Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGEDEI EL BLIONGEL

Ngera Telbilel a Dios el kirel a Beluulechad?

Ngera Telbilel a Dios el kirel a Beluulechad?

Ngera telbilel a Dios el kirir a rechad?

Ngmilekerang e mleasem a Dios?

Ngmo ua ngerang a klengar er a chutem er a ngar er a medad el klebesei?

A TELBILEL a Jehovah el kirel tia el chutem a kmal mengasireng. Ngsoal a bo el mui er a rechad el dmeu a rengrir e mesisiich a bedengir. A Biblia a melekoi el kmo a “Dios a dillemii a sers er a Eden” e "ulemekeroul a bek el bedengel a kerrekar er ngii el mle klebokel e ourodech a ungil rodech.” Uriul er a lebebii a Adam me a Eba el mo kiei er ngii el klebokel el delengchokl, e ngdilu er tir el kmo: “Bo le betok a re ngelekiu, ma ruldidellel a rsechiu bo le kiei er ker me ker er a beluulchad e bo lorreder er ngii.” (Genesis 1:28; 2:8, 9, 15) Me ngmle telbilel a Dios el mle soal a rechad a bo el loungalek, e bo longlou er isei el paradis e bo el lomekerreu a charm.

2 Omomdasu e a telbilel a Dios el soal a rechad a bo el kiei el ngar er a paradis, ngsebechel el mo tmaut? A Dios a melekoi el kmo: “A ika tekingek, me ng mo tmaut.” (Isaia 46:9-11; 55:11) Me ngulterekokl el mo otaut a telbilel. E le ngkmo: “Ng dimlak le rellii el di bechachau el beluu, ng bai basio el kirir a re chad el kiei er ngii.” (Isaia 45:18) Te ua ngera el chad a mle sorir a Dios a bo el kiei er tia el chutem? E kiei el ua klteketel a ngerang? A Biblia a onger el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”―Psalm 37:29; Chocholt 21:3, 4.

3 Ngbleketakl tia el tekoi el dirkak el bo er ngii. A rechad a dirk mo smecher e mad, te dirrek el kaumekemad e omekoad er a rebebil. Ngulterekokl a Dios el dimlak el tibir el kmo a beluulechad a mo ua itia el domes er ngii er a chelecha el sils. Me ngngera dilubech? Ngera uchul me a moktek er a Dios a dirkak el bo el taut? Ngdiak a babier er a reksi el sebechel el louchais er kid, e le mondai a mleuuchel er a eanged.

A UCHELEL A CHERRARO

4 A kot el babier er a Biblia a ouchais el kirel ngike el ulemtok el dilum er a sers er a Eden. Ngmesaod er ngii el kmo ng "bersoech,” engdi ngdimlak el charm. Ngar er a ulebongel el babier er a Biblia e ngkmo ng “okedongall el Diabelong malechub e ngSatan, el mengeuid ra belulechad el rokir,” e dirrek el “chuodel bersoech.” (Genesis 3:1; Chocholt 12:9) Ngika el mesisiich el anghel a uluusbech er a bersoech el mo mengedecheduch er a Eba, el di ua blekerdelel a meduch el chad el sebechel el rullii a oto er a ngerel me ngmorenges el rengud ngmla er a oninio el ngar er a bita er ngii. Ngulterekokl el mla er sei er sera longetmokl er a chutem a Dios el kirir a rechad.―Job 38:4, 7.

5 A lsekum a rokui el blebelel a Jehovah a mle mecherrungel, e ngtecha rirellii a “Diabelong,” e “Satan”? A beot el omesodel a kmo a ta er tirke el mesisiich el ngelekel a Dios a di mle ngii el meltii el mo Diabelong. Ngmlekerang e mo uaisei? Chelecha el sils e ngsebechel a ungil e melemalt el chad el mo merechorech a lebechei a mekngit el ngibes me ldubech er a chelsel a rengul. E a lolemolem el melebedebek er ngii e ngmo mesisiich, me a lebo er ngii a techellel, e ngmo rullii ngii el tekoi.―Jakobus 1:13-15.

6 Tiang a dilubech el mo er a Satan el Diabelong. Nglocha rirengesii a Dios er a lolekoi er a Adam me a Eba me bo el loungalek el mekekii tia el beluulechad. (Genesis 1:27, 28) Me nglocha mlo melebedebek el kmo ‘Tirka el chad a bai kmal sebechir el mo mengull er ngak e diak longull er a Dios.’ Seikid e a mekngit el ngibes a ulemuchel er a chelsel a rengul. Me ngmocha melekoi er a Eba a blulak el kirel a Dios. (Genesis 3:1-5) Me ngmlo okedongall el “Diabelong” el belkul a kmo, “Ngike el Oltuub.” E “Satan” el belkul a kmo “Ngike el Omtok.”

7 Me a Satan el Diabelong a uluusbech a blulak el rullii a Adam me a Eba el mo diak el lolengesenges er a Dios. (Genesis 2:17; 3:6) Me a uriul e te mlad el ua ledilu Dios el kmo ngmo duubech a bo lak el lolengesenges. (Genesis 3:17-19) A Adam a mlo diak el cherrungel er a lebo er a klengit, me a rokui el ngelekel a mludiukes er a klengit el mla er ngii. (Rom 5: 12) Tia el tekoi a sebeched el omekesiu er ngii er a kata el doba el melul a blauang. A lsekum sel kata a mle blet e a bek el blauang el tuobed er ngii a ulduum. Me ngdi osisiu, a rederta el chad a uldiukes er a diak el cherrungel el ua “ulduum” el blekeradel el mla er a Adam a uchul me kede rokui el mo mechuodel e mad.―Rom 3:23.

8 A Satan er a lecheteklii a Adam me a Eba el mo er a klengit el omtok er a Dios, e ngulemuchel a ultok. Ngulemtok er a rolel a omengederederel a Jehovah. E le Satan a ua el dilu el kmo: ‘A Dios a kmal mekngit el mengedereder. Ngomulak e orreked a ungil el tekoi er a rechederedellel. Me a rechad a diak el lousbech er a Dios el mengedereder er tir. E le ngsebechir el di tir el melib a ungil me a mekngit el kirir. E bai mo ungil a klechad er tir a bo el chederedall er ngak.’ Ngmekerang a Dios a bo el longer er tia el ultok? A rebebil a omdasu el kmo ngbai mle kirel a Dios el di mekodeterir. Engdi a lurruul el uaisei, e ngulenger er a ultekengel a Satan? Ngmlo sebechel el meketeklii el kmo a omengederederel a Dios a melemalt?

9 A cherrungel el llemeltel a Jehovah a dimlak el becherei me lemereched el mekodeterir. Ngmilsa el kmo a taem a mle usbechall el mo onger er a ultekengel a Satan e mo meketeklii el kmo ngii el Diabelong a bulak. Me seikid e a Dios a milechititerir a rechad me ngdi mlo tir el mengedereder er tir el telkib el taem el ngar er a cheungel a ulekrael er a Satan. Sel uchul me a Jehovah a mirruul er tia el tekoi me a uchul e ngulemechei er a kmal kemanget el taem el bo el losmechokl aikang, a mo soadel er a 11 el Bliongel er tia el babier. Engdi chelechang e ngkmal ungil el bo dolebedebek er tia el kmo: A Adam me a Eba ngmle melemalt el loumerang er a Satan, el ngii a dirkak a ta el ngera el ungil el rruul el kirir? Ngmle melemalt el bo el loumerang el kmo a Jehovah el ngii a milsterir aike el rokui el mla er ngii er tir, a mle cheblad? Omko ngmle kau e ke milekerang?

10 Ngkmal ungil el dolebedebek aika el ker e le kid me kede chelebangel ngii el tekoi er a chelecha el sils. Ngngar er ngii a techellem el mo olengeseu er a Jehovah el longer er sel omelsemai er a Satan. Ngsebechem el kongei er a Jehovah el mo Merredelem e olengeseu el lolecholt el kmo a Satan a bulak. (Psalm 73:28; Osisechakl 27:11) Ngklou el klengiterreng e le te di mekesai er a chelsir tirka el betok el biliol el chad el ngar er a beluulechad er a chelechang a melilt er tia el tekoi. Me tiang a mekdebechii a klou a ultutelel el ker el kmo, A Biblia ngmera el lolisechakl el kmo a Satan a mengedereder er tia el beluulechad?

NGTECHA MENGEDEREDER ER TIA EL BELUULECHAD?

Ngmlekerang e sebechel a Satan e omsa Jesus a rokui el renged er a beluulechad a lsekum ngii el renged a dimlak el kloklel?

Jesus el oltngakl er a omengesuseu er a Satan el soal el omsang a rokui el dereder er a beluulechad

11 A Jesus a dimlak el loumededenger el kmo a Satan a merreder er a beluulechad. Nguleak a ongasireng, e a Satan a mle ta el lolecholt er a Jesus a “rokuil renged ma klebkellel ngiil renged er tial belulechad.” Uriul e ngdilu er a Jesus el kmo: “A lsekum ke mo terrob el mengull el meluluuch er ngak, e ak meskau a ikal rokui.” (Matteus 4:8, 9; Lukas 4:5, 6) Molatk er tiang. Omomdasu e tia el tekoi ngmle sebechel el uchul a omengarm el mo er a Jesus a lsekum a Satan a dimlak el mera el merreder aika el renged? A Jesus a dimlak el loumededenger me a ka lulemtok el kmo aika el kabelment er a beluulechad a mle kloklel a Satan.

12 Tia ulterekokl el tekoi el kmo a Jehovah a kot el ngarbab el Dios, el Ngike el Ulemeob er tia el mengasireng el melidiul. (Chocholt 4:11) Engdi a Jesus a mle bleketakl el melekoi el kirel a Satan el kmo ng “merreder er tial belulechad.” (Johanes 12:31; 14:30; 16:11) A Biblia a dirrek el melutk er a Satan el Diabelong el kmo ng “chelid er tial belulechad.” (2 Korinth 4:3, 4) A Johanes a dirrek el milluches el kirel ngika el lomtok el Satan el kmo: “A belulechad el rokir a chederdall er ngikel mekngit.”―1 Johanes 5:19.

NGMEKERANG E MO METEMALL A BELUULECHAD ER A SATAN

13 Bek el rak e a beluulechad a merael el mengal mo kengaol. Ngmui er a ruumekemad el soldau, remechebirukel el chad er a balatiks, recheblad el mengeteklel a klechelid, me a redengerenger. Ngmeringel el lemesmechokl a beluulechad el rokir, engdi a Biblia a olecholt el kmo ngdi kmedung e a Dios a mo okngemedii tia el mekngit el beluulechad el oba mekemedil er a Armageddon, e mo mtechir er a melemalt el beches el beluulechad.―Chocholt 16:14-16.

14 A Jehovah el Dios a ngileltii a Jesus Kristus el mo Mengedereder er a Rengedel el ngar er a eanged. A irechar e a Biblia a millekoi el kmo: "A ta el ngalek a mechell el kired! A ngalek el sechal a lebeskid! E ngii a mo merredeled. Ngmo okedongall el kmo…‘King el ngalek er a Budech.’ A klisichel el king a di mo merael el mo klou; me a kabelment er ngii a di mo blechoel el ngar er a budech.” (Isaia 9:6, 7, King James Version) A Jesus a ullisechakl er a rulebengkel el meluluuch el kirel tia el kabelment el kmo: “A rengedem le mei, ma uldesuel a rengum le meruul ra belulechad el ua chomerellel ra eanged.” (Matteus 6:10) Me ngdi ua bo domes er a uriul el ngar er tia el babier, a Rengedel a Dios a di kmedung e ngmo tomall aika el rokui el kabelment er tia el beluulechad, e ngii a mo mengedereder el omtechei. (Daniel 2:44) E seikid e a Rengedel a Dios a mo kutmeklii tia el chutem el mo paradis.

A BECHES EL BELUULECHAD A DI KMEDANG

15 A Biblia a smisiich a rengud el kmo: “Ngdi kid a me ngiil er sel ngara telbilel a Dios el beches el eanged ma beches el chutem el bo le kiei er ngii a llemalt.” (2 Petrus 3:13; Isaia 65:17) A lebebil er a taem e a Biblia sel ledu “chutem” e ngmelutk el kirir a rechad el kiei er tia el chutem. Me sel melemalt el “beches el chutem” a melutk el kirel a klechad el oba kengei er a Dios.

16 A Jesus a tilbir el kmo ngar er sel mei el beches el beluulechad, e tirke el kengei er tir a Dios a mo ngmai a sengk er a “diak a ullebengelel klengar.” (Markus 10:30) Ka moutekangel el misii a Biblia er kau el mo er a Johanes 3:16 me a 17:3, e mesa lullekoi er ngii a Jesus el kmo ngngera kired el meruul er ngii me bo el sebeched el mo nguu a diak a ulebengelel el klengar. Momes el okiu a Biblia aike el klengeltengat el sebechir el mo oldeu a rengrir er ngii tirke el chad el mo rredemelel a nguu tia el mengasireng el sengk el mla er a Dios er a chelsel a Paradis el chutem.

17A chelebirukel, mekemad, delengerenger, me a uldikel a mo diak. “Ngdi telkib kung, e a re dengerenger a mo dibus;…ngdi tirkel medemedemek a mo ungilbesrir el kiei el ngar a beluu.” (Psalm 37:10, 11) Ngmo er ngii a budech e le “[a Dios a mo] merrob a mekemad er a beluulchad el rokir.” (Psalm 46:9; Isaia 2:4) E seikid e “a llemalt bo loleketek er a klemengetel a klengar er [a chad], ma klteketel a le diich a buil e di le medechel a klungiaol” el belkul a kmo ngmo diak a ulebengelel!―Psalm 72:7.

18A remengull er a Jehovah a mo kiei el ngar er a ulekerreu. A rengalek er a Israel er a taem er a omelechesel a Biblia a kiliei el ngar er a ulekerreu sel lolemolem el olengesenges er a Dios. (Levitikus 25:18, 19) Kede ulterekokl el mo oldeu a rengud er a osisiu el ulekerreu er a chelsel a Paradis!―Isaia 32:18; Mika 4:4.

19Ngmo diak a ngelsengesel a kall. A milluches er a psalm a milengitakl el kmo: “Bo le betok a redechel a wheat er a beluu; ma ikel bukl di bo le medekedek er a dellomel el kall.” (Psalm 72: 16) A Jehovah el Dios a mo omekngeltengat er a remelemalt el chedal, me a ‘chutem a mo oltobed a smengel.’―Psalm 67: 6.

Kakerous a blekerdelel a klengar er tir el chad el dmeu a rengrir el dmak el kiei er a chelsel a Paradis

20A beluulechad el rokir a mo paradis. A klebokel el beches el blai me a sers a oberk er aike el chutem el tillemall a rengar er a klengit el chad. (Isaia 65:21-24; Chocholt 11:18) Sel lorael a taem el mong, e aike el basio er a beluulechad el mla meketmokl a omerk el mo lmuut er sel taem el beluulechad el rokir a mla mo klebokel e bekerredechel el ua sers er a Eden. E a Dios a ulterekokl el diak el okor el mo ‘omok a chimal e omotech a rengrir a rokui el dingar.’―Psalm 145:16, New World Translation.

21Ngmo er ngii a budech er a delongelir a rechad me a charm. A tebelik me a turturk el charm a mo dmak el mengang. E a kekerei el ngalek me ngdiak bo el medakt aike el charm el chelecha el taem e ngkdekudel.―Isaia 11:6-9; 65:25.

22A secher a mo diak. Me a Jesus el ngii a Merreder er a Rengedel a Dios el ngar er a eanged, a mo omekungil er a rechad el ngar er a lmuut el kmal klou el rolel er aike el lurruul er a lengar er tia el chutem. (Matteus 9:35; Markus 1:40-42; Johanes 5:5-9) E seikid e ngmo “diak a tal chad el kiei er a beluad el lmuut el mo mengeremrum el kmo ng smecher.”―Isaia 33:24; 35:5, 6.

23A rulekoad a lmuut el mo mekiis e mo er ngii a techellir el diak el luut el mo mad. Tirke el rokui el mechiuaiu el ngar er a kodall el ngar er a omelebedebekel a Dios a rokui el mo moluut a klengar er tir. E le ngmo er ngii a “chokiis rar melemalt mar diak le melemalt.”―Rellir 24:15; Johanes 5:28, 29.

24 Ngmera el mengasireng a klengar er a ngar er a medad el mengiil er a rechad el tir a melilt el mo mesuub el kirel ngike el Ngarbab el Ulemeob, el Jehovah el Dios, e mo mesiou er ngii! Tiaikid sel merael el mei el Paradis el ngar er tia el chutem el lullekoi er ngii a Jesus er sera el tibir el mo er ngike el chad el mle kltekotel er a kerrekar er a bita er ngii el kmo: “Ke mo obengkek el ngara Baradis.” (Lukas 23:43) Ngkmal klou a ultutelel el dosuub a betok el kirel a Jesus Kristus, el oeak ngii e aika el rokui el klengeltengat a mo meketmokl.

AIKE EL LOLISECHAKL A BIBLIA

  • A telbilel a Dios el mo meruul er a beluulechad el mo paradis a mo motaut.―Isaia 45:18; 55:11.
  • A Satan a mengedereder er tia el beluulechad er a chelechang.―Johanes 12:31; 1 Johanes 5:19.
  • Ngar er sel merael el mei el beches el chutem, e a Dios a mo oleitel a betok el klengeltengat er bebrir a rechad.―Psalm 37:10, 11, 29.

Aike el Ker er a Suobel

1. Ngera telbilel a Dios el kirel tia el chutem?

2. (a) Kede mekera e medengei el kmo a telbilel a Dios el kirel tia el chutem a mo tmaut? (b) Ngera ngmelekoi a Biblia el kirir a rechad el kiei el mo cherechar?

3. Ngera el mekngit a rengud er ngii el blekeradel a ngar er ngii er tia el beluulechad, me tia ngmekdubech a ngera el ker?

4, 5. (a) Ngtecha ngike el mera el milengedecheduch er a Eba el ousbech er a bersoech? (b) Ngmekerang e a mle ungil e melemalt el chad a mo merechorech?

6. Ngmilekerang e ngike el mesisiich el ngelekel a Dios e mlo Satan el Diabelong?

7. (a) Ngera uchul me a Adam me a Eba a mlad? (b) Ngera uchul me a rokui el ngelekel a Adam a mo mechuodel e mad?

8, 9. (a) Ngera el ultok a lerirellii a Satan? (b) Ngera uchul me a Dios a dimlak el mereched el lokngemedeterir tirka el mlo omtok er ngii?

10. Ke mekerang e olengeseu er a Jehovah el longer er sel omelsemai er a Satan?

11, 12. (a) Ngmekerang e a ongarm el mlo er a Jesus a olecholt el kmo a Satan a merreder er tia el beluulechad? (b) Ngera dirrek el meketeklii el kmo a Satan a mera el merreder er tia el beluulechad?

13. Ngera uchul me kede ousbech er a beches el beluulechad?

14. Ngtecha bla el ngiltii a Dios el mo Mengedereder er a Rengedel, e milekerang a ulaoch a lolekoi el kirel tiang?

15. Ngera “beches el chutem”?

16. Ngera sel mekreos el sengk el mla er a Dios el mo er tirke el lekengei er tir, e ngera kired el meruul me bo el sebeched el mo nguu?

17, 18. Kede mekera e mo ulterekokl a rengud el kmo ngmo er ngii a budech me a ulekerreu er a beluulechad el rokir?

19. Ngera uchul me kede medengei el kmo ngmo obdois a kall er a chelsel a beches el blekeradel er a Dios?

20. Ngera uchul me ngngulterekokl a rengud el kmo a beluulechad el rokir a mo paradis?

21. Ngera ochotii el kmo ngmo er ngii a budech er a delongelir a rechad me a charm?

22. Ngera mo duubech el mo er a secher?

23. Ngera uchul me a okiis a mo uchul a deurreng er kid?

24. Ngera uldesuem el kirel a klengar el ngar er a chelsel a Paradis el chutem?