Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGEUA EL BLIONGEL

Ngtecha Jesus Kristus?

Ngtecha Jesus Kristus?

Ngera el ileakl el deruchall a lobang?

Ngmla er ker el mei?

Ngmle ua ngera el chad a Jesus?

TE NGAR er ngii a rekmal betok el merael a chisir el chad el ngar er tia el beluulechad. A rebebil a merael a chisir er a basio el kiei er ngii me a rebebil a merael a chisir er a beluulechad el rokir. Engdi a di dodengelii a ngklel a chad el merael a chisel a diak el belkul a kmo kede mera el medengelii ngii el chad. E le ngdiak dodengei a omesodel a cherellel me a okurulel me a diak dodengelii el kmo ngua ngera el chad.

2 A Jesus Kristus a kiliei er tia el chutem er a bekord el 2,000 el rak er a mla me mong, engdi te betok el chad el meliuekl er a beluulechad a mla remenges a kmung ngerang el chisel. Me nguaisei, engdi te betok a rrau a rengrir el kmo a Jesus ngmera el mle techang. A rebebil a melekoi el kmo ngkuk di mle ta er a ungil el chad, me a rekmo ngdi mle ta er a profet. Me a ngar er ngii a kuk oumerang el kmo a Jesus a Dios me ngkired el mengull el meluluuch el mo er ngii. Engdi ngmera el uaisei?

3 Ngkmal klou a ultutelel el bo modengelii a klemerang el kirel a Jesus. E le Biblia a melekoi el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.” (Johanes 17:3) Me a dodengelii a klemerang el kirel a Jehovah el Dios me a Jesus Kristus e ngmekrolid el mo er a diak a ulebengelel el klengar el ngar er a paradis el chutem. (Johanes 14:6) A Jesus a meskid a kot el ungil el kerebai el kirel a blekerdelel a klengar er kid me a omerelled el mo er a rebebil er a rechad. (Johanes 13:34, 35) Ngar er a kot el bliongel, e kede milsaod er a klemerang el kirel a Dios. Chelechang, e me bo domes el kmo ngerang mera el lolisechakl a Biblia el kirel a Jesus Kristus.

A MESSIAS ER A TELBIIL

4 Betok el rak er a uchei er a lemechell a Jesus, e a Biblia a ulemlaoch el kirel a chad el bo lodureklii a Dios el me mechell el mo Messias me a lechub e ng Kristus. Tia el dui el “Messias” (el mlengai er a tekoi er a Hebru) me a “Kristus” (el mlengai er a tekoi er a Grik) a di dul belkul a kmo “Ngike el Mlucheluch.” Ngar er a taem er a omelechesel a Biblia, e a chad a metutk el mo er a ileakl el deruchall el oeak sel lemoitel a cheluch er a bebul a bdelul. Me ngikaikid el ngalek er a telbiil a mo mucheluch, el belkul a kmo ngmetutk er a Dios el mo er a ileakl el deruchall. Ngar er a ulebengelel tia el babier, e kede mo mesuub a lmuut el betok el kirel a klou a ultutelel el ngerachel el loba Messias er a chelsel a otutel me a cherrengelel a telbilel a Dios me aike el betok el klengeltengat el sebeched el melemolem el melai el me lmuut er a chelechang el okiu a Jesus. Engdi, uchei er a be lemechell a Jesus e te betok a locha millebedebek el kmo, ‘Ngtecha ngike el ngii a mo obeketakl el kmo ng Messias?’

5 A redisaiplo er a kot el dart el rak a mle ulterekokl a rengrir el kmo a Jesus a ngike el mildung er a ulaoch el Messias. (Johanes 1:41) A disaiplo el Simon Petrus a dilu er a Jesus el kmo: “Ikau a Kristus.” (Matteus 16:16) Engdi te mlekerang tirke el disaiplo me kid e mo ulterekokl el medengei el kmo a Jesus a mera el ngike el mla er a telbiil el Messias?

6 A reprofet er a Dios el kiliei er a uchei er a taem er a Jesus a uluuchais a betok el tekoi el kirel a Messias. A tekoi el luluuchais a sebechel el ngosuterir a rechad el dongchii a Messias, el di ua tiang: Omko ke mlodurech el mo er a kmal meseked el bdelulachang el mo oltak er a chad el diak modengelii, e ngdiak el bai el lungil a lsekum te milskau a bebil er a komakai el omesodel ngii el chad? Me ngdi osisiu, ngoeak a reprofet, e a Jehovah a milskid a komakai el omesodel a tekoi el bo el loruul a Messias me a bo el charm er a klengar er ngii, el ngosuterir a reblak a rengrir el chad el mo sebechir el dongchii.

7 Ka molatk a teblo el okesiul tiang. A kot, e ngbekord el 700 el rak er a uchei e a profet el Mika a ulemlaoch el kirel a ngalek er a telbiil el mo mechell er a Bethlehem. (Mika 5:2) A Jesus ngmlechell er ker? Ngmlechell er isei el mats. (Matteus 2:1, 3-9) Ongerung, e ngbetok er a 500 el rak er a uchei, e a ulaoch el ngar er a Daniel 9:25 a millutk el mo er a rak el be el duum a Messias el ngii a mle rak er a 29.* Me a otutel aikang me a lmuut el bebil er a ulaoch a meketeklii el kmo a Jesus a mera el ngike el mla er a telbiil el Messias.

Jesus el mocha metecholb

Sera lemetecholb, e a Jesus a mlo Messias me a lechub e ng Kristus

8 A lmuut el bebil er a olechotel a kmo a Jesus a mera el mle Messias a mlo bleketakl er a ulebengelel a rak er a 29. Tiaikid sel rak el Jesus a mlo er a Johanes el Techolb el mo metecholb. A Jehovah a tilbir el mo er a Johanes el kmo ngmo msa olengchelel a Messias. A Johanes a milsa ngii el olangch er sera lemetecholb a Jesus. A Biblia a ouchais el kmo: “Ma Jesus er a le metechelbang, e ngdimlemereched el tokerekl ra ralm, e mesang, ngulebkais a eanged e ngmesa [oureor el klisichel a] Dios el ua belochel el me metengel er a bebul; e mlarngii a ngor ra eanged el kmo, ‘Ngikang a betik ra renguk el Ngelekek, el odeuir a renguk.’” (Matteus 3:16, 17) A uriul er a leues el renges a tekoi el dilubech, e a Johanes a mlo ulterekokl a rengul el kmo a Jesus a mlodurokl er a Dios. (Johanes 1:32-34) Seikid er a lemetengel a oureor el klisichel a Dios er a bebul a Jesus e ngmlo Messias el milengilt er a Dios el mo Mengedereder el King.―Isaia 55:4.

9 A otutel a ulaoch me a tekoi el lullekoi a Jehovah el Dios a bleketakl el ulechotii el kmo a Jesus a ngike el mla er a telbiil el Messias. Engdi a Biblia a onger a lmuut el teblo er a meklou a ultutelel el ker el kirel a Jesus Kristus el kmo: Ngmla er ker el mei, e mle ua ngera el chad?

A JESUS NGMLA ER KER EL MEI?

10 A Biblia a olisechakl el kmo a Jesus a kiliei er a eanged er a uchei er a lemei er a chutem. A Mika a ulemlaoch el kmo a Messias a mo mechell er a Bethlehem me a uchelel a mla er a “kmal irechar” el mei. (Mika 5:2) Ngbetok el taem, e a Jesus a millekoi el kirel el kmo ngkiliei er a eanged. (Johanes 3:13; 6:38, 62; 17:4, 5) Me a lengar er a eanged, e ngmla er ngii a ileakl el deleuill er ngii me a Jehovah.

11 A Jesus a kmal mle betik er a rengul a Dios el Ngelekel. Ngokedongall el ‘uleak uchei ra rokuil bleob,’ e le ngii el ble lekot el mebii a Dios.# (Kolose 1:15) Ngii a “dital Ngelekel” a Dios. (Johanes 3:16) Tiang a belkul a kmo a Jesus a di mle ngii el tang a mera el ulebeob er a Dios, e dirrek el di mle ngii el tang a luluusbech er ngii a Dios er a lomeob a rokui el tekoi. (Kolose 1:16) Ngdirrek el okedongall el “Tekoi.” (Johanes 1:14) Tiang a ouchais el kmo ngii a mle melekingel a Dios, el ullab a klumech me a ulekrael el mo er tirke el bebil er a rengelekel a Dios, el rechanghel me a rechad.

12 Ngika el kot el mlechell el Ngalek ngosisiu ngii me a Dios? Ngdi ua aike el dulsaod er a uchei, a Biblia a olisechakl el kmo a Ngalek a ulebeob. Me ngmla er ngii a uchelel, engdi Jehovah el Dios a diak a uchelel el diak a ulebengelel. (Psalm 90: 2) E a Biblia a bleketakl el olisechakl el kmo a Chedam a kuk ngarbab er a Ngalek. (Johanes 14:28; 1 Korinth 11:3) E di ta el Jehovah a “Dios el Olab a Bek el Klisiich.” (Genesis 17:1) Me ngdiak a ngii di el techang el mekesiur.%

13 A Jehovah me a Ngelekel a mle kaubltikerreng e uleldeu a rengrir er a kmes el deleuill er tir el betok el biliol el rak. (Johanes 3:35; 14:31) Ngika el Ngalek a kmal di mle ua Demal, a uchul me a Biblia a melekoi el kirel el kmo ng “chokesiul a diak le meues el Dios.” (Kolose 1:15) Me ngdi ua ngalek el sechal el sebechel el ua demal er a betok el rolel, me ngika el Ngalek el ngar er a eanged a dirrek el kmal mle ungil el okesiul a blekerdelel a Demal.

14 Ngika el di ta el ngelekel a Jehovah a di mle ngii el kongei el me metengel er a chutem el ua rechad. Engdi ke locha mo melebedebek el kmo, ‘Ngmlekerang e sebechel a Jesus el ngii a kiliei er a eanged el me mechell el ua rechad?’ A Jehovah a rirellii a ongasireng er a loiuelii a klengar er ngika el kot el Ngalek el Sechal er a eanged el mo er a omecherellel a klikiid el ekebil er a Judah el ngklel a Maria. Ngdimlak el usbechall a chad el chedam el mo omekdubech er a klengar er ngii. A Maria a milechell er a cherrungel el ngalek el sechal e milengeklii el Jesus.―Lukas 1:30-35.

NGMLE UA NGERA EL CHAD A JESUS?

15 Aike el lullekoi me a lurruul a Jesus er sera lengar er a beluulechad a ngosukid el mo medengelii, e a ngar er a uchei er ngii e kede mo ungil el medengelii a Jehovah. E ngera uchul? Molatk el kmo a Ngalek a mle cherrungel el okesiul a Demal, a uchul me ngdilu er a ta er a redisaiplo er ngii el kmo: “Ngikel mla mesekak a mla mesa Chedam.” (Johanes 14:9) Aike el eua el Evangkelio, el Matteus, Markus, Lukas, me a Johanes a ouchais er kid a betok el kirel a klengar me a tekoi el lurruul, me a dirrek el blekerdelel a Jesus Kristus.

16 A Jesus a mle merael a chisel el “Sensei.” (Johanes 1:38; 13:13) Ngera ngullisechakl? A kot, e a klemechel a mle “evangkelio” er a renged, tiang a Rengedel a Dios, el sel kabelment el ngar er a eanged el ngii a mo mengedereder er a beluulechad el rokir e mo uchul a diak a ulebengelel el klengeltengat el kirir a rebekongesenges el chad. (Matteus 4:23) A Jesus a di mle ngii el melekoi el kmo: “Chosisecheklek a diak le mlar ngak, ele ng mlar ngikel ulderchak,” el ngii a Jehovah. (Johanes 7:16) A Jesus a mle medengei el kmo a Demal a soal a rechad a lrengesii tia el ungil el chais el kirel a Renged. Me ngngar er a 8 el Bliongel, e kede mo mesuub a betok el kirel a Rengedel a Dios me aike el bo loruul.

Jesus el olisechakl er a redisaiplo er ngii

A Jesus a ulemerk er a klumech er aike el bek el basio el mla er ngii a rechad

17 A Jesus a ullisechakl er aike el bek el lemla er ngii a rechad, me ngmla er a ikrel a beluu me a mats me a chelsel a beluu me a blil a makit me a rekeblirir a rechad. Ngdimlak el longiil er a rechad el mei er ngii. (Markus 6:56; Lukas 19:5, 6) Ngera uchul me a Jesus a milengoit er a klou el temel el olisechakl er a rechad? E le tiang a mle soal a Dios. (Johanes 8:28, 29) Engdi ngdirrek el mle mekngit a rengul er aike el seked er a rechad el mlo omes er ngii. (Matteus 9:35, 36) A remengeteklel a klechelid a ullechib a osengir er tir. Engdi a Jesus a mle medengei el kmo ngmle klou a ultutelel el kirir a rechad el rongesii a klemechel a renged.

18 A Jesus a kmal mle betik a rengul e chubteterir a rechad. Ngbekokuii e beot el bo longedecheduch er ngii, me ngmo lmuut er a rengalek me ngdimlak el medakt el mo kmeed er ngii. (Markus 10:13-16) A Jesus a dimlak longetukel er a rechad e uluuketui a chelebirukel. (Matteus 21:12, 13) Ngkiliei er a taem el dimlak a kmal techall me a omengull el mo er a redil, engdi Jesus a ullecholt el kmo te mle meklou a ultutelir. (Johanes 4:9, 27) A Jesus a mera el mle ngariou a rengul, me ngmle ta el loriso a ocherir a rechapostol er ngii, el ngii a urerir tirke el kot el ngariou el mesiou.

1. Jesus el omerk er a klumech; 2. Jesus el omekungil er a rechad

19 A Jesus a mle kerekikl a lousbech a rechad. Tiang a mle bleketakl er a lousbech er a oureor el klisichel a Dios el meruul a betok el ongasireng el omekungil a rakt. (Matteus 14:14) El ua tiang, ngmla er ngii a chad el mle kemkom el mlei er a Jesus e dilu el kmo: “A lungilbesul ra rengum, e ngsebechem el kikidak.” A Jesus a mlo mekngit a rengul e le ngmillechesuar er a rengelel ngii el chad. Me nguldersii a chimal el rutechii e dilu el kmo: “Ngsoak; me bo mklikiid.” Me ngii el smecher el chad a mlo ungil er a rektel! (Markus 1:40-42) Ka molatk el kmo ngkol mlo ua ngerang a deuil a rengul ngii el chad.

BLAK A RENGUL EL MO ER A ULEBONGEL

20 A Jesus a ulechotii a kot el ungil el kerebai er a blekongesenges el mo er a Dios. Ngmillemolem el blak a rengul e uluutekangel a bek el bedengel a ultok me a ringel. Ngmle ulterekokl a uldesuel e mesisiich el ulemtok a omengarm el mla er a Satan. (Matteus 4:1-11) Ngmla er ngii a taem, el rechedal a dimlak el loumerang er ngii, e melekoi er ngii el kmo “ngmla moeau a rengul.” (Markus 3:21) Engdi a Jesus a dimlak el bechititerir me lengedechii a uldesuel e bai uluutekangel a otuub me a ringel, e di millemolem el ulserechakl.-1 Petrus 2:21-23.

21 A Jesus a millemolem el blak a rengul el mo lmuut er a kodall er a chimorir a recherrouel. (Filipi 2:8) Ka molatk aike el tekoi el chilarm er a ulebongel er a klengar er ngii el ua chad. Ngulebdechem el ua kelebus, e mlotelechakl er a reklsuul el ocholt, e mloterekokl el kmo ngmekngit el oeak a remechebirukel el chad er a kerrekeriil, e meldenguul er a seked, e mlukcharm er a resoldau. Me a ledeleel er a kerrekar, e longoit a telil, e ngnguleldiu el kmo: “Ngmla mecherrungel!” (Johanes 19:30; Rellir 5:30) A ongedei el klebesei er a uriul er a kodellel a Jesus, e a Demal a ulekisii. (1 Petrus 3:18) A sesei el sandei er a uriul, e ngliluut el mo er a eanged. Ngar er isei, e ngmlo “dengchokl ra kidekmel a Dios” e mlengiil er a taem el blochu el nguu a klisichel a kleking.―Hebru 10:12, 13.

22 Me a Jesus ngngera ngrirellii er a lolemolem el blak a rengul el mo lmuut er a kodall? A kodellel a Jesus a mekengii a techall el kired el mo kiei el diak a ulebengelel el ngar er a paradis el chutem, el oltirakl er sel mle moktek er a Jehovah er a kot el uchul. Ngar er a ongingil el bliongel e kede mo mesaod el kmo ngmekerang e a kodellel a Jesus a rullii tia el tekoi.

AIKE EL LOLISECHAKL A BIBLIA

  • A mla mecherrungel el ulaoch me a dirrek el tekingel a Dios el mlorenges a meketeklii el kmo a Jesus a Messias, me a lechub e ng Kristus.―Matteus 16:16.
  • A Jesus a kiliei er a eanged el ua anghel er a uchei er a lemei er a beluulechad.―Johanes 3:13.
  • A Jesus a mle sensei, e mle chubteterir a rechad, e mle kerebai er a cherrungel el blekongesenges el mo er a Dios.―Matteus 9:35, 36.

*  A omesodel a ulochel a Daniel el mlecherrungel er a Jesus, a domes er a Bebil er a Omesodel.

#  A Jehovah a okedongall el Chedam e le ngii el Ulemeob. (Isaia 64:8) Me a Jesus a ulebeob er a Dios me ngokedongall el Ngelekel a Dios. Ngdi osisiu, a rechanghel me a chad el Adam a dirrek el sebechir el okedongall el ngelekel a Dios.

%  A lmuut el bebil er a olechotel a kmo a kot el mlechell el Ngalek a dimlak el osisiu ngii me a Dios, a omomes er a Bebil er a Omesodel.


Aike el Ker er a Suobel

1, 2. (a) Ngera me a dodengelii a ngklel a merael a chisel el chad e ngdiak el belkul a kmo kede mera el medengelii? (b) Ngera el rraurreng a ngar er ngii el kirel a Jesus?

3. Ngera uchul me ngklou a ultutelel el bo modengelii a klemerang el kirel a Jesus?

4. Ngera belkul a dui el "Messias” me a lechub e ng "Kristus”?

5. A redisaiplo er a Jesus ngerang mle ulterekokl a rengrir er ngii el kirel a Jesus?

6. Ka msodii el kmo ngmilekerang a Jehovah er a lengesuterir a reblak a rengrir el chad el mo sebechir el dongchii a Messias.

7. Ngerang a teblo er aike el ulaoch el mlecherrungel er a Jesus?

8, 9. Ngera el olechotel a kmo a Jesus a Messias, a mlo bleketakl er a taem er a lemetecholb?

10. Ngera ngolisechakl a Biblia el kirel a Jesus er a uchei er a lemei er a chutem?

11. Ngmekerang a Biblia a lochotii el kmo a Jesus a mle kot el betik er a rengul a Jehovah el Ngelekel?

12. Kede mekerang e medengei el kmo ngike el kot el mlechell el Ngalek a diak el osisiu a deruchellel ngii me a Dios?

13. Ngera belkul sel lolekoi a Biblia el kirel a Ngalek el kmo ng "chokesiul a diak le meues el Dios”?

14. Ngmilekerang a di ta el Ngelekel a Jehovah e mle mechell er tia el chutem?

15. Ngera uchul me kede melekoi el kmo ngoeak a Jesus e kede mo ungil el medengelii a Jehovah?

16. Ngera sel mle kot el klemechel a Jesus, e mla er ker el mei a osisecheklel?

17. A Jesus ngullisechakl er ker, e ngera uchul me ngkmal mle blak a rengul el olisechakl er a rebebil?

18. Ngera el blekerdelel a Jesus a kmal soam?

19. Ngera olecholt el kmo a Jesus a mle kerekikl aike el lousbech a rebebil?

20, 21. Ngmilekerang a Jesus e kutmeklii a ungil el kerebai er a blekongesenges el mo er a Dios?

22. Ngera ngrirellii a Jesus er a lolemolem el blak a rengul el mo lmuut er a kodall?