Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

Ngmilekerang a Ulochel a Daniel a Louchais er a Demiel a Messias

Ngmilekerang a Ulochel a Daniel a Louchais er a Demiel a Messias

A PROFET el Daniel a kiliei er a betok er a 500 el rak er a uchei er a cherellel a Jesus. Me nguaisei, engdi a Jehovah a uluuchais er a Daniel a tekoi el rullii me ngmo beot a bo lolangch er a taem el lebo lemucheluch a Jesus me a lechub e ngmo mengilt el Messias me a lechub e ng Kristus. Ngmildung el mo er a Daniel el kmo: “Mutebengii tiang e bo modengelii. Sel taem el le tobed a tekoi el bo lluut el meteketek a Jerusalem el mor sel le mei ngiil ngellitel er a Dios el merreder e ng mo 49 el rak. A Jerusalem a lmuut el mo meteketek el mor ngii a rael ma mesisiich el cheuatel, el mo dechor el 434 el rak.”―Daniel 9:25.

A bo dodengei el kmo ngoingerang e ngmei a Messias, e a kot e ngkired el mo medengei el kmo ngoingerang e kede omuchel el omechur. A doltirakl er a ulaoch, e ngomuchel er "sel taem el le tobed a tekoi el bo lluut el meteketek a Jerusalem.” Tia el tekoi ngtilobed er a oingerang? A doltirakl a ledilung a Nehemia el ta er a remilluches er a Biblia, e a tekoi el tilobed el kirel a cheuatel er a Jerusalem el lmuut el mo obekedechor a mlo er ngii er “sel buil el Nisan, er a chelsel ongelluich er a rak er a le king a Artakserses.” (Nehemia 2:1, 5-8) A rechad er a reksi a oterekeklii el kmo a rak er a 474 B.C.E.* a mle kot el rak er a Artakserses el mengedereder el ua king. Me a leuaisei, e a ongelluich el rak er ngii er a omengedereder a mle rak er a 455 B.C.E. Me chelechang e kede mla mo medengelii a uchelel a taem er a ulochel a Daniel el kirel a demiel a Messias el kmo ngmle rak er a 455 B.C.E.

A Daniel a uluuchais el kmo ngmo ua klteketel a ngerang el taem a engelakl e ngmereku Messias el ngike el Merredel. A ulaoch a melekoi el kirel a “49 el rak” me a dirrek el “434 el rak,” el uldekial a 483 el rak.

Me a di kired el meruul er ngii er a chelechang a omechur. A domuchel er a rak er a 455 B.C.E. e domechur el 483 el rak e kede mo tmurk er a rak er a 29 C.E. Tia sel rak el lemiltecholb a Jesus e mlo Messias!# (Lukas 3:1, 2, 21, 22) Tiang diak el sal mengasireng el otutel a ulaoch er a Biblia?


*  A [C.E.] el blingelel a taem er a reksi a omuchel er a kot el rak el mei er a chelecha el taem er kid, e a [B.C.E.] el blingelel a taem er a reksi a kuk ulemuchel er a kot el rak e merael el mo tmurk er a uchelel a klechad.

#  Ngar er a rak er a 455 B.C.E. el mo er a 1 B.C.E. e ngngar er ngii a 454 el rak. E ngar er a 1 B.C.E. el mo er a 1 C.E. e ngngar er ngii a 1 el rak. E ngar er a 1 C.E. el mo er a 29 C.E. e ngngar er ngii a 28 el rak. Me a uldekial aika el kldei el ochur (454+1+28) a 483 el rak. A Jesus a mlo “mokoad” er a 33 C.E. el ngii a mle melengel sel mong me ng “euid el 70 el rak.”―Daniel 9: 24, 26.

“EUID EL 70 EL RAK”
490 el rak
7 el sandei
(49 el rak)
62 el sandei
(434 el rak)

←B.C.E. | C.E.→

1 el sandei
(7 el rak)
455

“A tekoi el lmuut el mo omekedechor…er a Jerusalem”

A telemellel a cheloit el beluu er a Jerusalem
406

Jerusalem a lmuut el obekedechor

Jerusalem a lmuut el obekedechor
29

A Messias a me duum

Jesus a metechelbang
33

A Messias a “mokoad”

Jesus el medei
36

Ulebengelel a “euid el 70 el rak”

A soldau er a Rom

← Momes er a medung el bliongel