Skip to content

Skip to secondary menu

Skip to table of contents

Resioning er a Jehovah

Palauan

Molemolem el Ngar er a Bltikerreng er a Dios

 BEBIL ER A OMESODEL

A Rolel e Ke Mo Mesisiich er a Tekoi er a Omengelooch

A Rolel e Ke Mo Mesisiich er a Tekoi er a Omengelooch

A omengelooch a mekngit er a osengel a Dios e le ngrullii a chad el mo melatk er a di ngii e mo omdasu a mekngit el tekoi. *  Me a chad el meruul er tia el tekoi a sebechel el mo omes er a rechad el ua klalo me a lechub e ngdongu el di kirel a ngelbesel a rengul. Me ngrullii a tekoi er a durs el mo ua lak a bltikerreng er a chelsel, e di mo uchul a tedeb el deurreng er ngii me bo lungil a rengul. Engdi tia el blekeradel a diak lolemolem. A mera er ngii, a omengelooch a diak leterob a ‘ngelbesel a mekngit el omichoech er a rengud, el oketa deleboes el delengerenger, olechotel a deleboes, ma klekad, ma ngibes er a deleboes,’ e ngbai lmuut el smisichii tia el ngibes.Kolose 3:5.

A apostol el Paulus a milluches el kmo: “Kemiu el betik er a renguk, . . . de kikidid er a ikel mengikiongel a bedenged ma rengud, e dutebechel a klengar er kid el mo cherrungel el chemau a ungil el tekoi el mengull er a Dios.” (2 Korinth 7:1) Me a lsekum ke oldechelakl er a uldesuem el kirel tia el tekoi, e lak bo lemechitechut a rengum. A Jehovah a kmal kltmokl el “ousubes” e ngosukau. (Psalm 86:5; Lukas 11:9-13) Me alta e a bebil er a taem e ke mo mechitechut e lmuut el mo meruul er ngii, engdi tia el blekerdelem el ouuchel er a rengum e melasem el mengoit er ngii a ochotii el kmo ngungil a moktek er kau. E lak mobes el kmo, “a Dios a lmuut el chubechubchad er a rengud e medengei a rokui el tekoi.” (1 Johanes 3:20) Ngomes a klengar er kid el rokir, el diak di lomes a kngtid. Me tiang a rullii me ngsebechel el kongei el orrenges er kid sel doluluuch el olengit a klausubes er ngii. Me lak meterob el meluluuch el mera el ngar er a rengum el mo er Ngii, el ua ngalek el remurt el mo er a demal sel lousbech a ngeso. E a Jehovah a mo ngosukau me ngmo klikiid a ukltkem. (Psalm 51:1-12, 17; Isaia 1:18) Me nguaisei, engdi ngkirem el meruul a tekoi el oltirakl a nglunguchem. El ua tiang, ngkirem el mengeroid er kau er a rokui el siasing er a remeau me a dirrek el mekngit el klausechelei. *

A lsekum ngmeringel er kau el mo diak mongelooch, e ngsebechem  el mengedecheduch er a Kristiano el demam me a lechub e ngdelam, me a lechub a ta er a chad er a ongdibel el mesisiich a klaumerang er ngii, e betik a rengul er kau. *Osisechakl 1:8, 9; 1 Thesalonika 5:14; Titus 2:3-5.

^ par. 1 A omengelooch a blekeradel el chad a di ngii el merutech e ousekool er a ilekemellel, el di ngii el oltiid er ngii.

^ par. 2 A betok el telungalek a loia computer er tir er a basio el sebechir a rokui el chad er a blai el mesang. A rebebil a dirrek el omechar aike el computer program el sebechel el torob a mekngit el siasing me a website. Engdi aikang a diak el sebechel el torob a rokui el mekngit el tekoi. E lak dobes, a rechad a dirrek el sebechir el mo er a Internet el okiu a dengua er tir me a lmuut el bebil er a klekedall.

^ par. 1 Ngdirrek el sebeched el metik a bebil el omesodel el ngosukid el ngar er a suobel el “Young People Ask . . . How Can I Conquer This Habit?” el ngar er a November 2006 el Awake!, me a suobel el ngar er a 178-182 el llel a babier el Questions Young People Ask—Answers That Work, Volume 1.