Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

Ngkirir a Rekristiano el Ousbech a Kerus er a Omengull er Tir?

Ngkirir a Rekristiano el Ousbech a Kerus er a Omengull er Tir?

TE BETOK el miliol el chad a sorir el mengull a kerus. A The Encyclopædia Britannica a omekedong a kerus el kmo “ngkot el klou a ultutelel el olengchelel a klechelid er a Rekristiano.” Me nguaisei, engdi ngdi ungil er a Rekristiano a lousbech a kerus er a omengull er tir?

A klou a ultutelel el uchul a kmo a Jesus Kristus a dimlak el mad er a kerus. A tekoi er a Grik el lulleiuid er ngii el mo “kerus” a stau·ros´ el melekoi el kirel a “dechor el melemalt el kerrekar.” A The Companion Bible a kmo: “[A stau·ros´] a diak el ta el lolekoi el kirel a teblo el kerrekar el kabutang er a ngii di el teletael…Ngdiak a ngii di el tekoi er a Grik el ngar er a [Beches el Testament] el melutk el kirel a teblo el kerrekar.”

Ngar er a bebil er a bades, e a remilluches er a Biblia a uluusbech er a kuk ta er a tekoi el melutk el kirel sel klalo el luluusbech er ngii el lomekoad er a Jesus. Te uluusbech er a tekoi er a Grik el xy´lon. (Rellir 5:30; 10:39; 13:29; Galatia 3:13; 1 Petrus 2:24) Tia el tekoi a melutk el kirel a “kerrekar el tang, idungel” me a lechub e ng “kerrekar el skors, chelebed, sums, ututk” me a lechub e ng “dellomel el kerrekar.”

Me a losaod er a uchul me ngkmal di mle beot a teletelel el kerrekar a luluusbech el kirel a okodellir a rechad, e a babier el Das Kreuz und die Kreuzigung (A Kerus Me a Omengerus), el lulluches er ngii a Hermann Fulda a kmo: “Ngdimlak a kerrekar er aike el basio el mlengilt el kirir a rukodall el osongel er a buai. Me te di ulengeltii a teluo el kerrekar er a chelsel a chutem. E a redengerenger el chad, a mle blechoel el luleldars a chimorir el bedul bab me a ocherir me ngmle dmak el rrengodel me a lechub e ngdeleel el mo er sel kerrekar.”

Engdi sel kot el ngarbab el omesaod el lomeketakl er tiang a ngar er a Tekingel a Dios. A apostol el Paulus a kmo: “E a Kristus a mlo delebeakl el kired, me ngngilbetid ra dellebeklel a llach-le ngellechukl el kmo, ‘Tirikel rokui el kltekotel ra kerrekar a medebeakl.’” (Galatia 3:13) Ngar tiang e ngmillekoi a tekoi el ngar er a Duteronomi 21:22, 23 el mle bleketakl el melutk er a teluo el kerrekar, el diak el kerus. Tia el rolel a blals el kirel a kodall a rirellii a chad el mo ‘delebeakl’ me ngdiak lemelemalt a lsekum a Rekristiano a omesiich a blirir el lolab a bleob er a Jesus el deleel er a kerrekar.

Ngdiak a olechotel a kmo aike el kot el 300 el rak er a uriul er a kodellel a Jesus e a rechad el melekoi el kmo te Kristiano a uluusbech a kerus er a chelsel a omengull er tir. Engdi sera ongeua el dart el rak, e a milengull a klsuul el chelid el Emperor el Constantine a ulebult el mo chedal a ongdibel er a Rekristiano engdi ngmillemolem el olab a osisechakl el omtok er a Biblia e mlo melisiich er a kerus el mo olengchelir. Me a ngii di el tekoi el blo lolekoi a Constantine el melisiich er tiang, me ngii a di mle bleketakl a kerus el dimlak a ngera el chesechesemel el mo er a Jesus Kristus. E le mera er ngii a kerus a mlengai a uchelel er a klsuul el klechelid. A New Catholic Encyclopedia a kongei el kmo: “A kerus a debetik er ngii er a omengull er a uchei er a taem er a Rekristiano me a dirrek el siukang er a rechad el dimlak el Kristiano.” Ngar er ngii a relmuut el betok el chellimosk er a omesubel a omengull er a rechad el melekoi el kmo a kerus a ulech er a tekoi er a omengull er a sils me aike el ungil el klebesei el kirel a chelid er a cheroll er a irechar.

Me ngngera me tia el olengchelir a rechad er a klsuul el chelid a blo lolisiich er ngii e ousbech er ngii? Me bo el beot er a remengull a klsuul el chelid el mo kongei er a “Klekristiano.” Me nguaisei, engdi a blakerreng el mo er a ngii di el olengchelel a klsuul el klechelid a bleketakl el lomtok er a Biblia. (2 Korinth 6:14-18) A Bades a dirrek el lolekebai a ngii di el bedengel a omengull el bleob. (Exodus 20:4, 5; 1 Korinth 10:14) Me ngngar er ngii a kmal ungil el uchul me a remera el Kristiano a diak el lousbech a kerus er a chelsel a omengull er tir.

← Momes er a medung el bliongel