mesaod er tia el omeruul el okedongall el toasting el kmo: Ng “tekoi el doruul er chelechang el ua omerellel a omelenget el chedaol el ilumel el lurruul a rechad er a irechar el melenget el mo er aike el chelid er tir . . . me bo longer a nglunguchir el kirel a kemanget el klengar me a klisichel a bedengir.”

 20 Chelecha el taem e a rebetok a diak lodengei el kmo tia el omeruul a chelsechusem er a omengull el mo er a ngodech el chelid. Me nguaisei, engdi a chad el odersii a kebengel el bedul bab a ua lolengit a klengeltengat er a chelid, e tia el omeruul a diak loltirakl a osisecheklel a Biblia.Johanes 14:6; 16:23. *

“A RUBAK A KMAL SOAL TIRKEL OUKETUI A MEKNGIT”

21. Ngera el ungil el klebesei a mekngit el kirir a Rekristiano, alta ngdiak el mengai a uchetemel er a klsuul el klechelid? E ngera uchul?

21 Chelecha el taem e ngdi meleketek a mekngit el omeruul er a beluulechad. Me a lebebil er a taem e aike el klechelid er a kloul Babilon a dirrek el kongei aika el omeruul me a lechub e ngdiak lorrob er a rechad el meruul. Me ngar er a bebil er a beluu e a kabelment a mengetmokl a meklou el parade me a lechub a carnival el blechoel el ngar er ngii a mekngit el ngloik er ngii me a lechub e ngmelisiich er a remengolchotaor me a redil el becherir a redil. Ngdi ungil a lsekum a mesiungel a Jehovah a omes me a lechub e ngmo er aika el ungil el klebesei? A omerellel ngochotii el kmo ngouketui a mekngit? (Psalm 1:1, 2; 97:10) Ngbai ungil a bo leua uldesuel a ta er a milluches er a psalm el milluluuch el kmo: “Mochib a medak er a chelsengsang”!Psalm 119:37.

22. Ngmekerang a ukltkel a Kristiano e sebechel el ngosuir el mo melilt el kmo ngmo teloi er a ungil el klebesei me a lechub e ngdiak?

22 A Kristiano a kirel el mo kerekikl me a omerellel lak lerelleterir a rechad el mo omdasu el kmo ngteloi  er a ungil el klebesei el mekngit er a osengel a Dios. A Paulus a milluches el kmo: “A cho monga ma cho molim ma cho moruul er a ngii di le ngerang, e moruul el rokui el mo kirel odengesel a Dios.” (1 Korinth 10:31; momes er a baks el “ Bo Mungil el Melilt a Tekoi.”) Me nguaisei, engdi a lsekum a siukang me a lechub a ungil el klebesei a diak el mengai a uchetemel er a klsuul el omengull, e diak lolisiich a tekoi er a balatiks, e diak lomtok a omellach er a Biblia, e seikid e a derta el Kristiano a sebechel el di ngii el melilt el kmo ngmo teloi aika el tekoi me a lechub e ngdiak. Engdi ngkirel el kerekikl me a omerellel lak bo luchul e lolibas er a rebebil.

A TEKINGEM ME A OMERELLEM BO LONGEBKALL ER A DIOS

23, 24. Kede mekerang e mo ungil el smodii a melemalt el llechul a Jehovah el mo er a chad?

23 A rebetok a omdasu el kmo aika el ungil el klebesei a kmal ungil el techellir el mo dmak el telungalek tir me a resechelirir e kuk kasoues. Me a lsekum a chad a mo cheleuid a uldesuel el omdasu el kmo a otirekled er a Biblia a diak el tabesul me a lechub e ngdiak el rolel a bltikerreng, e ngsebeched el meketeklii el mo er ngii el kmo, kid el Sioning er a Jehovah a dirrek el kmal soad el mo dmak kid me a telungalek er kid me a resechelid e kuk kasoues. (Osisechakl 11:25; Olisechakl 3:12, 13; 2 Korinth 9:7) Kede blechoel el mo dmak kid me a rebetik er a rengud, engdi ngbltkil a rengud el mo er a Dios me a melemalt el llechul a uchul, me ngdiak el soad el remuul aika el temed el dmak el mo uchul e kede remuul a tekoi el louketui er ngii a Dios.—Momes er a baks el “ A Mera el Omengull a Mo Uchul a Klou el Deurreng.”

 24 A rebebil el Sioning a mla ousbech a tekoi el ngar er a 16 el bliongel er a babier el Ngerang Mera el Lolisechakl a Biblia? * el onger a kerrir a remelemalt a rengrir el chad. Me tiang a mlo uchul a ungil el cheldecheduch er a delongelir. Me lak dobes, ngdiak el soad el mengaititekangel, e ngbai soad el olechau er tir el mei er a mera el omengull. Me a leuaisei, e molecholt a omengull el mo er tir e moba delemedemek, “ma tekoi el tuobed er a ngeriu bo lungil a delecherul e lomeksemeriar a reng.”Kolose 4:6.

25, 26. Te mekerang a ruungalek e melisiich er a klaumerang er a rengelekir me a bltkil a rengrir el mo er a Jehovah?

25 Kid a Resioning er a Jehovah a ungil el medengei a tekoi el dosaod. Kede medengelii a uchul me kede oumerang e meruul a bebil er a tekoi, e kuk diak doruul a bebil. (Hebru 5:14) Me kemiu a ruungalek, mosisecheklterir a rengelekiu el mo meduch el mesaod a omellach er a Biblia. Sel moruul el uaisei, e ngsmisiich a klaumerang er tir, e rulleterir el mo meduch el ousbech a Bades el onger er tirke el oker a ker, e dirrek el ngosuterir el mo medengei el kmo a Jehovah a betik a rengul er tir.Isaia 48:17, 18; 1 Petrus 3:15.

26 Tirke el mengull e meluluuch er a Dios “loba reng ma klemerang” a mengeroid er tir er a ungil el klebesei el louketui er ngii a Dios e dirrek el melasem el meruul a llemalt er a bek el taem. (Johanes 4:23, BT) A rebetok er chelechang a omdasu el kmo ngkmal meringel el bo lemelemalt a omerelled er a bek el taem. Engdi a ongingil el bliongel a mo meketeklii el kmo, a rolel er a Dios a kot el ungil.

^ par. 5 A lsoam a lmuut el betok el omesodel, e momes er a 252-254 el llel a babier el Ngerang Mera el Lolisechakl a Biblia? el lultebedii a Resioning er a Jehovah.

^ par. 11 A doltirakl er a Llach er a telbiil e a redil a kirel el odersii a tenget er a klengit el mo er a Dios er a uriul er a lochellii a ngalek. (Levitikus 12:1-8) Tia el llach a ulemeklatk er a rechad er a Israel el kmo, sel lochellii a ngalek e te oiuul a klengit el mo er a rengelekir. Me tiang a dirrek el ngilsuterir el mo tabesul a uldesuir el kirel a cherellel a ngalek, me ngdiak bo losuub aike el siukang er a tanziobi er a rechad er a bebil er a beluu.Psalm 51:5.

^ par. 13 A Eostre (me a lechub e ng Eastre) a dirrek el mle redil el chelid er a cheroll. Me a doltirakl er a The Dictionary of Mythology, e “ngmla er ngii a chermel el usangi el kmal mle soal a ngais e kiliei er a buil. Me a lebebil er a taem e te meruul a siasing er ngika el chelid el bdelul a ua bdelul a usangi.”

^ par. 18 Momes aike el eru el suobel el kirel a merengel a chebechiil me a lmuut el bebil el rolel a omilil el ngar er a Ongkerongel, er a January 1, 2007, er a 23-32 el llel.

^ par. 20 Momes er a Ongkerongel er a tekoi er a Merikel, er a February 15, 2007, er a 30-31 el llel.

^ par. 24 Lultebedii a Resioning er a Jehovah.