Skip to content

Skip to secondary menu

Skip to table of contents

Resioning er a Jehovah

Palauan

Molemolem el Ngar er a Bltikerreng er a Dios

 10 EL BLIONGEL

Chebechiil—A Sengk el Mla er a Betik a Rengul el Dios

Chebechiil—A Sengk el Mla er a Betik a Rengul el Dios

“A le edei a kerrelel a ekil e ng meringel el meloched.”OLISECHAKL 4:12.

1, 2. (a) Kede melatk a ngera el tekoi a lebebil er a taem el kirir a redirk mlo bechiil, e ngera uchul me kede omdasu el uaisei? (b) Ngera el ker a mo soadel er tia el bliongel?

KAU ngsoam el mo er a merengel a chebechiil? A rebetok el chad a sorir el mong e le aikang a ungil el tekoi. Ngsebechem el omes er tirka el mochu bechiil el kmal klebokel, e dirrek el kmal dmeu a rengrir! Me tia el sils a uchul a deuil a rengrir e sebeched el mesang el kmo ngbetok a ungil el omelatk el kirir er a ngar mederir el klebesei.

2 Me nguaisei, engdi ngar er a osengir a rebetok el chad e a chebechiil er chelecha el taem a kmal cheliseksikt. Me alta kede melatk a ungil el kirir tirka el dirk mlo bechiil, engdi a lebebil er a taem e kede melatk el kmo: ‘Tiang mo ungil el chebechiil? Ngsebechel el melemolem?’ A nger er aika el ker a di mo ultuil er a bechiil el sechal me a redil el mo oumerang e oltaut a ulekrael er a Dios el kirel a chebechiil. (Monguiu er a Osisechakl 3:5, 6.) Ngkmal kirir el meruul el uaisei me bo el sebechir el melemolem el ngar er a bltikerreng er a Dios. Me bo dosaod a nger er a Biblia el kirel aika el eua el ker el kmo: Ngera uchul me ke mo bechiil? A lsekum e ke melatk el mo bechiil, e ngungil el bo bechil a ua techa el chad? Ke mekerang e mo kltmokl el mo  bechiil? E ngera sebechel el ngosuterir a rubekel el mo melemolem el dmeu a rengrir er a chebechiielir?

NGERA UCHUL ME KE MO BECHIIL?

3. Ngera me ngdiak luchul a llomeserreng a lsekum a chad a mo bechiil el diak a ungil el uchul?

3 A rebebil a oumerang el kmo, a lak bo bechiil e ngdiak el sebechel el mo dmeu a rengum. E tiang a kmal diak el klemerang el tekoi! A Jesus el ngii a dimlak el bechiil a mesaod el kirel a chad el di mesobil el kmo ngsengk, e millisiich er tirke el sebechir me lolemolem el di mesobil. (Mateus 19:11, 12) A apostol el Paulus a dirrek el milsaod el kirel a klungiolel a klemesobil. (1 Korinth 7:32-38) A Jesus me a Paulus a dimlak loruul er a llach el kmo a chad a kmal kirel el di mesobil. A osisechakl el kmo ‘ng mekull er a re chad a bo le bechiil’ a bai ‘osisechakl el mla er a mekngit el chelid.’ (1 Timothy 4:1-3) Me a chad el mesobil a ngar er ngii a techellel el remuul a betok el kirel a omesiungel el mo er a Jehovah el diak a mengesang er ngii. Ngdiak luchul a llomeserreng a lsekum a chad a mo bechiil el di diak a ungil el uchul me a lechub e a rebebil a orrimel er ngii.

4. A ungil el chebechiil nguchetemel a ngera el blekeradel el kirel a okurulir a rengalek?

4 Me a chebechiil, ngar er ngii a ungil el uchul me a rechad a meruul er ngii? Chochoi. A chebechiil me ngdirrek el sengk el mla er a betik a rengul el Dios el me er kid. (Monguiu er a Genesis 2:18.) Me ngar er ngii a klungiolel e dirrek el mo uchul a deurreng. El ua tiang, a ungil el chebechiil a uchetemel a ungil el klengar er a telungalek. A rengalek a ousbech er a ungil e ultebechel el blekeradel, el ngar er ngii a chedam me a chedil el loubltikerreng el mo er tir, e omekeroul, e mellach, e dirrek el omekrael er tir. (Psalm 127:3; Efesus 6:1-4) Me nguaisei, engdi ngdiak  di el okurulir a rengalek a uchul e ngkirel el mo er ngii a chebechiil.

5, 6. (a) Ngera bebil el klungiolel a ungil el klausechelei el losaod er ngii a Olisechakl 4:9-12? (b) Ngmekerang e sebechel el mo edei a kerrelel a chebechiil?

5 Ka di molatk er a bades er tia el bliongel me a omesodel el kmo: “A re terung a kuk ungil er a di tang, ele le dak el oureor e ng meruul a ungil ureor. A bo lubuu a tang, e ngkel tang a ngosuir; e a chad a di le ngii el tang e bo lubuu e ng chebuul le ng diak a ngosuir. Ma le teru el mechiuaiu e te kakeald, e a di le ngii el tang e ng mekera e mo mekeald? Ma re terul chad a sebechir el mtekengii a odechelakl er a le di le tal chad. A le edei a kerrelel a ekil e ng meringel el meloched.”Olisechakl 4:9-12.

6 Me alta e tia el bades a mesaod el kirel a mera el klausechelei, engdi a chebechiil a uaisei el meteketek er a delongelir a reteru el kmal kaodengei el chad. Me ngdi ua losaod tia el bades, a chebechiil a mesterir a techellir a reteru el obekel el mo kaingeseu, e chachelaod, e kaukerreu. Me a chebechiil a lmuut el mo mesisiich a lsekum e ngchachisois a okul. Tia el bades a ua lochotii el kmo a eru el kerreel el uldak a sebechel el meloched. Engdi a lsekum a edei el kerreel a chelaus el uldak me a lechub e ngdelidai el kldei, e ngmeringel el meloched. Me a chebechiil el nguu a Jehovah el mo kot er a chelsel a di ua edei a kerrelel el chebechiil. Me a Jehovah a kot el ngarbab el okul a chebechiil el uchul me a chebechiil a kmal mesisiich.

7, 8. (a) Ngera el ulekrael a ledillii a Paulus el mo er a remesobil el Kristiano, el tir a oldechelakl er sel urungulir el sorir el meruul a durs? (b) Ngerang a osengel a Biblia el kirel a chebechiil?

7 A chebechiil a di ta el blekeradel el sebechel a durs el meketmokl er a chelsel el mo uchul a deurreng el ngar er a melemalt el rolel. Ngar tiaikid el blekeradel e a durs a  sebeched el omes er ngii el kmo ngdeuil a rengrir a reteru el obekel. (Osisechakl 5:18) A chad a sebechel el dirk outekangel, alta e ngmla engelakl er a taem er a klengeasek er ngii, el ngii sel taem el kmal mesisiich a urungulel el soal el meruul a durs. Me a diak lultebechel el urungulel a sebechel el mo uchul a diak leklikiid el omeruul. Sei a uchul me a Paulus a mlukrael el mo meluches er tia el uleklatk el mo er a remesobil el chad el kmo: “E ngdi lak el sebechir el osarech a rengrir, e bo le bechiil kung. Ele ng bai ungil a bo le bechiil er a lomichoech a rengrir er a ngibes er a deleboes.”1 Korinth 7:9; Jakobus 1:15.

8 Me alta e ngkakerous a uchul me a rechad a mo bechiil, engdi ngkirir el mo medengei el kmo te mo chelebangel a omelsemai. Me ngua lolekoi a Paulus el kmo tirke el mo bechiil “a mo metik a rengelel a klechad.” (1 Korinth 7:28) A rebechiil el chad a chelebangel a omelsemai el diak lodengei a remesobil el chad. Me a lsekum e ke tibir el mo bechiil, e ke mekerang e mo sebechem el olengeasek a omelsemai er a chelsel a chebechiielem, e mo metik a betok el klengeltengat me a deurreng? A ta er a rolel a sel mungil el ngiltii a mo bechim.

NGUA TECHA EL CHAD A UNGIL EL BUCH?

9, 10. (a) Ngmilekerang a Paulus er a losaod er a telemellel a domak a deleuill er kid el obengkel a chad el diak loumerang? (b) Ngera mo rsel a lsekum kede mengemikr a llechul a Dios el kirel a chebechiil?

9 A Paulus a mlukrael el meluches er tia el klou a ultutelel el omellach, el kirel a chad el melatk er ngii er a uchei er a losiik er a mo bechil el kmo: “Lako mobenterir ar diak loumerang el ngara tal ongelungel, e ngdiak bo ltang.” (2 Korinth 6:14, BT) A rechad er a sers a ungil el medengelii a belkul tia el okesiu. A lsekum te ngmai a teblo el kakerous el charm el kakerous a meklungel me a klisichel el odak, e ngulterekokl el mo meringel er tir el  dmak el oureor. Me ngdi osisiu a chebechiil el moak er a delongelel a chad el oumerang me a diak loumerang a ulterekokl el mo er ngii a klekakebosech er a uldasu. Me a lsekum a tang a soal el melemolem el ngar er a chelsel a bltikerreng er a Jehovah e a tang a kuk diak lomekerreu, e aike el meklou a ultutelel el tekoi er a klengar er tir a mo kakerous, e tiang a dirrek el mo uchul a ringel. Me a Paulus a melisiich er a Rekristiano el mo bechil a chad el “oltirakl er a Rubak.”1 Korinth 7:39.

10 A rebebil el mesobil el Kristiano a omdasu el kmo ngbai ungil a lak dengar er a ta el klaumerang, er a bai di desabisi er a bek el taem. Me te kongei el mengemikr er a ulekrael er a Biblia, e mo bechil a chad el diak losiou er a Jehovah. Me ngdi blechoel el mo mekngit er a uriul. Me te mo melechesuar el kmo a chad el bla bo lebechil a diak el sebechir el dmak el mesaod a kot el meklou a ultutelel el tekoi er a klengar. Me chelechang el lebechiielang, e ngbai kmal mla lmuut el mo sabisi el kuk ngaruchei er sera bo lebechiil. Me ngkmal dmeu a rengud e le te betok el telael el mesobil el Kristiano a blak a rengrir el oltirakl a omellach er a Biblia el kirel a chebechiil. (Monguiu er a Psalm 32:8.) Me alta te melatk el mo bechiil er a ta er a klebesei, engdi te melemolem el di mesobil el mo lmuut er sel lebetik er a ungil el mo bechil er a delongelir tirke el mengull er a Jehovah el Dios.

11. Ngera sebechel el ngosukau el mo ungil el melilt er a mo bechim? (Dirrek el momes er a baks el dai er ngii a kmo “ Ngua Techa el Chad a Kulatk el Mo Bechil?”)

11 Ngmera el tekoi, ngdiak el rokui el mesiungel a Jehovah a ungil el buch. Me a lsekum ke melatk el mo bechiil, e mosiik er a chad el blekerdelel, me a turrekong er ngii, me a bltkil a rengul el mo er a Jehovah a di ua uldesuem. A blak a rengul e mellomes a rengul el mesiou a mla otobed a kmal betok el ungil el suobel el kirel tia el tekoi, me  ngmo uchul a klungiolem a lsekum e ke melebedebek e dirrek el meluluuch el kirel, e mechei me ngomekrael er kau sel bochu molilt er a mo bechim. *Monguiu er a Psalm 119:105.

12. Ngera el siukang el kirel a chebechiil a loltirakl er ngii a betok el beluu, e ngera el kerebai el ngar er a Biblia a meskid a ungil el ulekrael el kirel?

12 Ngar er a betok el beluu e ngsiukang er a ruungalek el melilt er a mo bechil a ngelekir. Ngmesisiich el uldasu er aike el beluu el kmo a ruungalek a klou a klemedengei me a llemesel a rengrir me ngsebechel el ungil a omelilt er tir. Me chelechang a di ua taem er a Biblia, el chebechiil el moak el okiu tiaikid el rolel a blechoel el mo ungil el chebechiil. Me a omerellel a Abraham el ulderchii a mesiungel el mo osiik er a mo bechil a Isak a ungil el ulekrael el kirir a ruungalek el oltirakl er ngii. A Abraham a dimlak lomes a udoud me a deruchall el meklou a ultutelel, e ngbai mlo er a tkurrebab el sebechel el osiik er a mo bechil a Isak er a delongelir a rechad el milengull er a Jehovah. *Genesis 24:3, 67.

KE MEKERANG E MO KLTMOKL EL KIREL A CHEBECHIIL?

13-15. (a) Ngmekerang a omellach el medung er a Osisechakl 24:27 e ngosuir a chad el melatk el mo bechiil? (b) E ngera sebechel a redil el kutmeklii er a uchei er a bo lebechiil?

13 A lsekum ke mocha melatk el kirel a chebechiil e  ngungil a di lekau el oker el kmo: ‘Ngak ak mla mo kltmokl el mo bechiil?’ A nger er kau a diak el kirel el di mo ultuil er a uldesuem el kirel a bltikerreng, me a durs er a chebechiil, me a chelmengem, me a klengelakel. E le ngar er ngii a meklou a ultutelel el ngerachel el kirel a sechal me a redil el melatk er a uchei er a bo lebechiil.

14 A kekerei el chad el osiik er a mo bechil a kirel el kerekikl el melatk er tia el omellach el kmo: “Mkedmeklii a uchul a kerrekerngem, e mkedmokl a bek el tekoi er a sersem, e bochu momekedechor er a blim.” (Osisechakl 24:27) E tiang ngera belkul? A irechar e a chad el soal el mo bechiil, e meleketek er a telungalek er ngii a kirel el di ngii el oker el kmo, ‘Ngak ak mla mo kltmokl el mo bechiil e dirrek el mo oungalek?’ Ngmle kirel el omuchel el mo oureor el mengetmokl er a sersel me a lechub e ngdellemelel. Me tia el osisiu el omellach a dirrek el ungil el kired er chelechang. A chad el soal el mo bechiil a kirel el mo ungil el kutmeklii el kirel a ngerachel el bo lechelebangel. Me a klemengetel a taem el lemesisiich a bedengel e ngkirel el oureor el mengereker. Me a Tekingel a Dios a meketeklii el kmo, a chad el oumerang e diak losiik aike el ousbech a telungalek er ngii er a klechad, me a uldasu, me a omesiungir el mo er a Dios, a kuk mekngit er ngike el diak a klaumerang er ngii!Monguiu er a 1 Timothy 5:8.

15 A redil el soal el mo bechiil a dirrek el kirel el melatk el kmo, ngar er ngii a ngerechelel el olengeseu el meruul a meklou a ultutelel el tekoi er a chebechiielel. A babier er a Osisechakl a omasech a duch me a blekeradel el bechiil el redil a ousbech sel lolengeseu er a bechil el omekerreu er a telungalek er ngii. (Osisechakl 31:10-31) Me a sechal me a redil el di mereched el mo bechiil el diak lungil el kltmokl a ochotii el kmo, te di melatk er a di tir e diak lomdasu el kmo ngera ngousbech a chad el bo lebechil.  E a ngarbab er ngii el rokui, a chad el melatk el mo bechiil a kirel el mesuub el mo ungil el oltaut a omellach er a Biblia sel bo lebechiil.

16, 17. Me tirke el sorir el mo bechiil ngkirir el melatk er a ngera el omellach er a Biblia?

16 A oketmeklel a chebechiil a uldimukl er a dolebedebek a ngerachel el Dios a omekngerachel er a bechiil el sechal me a bechil. A sechal a kirel el mo medengei el kmo ngerang a ngerechelel el bdelul a delengchokl. E tia el ngerachel a diak lebsa llemeltel el mo mesisiich el mengedereder er a bechil. Ngbai kirel el mo oukerebai er a omerellel a Jesus el bdelul a ongdibel. (Efesus 5:23) Me a Kristiano el bechiil el redil me ngkirel el mo medengei a ngerechelel. Ngmo kongei el olengesenges er a bechil? (1 Korinth 11:3) Ngii el redil a mla mo chederedall er a Jehovah me a Kristus. (Galatia 6:2) Me a lsekum e ngmo bechiil e ngdirrek el kirel el mo chederedall er a bechil. Ngsebechel el mo kongei el chederedall er a diak lecherrungel el chad? A lsekum e ngmeringel er ngii tia el tekoi e ngbai ungil a lak bo lebechiil.

17 Me a lmuut el tang, tirka el teru el obekel a kirir el kltmokl el kaukerreu er a delongelir. (Monguiu er a Filipi 2:4.) A Paulus a milluches el kmo: “A re bek el sechal a kirir el betik a rengrir er a re becherir el di ua le tir, ma re bek el redil a kmal kirir el mengull er a re becherir.” A Dios a ngilsuir a Paulus el mo medengei el kmo a sechal a ousbech el mo melechesuar a dmolech el omengull er a bechil el bedulngii. Me a redil a ousbech el mo melechesuar el kmo a bechil a kmal betik a rengul er ngii.Efesus 5:21-33.

Nguchul a llomeserreng a lsekum a rechad el melatk el mo bechiil a tibir el kmo sel ledak el terung e ngkirel a ta er a chad el obengterir

18. Ngera uchul me a rechad el melatk el mo bechiil a kirir el mo ulserechakl a rengrir?

18 A skel a chebechiil a diak el klekool el tekoi. Ngtaem  el sechal me a redil a melasem el mo ungil el kaodengei me bo el sebechir el oterekeklii el kmo ngdi ungil a bo lebechiil me a lechub e ngdiak. Ngdirrek el taem el kirir el mera el mo ulserechakl a rengrir! E le sel urungulir el sorir el mo dmak a kmal mo mesisiich, e le Dios a milebid el kired el omelechesiu er tia el tekoi. Me nguaisei, engdi tirke el mera el kaubltikerreng a mengeroid er tir er a ngii di el omeruul el sebechel el tomellii a deleuill er tir me a Dios. (1 Thesalonika 4:6) Me a lsekum e ke melekoi  a chebechiil er a chad, e ngkirel el mo ulserechakl a rengum, e le ngmo uchul a klungiolem alta ke mo bechiil me a lechub e ngdiak.

NGMEKERANG A CHEBECHIIL E SEBECHEL EL MELEMOLEM?

19, 20. A osengel a Kristiano el kirel a chebechiil ngkirel el mo ngodech er a osengir a rechad er chelechang? Ka momekesiu.

19 A rubekel a kirir el mo melemalt a uldesuir el kirel a chebechiielir me bo el sebechel el melemolem. Ngar er a chelsel a babier me a mubi, e ngblechoel el mo er ngii a kmal ungil e klebokel el chebechiil er a ulebengelel, e a rechad a mera el oureng er tia el tekoi. Engdi a mera er ngii, a chebechiil a diak el ulebengelel a rokui el tekoi, e ngbai uchelel a tekoi el Jehovah a mla kutmeklii el kirel el di melemolem. (Genesis 2:24) Me ngklengiterreng, e le rechad er chelechang a kuk ngodech a osengir el kirel tia el tekoi. Ngar er a bebil el beluu e a rechad a omes er a chebechiil el ua dolibuk a kerreel. Engdi te diak lolechesuar el kmo tia el okesiu a kmal ungil el smodii a osengir el kirel a chebechiil. El mekerang? Alta e a ungil el delibuk el kerreel a sebechel el mo kmes, engdi kede medengei el kmo ngsebechel el di beot el medibuk e di beot el mekedoked.

20 A rebetok el chad er chelechang a omes er a chebechiil el di beot el tekoi. Me te di mereched el mo bechiil me bo el sebechir el ngmai a sorir er tia el chebechiil, e omdasu el kmo ngsebechir el di mereched el dortii sel lebo lemeringel a blekeradel er a chelsel. Engdi lak dobes el kmo a Biblia a omekesiu er a chebechiil el mo er a kerreel. Aike el kerreel me a ekil el lousbech a diall a kirel el mesisiich me ngdiak lemetemall el mo lmuut er sel lebo er ngii a mesisiich el oiu. Me ngdi ua chebechiil el kirel  el melemolem. Lak mobes, a Jesus a dilu el kmo: “A chad a diak le kirel el mesaod er sel bla lodekiar a Dios.” (Mateus 19:6) Me a lsekum ke mo bechiil e ngkirel el mo uaisei a uldesuem el kirel a chebechiielem. Me a chouaitia el telbiil ngrullii a chebechiil el mo meringel? Ngdiak.

21. A rebechiil, ngkirel el mo uangera osengir er a delongelir, e ngera el tekoi a sebechel el ngosuterir?

21 A bechiil el sechal me a redil a kirir el mo melemalt a osengir me a uldesuir el bedul a derta er tir. A lsekum te di dul mo kerekikl el omes aike el ungil el blekerdelir me a omerellir, e a chebechiil a sebechel el melemolem el ngar er ngii a deurreng er a chelsel. Engdi a ker a kmo, ngmera el sebechel a tang el melemolem el ungil a uldesuel el bedul ngike el tang el ngii a diak lecherrungel? A Jehovah a medengei el kmo ngdiak demecherrungel, engdi kede oumerang el kmo ngsebechel el mo ungil a uldesuel el bedulkid. A ta er a milluches er a Psalm a kmo: “Chomko ke meluches a kngtmam, e ng techa sebechel moiub el diak le medebeakl?” (Psalm 130:3) Me a rebechiil el chad a kirir el mo oba osisiu el uldasu, e dirrek el mo kausubes er a delongelir.Monguiu er a Kolose 3:13.

22, 23. Ngmilekerang a Abraham me a Sara e ochotii a ungil el kerebai el kirir a rebechiil er chelechang?

22 A cherengel a taem el lolemolem a chebechiil e ngsebechel el mo uchul a klou el deurreng. A Biblia a mesaod er a chebechiielel a Abraham me a Sara er sel taem er a lemechudelang. Ngar er a chelsel a klengar er tir e te dirrek el mlo chelebangel a ringel me a omelsemai. Ka di molatk er a Sara el locha mle bekord el 60 a rekil e mocha mengoit er a delengcheklel er sel merau el beluu er a Ur, e tuobed el mo kiei er a tento el mo lmuut er a ulebongel er a klengar er ngii. Me nguaisei, engdi ngii a millemolem  el olengesenges er a bechil el ngii a bdelul a delengchokl. A Sara a mera el mle chelmengel e ngelsuil a Abraham, e milengull a uldesuel a bechil e ullengeseu er ngii el mo otaut a tekoi el soal a lemeketmokl. E tiang a mera el mle blekerdelel, e le ngulemekedong er a bechil el kmo rubak. (Genesis 18:12; * 1 Petrus 3:6) Ngmera el ullecholt er a omengull el bedul a Abraham.

23 Me tiang a diak el belkul a kmo a Abraham me a Sara a di mle blechoel el osisiu a uldesuir er a bek el tekoi. A Sara a mle ta el ledelii a tekoi el “kmal uldkelii a rengul a Abraham.” Engdi a Jehovah a millisiich er a Abraham el mo orrenges er a bechil. Me ngkilengei el rongesii, e tiang a mlo uchul a klengeltengat el mo er a telungalek er tir. (Genesis 21:9-13) Me a rebechiil el chad er chelechang el uldimukl er tirke el mla bechiil el betok el rak a sebechir el nguu a klubelir er tirka el blak a rengrir el obekel.

24. Ngua ngera el chebechiil a oldanges er a Jehovah el Dios, e ngera uchul?

24 Ngar er a chelsel a ongdibel er a Rekristiano, e ngar er ngii a betok el telael el ungil el chebechiil, el bechiil el redil a oba dmolech el omengull el bedul a bechil, me a bechiil el sechal a oubltikerreng e mengebkall er a bechil, e te dmak el terung el nguu a soal a Dios el mo kot er a chelsel a klengar er tir. Me a lsekum ke melatk el mo bechiil, e bo mungil el melilt er a mo bechim, e mungil el kutmeklau el kirel a chebechiielem, e moleketek er a ungil e budech el chebechiielem el mo uchul a odanges el mo er a Jehovah el Dios. E sel bo muaisei, e a chebechiielem a mo ngosukau me ke melemolem el ngar er a bltikerreng er a Dios.

^ par. 11 Momes er a Ongkerongel, er a January 1, 2015, er a 30-31 el llel, parakurab 11-14, me a March 1, 2015, er a 18-20 el llel.

^ par. 12 A rebebil el mesiungel a Dios er a irechar el ua Abraham me a Jakob a mle betok a rebecherir. Me a Jehovah er a lollach e lomekrael er tir me a rechad er a Israel e ngdimlak lorrob er a omeruul el mengeroakl. Alta e ngdimlak el uchul tia el omeruul, engdi ngriruul a llach el mesaod er ngii. Me nguaisei, engdi a Rekristiano er chelechang a kirir el melatk el kmo a Jehovah a diak lekengei er a remesiungel el mo betok a rebecherir.Mateus 19:9; 1 Timothy 3:2.

^ par. 22 A doltirakl er a Genesis 18:12 er a Chedaol Biblia, e a Sara a ulemekedong er a Abraham el kmo ngbechil, engdi ngar er a tekoi er a Hebru e ngulemekedong er ngii el “rubak er ngak.”