Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

Ngtecha Mihael el Bderrir a Rechanghel?

Ngtecha Mihael el Bderrir a Rechanghel?

NGIKE el anghel el okedongall el Mihael a diak el blechoel el losaod el kirel el ngar er a Biblia. Engdi, sel ta el losaod el kirel e ngblechoel el ngar er ngii a tekoi el loruul er ngii. Ngar er a babier er a Daniel, e a Mihael a oldechelakl er a remekngit el anghel, e a babier er a Judas e ngkautok ngii me a Satan, e a lengar er a Chocholt e ngoumekemad er a Diabelong me a remekngit el anghel er ngii. Me a losebechakl er a omengederederel a Jehovah el okeuad er a recherrouel a Dios, e ngika el Mihael a kmal loltaut er a belkul a ngklel el kmo: “Ngtecha ua Dios?” Engdi ngtecha Mihael?

Sel lebebil, e te ngar er ngii a rechad el dodengelterir er a betok el ngklir. El ua tiang, a Jakob a dirrek el ble lodengelii a ta er a ngklel el Israel, me a apostol el Petrus a dirrek el mle Simon. (Genesis 49:1, 2; Matteus 10:2) Me ngosisiu, a Biblia a ochotii el kmo a Mihael a ta er a ngklel a Jesus Kristus, el luluusbech er ngii er a uchei me a uriul er a klengar er ngii er tia el chutem. Ka me bo domes a bebil er a tekoi el medung er a Bades el ngosukid el mo omdasu el uaisei.

Bderrir A Rechanghel. A Tekingel a Dios a omekedong er a Mihael el “bderrir ar anghel.” (Judas 9) Mutebengii a bades sel du el kmo a ‘bderrir a rechanghel’ el lolecholt el kmo ngika di chimong el anghel el uaisei, me tia el tekoi el "bderrir ar anghel” sel debetik er ngii er a Biblia e ngdi blechoel el di melekoi er a ta el chelechad, el diak a ta el taem el bo lolekoi el kirir a rebetok. Me a lmuut el tang, a Jesus a blechoel el losaod er ngii el ngar er tia el deruchall. Me a losaod el kirel a mlokiis el Rubak er kid el Jesus Kristus, e a 1 Thesalonika 4:16 a kmo: “Le Rubak a ngii a ngara eanged el me metengel loba kedul, ma ngor ra bderrir ar anghel.” Me a ngerel a Jesus a losaod er ngii el kmo ngua ngerel a bderrir a rechanghel. Me tia el bades a olecholt el kmo a Jesus ngii ngike el bderrir a rechanghel el Mihael.

Mengeteklel a Urrurt. A Biblia a kmo: “Mihael mar anghel er ngii a uluumekemad ra dragon…mar anghel er ngii.” (Chocholt 12:7) Me seikid, e a Mihael a Mengeteklir a urrurt er a reblak a rengrir el anghel. A babier er a Chocholt a dirrek el mesaod er a Jesus el ua Mengeteklel a urrurt er a resoldau er a reblak a rengrir el anghel. (Chocholt 19:14-16) A apostol el Paulus a ileakl el melekoi el kirel a Rubak el Jesus me a re “ngarngii a klisichir el anghel.” (2 Thesalonika 1:7) Me seikid, e a Biblia a dul melekoi el kirel a Mihael me “ar anghel er ngii” me a Jesus me “ar anghel er ngii.” (Matteus 13:41; 16:27; 24:31; 1 Petrus 3:22) Me a Tekingel a Dios a diak lolekoi el kirel a teblo el urrurt er a reblak a rengrir el anghel el ngar er a eanged, el tang a obengkel a Mihael me a tang a obengkel a Jesus, a uchul e kede oumerang el kmo a Mihael a melutk er a Jesus Kristus sel lengar er a deruchellel er a eanged.

← Momes er a medung el bliongel