Skip to content

Skip to secondary menu

Skip to table of contents

Resioning er a Jehovah

Palauan

Molemolem el Ngar er a Bltikerreng er a Dios

 1 EL BLIONGEL

A Belkul a Bltikerreng er a Dios

A Belkul a Bltikerreng er a Dios

“Ele bltikerreng er a Dios a belkul a kmo kede oltirakl a llechul. E a ikeikid el tekoi a diak lesal meringel er kid el meruul.”1 JOHANES 5:3.

1, 2. Ngera uchul me ngbetik a rengum er a Jehovah el Dios?

KAU ngbetik a rengum er a Dios? A lsekum ke mla tibir er a rengum el mo mesiou er a Jehovah el Dios, e ke ulterekokl el dmu el kmo chochoi. Ngkirel el mo betik a rengud er a Jehovah, e le Ngii el betik a rengul er kid. A Biblia a kmo: “Kede oubltikerreng ele Dios a mle kot el oubltikerreng el mer kid.”1 Johanes 4:19.

2 A Jehovah a ulemuchel el ochotii a bltkil a rengul el me er kid. Ngmla meskid a klebokel el chutem el mo delengchekled, e dirrek el omeskid aike el dousbech er a bek el sils. (Mateus 5:43-48) E a ngaruchei, e ngmeskid aike el dousbech el smisichii a deleuill er kid me Ngii. Ngmla meskid a Tekingel el Biblia. Ngdirrek el mengemedaol er kid el mo meluluuch el mo er ngii, e mla tibir el mo orrenges er kid e olengeseu er kid el okiu a chedaol reng er ngii. (Psalm 65:2; Lukas 11:13) Engdi sel kot el klou a ultutelel el tekoi a kmo, ngulderechii a betik er a rengul el Ngelekel el me melubet er kid er a klengit me a kodall. Me tiang a mera el olechotel a klou el bltkil a rengul a Jehovah el me er kid!Monguiu er a Johanes 3:16; Rom 5:8.

3. (a) Ngkired el mekerang me dolemolem el ngar er a bltikerreng er a Dios? (b) Ngera el klou a ultutelel el ker a kired el melatk er ngii, e kede mo metik er a nger er ngii er ker?

 3 A Jehovah a soal a dolemolem el melai a klungioled er a bltkil a rengul. E tiang a di mo ultuil er kid. A Tekingel a Dios a mengelechel er kid el kmo: “Momtebechel er kemiu el ngar a bltikerreng er a Dios, . . . e [Ngii a] mo meskemiu a diak a ulebengelel klengar.” (Jude 21) A tekoi el “momtebechel er kemiu” a ochotii el kmo ngar er ngii a kired el meruul me dolemolem el ngar er a bltikerreng er a Dios. Me a bltkil a rengud el mo er ngii a kirel el bleketakl el mocholt el okiu a omerelled,  e le ngii el uluubltikerreng el me er kid er a uchelel. Me a klou a ultutelel el ker el kired el melatk er ngii a kmo, ‘Ak mekerang e ochotii a bltkil a renguk el mo er a Dios?’ A nger a debetik er ngii er a mlukrael el tekingel a apostol el Johanes el kmo: “Ele bltikerreng er a Dios a belkul a kmo kede oltirakl a llechul. E a ikeikid el tekoi a diak lesal meringel er kid el meruul.” (1 Johanes 5:3) Ngkired el merriter a belkul aika el tekoi, e le ngsoad el ochotii er a Dios el kmo ngkmal betik a rengud er ngii.

A BELKUL A BLTIKERRENG ER A DIOS

4, 5. (a) Ngera belkul a tekoi el bltikerreng er a Dios? (b) Mosaod er a rolel e ngulemuchel el mukeroul a bltkil a rengum el mo er a Jehovah.

4 Ngera mle uldesuel a apostol el Johanes er sera ledu el kmo “bltikerreng er a Dios”? Tia el tekoi a diak losaod er a bltkil a rengul a Dios el me er kid, e ngbai bltkil a rengud el mo er ngii. Me kau, ke dirk melatk er sel taem er a lomuchel el mukeroul a bltkil a rengum el mo er a Jehovah?

A telbilel a rengud me a techolb a uchelel a klengar el olengesenges er a Jehovah e le ngbetik a rengud er ngii

5 Ka molatk er sel taem er a cho msubii a klemerang el kirel a Jehovah me a moktek er ngii e bo moumerang er ngii. Ke mlo medengei el kmo, ke mlechell el ngar er a klengit el cheroid er a Dios, engdi ngokiu a Kristus, e a Jehovah a kiltmeklii a rolel e ngsebechem el lmuut el mo cherrungel, e mo oudiukes er a diak a ulebengelel el klengar el lurridii a Adam. (Mateus 20:28; Rom 5:12, 18) Seikid e ke mlo melechesuar el kmo, a Jehovah a mla rullii a kmal klou el tekoi el ulderchii a betik er a rengul el Ngelekel el me mad el kirem. Me tia rirellau el kmal mo betik a rengum er a Dios, el ngii a mla ochotii  a klou el bltkil a rengul el kirem.Monguiu er a 1 Johanes 4:9, 10.

6. Ngmekerang e mocholt a mera el bltikerreng, e ngii el bltkil a rengum el mo er a Dios ngrirellau el mo mekerang?

6 Me tiang a di mle uchelel a bltkil a rengum el mo er a Jehovah. A bltikerreng a diak di le blekeradel me a lechub e ngdi tekoi. A mera el bltikerreng el mo er a Dios a diak el di sel dedu el kmo, “Ngbetik a renguk er a Jehovah.” A mera el bltikerreng a di ua klaumerang el mocholt el oeak a omeruul. (Jakobus 2:26) Kede olecholt er a bltikerreng sel doruul a ungil el mo er ngike el chad el betik a rengud er ngii. Me sera omomuchel el mo betik a rengum er a Jehovah, e ngmlo soam el kiei el oldeu er a rengul ngika el Demam el ngar er a eanged. Me kau, ke mla metecholb el Sioning? A leuaisei, e a bltkil a rengum me a blakerreng er kau a rirellau el mo ngiltii a kot el klou a ultutelel el tekoi er a klengar er kau. Me ke tilbir er a rengum el mo meruul a soal a Jehovah, e ulechotii a telbilel a rengum er sera obo metecholb. (Monguiu er a Rom 14:7, 8.) Me a otutel tia el telbilem el mo er a Jehovah a sebechel el obeketakl el okiu a tekoi el ledilu apostol el Johanes.

“KEDE OLTIRAKL A LLECHUL”

7. Ngera bebil er a llechul a Dios, e a otirekled er ngii nguldimukl er a ngerang?

7 A Johanes a mesaod er a belkul a bltikerreng el mo er a Dios el kmo: “Kede oltirakl a llechul.” Me ngera el llechul a Dios? A Jehovah a meskid a bebil el ileakl el llechul el okiu a Tekingel el Biblia. El ua tiang, ngolekebai a imis el omelim el rrom, me a deleboes el omeruul, me a omengull el bleob, me a omerechorech, me a blulak. (1 Korinth 5:11; 6:18; 10:14; Efesus 4:28; Kolose  3:9) Me a otirekled er a llechul a Dios a uldimukl er sel dekiei el oltirakl a bleketakl el ulekrael er a Biblia el kirel a tekoi er a kldung.

8, 9. Kede mekerang e mo medengei a soal a Jehovah el mo lmuut er a taem el blekeradel el dechelebangel er ngii a diak a bleketakl el omesodel er a Biblia? Mosaod.

8 A lsoad el oldeu er a rengul a Jehovah, e ngkired el meruul a lmuut el betok er a di dolengesenges a llechul. Ngdiak lomeskid a kmal betok el llach el kirel a bek el tekoi er a klengar er kid. Me a bek el sils e kede mo chelebangel a betok el blekeradel, el diak a llach er a Biblia el mesaod er ngii. Me kede mekerang e mo medengei a tekoi el soal a Jehovah a bo doruul? A Biblia a ngosukid el mo medengelii a uldesuel. Me sel dosuub er ngii, e kede mo medengei aike el soal me aike el tekoi el louketui. (Monguiu er a Psalm 97:10; Osisechakl 6:16-19) Kede mo medengei a uldasu me a omeruul el Jehovah a kongei. Me sel dosuub a lmuut el betok el kirel a blekerdelel me a rolel, e ngmo sebeched el kongei er Ngii me ngomekrael a tekoi el doruul. Seikid e ngmo sebeched el omtab “a soal a Rubak” el mo lmuut er a taem el diak a ulterekokl el llechul el mesaod er a blekeradel el dechelebangel er ngii.Efesus 5:17.

9 El ua tiang, a Biblia a diak a losaod a llach el kirel a osengel a mubi me a prokuram er a TV el olecholt a kdekudel el omeruul me a rolel a deleboes. Me tiang ngbelkul a kmo, ngkmal kirel el ngar er ngii a ileakl el llach el mengelechel er kid me lak domes aika el mekngit el tekoi? Ngdiak, e le kid a medengelii a uldesuel a Jehovah el kirel aika el tekoi. Ngbleketakl el melekoi el kmo: Ngii a “ouketui er ngikel soal el meruul a delengerenger.” (Psalm 11:5) Ngdirrek el kmo: A “Dios a mo oukerrekeriil a deleboes ma laokreng.” (Hebru 13:4) Me sel  dolebedebek aika el tekingel, e kede mo medengei aike el soal a bo doruul. Seikid e ngmo diak domes a chouaika el mekngit el tekoi, el ngii a omeruul el Jehovah a ouketui. Kede medengei el kmo ngkmal dmeu a rengul sel dongeroid er kid er aika el mekngit el tekoi, el beluulechad a omes el ua lungil el rolel a ongelaod. *

10, 11. Ngera uchul me kede ngiltii el mo olengesenges er a Jehovah, e tiang ngua ngera el rolel a blekongesenges?

10 Ngera sel kot el ngarbab el uchul me kede oltirakl a llechul a Dios? Ngera uchul me ngsoad el kiei er a bek el sils el oltirakl a soal? Ngdiak doruul er tia el tekoi el melatk el kmo, me lak dobals, me a lechub e bo luchul a telemelled, e le ngdimlak doltirakl a soal a Jehovah. (Galatia 6:7) Kede bai omes er a blekongesenges er kid el mo er Ngii el ua klou el techelled el ochotii a bltkil a rengud el mo er ngii. Kede di ua ngalek el soal el oldeu er a rengul a demal, me kid me ngdirrek el soad el oldeu er a rengul a Jehovah. (Psalm 5:12) Ngii a Demad me ngbetik a rengud er ngii. Ngdiak a lmuut el klou el deurreng el sebechel el mekesiur a deurreng er a chad el medengei el kmo, a “RUBAK a dmeu a rengul” er ngii.Osisechakl 12:2.

11 Me a blekongesenges er kid a diak el kirel el morimel me a lechub e ngar er ngii a soal tekoi me a chetil. * Ngdiak di el sel lebeot a tekoi me a lechub e ngsoad a tekoi e dekengei el olengesenges. Ngbai kirel  el mo ‘blak a rengud el oltirakl’ a llechul a Dios. (Rom 6:17) Me kede ua ngike el milluches er a Psalm el dilu el kmo: “Ele kmetik er a deuil a renguk er a llechum, ng kmal soak.” (Psalm 119:47) Nguaisei, ngkmal soad el olengesenges er a Jehovah. Kede ungil el medengei el kmo, ngii a rredemelel a cherrungel el blekongesenges er kid. (Duteronomi 12:32) Me ngsoad a Jehovah a bo ledu a osisiu el tekoi el kired, el ua uldesuel el kirel a Noah. Ngika el blak a rengul el chad a ulechotii a bltkil a rengul el ulekiu a blekongesenges er ngii el mo er a Jehovah el betok el rak. Me a Biblia a kmo: A “Noah a riruul a rokui el tekoi el le dilu er ngii a Dios.”Genesis 6:22.

12. Ngmekerang a blekongesenges er kid e mo odeuir a rengul a Jehovah?

12 Ngua ngera uldesuel a Jehovah el kirel a blekongesenges er kid? A Tekingel a mengelechel er kid el kmo: “Mrellii a renguk el mo ungil.” (Osisechakl 27:11) Me a blekongesenges er kid ngmera el sebechel el odeuir a rengul Ngika el kot el ngarbab el Merreder? Ngkmal sebechel! E ngar er ngii a ungil el uchul. A Jehovah a milebid el ngar er ngii a llemelted el melilt a tekoi. Me ngbelkul a kmo ngsebeched el melilt el mo olengesenges er Ngii me a lechub e ngdiak. (Duteronomi 30:15, 16, 19, 20) Me sel dengiltii el mo olengesenges er ngika el Demad el Jehovah el bltkil a rengud el mo er ngii a uchul, e kede odeuir a rengul. (Osisechakl 11:20) Kede dirrek el mo ngiltii a kot el ungil el rolel a klengar.

A LLECHUL “A DIAK LESAL MERINGEL”

13, 14. Ngera me ngsebeched el melekoi el kmo a llechul a Dios “a diak lesal meringel,” e mekerang a domekesiu er ngii?

13 A apostol el Johanes a ouchais er kid a ungil el  tekoi el kirel a llechul a Jehovah el kmo: A llechul “a diak lesal meringel.” A tekoi er a Grik el moiuid el “meringel” el ngar er a 1 Johanes 5:3 a belkul a kmo “oberaod.” * A ta er a oidel a Biblia a kmo: “A llechul a diak lomekberaod er kid.” (New English Translation) Me a llechul a Jehovah a tabesul, el sebechir a rediak lemecherrungel el chad el mo olengesenges.

14 El ua tia el okesiu. A sechelim a olengit a ngeso er kau el mo melukl a kloklel el mo er a ta er a basio, e kmal betok a baks el kirel el melukl. A bebil er ngii a mekebekakl me ngsebechel a di ta el chad el mengider, e a kuk bebil a kmal oberaod me ngousbech er a reteru el chad el mengider. Me ngmo ngmilt a baks el soal a obo mongider. Omomdasu e ngmo oldurech er kau el mengider a baks el lodengei el kmo ngkmal oberaod? Ngdiak, e le ngdiak el soal a di lekau el tang el mengider e metemall. Me ngdi osisiu, a betik a rengul el Dios a diak lomeskid a kmal meringel el llach me bo lemeringel er kid el oltaut. (Duteronomi 30:11-14) Ngdiak el sebechel el oldurech er kid el mengider a kmal oberaod el telechull. Ngii el Jehovah a ungil el medengei a chelitechetud, e le “ng medengei el kmo kede rruul er a ngerang; ng melatk el kmo kid a di chebechab.”Psalm 103:14.

15. Ngera uchul me ngulterekokl a rengud el kmo, a llechul a Jehovah a di mo uchul a klungioled?

15 A llechul a Jehovah a diak lomekberaod, e ngbai  mo uchul a klungioled. (Monguiu er a Isaia 48:17.) Me a Moses a dilu er a rechad er a Israel el kmo: “A RUBAK el Dios er kid a dilu er kemam maki olengesenges a ikal llach el rokui e meluu er ngii. Aki bo mua isei, e ng mo blechoel el mengkar er a beluad e kudmeklii me ng di ungil.” (Duteronomi 6:24) Me ngulterekokl a rengud el kmo, sel lomeskid a llechul a Jehovah, e ngkmal melatk er kid me aike el mo uchul a klungioled er a ngar er medad el taem. E ngii el llechul a diak el sebechel el mo uchul a telemelled. Ngkmal dmolech a llemesel a rengul a Jehovah, me ngungil el medengei aike el mo uchul a klungioled. (Rom 11:33) Ngii a dirrek el kot el ngarbab el kerebai el kirel a bltikerreng. Me a bltikerreng a uchetemel a rokui el tekingel me a omerellel, e dirrek el uchetemel a llach el lomesterir a remesiungel.1 Johanes 4:8.

16. Ngmekerang e sebeched el melemolem el olengesenges, alta e ngdiak demecherrungel e kiei er a chelsel tia el mekngit el beluulechad?

16 Me ngdiak el belkul a kmo, ngbeot el tekoi a dolengesenges er a Dios. Ngkmal kired el oltngakl a omengesuseu er tia el mekngit el beluulechad el “ngar eungel Ngikel Mekngit.” (1 Johanes 5:19) Ngdirrek el kired el oltngakl er a diak lecherrungel el klechad er kid el rullid el mo melemall a llechul. (Rom 7:21-25) Engdi a bltkil a rengud el mo er a Jehovah a sebechel el rullid el mo mesisiich er aika el tekoi. E Ngii a omekngeltengat er tirke el sorir el olecholt a bltikerreng el mo er ngii el okiu a blekongesenges er tir. Ngdirrek el mesterir a chedaol reng “tirkel olengesenges er ngii.” (Rellir 5:32) Tia el klisiich a mekdubech a ungil el blekerdeled el sebechel el ngosukid me kede melemolem el olengesenges er ngii.Galatia 5:22, 23.

17, 18. (a) Ngera kede mo mesaod el ngar er tia el babier? E ngera el tekoi a kired el melatk er ngii? (b) Ngera kede mo mesaod er a ongingil el bliongel?

 17 Ngar tia el babier, e kede mo mesaod a omellach me a llechul a Jehovah el kirel a tekoi er a kldung me a lmuut el bebil er a tekoi. Me sel dosaod aikang, e ngkired el melatk a bebil el meklou a ultutelel el tekoi. A Jehovah a diak lorrimel er kid el mo oltirakl a llechul me a omellach er ngii, e ngbai soal a dolengesenges er ngii e le ngbetik a rengud er ngii. Me lak dobes el kmo, a Jehovah a soal a dekiei el rolel a klengar er kid a mo uchul a klungioled er chelechang me a diak a ulebengelel el klengar. Me bo domes er a blekongesenges er kid el ua letechelled el ochotii el mo er a Jehovah el kmo, ngkmal betik a rengud er ngii.

18 Ngoeak a bltkil a rengul a Jehovah e ngmla meskid a ukltked el ngosukid el mo meduch el kutukel a ungil me a mekngit. Engdi a ukltked a mo ungil el omekrael er kid a lsekum ngmosisechakl er a melemalt el rolel, el ua bo losaod er ngii a ongingil el bliongel.

^ par. 11 A remekngit el anghel a dirrek el sebechir el olengesenges el diak el mera el ngar er a rengrir. Sel taem el Jesus a uleldik er tir me letobed er a rechad, e te mle medengelii a klisichel a dereder el lulebang a uchul, me te mlorimel el tuobed el dimlak lungil er a rengrir.Markus 1:27; 5:7-13.

^ par. 13 Ngar er a Mateus 23:4 e ngmesaod er a tekoi el “oberaod el telechull,” el ngii a betok el di llecherir me a siukang er a rechellimosk er a llach me a Refarisi el ulemekberaod er a rechad. E tia el osisiu el tekoi a moiuid el “tebelik” el ngar er a Rellir 20:29, 30, el melutk el kirir a remekngit el sensei el “omulak e mengetikaik” er a rechad.