Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGETERUICH ME A ONGEIM EL BLIONGEL

Omengull el Kengei er Ngii a Dios

Omengull el Kengei er Ngii a Dios

A rokui el klechelid ngoldeu er a rengul a Dios?

Kede mekerang e dongchii a mera el klechelid?

Te rua techang a mera el mengull er a Dios el ngar tia el chutem er a chelecha el sils?

A JEHOVAH el Dios a betik a rengul er kid e soal a dolai a klungioled er a ulekrael el lomeskid. A dongull er ngii el ngar er a mera el rolel, e ngmo dmeu a rengud e choibngid er a betok el mondai er a klengar. Ngdirrek el sebeched el ngmai a klengeltengat me a ngeso el mla er ngii. (Isaia 48:17) Ngkmal betok el klechelid a melekoi el kmo te olisechakl a klemerang el kirel a Dios. Engdi ngkmal kakerous a osisecheklir el kirel a kmo ngtecha Dios e ngera soal a bo doruul.

2 Ke mekera e mo medengelii a melemalt el rolel a omengull el mo er a Jehovah? Ngdiak a belkul el mosuub e momekesiu a osisechakl er a rokui el klechelid. Ngdi ngkirem el suubii el kmo ngerang mera el lolisechakl a Biblia el kirel a mera el omengull. El ua tiang: Ngar er a betok el beluu, e ngngar er ngii a mondai er a usbechel a diak el mera el udoud. A lsekum te milskau a ureor el mo meleakl ngii el diak el mera el udoud, e ke mo mekerang? Ngkirem el mo medengei a rokui el diak el mera el udoud? Ngdiak. Ngbai klungiolem a omchoit a temem el suubii a mera el udoud. E le obo modengelii a mera el udoud e ngmo beot er kau el dmangch a diak el mera el udoud. Me ngdi osisiu, a dosuub el mo medengei a olengchelel a mera el klechelid, e ngmo sebeched el mes a klsuul el klechelid.

3 Ngklou a ultutelel el dongull er a Jehovah er a rolel el lekengei er ngii. Te betok a oumerang el kmo a rokui el klechelid a oldeu er a rengul a Dios, engdi a Biblia a diak el olisechakl el uaisei. Ngdirrek el diak el sebechel a chad el di melekoi el kmo ng Kristiano e lungiang. A Jesus a dilu el kmo: “Ngdiak el tirikel rokui el dmu er ngak el kmo, ‘Rubak, Rubak,’ a mo soiseb ra rengedel a eanged, ngdi tirikel meruul a soal a Demak el ngara eanged a mo soiseb.” Me a leuaisei, e a lsoad el mo nguu a kengei er a Dios e ngkmal kired el mo medengei el kmo ngera soal a doruul e mo meruul. A Jesus a ulemekedong er tirke el diak loruul a soal a Dios el kmo te “meruul a chelebirukel.” (Matteus 7:21-23) Me ngua aike el diak el mera el udoud, a klsuul el klechelid a diak a ultutelel e bai kmal klou a letemellii.

4 A Jehovah a mesterir a rokui el chad a techall el mo nguu a diak a ulebengelel el klengar. Engdi a bo dekiei el diak a ulebengelel el ngar er a Paradis, e ngkired el mengull er a Dios el ngar er a melemalt el rolel me a blekerdelel a klengar er kid er a chelechang a lekengei er ngii. Engdi te kmal betok a diak el kengei er tiang. Sei a uchul me a Jesus a dilu el kmo: “Bo msiseb er chobutek el siseball; e a siseball el mora tellemall a klou, ma rael er ngii a meteu, me te betok ar chad el soiseb er ngii. E a siseball el mora klengar chobutek, ma rael er ngii a kekerei, me te mekesai ar chad el metik er ngii.” (Matteus 7:13, 14) A mera el klechelid a omekrael el mo er a diak a ulebengelel el klengar, e a klsuul el klechelid a omekrael el mo er a tellemall. A Jehovah a diak el soal a bo el metemall a ngii di el chad a uchul e ngomesterir a rokui a techall el mo mesuub el kirel. (2 Petrus 3:9) Me a rolel a dongull er a Dios a mera el sebechel el mo uchul a klengar me a lechub a kodall el kired.

A ROLEL A DEDENGCHII A MERA EL KLECHELID

5 Ngmekera e sebeched el metik er a ‘rael el mora klengar’? A Jesus a dilu el kmo a mera el klechelid a mo bleketakl el loeak a rolel a klengar er a rechad er ngii el klechelid. Ngdilu el kmo: “Kom dongcheterir era rodech er tir.…Nguaisei el bek lungil kerrekar chourodech a ungil rodech.” (Matteus 7:16, 17) Me tirke el ngar er a mera el klechelid a sebeched el dongcheterir el oeak a klaumerang er tir me a blekerdelir. Me alta ngdiak el mecherrungel e mo meruul a cheleuid, engdi a rengar er a mera el omengull a dmak el ua ta el cheldebechel e osiik el mo meruul a soal a Dios. Ka me bo domes a elolem el tekoi el olengchelir a rengar er a mera el klechelid.

A REMENGULL ER A MERA EL DIOS

  • a otuil a osisecheklir er a Biblia
  • a mengull er a di ta el Jehovah e olecholt er a ngklel
  • a kaiuecholt a mera el bltikerreng er a delongelir
  • a kongei er a Jesus el kmo ngngii a osobel el lebilskid a Dios
  • a diak el teloi er tia el beluulechad
  • a omerk er a Rengedel a Dios el kmo ngdi ta el omelatk el kirir a rechad
Kakerous el bedengir a rechad el mengull er a Dios

6A rechedal a Dios a melai a rokui el osisecheklir er a Biblia. A Biblia a di ngii el kmo: “Ele chedaol Llechukl el rokui a melluches luleak a [r]eng ra Dios, me ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt, el kirel ma chad ra Dios bo lsiich a kedmeklel el kirel a ungil lurreor, me le mekedmokl el mecherrungel.” (2 Timoteus 3:16, 17) Me a loluches el mo er a rekldemel el Kristiano, e a apostol el Paulus a dilu el kmo: “Ser cho mrenges a tikingel a Dios el ki mulsisechakl er kemiu e kom ngilai el tikingel a Dios, el diak le ua ltikingel a chad, e ngmeral tikingel a Dios.” (1 Thesalonika 2:13) Me seikid, e a klaumerang me a tekoi el loruul a rengar er a mera el klechelid a diak el oeak a osengir a rechad me a lechub e ngsiukang er a beluu, e ngbai mlengai er a Tekingel a Dios, el Biblia.

7 A Jesus Kristus a rirellii a ungil el kerebai el blechoel el melai a osisecheklel er a Tekingel a Dios. Me a loluluuch el mo er a Demal, e ngdilu el kmo: “A tikingem a klemerang.” (Johanes 17:17) Nguluumerang er a Tekingel a Dios, me a rokui el tekoi el lullisechakl a uleltirakl a Bades. Ngmle blechoel el melekoi el kmo: “Ngellechukl el kmo.” (Matteus 4:4, 7, 10) E a uriul e ngmo melekoi a tekoi el llechukl er a bades. Me ngdi osisiu, a rechedal a Dios er a chelecha el sils a diak el lolisechakl a di uldesuir. Te oumerang el kmo a Biblia a Tekingel a Dios, me te ousbech er ngii el uchetemel a rokui el osisecheklir.

8A rengar er a mera el klechelid a mengull er a Jehovah el di ngii el tang, e olecholt er a ngklel. A Jesus a dilu el kmo: “Bo mongull el meluluuch ra [Jehovah] el Dios er kau, e di le ngii cho mosiou er ngii.” (Matteus 4:10) Me a remesiungel a Dios a di ta el Jehovah a longull er ngii. Tia el omengull a uldimukl er ngii a bo louchais er a ngklel me a blekerdelel el mo er a rokui el chad. A Psalm 83:18 a kmo: “Ng di kau el tang a RUBAK, ke ngarbab el merreder er a beluulchad el rokir.” A Jesus a kiltmeklii a kerebai er a lolengeseu er a rebebil el mo medengelii a Dios, el ua lullekoi er a nglunguchel el kmo: “Ak mla mo ochotii a ngklem er tirikel chad el mngiliiteterir ra belulechad el meskak.” (Johanes 17:6) Me a remera el mengull er a chelecha el sils a olisechakl er a rebebil el kirel a ngklel a Dios, moktek er ngii, me a blekerdelel.

9A rechedal a Dios a olecholt er a merang e diak a chelechei er ngii el klaubltikerreng er a delongelir. A Jesus a dilu el kmo: “Cho bo mkaubltikerreng, e te mo medengelkemiu a rokuil chad el kmo kom [o]bengkek.” (Johanes 13:35) A rekot el Kristiano a mla er ngii a chouaisei el klaubltikerreng er a delongelir. A klaubltikerreng el oltirakl er a Dios a sebechel el mo mesisiich er a klekakiakl er a bedengir a rechad, deruchellir er a buai, me a lechad er ngii el beluu, e rulleterir el mo dmak el ngar er a mesisiich el diak el metemall el ochull er a mera el klodam. (Kolose 3:14) A rengar er a klsuul el klechelid a diak a chouaisei el bltikerreng er a klodam er a delongelir. Kede mekera e medengei? E le tir el omekoad er a rebebil er tir el kuk ngodech a rekebelurir me a lechub a kleblillir. A remera el Kristiano a diak el bo er a mekemad el mo omekoad er a rudam er tir el Kristiano me a ngii di el chad. A Biblia a kmo: “Itiaikid a meketeklii a klekakerous erar ngelekel a Dios mar ngelekel a [D]iabelong el kmo: ngikel diak loruul a llemalt a dimlak le ngara Dios el mei, me ngikel diak le betik a rengul er chodam er ngii me nguaisei…ngkired el mo dul kaubltikerreng, e lak bo de ua Kain el mlar ngikel mekngit el mei, me ngmilekodir a chochellel.”―1 Johanes 3:10-12; 4:20, 21.

10 Ngulterekokl el mera el bltikerreng a ousbech er a lmuut el klou er a di bo lak domekoad er a rebebil. A remera el Kristiano a mera el ngar er a rengrir e ousbech a temir, klisichir, me a kloklir, el kaingeseu e kasisiich er a delongelir. (Hebru 10:24, 25) Te kaingeseu er a delongelir sel lengar er ngii a meklou el chelebuul me a tellemall er a beluu, e bleketakl a omerellir el mo er a rechad. Te oltaut er a klengar er tir sel omellach el ngar er a Biblia el kmo ‘moruul a ungil el mora ngiidil chad.’―Galatia 6:10.

11A remera el Kristiano a kongei er a Jesus Kristus el kmo ngngii a rolel a osobel el mla er a Dios el mei. A Biblia a kmo: “Ngdiak cholsobel el ngara ngodech, ele ngdiak a ngodech el ngakl el ngar cheungel a eanged el le bilsterir ar chad el bo de sobel er ngii.” (Rellir 4:12) Me ngua aike el dules er a 5 el Bliongel, a Jesus a uldersii a klengar er ngii el olubet el kirir a rebekongesenges el chad. (Matteus 20:28) Me a dirrek, ngii a telutk el King er a Dios el ngar er a Rengedel el ngar er a eanged e mengedereder er a beluulechad. A Dios a dirrek el soal a bo dolengesenges er ngii e doltirakl a osisecheklel a lsoad a diak a ulebengelel el klengar. Sei a uchul me a Biblia a kmo: “Me ngikel oumera ra Ngalek a mo oba diak a ullebengelel klengar; e ngikel diak lolengesenges ra Ngalek a diak bo lesa klengar.”―Johanes 3:36.

12A remera el mengull er a Dios a diak el teloi er a beluulechad. Sera lengar er a kerrekeriil er a medal a Pilatus el chad er a Rom el milerredel, e a Jesus a dilu el kmo: “A rengedek a diak le ngar tial belulechad.” (Johanes 18:36) Me a ngii di el beluu el lekiei er ngii, a remera el oltirakl er a Jesus a chederedall er a Rengedel el ngar er a eanged, me te melemolem el diak bo el teloi er a balatiks er tia el beluulechad me a ngii di el klautok er a chelsel. Me nguaisei, engdi a remengull er a Jehovah a diak bo loruul a ngii di el ngerang el mo merrob er a rebebil er a omelilt er tir el mo soiseb er a cheldebechel er a balatiks, me a lechub e te remurt el mo er a deruchall er a omerredel, me a lechub e te sengkio. Me alta remera el mengull er a Dios a diak lolab el mo er a ngii di el chelechad er a balatiks, engdi te kerekikl el oltirakl a mla moterekokl el llach er a beluu. E ngerang? E le Tekingel a Dios a mellach er tir el mo “olengesenges ra klisiich el ngar chomerreder” er a kabelment. (Rom 13: 1) Engdi sel lebo leketouch a tekoi el soal a Dios a doruul me a tekoi el longerechir er ngii a kabelment, e te mo oltirakl a kerebai er a rechapostol er a ledu el kmo: “Ngkired loltirakl ra Dios ra bai doltirakl rar chad.”―Rellir 5:29; Markus 12:17.

13A remera el oltirakl er a Jesus a omerk el kmo ngdi ta el Rengedel a Dios a omelatk el kirir a rechad. A Jesus a dilu el kmo: “Tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (Matteus 24:14) Me a remera el oltirakl er a Jesus Kristus a diak lolisiich er a rechad el mo omes er a remerreder er a klechad el kirel a semecheklel a mondai er tir, e te bai omerk el kmo a Rengedel a Dios el ngar er a eanged a di ta el seikid a omelatk el kirel a klechad. (Psalm 146:3) A Jesus a ullisechakl er kid el mo meluluuch el kirel a cherrungel el kabelment el kmo: “A rengedem le mei, ma uldesuel a rengum le meruul ra belulechad el ua chomerellel ra eanged.” (Matteus 6:10) A Tekingel a Dios a uluuchais el kmo tia el Rengedel a eanged a mo “okngemed a ikel bebil er a renged el rokui [el mengedereder er a chelechang] e sola e ngii a mo medechel el mo cherechar.”—Daniel 2:44.

14 Me a domtab aika el bla desaod, e di lekau el oker er kau el kmo: ‘Ngngera el cheldebechel er a klechelid a melai a rokui el osisecheklel er a Biblia e olecholt er a ngklel a Jehovah? E olecholt er a rolel a bltikerreng el kengei er ngii a Dios, me a klaumerang el ngar er a Jesus, e diak el teloi er a beluulechad, e omerk el kmo a Rengedel a Dios a di ta el omelatk el kirir a rechad? A domes a rokui el cheldebechel er a klechelid el meliuekl er a beluulechad, e ngngera er ngii a meruul aikang?’ Ngbleketakl el kmo te Sioning er a Jehovah.—Isaia 43:10-12.

A omosiou er a Jehovah el obengterir a rechedal, e ke mo ngmai a lmuut el betok er aike el bo moriid

Kakerous el bedengir a rechad el kausechelei

NGERA KE MO MERUUL ER NGII?

15 A di dedu el kmo kede oumerang er a Dios e ngdiak el di el seikid e lungiang el loldeu er a rengul. E le Biblia a melekoi el kmo ngmo lmuut er a remekngit el anghel me te oumerang el kmo ngngar er ngii a Dios. (Jakobus 2:19) Engdi ngbleketakl el diak loruul a soal a Dios e diak el oba kengei er ngii. Me a bo lekengei er kid a Dios, e ngdiak di doumerang el kmo ngmera el ngar er ngii e lemerekong e ngdirrek el kmal kired el mo meruul a soal. Ngdirrek el kired el mo cheroid er a klsuul el klechelid e smisichid el orekedii a mera el omengull.

16 A apostol el Paulus a ulechotii el kmo ngkmal diak el kired el mo teloi er a klsuul el omengull. Ngmilluches el kmo: “Misei, e ngdilu Rubak el kmo, ‘mtobed ra chelsir el mo cheroid er tir, e lako morreek a idokel; me kngiikemiu.’ ” (2 Korinth 6:17; Isaia 52:11) Me a remera el Kristiano a mengeroid er tir er a ngii di el ngerang el chelsechusem er a klsuul el omengull.

17 A Biblia a olecholt el kmo a rokui el bedengel a klsuul el klechelid a uldimukl er a “Kloul Babilon.”* (Chocholt 17: 5) Tia el ngakl a mekltkid er a mats er a Babilon er a irechar, el mleuuchel er ngii a klsuul el klechelid er a uriul er a ieleb er a sils er a Noah. Ngbetok el osisechakl me a omeruul el debetik er a chelsel a klsuul el klechelid a mleuuchel er a Babilon er a irechar. El ua tiang, a rechad er a Babilon a milengull a Trinidad, me a lechub e te uldekial a tedei el dios el di mo tang. Chelecha el sils, e a Trinidad a kmal klou a ultutelel el osisechakl er a betok el klechelid. Engdi a Biblia a bleketakl el lolisechakl el kmo ngngar er ngii a di ta el mera el Dios, el Jehovah, me a Jesus Kristus el Ngelekel. (Johanes 17:3) A rechad er a Babilon a dirrek el uluumerang el kmo a rechad a ngar er ngii a delbengir el sel lemad a bedengir e ngii a tuobed e di melemolem el ngar. Chelecha el sils, e a klaumerang el kirel a deleb me a lechub e ngreng el diak el mad e sebechel el mo chuarm er a beluu er a ngau a osisechakl el debetik er ngii er a oumesingd el klechelid.

18 Me a omengull er a Babilon er a irechar a mla oberk er a beluulechad el rokir a uchul, e a Kloul Babilon a sebeched el kmo ngmelutk er a cheldellel a klsuul el klechelid er a beluulechad el rokir. A Dios a ulemlaoch el kmo tia el cheldellel a klsuul el klechelid a mo uker er a di mereched el tellemall. (Chocholt 18:8) Ngsebechem el mesa uchul me ngkmal klou a ultutelel el meklau el mo cheroid er a ngii di el keskelel a Kloul Babilon? A Jehovah el Dios a soal kau a ‘chomtobed er a chelsel’ el di mereched er a chelechang el dirk el ngar er ngii a taem el sebechem el meruul el uaisei.—Chocholt 18: 4.

19 Sel omtibir el mo diak moruul a tekoi el loruul a klsuul el klechelid, e a rebebil a mo diak el sorir el obengkem. Engdi a omosiou er a Jehovah el obengterir a rechedal, e ke mo ngmai a lmuut el betok er aike el bo moriid. Me ngua rekot el disaiplo er a Jesus el chiloit a bebil er a tekoi e mlo oltirakl er ngii, e kau me ngmo er ngii a rebetok el odam me a rudos er kau el kldemem er a klaumerang. Ke mo chedal a klou el telungalek er a rebetok el miliol el mera el Kristiano el meliuekl er a beluulechad el tir a olecholt er a mera el bltikerreng el eko er kau. Ngdirrek el mo er ngii a kmal ungil el omeltkem el mo kiei el diak a ulebengelel er a chelsel “sel mei el belulechad.” (Markus 10:28-30) E a lorael a taem el mei, e tirke el chilitau el klaumerang er kau a uchul a locha mo sebechir el mesa el kmo ngera ngolisechakl a Biblia e dirrek el mo mengull er a Jehovah.

20 A Biblia a olisechakl el kmo a Dios a di kmedung e ngmo okngemedii tia el mekngit el blekeradel er a beluulechad e mo mtechir er a melemalt el beches el blekeradel el ngar er a cheungel a omengederederel a Rengedel. (2 Petrus 3:9, 13) Ngkmal mo mengasireng a blekeradel er a beluulechad er isel taem! E ngar er a chelsel isei el melemalt el beches el blekeradel, e ngmo er ngii a di ta el mera el klechelid, me a di ta el mera el bedengel a omengull. Tiang diak el rolel a llomeserreng a lsekum ke mo meruul aike el meklou a ultutelel el tekoi el bo moruul e ngmo sebechem el mo teloi er a rengar er a mera el omengull er a chelecha el taem?

AIKE EL LOLISECHAKL A BIBLIA

  • Ngngar er ngii a di ta el mera el klechelid.—Matteus 7:13, 14.
  • A mera el klechelid a medangch el oeak a osisecheklel me a tekoi el loruul.—Matteus 7:16, 17.
  • A Resioning er a Jehovah a mengull el ngar er a rolel el kengei er ngii a Dios.—Isaia 43:10.

*  Lmuut el bebil er a omesodel a Kloul Babilon el omtechei er a cheldellel a klsuul el klechelid er a beluulechad, a ngar er a Bebil er a Omesodel.


Aike el Ker er a Suobel

1. Ngera el klungiaol a bo dengai a dongull er a Dios el ngar er a melemalt el rolel?

2. Kede mekera e suubii a melemalt el rolel a omengull el mo er a Jehovah, e ngera el okesiu a ngosukid el mo medengelii tiang?

3. Ngdi ua ledilu Jesus, ngngera kired el meruul er ngii a lsoad a kengei er a Dios?

4. Ngngera belkul a tekingel a Jesus el kirel aike el teblo el rael, e rael el mo er ker?

5. Kede mekera e dongcheterir a rengar er a mera el klechelid?

6, 7. Ngua ngera osengir a remesiungel a Dios el kirel a Biblia, e ngera kerebil a Jesus el kirel tiang?

8. Ngera uldimukl er a omengull er kid el mo er a Jehovah?

9, 10. Te mekerang a remera el Kristiano a lekaiuecholt a bltikerreng er a delongelir?

11. Ngera me ngkired el kongei er a Jesus Kristus el kmo ngngii a rolel osobel el mla er a Dios?

12. Ngera uldimukl er tia el kmo ngdiak deteloi er a beluulechad?

13. A remera el oltirakl er a Jesus ngua ngera osengir er a Rengedel a Dios, me te mo mekerang?

14. Ngera el klechelid a omoumerang el kmo ngoltirakl aike el kirir el meruul a rengar er a mera el omengull?

15. Ngera soal a Dios a doruul el uldimukl er a klaumerang er kid er ngii?

16. Kede mekerang aike el tekoi el rullid el mo teloi er a klsuul el klechelid?

17, 18. Ngera “Kloul Babilon,” e ngera me ngorechudel el de ‘tobed er a chelsel’?

19. Ngera ke mo ngmai el oeak a omesiungem el mo er a Jehovah?

20. Ngera ngar er ngii er a ngar er a medad el kirir a rengar er a mera el klechelid?