Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGEAI EL BLIONGEL

Ngerang a Rengedel a Dios?

Ngerang a Rengedel a Dios?

Ngera ngouchais er kid a Biblia el kirel a Rengedel a Dios?

Ngera ngmo meruul er ngii?

Ngoingerang e ngmo meruul a soal a Dios er tia el chutem?

TE BETOK el miliol el chad el meliuekl er a beluulechad a medengelii sel nglunguuch el lebilecherei a Jesus el ua lekerebai er a lolisechakl er a redisaiplo er ngii el meluluuch. Tiang a kmal klou a belkul el nglunguuch, me a omesodel aike el kot el edei el tekoi er ngii, a mo ngosukau el suub a lmuut el betok el kirel aike el mera el lolisechakl a Biblia.

2 Ngar er a uchelel, e a Jesus a dilu er a rulerrenges er ngii el kmo: “Misei e moluluuch el ua ika el kmo: ‘A Demmam el ngara eanged, le mechedaol a ngklem. A rengedem le mei, ma uldesuel a rengum le meruul ra belulechad el ua chomerellel ra eanged.’ ” (Matteus 6:9-13) Ngua ngera klungel a ultutelel aika el kldei el tekoi el lolengit el ngar er tia el nglunguuch?

3 Ngkmal betok a bla desuub el kirel a ngklel a Dios el Jehovah. E dirrek el mla telkib el smaod a soal me aike el bla el rruul me a tekoi el dirk medechel el bo el loruul el kirel a klechad. Engdi a Jesus ngmillekoi el kirel a ngerang er a ledu er kid me doluluuch el kmo: “A rengedem le mei”? Ngerang a Rengedel a Dios? E a mei er ngii ngmekera bo el longebkall me a lechub e longedaol er a ngklel a Dios? Tia el tekoi el Renged a lemei, ngngera deleuill er ngii me a omerellel a soal a Dios?

NGERANG A RENGEDEL A DIOS

4 A Rengedel a Dios a kabelment el kiltmeklii a Jehovah el Dios e di mle ngii el ngiltii a king er ngii. Me ngtecha ngika el King er a Rengedel a Dios? Ng Jesus Kristus. A Jesus el ua King a kuk ngar er a bab er a rokui el chad el mengedereder e okedongall el “Rubak rar rubak e King rar king.” (Chocholt 17:14) Ngngar er ngii a klisichel el mo meruul a lmuut el betok el ungil el tekoi el kuk betok er a bla el rruul a ngii di el chad el mla mengedereder.

5 A Rengedel a Dios ngmo mengedereder el ngar er ker? Me a Jesus ngngar er ker? Ke locha melebedebek er obla msuubii el kmo te milekodir er a teluo el kerrekar, engdi ngii a liluut el mekiis er a kodall. Telkib el taem er a uriul er isei e ngngilasech el mo er a eanged. (Rellir 2:33) Me a Biblia a omekedong er a Rengedel a Dios el kmo ng “rengedel el ngara eanged.” (2 Timoteus 4:18) Me alta ngngar er a eanged, engdi ngmo mengedereder er a beluulechad.―Chocholt 11:15.

6 Ngera rullii a Jesus el kmal ungil el Merreder? A kot, e ngdiak el mad. A lomekesiu er a Jesus me a remerreder el chad, e a Biblia a omekedong er ngii el kmo ngngike el “diak le ngemed [a] klengar” er ngii. (Hebru 7:16) Tiang a belkul a kmo aike el rokui el ungil el tekoi el bo el loruul a Jesus a melemolem el ngar er ngii el mo cherechar. E ngii a ulterekokl el mo meruul a meklou e ungil el tekoi.

7 Ka molebedebek er a ulaoch er a Biblia el kirel a Jesus el kmo: “A klisichel a Rubak a mo msa llomeserreng, ma klemedengei, ma duch el mo mengedereder er a re chedal. Ng mo medengelii a soal a Rubak e mo meluu er ngii, e mo metik er a deurreng el ngar omesiungel. Ng diak bo loukerrekeriil el okiu a ikel le ues ma ikel le renges; ng mo melemalt el oukerrekeriil er a re mechebuul, e mesebechakl a llemeltir a re ngariou a rengrir.” (Isaia 11:2-4) Aika el tekoi a ochotii el kmo a Jesus a mo melemalt e chubechub el Merreder el mo mengedereder er a rechad el ngar er a beluulechad. Kau ngdiak el soam el mo chederedall er a uaisei el merreder?

8 Tiakid a ta er a klemerang el kirel a Rengedel a Dios el kmo: A Jesus a mo er ngii a rechad el mo obengkel el mengedereder. El di ua tiang, a apostol el Paulus a dilu er a Timoteus el kmo: “Ma doutekangel, e kede dirrek el mo mengedereder lobengkel.” (2 Timoteus 2:12) Nguaisei, a Paulus me a Timoteus me a lmuut el bebil er a reblak a rengrir el chad el lullilt er tir a Dios a mo mengedereder el obengkel a Jesus el ngar er a Rengedel a eanged. Te tela el chad a mo er tir a uaisei el techall?

9 Ngdi ua aike el ulebeketakl er a 7 el Bliongel er tia el babier, a apostol el Johanes a lebilsa ues el kirel a “ngelekel a sib [el Jesus Kristus el] dechor ra Rois el Zion [el ngii a deruchellel er a omengedereder el ngar er a eanged], ma dart ma chokouang ma cheual telael el chad el obengkel, el ngarngii a ngklel a Ngelekel a sib ma ngklel a Demal el llechukl ra medal a bderrir.” Tirka el 144,000 te rua techang? A Johanes a di ngii el ouchais er kid el kmo: “Itirikai tirikel obengkel a Ngelekel a sib el mor sel ngiidi le ker el le bor ngii; itirikai tirikel mlengubet el mlara delongelir ar chad el mo kot el rodech el kirel a Dios ma Ngelekel a sib.” (Chocholt 14:1, 4) Me tirka tirke el blak a rengrir el ulebengkel a Jesus Kristus el mle ileakl el mengilt el mo mengedereder el ngar er a eanged el obengkel. Me a uriul er a lebekiis er a kodall el mo ngmai a klengar er tir er a eanged, “e te mo mengedereder ra belulechad” el obengkel a Jesus. (Chocholt 5:10) Me ngulemuchel er a taem er a rechapostol el merael el mei, e a Dios a millilt er a reblak a rengrir el Kristiano el mo mengerrungel er tia el ochur el 144,000.

10 Me a longetmokl el kirel a Jesus me a re 144,000 el mo mengedereder er a klechad e a kmal klou el bltkil a rengul a Dios a mlocholt. E le kot, e a Jesus a ungil el medengei el kmo ngua ngerang a chelitechetul me a rengelel a klechad. A Paulus a dilu el kmo a Jesus “a diak lak el sebechel chuub a chelitechetud, ele ngua kid el mlor ngii chomengarm el kirel a bek el tekoi, ngdi ngii a dimlak le bora klengit.” (Hebru 4:15; 5:8) Me a rechad el mo obengkel el mengedereder me te dirrek el chilarm er a rengelel a klechad e uluutekangel. Me a lmuut el tang, te dirrek el chilarm er a diak el cherrungel el klengar, e mle kirir el outekangel a bek el bedengel a secher. Te ulterekokl el mo oba ungil el klemedengei er aike el mondai el bo el chelebangel a rechad!

NGERANG MO MERUUL ER NGII A RENGEDEL A DIOS?

11 A Jesus er a ledu el kmo a redisaiplo er ngii a kirir el meluluuch el olengit er a Rengedel a Dios me lemei, e ngdirrek el dilu el kmo ngkirir el olengit me a soal a Dios lemeruul er tia el “belulechad el ua chomerellel ra eanged.” A Dios a ngar er a eanged, me a reblak a rengrir el anghel er ngii a mengetmokl aike el soal er a eanged. Ngar er a 3 el Bliongel, e kede silubii el kmo a mekngit el anghel a mlo diak loruul a soal a Dios e chiltikikii a Adam me a Eba el mlo er a klengit. Ngar er a 10 el Bliongel, e kede mo mesuub a lmuut el betok el osisecheklel a Biblia el kirel ngii el mekngit el anghel, el ngii a dodengelii el Satan el Diabelong. A Satan me a rebebil er a rechanghel el ngileltii el mo oltirakl er ngii a lebilechititerir, me ngmle telkib el taem el lolemolem el kiei er a eanged. Me seikid, e ngdimlak el rokui el ngar er a eanged a mirruul a soal a Dios. Tia el blekeradel a mo kirel el mengodech sel bo el omuchel el mengedereder a Rengedel a Dios. Ngike el mlo king, el Jesus Kristus, a mle kirel el mo oumekemad er a Satan.―Chocholt 12:7-9.

12 A ongingil el ulaoch a smodii a tekoi el kirel el mo duubech el kmo: “Mitia e ak rirengesii a kloul ngor el ngara eanged el kmo, ‘Chelecha e ngmla morngii cholsobel, ma klisiich, ma renged ra Dios er kid, ma klisichel chomerreder ra Kristus er ngii, le ngikel oltutakl rar udam er kid el oltutakl er tir ra medal a Dios ra llomes ma klebesei a mla obidokl el moriou.’ ” (Chocholt 12:10) Ke miltab aike el teblo el meklou a ultutelel el tekoi el losaod tia el bades? A kot, e a Rengedel a Dios el ngar er a cheungel a Jesus Kristus a omuchel el mengedereder. E a ongerung, e a Satan a obidokl er a eanged el meriou el mei er a chutem.

13 Ngera mlo rsel aika el teblo el meklou a ultutelel el tekoi el mlo er ngii? Kede menguiu el kirel a tekoi el dilubech er a eanged el kmo: “Misei e kemiul eanged me tirikel kiei el ngara chelsel, bo le kloul dmeu a rengmiu!” (Chocholt 12:12) Nguaisei, tirke el blak a rengrir el anghel el ngar er a eanged a oldeu a rengrir e le Satan me a remekngit el anghel er ngii a mla mo dibus me a rokui el medechel er a eanged a di tirke el blak a rengrir el mo er a Jehovah e merekong. Me ngngar er ngii a cherrungel el dikea lemetemall el budech me a kltarreng er isei. Me a soal a Dios a merella er a eanged.

14 E kuk mekera tia el chutem? A Biblia a kmo: “Ngdi kom chebuul, kaul chutem ma daob, ele diabelong a mocha medengei el kmo ngkekedeb a taem er ngii, me ngoba meringel cheldechuderreng lechika er kemiu!” (Chocholt 12:12) A Satan a kesib a rengul er a lemodik er a eanged e medengei el kmo ngkmal kedebengang a temel el medechel. Me ngoba ngasecherreng e omuchel a uldikel, me a lechub e ng “chelebuul” er a bebul a chutem. Kede lmuut el mo mesuub a betok el kirel aika el “chelebuul” el ngar er a ongingil el bliongel. Me sel dolatk er tiang, e kede mo oker el kmo, Ngmekera Rengedel a Dios a bo el loruul a soal el ngar er tia el chutem?

15 Ka bo molebedebek el kmo ngera sel mle soal a Dios el kirel tia el chutem. Ke silubii tia el tekoi el ngar er a 3 el Bliongel. Ngar er a Eden, e a Dios a ulechotii el kmo ngmle soal tia el chutem a bo el paradis el mui er a rediak el mad e melemalt el chad. A Satan a rirellii a Adam me a Eba me te mlo er a klengit, engdi tia el tekoi a di mla er ngii a lerellii er a otutel a moktek er a Dios el kirel tia el chutem el dimlak el ngedechii. Ngdirk ngar er a telbilel a Jehovah el soal “a re melemalt a [bo el] ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) E a Rengedel a Dios a mo rullii tiang. El oeak a ngera el rolel?

A Satan me a remekngit el anghel er ngii er a lemodik er a eanged e ngmlo uchul a chelebuul el mei er a chutem. Chouaika el chelebuul a di kmedung e ngmo nguemed

Siasing er a mekemad, delengerenger, me a bosech

16 Ka molebedebek er a ulaoch el debetik er ngii er a Daniel 2:44. Ngar isei e kede menguiu el kmo: “Me sel taem el lorreder tirkel king, e a Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.” Tiang ngera ngouchais er kid el kirel a Rengedel a Dios?

17 A kot, e ngouchais er kid el kmo a Rengedel a Dios a mo meketmokl er “sel taem el lorreder tirkel king” me a lechub e ngsel taem el dirk el ngar er ngii a bebil er a renged el mengedereder. Ongerung, e ngouchais er kid el kmo a Renged a di ngar er ngii el mo cherechar. Ngdiak a mo mesisiich er ngii me a ka bo el mutechei er a kuk ngodech el kabelment. Ongedei, e kede mesa el kmo ngmo er ngii a mekemad er a delongelel a Rengedel a Dios me aika el renged er tia el beluulechad, e a Rengedel a Dios a mo mesisiich er ngii el mekemad. Me a ulebongel er ngii, engdi mo ta el Rengedel a Dios a kabelment el mengedereder er a klechad. Me a rechad el mo chederedall er ngii a mo oldeu a rengrir er a kot el ungil el omengedereder el kol ta el bocha er ngii.

18 Ngbetok a lolekoi a Biblia el kirel sel ulebongel el mekemad el mo er ngii er a delongelel a Rengedel a Dios me aika el kabelment er tia el beluulechad. El di ua tiang, ngolisechakl el kmo sel lolekeed a ulebongel, e a remekngit el anghel a mo omerk a blulak el mo mengeblad er a ‘reking ra belulechad el rokir.’ El ngera moktek er tir? Ngmo “chudelterir el kirel sel klaumekemad er sel kloul sils ra Dios, el Cherrengelel a klisiich.” Me a reking er a beluulechad el rokir a mo cheldull er “sel lulngakl el Armageddon el tekoi ra Hebru.” (Chocholt 16:14, 16) A tekoi el medung er a chelsel aika el teblo el bades a uchul me sel ulebongel el klautok er a delongelel a kabelment er a klechad me a Rengedel a Dios a okedongall el kmo ngmekemad er a Har-Magedon me a lechub e ng Armageddon.

19 A Rengedel a Dios ngera ngmo kutmeklii el oeak a Armageddon? Ka molebedebek el kmo ngera soal a Dios el kirel tia el chutem? Ngmle moktek er a Jehovah el Dios el soal a beluulechad a bo el mui er a remelemalt e cherrungel el chad el ngar er a Paradis e mesiou er ngii. Ngera olekebai er a chouaisei el tekoi me ngdiak el meketmokl er a chelechang? A kot, e kid a ngar er a klengit, me kede mo smecher e mad. Engdi kede silubii er a 5 el Bliongel el kmo a Jesus a mlad el kired me bo el uchul e bo el sebeched el mo kiei el mo cherechar. Ke locha dirk melatk a tekoi el llechukl er a Evangkelio er a Johanes el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirikel rokui loumera er ngii a diak bo lriid, e bai mo oba diak a ullebengelel klengar.”―Johanes 3:16.

20 A lmuut el ta er a mondai a kmo a rebetok el chad a meruul a mekngit el tekoi. Te omulak e mengeblad e ngar er a deleboes el omeruul. Ngdiak el sorir el meruul a soal a Dios, me te mo metemall sel lebo er ngii a mekemedil a Dios er a Armageddon. (Psalm 37:10) Ngdirrek el kabelment el mengedereder er a chelechang a diak lolisiich er a rechad el mo meruul a soal a Dios. Ngbetok el kabelment a mechitechut, me a lechub e ngmekngit el mengedereder er a rechad, me a lechub e ngmeruul a betok el chelebirukel. A Biblia a bleketakl el melekoi el kmo: “A re bebil er a re chad er tial beluulchad a ngar ngii a klisichir, e a re bebil a mo chuarm er tir.”―Olisechakl 8:9.

21 Uriul er a Armageddon, e a rechad a mo ngar er a cheungel a di ta el kabelment, el ngii a Rengedel a Dios. Tia el Renged a mo meruul a soal a Dios el oeak a betok el mengasireng el klengeltengat. El di ua tiang, ngmo choridii a Satan me a remekngit el anghel er ngii. (Chocholt 20:1-3) A klisichel a tengetengel a Jesus a mo motaut, me seikid e a reblak a rengrir el chad a dikea lluut el mo smecher el mad. Ngbai, ngar er a cheungel a omengederederel a Renged e a rechad a mo sebechir el kiei el mo cherechar. (Chocholt 22:1-3) A beluulechad a mo meketmokl el mo paradis. Seikid, e a Renged a mo remuul a soal a Dios er tia el chutem e mo odengesii a ngklel. Tiang a belkul a kmo ngar er a cheungel a Rengedel a Dios, e a rokui el chad a mo mengebkall er a ngklel a Jehovah.

OINGERANG E A RENGEDEL A DIOS A MO OUREOR?

22 A Jesus er a ledu er a rulebengkel el mo meluluuch el kmo, “A rengedem le mei” e ngmle bleketakl el kmo a Renged a dirkak el mei er seikid el taem. Me ngmlei er sera lengasech el mo er a eanged? Ngdimlak, e le Petrus me a Paulus a dul millekoi el kmo a uriul er a lemokiis a Jesus, e a ulaoch el ngar er a Psalm 110:1 a mlotaut er ngii er a ledu el kmo: “A [Jehovah] a dilu er a rubak er ngak el king el kmo, ‘Bo mdengchokl er a kadekmek, el dimerkmo kngititerir a re cherrouem el mor eungel ochim.’ ” (Rellir 2:32-35; Hebru 10:12, 13) Ngmle kirel el mengiil er a uchei er a bo el omuchel el mengedereder.

Ngar er a cheungel a omengederederel a Renged, e a soal a Dios a mo meketmokl er tia el chutem el di ua omerellel er a eanged

Ngeltel a sils er bebul a daob

23 El ua klemengetel a ngerang? Ngar er aike el rak el ngar er a ulebengelel a 1800 me a uchelel a 1900, e a reblak a rengrir el ngalek er a skuul er a Biblia a mlekekoketerir el mo medengei el kmo tia el taem er a omengiil a mo merek er a rak er a 1914. (Kirel tia el rak, e momes er a Bebil er a Omesodel.) A tekoi el dilubech er a beluulechad er a rak er a 1914 a meketeklii el kmo a klemedengei el luleba tirka el blak a rengrir el ngalek er a skuul er a Biblia a mle melemalt. A otutel a ulaoch er a Biblia a ochotii el kmo ngar er a 1914, e a Kristus a mlo King me a Rengedel a Dios a ulemuchel el mengedereder el ngar er a eanged. Me seikid, e kede mocha kiei er sel ‘kedeb el taem’ el dirk medechel el kirel a Satan. (Chocholt 12:12; Psalm 110:2) Ngdirrek el sebeched el melekoi el oba oterekeklel a tekoi el kmo ngdi kmedung e a Rengedel a Dios a mo oureor el mo remuul a soal a Dios er tia el chutem. Tia ngdiak el kora kmal meang el chais el kirem? Ke oumerang el kmo ngklemerang? A ongingil el bliongel a mo ngosukau el mo mesa el kmo a Biblia a mera el olisechakl aika el tekoi.

AIKE EL LOLISECHAKL A BIBLIA

  • A Rengedel a Dios a kabelment el ngar er a eanged el le King er ngii a Jesus Kristus, me a dirrek el 144,000 el chad el mlengilt el mo mengedereder el obengkel.―Chocholt 14:1, 4.
  • A Renged a mlo omuchel a omengederederel er a 1914, e seikid el taem el mei e a Satan a mla modik er a eanged el mei er tia el chutem.―Chocholt 12:9.
  • Ngdi kmedung e a Rengedel a Dios a mo tomall a kabelment er a klechad, e a beluulechad a mo paradis.―Chocholt 16:14, 16.

Aike el Ker er a Suobel

1. Ngera el merael a chisel el nglunguuch a bo dorriter er ngii?

2. Ngera edei er aike el tekoi el Jesus a ullisechakl er a redisaiplo er ngii el mo meluluuch el kirel?

3. Ngera kired el mo medengei el kirel a Rengedel a Dios?

4. Ngerang a Rengedel a Dios, e techa King er ngii?

5. A Rengedel a Dios ngngar er ker e mengedereder er a ngerang?

6, 7. Ngera rullii a Jesus el kmal ungil el Merreder?

8. Te rua techang a mo mengedereder el obengkel a Jesus?

9. Te telang a mo mengedereder el obengkel a Jesus, e oingerang e a Dios a mlo omuchel el melilt er tir?

10. Ngera me ngochotel a bltkil a rengul a Dios a bo longedereder er a klechad a Jesus me a re 144,000?

11. Ngera uchul me a Jesus a dilu er a redisaiplo er ngii el kmo ngkirir el meluluuch el kirel a soal a Dios me ngmo meketmokl er a eanged?

12. Ngera el teblo el meklou a ultutelel el tekoi el dilubech a losaod a Chocholt 12: 10?

13. A Satan er a lemodik er a eanged e ngngera mlo rsel?

14. A Satan el mlodik el mei er tia el chutem ngmlo uchul a ngerang?

15. A Dios ngngera soal el kirel tia el chutem?

16, 17. A Daniel 2:44 ngera ngouchais el kirel a Rengedel a Dios?

18. Ngera ngklel sel ulebongel el mekemad el mo er ngii er a delongelel a Rengedel a Dios me aika el kabelment er tia el chutem?

19, 20. Ngera olekebai a soal a Dios me ngdiak el sebechel el meketmokl er a chutem er a chelechang?

21. Ngmekerang a Renged a bo el loruul a soal a Dios er tia el chutem?

22. Ngera uchul me kede medengei el kmo a Rengedel a Dios a dimlak el mei er a dirk lengar er a chutem a Jesus me a dirrek el telkib el taem er a uriul er a lebekiis er a kodall?

23. (a) Ngoingerang e a Rengedel a Dios a mlo omuchel el mengedereder? (b) Ngera mo soadel er a ongingil el bliongel?