Skip to content

Skip to secondary menu

Skip to table of contents

Resioning er a Jehovah

Palauan

Molemolem el Ngar er a Bltikerreng er a Dios

 BEBIL ER A OMESODEL

A Rolel a Dosmechokl a Mondai er a Siobai er Kid

A Rolel a Dosmechokl a Mondai er a Siobai er Kid

Ngar er a 1 Korinth 6:1-8, e a apostol el Paulus a milsaod el kirel a klaotutakl er a delongelir a Rekristiano el rudam. Ngulechotii a kngtil a rengul er a ledu el kmo, a rebebil el Kristiano er a Korinth a kaotutakl e “nguu ngii el tekoi el mor mederir a re chad er a kerrekeriil el diak le chedal a Dios.” (1 el Bades) Me a Paulus a mla er ngii a ungil el uchul me ngdilu el kmo a Rekristiano a diak el kirir el kaotutakl er a kerrekeriil, e ngbai kirir el mesaod a mondai er tir el ultuil er a ulekrael er a ongdibel. Me bo dosaod a bebil el uchul me ngkired el oltirakl er tia el uleklatk me a bebil el blekeradel el diak el sal bleketakl a omesodel tia el bades el kirel.

A lsekum ngar er ngii a mondai er a siobai er kid me a kldemed el Kristiano, e ngkmal kired el mesmechokl er ngii el ngar er a rolel er a Jehovah el diak el rolel er kid. (Osisechakl 14:12) El ua ledilung a Jesus, ngbai ungil a demereched el sumecheklii a kekerei el mondai er a bai debecherei me lemukeroul el kmal mo klou. (Mateus 5:23-26) Engdi ngklengiterreng, e le rebebil el Kristiano a di kaititekangel e mla ngmai a mondai er tir el mo er a kort. A Paulus a dilu el kmo: “A klaiuengasech el ngar ngii er a delongeliu a ochotii el kmo kom mla touchakl er a rolel a dotirakl er a Kristus.” E ngera uchul? E le omerellir a mlo uchul a otuub el kirel a ongdibel me ngika el Dios el dongull er ngii. Me ngkmal kired el kerekikl el melatk er a keril a Paulus el kmo: “Ng diak bai lungil a di berekakl a mekngit el ekor kemiu?”7 el Bades.

A Paulus a dirrek el milsaod el kmo a Dios a mla msa ongdibel a melemalt el ulekrael el ousbech el mesmechokl a mondai. Me a remechuodel er a ongdibel a meklou el chad el Kristiano el ngar er ngii a klemedengei er tir er a Bades, me a Paulus a dilu el kmo: ‘Ng sebechir el smaod a tekoi er a delongelir a re Kristiano’ el kirel a “tekoi er tial beluulchad.” (3-5 el Bades) A Jesus a milsaod er a rolel e a Rekristiano a mesmechokl a mondai er a delongelir el ua sel lomulak me a lechub e te melemall a chisel a ta er a chad. Me a kot e ngkirir tirke el teru el mo dengchokl e smodii a mondai; e a ongerung e a lsekum ngdimlak lekengei a tang e ngike el tang a nguu a tang me a lechub e te terung me te obengkel el  mong; e a ongedei e a lsekum ngdirrek el di chetil, e ngmla mo kirir el mo subedeterir a remechuodel er a ongdibel el kirel tia el tekoi.Mateus 18:15-17.

A remechuodel a diak el chad er a llach me a lechub e lechad er a siobai me ngdiak el kirir el meruul a tekoi el uai tir. Ngdirrek el diak loruul a llecherir el melasem el mesmechokl a mondai er a rudam el dmak el ousiobai. Te bai ousbech a Bades el olengeseu er a rudam er tir me ngsebechir el budech a delongelir e sumechokl a mondai er tir. Engdi a lsekum a mondai a kmal oberedang e ngsebechir el olengit a ngeso er a odam el oldingel a ongdibel me a lechub a obis er a Resioning er a Jehovah. Me nguaisei, engdi ngar er ngii a blekeradel el diak el sal bleketakl a omesodel er tia el uleklatk el ledillii a Paulus. Me aikang ngerang?

A lebebil er a taem e ngmo kired el mo er mederir a rechad er a kerrekeriil e le ngar er ngii a tekoi el kired el kutmokl el diak el klaititekangel a uchul. El ua tiang, nglocha di ta el rolel e kede dortii a chebechiieled, e mo er ngii a llemelted el ngoititerir a rengeleked, e ngmai a ngeso el kirir a rengeleked, e remuul a claim er kid el kirel a insurance, e ngmai a ududed sel lebo el bankrupt a kombalii, e dirrek el kutmokl a will er kid. Ngdirrek el lebebil er a taem e a odam a locha mo kirel el meruul er a ultuteklel me bo el sebechel el smodii a ultutakl el mlo er ngii. *

Me a lsekum kede meruul a chouaika el tekoi el ngar er a budech e ngdiak detemellii a uleklatk el ledillii a Paulus. * Me nguaisei, engdi sel kot el ngaruchei el tekoi el kirir a Rekristiano el meruul er ngii a mo mengebkall er a ngklel a Jehovah e dirrek el melisiich er a budech me a kltarreng er a chelsel a ongdibel. Me a olengchelir a rultirakl er a Kristus a bltikerreng er a delongelir, e le bltikerreng a “diak le bechelechelingaol a rengul.”1 Korinth 13:4, 5; Johanes 13:34, 35.

^ par. 2 Nglocha mo er ngii a taem el Kristiano a tomellii a klou el tellemall el ua oterebekii a ta er a Kristiano me a lechub e ngodelecheklii me a lechub e ngmekodir me a lechub e ngrullii a klou el omerechorech. A lsekum ngmo uaisei e ngsebeched el mesubed er a rebulis el kirel tia el tekoi, alta e tiang a mo uchul e kede mo mesaod er kid er a kort.

^ par. 3 A lsoam a lmuut el omesodel e momes er a Ongkerongel er a September 1, 1997 er a 25-30 el llel, me a dirrek el Ongkerongel er a tekoi er a Merikel er a October 15, 1991, er a 25-28 el llel.