Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

Ngngerang a Sheol me a Hades?

Ngngerang a Sheol me a Hades?

NGAR er aike el kot el omelekoi el luluusbech er a omelechesel, e a Biblia a uluusbech er a tekoi er a Hebru el she’ohl´ me a tekoi er a Grik el hai´des el kuk betok er a 70 el taem. Aika el teblo el tekoi a dul ngar er ngii a deleuill er ngii me a kodall. A bebil er a oidel a Biblia a oleiuid aika el tekoi el “debull,” “beluu er a ngau,” me a lechub e ng “kliokl.” Engdi, ngngar er a oumesingd el omelekoi e ngdiak a tekoi el kmal osisiu a belkul ngii me aika el tekoi er a Hebru me a Grik. Sei a uchul me a New World Translation a di ousbech aika el tekoi el “Sheol” me a “Hades.” Engdi a Chuodel el Testament el tekoi er a Belau a oleiuid er a Sheol el mo “beluu er a kodall” me a lechub e ng “belurir a remla mad.” Engdi aika ngngera mera el belkul? Ka me bo domes a usbechel er a kakerous el bades er a Biblia.

A Olisechakl 9:10 a kmo: “Ng diak le bor ngii a ureor ma uldasu ma lechub e ng klemedengei ma lechub e le llomeserreng er a beluu er a kodall el kau a mor ngii.” Tiang belkul a kmo a Sheol ngmelekoi el kirel a ulterekokl me a lechub e ngderta el debull el ngar er a olekull el dedilekkelterir a rebetik er a rengud er ngii? Ngdiak. E le Biblia sel lolekoi a derta el debull me a lechub e ngolekkellir a rechad e ngousbech a kuk ngodech el tekoi er a Hebru me a Grik el kirel, el diak lousbech er a she’ohl´ me a hai´des. (Genesis 23:7-9; Matteus 28:1) Ngdirrek el diak lousbech er a tekoi el “Sheol” el kirel a debull el betok el chad a medakl er ngii, el ua aike el olekkellel a ta el telungalek me a lechub e te betok el chad.―Genesis 49:30, 31.

Me a “Sheol” ngmelutk el mo er a ua ngera el basio? A Tekingel a Dios a olecholt el kmo a “Sheol” me a lechub a “Hades,” a melutk el mo er a tekoi el kuk klou er a di olekkellir a rebetok el chad. El ua tiang, a Isaia 5:14 a melekoi el kirel a beluu er a kodall el kmo: “Nglai a chesmerel.” Me alta belurir a remla mad a mla merekekelterir a rebetok el mla mad, engdi ngdirkak bo el ungilbesul er a rengul a ildisir a rechad el mla soiseb er a chelsel. (Osisechakl 30:15, 16) Me ngdiak losisiu ngii me a debull el bo lemedakl er ngii a rulekoad el di klebechel a ildisir a sebechir el mo medakl er ngii, e le “belurir a re mla mad el dirk mengiil er a re mad el chad.” (Osisechakl 27:20) A belurir a remla mad a diak el bo el meseked me a diak a telkael er a ildois el mo er ngii. Me tia el Sheol me a lechub e ng Hades, el loleiuid er ngii el “belurir a re mla mad” a diak el ulterekokl el basio el ngar er a kmung ker. Ngbai di tekoi el omtechei er a debellel a klechad el ngar er ngii a ruumesingd el chad el mechiuaiu er a kodall.

A osisecheklel a Biblia el kirel a okisir a rulekoad a ngosukid el lmuut el ngmai a betok el klemedengei el kirel a belkul aika el tekoi el “Sheol” me a “Hades.” A Tekingel a Dios a blechoel el mesaod er a Sheol me a Hades el lobengkel a kodall el ngar er ngii a omelatk er a okiis el kirel.* (Job 14:13; Rellir 2:31; Chocholt 20:13) Ngdirrek el olecholt el kmo tirke el ngar er a “belurir a re mla mad,” Sheol me a lechub a Hades, a diak di el tirke el milsiou er a Jehovah e ngdirrek el betok er tir a dimlak losiou er ngii. (Genesis 37:35; Psalm 55:15) Me a Biblia a olisechakl el kmo ngmo er ngii a "chokiis rar melemalt mar diak le melemalt.”―Rellir 24:15.


*  Ngdi tirke el ulekoad el diak el bo el bekiis a losaod er tir el diak el ngar er a “belurir a re mla mad,” el ka lengar er a Sheol, me a ka lengar er a Hades, e te bai ngar er a “Gehenna.” (Matteus 5:30; 10:28; 23:33) Engdi ngua Sheol me a Hades, a Gehenna a di belkul a tekoi el diak el mera el basio el bo er ngii a rulekoad.

← Momes er a medung el bliongel