Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

Ngtiaikid a Mle Telbilel a Dios?

Ngtiaikid a Mle Telbilel a Dios?

MONGUIU a ngii di el simbung. Momes a TV, me a lechub e morrenges a razio. Ngkmal betok a chisel a delengerenger, me a mekemad, me a kdekudel el tekoi el duubech el oeak a reterrorist. Ka kuk bo molebedebek a di mondai er kau. A secherel me a lechub a kodellel a betik er a rengum a locha uchul a klou el ringelel a uldesuem. Ke locha mo melechesuar el kmo ke ua ngike el ungil el chad el Job er a lolekoi el kmo a chelebulel a “kuk oberaod er a chelechol er a rriil.”―Job 6:2, 3.

Di el kau el oker er kau el kmo:

  • Tiaikid ngmle telbilel a Dios el kirek me a klechad el rokir?
  • Ak metik a ngeso er ker el kirel aike el chetituokel er a klengar er ngak?
  • Ngngar er ngii a omelatk el kirel a taem el mo sebeched el mesa budech er a beluulechad?

A Biblia a meskid a kmal el ungil el nger er aika el ker.

A BIBLIA A OLISECHAKL EL KMO A DIOS A MO REMUUL A CHOUAIKA EL OMELODECH ER TIA EL CHUTEM.

A chuodel el chad el luueta el mo ngeasek

“E mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak.”—Chocholt 21:4


A chitechut el redil el mocha sebechel el remurt

“A re chitechut a mo melechesokl e meloik.”—Isaia 35:6


A meiko el chad el luueta el mocha omes

“A re meiko a mo sebechir el omes.”—Isaia 35:5


A redil el kmal dmeu a rengul el omes er a betik er a rengul el luueta el me ngar

“Tirikel rokui el ngara debull, me te tuobed.”—Johanes 5:28, 29


A smecher el buik el mocha mesisiich a bedengel

“Ng mo diak a tal chad el kiei er a beluad el lmuut el mo mengeremrum el kmo ng smecher.”—Isaia 33:24


Sers er a wheat

“Bo le betok a redechel a wheat er a beluu.”—Psalm 72:16


MNGA KLUNGIOLEM ER AIKE EL LOLISECHAKL A BIBLIA

Teru el chad el mesuub a Biblia

Lak di mereched el mo omdasu el kmo a tekoi el mocholt a kora di urungulir a rechad e merekong. A Dios a tilbir el mo kutmokl a chouaisei el blekeradel, e a Biblia a smodii el kmo ngmekera bo el loruul el uaisei.

Engdi a Biblia a remuul a lmuut el betok el tekoi. Ngmeskau a kiis el mo er a klengar el ngar er ngii a mera el deurreng er ngii er a chelechang. Ka bo mtelkib el melebedebek aike el ngar er ngii el sebekreng me a mondai er a klengar er kau. Ngsebechel el mo uldimukl er ngii a tekoi er a udoud, mondai er a telungalek, secherel a bedenged, me a lechub a kodellel a betik er a rengud. A Biblia a sebechel el ngosukau el mo outekangel me a lechub e ke mesmechokl a mondai er kau er a chelecha el taem, e sebechel el chemolodii a rengum sel longer a ker el ua aika el kmo:

  • Ngera uchul me kede mo chuarm?
  • Kede mekera e mo outekangel me a lechub e kede mesmechokl aike el sebekreng er a klengar er kid?
  • Ngmekera e sebeched el lmuut el kilungii a deurreng er a chelsel a klengar er a telungalek er kid?
  • Ngera duubech el mei er kid sel demad?
  • Ngsebeched el lmuut el mo meseterir a rulekoad el betik er a rengud?
  • Kede mekerang e mo ulterekokl a rengud el kmo a Dios a mo oltaut a telbilel el kirel a ngar er a medad el klebesei?

Tia el kau a menguiu er tia el babier er a chelechang a olecholt el kmo ngsoam el mo medengei a lolisechakl a Biblia. E tia el babier a sebechel el ngosukau. Mutebengii el kmo a ker el kirel a bek el parakurab a llechukl er iou er a bek el llel tia el babier. A rebetok el miliol el chad a dmeu a rengrir el ousbech a ker me a nger el teletelel a omesuub a losaod er a Biblia el obengterir a Resioning er a Jehovah. Me aki oureng el kmo kau me ke dirrek el mo uaisei. Bo el sebechel a Dios el omekngeltengat er kau sel moldeu er a rengum er a ungil el omesubem er aike el tekoi el mera el lolisechakl a Biblia!

BO MODENGELII A BIBLIA ER KAU

A Biblia

NGNGAR er ngii a 66 el hong me a babier el dmak e rullii a uldekial a Biblia el rokir. A derta me a derta er aikang a blii el mo meklou el bliongel me a mekekerei el bades el kirel me lebeot a dosiik a tekoi er a chelsel. Me tia el babier sel loluches a bades, e sel kot el ochur el llechukl er a bita er a ngklel a hong er a Biblia a melutk er a klou el bliongel er a chelsel ngii el hong me a lechub e ngbabier, e sel ongingil el ochur a melutk er a kekerei el bades er a chelsel sel bliongel. El di ua tiang, a lsekum e ngellechukl a “2 Timoteus 3:16,” e ngbelkul a kmo ongeru el babier el mo er a Timoteus, 3 el klou el bliongel, 16 el kekerei el bades.

Ngsebechem el mereched el mo smau er a usbechel a Biblia el oeak sel momes a derta me a derta el bades el ousbech tia el babier. Ngera me ngdiak dilerrek el mrellii a temem el mo sebechem el menguiu er a Biblia er a bek el sils? A omonguiu a bekord edei el mo er a eim el bliongel er a ta el sils, e ngsebechem el chiuii a Biblia el rokir er a chelsel a ta el rak.

MOSUUB A LMUUT EL BETOK

Molengit a Diak Locheraol el Omesubel a Biblia

Ngera Meketmokl er a Omesubel a Biblia?

Meliuekl er a beluulechad el rokir, e a Resioning er a Jehovah a merael a chisir el kirel a prokuram er a omesubel a Biblia el loruul er ngii el obengterir a rederta el chad el diak locheraol. Mesa rolel a lemeketmokl.