Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

KOT EL BLIONGEL

Ngera Klemerang el kirel a Dios?

Ngera Klemerang el kirel a Dios?

A Dios ngmera el omekerreu aike el duubech el eko er kau?

Ngua ngerang a blekerdelel a Dios? Ngngar er ngii a ngklel?

Ngsebeched el olekeed er kid er ngii?

NGMLA ta el momtab er a rengalek sel loker a ker? Te betok a omuchel el lokerker sel kot el mo mengedecheduch. Te ngellomel er kau e oker el kmo: Ngera me a btuch a omsisebusech? Ngera me a eabed a merael? Ngtecha ullisechakl a charm el suebek el mo mengitakl? Alta e ke melasem el onger, engdi ngdiak el blechoel el beot el moruul el uaisei. E le ungil el nger er kau a dirrek el olechau er a lmuut el ta er a ker el kmo: E ngerang?

2 Ngdiak el di el ngalek a oker. E le dorael el mo meklou el chad e kede melemolem el oker a tekoi. Kede oker me bo el sebeched el metik a roled, e mo medengei a kengaol el tekoi me doibngid er ngii, me a lechub e debetik a nger er aike el tekoi el soad el mo medengei. Engdi te betok el chad a mla mo diak el okerker, el ileakl aike el meklou a ultutelel el ker. A lekesengil, e ngdikea el osiik a nger er a tekoi.

Ngalek el oker er a ker

3 Ka molatk aike el ker el ngar er a ikrel tia el babier el me lmuut er a uchelel tia el bliongel. Aikang a bebil er aike el meklou a ultutelel el ker el sebechem el oker, engdi te betok el chad a mla mo diak el osiik a nger er ngii. E ngerang? Ngngar er ngii a nger er ngii er a Biblia? A rebebil a melatk el kmo ngmeringel a bo dodengei a nger er ngii. Me a rekuk bebil a bekikl el oker e le ngchetirir el mo merur. Me a rebebil a melatk el kmo a chouaika el ker a ungil el di mengeteklel a klechelid me a resensei a oker. E kau a ua ngera uldesuem?

4 Ke locha semeriar el mo medengei a nger er aike el meklou a ultutelel el ker el kirel a klengar. Ke ulterekokl el locha melatk a lebebil er a taem el kmo: ‘Ngngera moktek er a klengar? Ngdi tiaikid a klengar e merekong? A Dios ngmera el ua ngerang?’ Ngungil a lak meterob el dimerekmo obetik a ulterekokl el nger. A Jesus Kristus a dilu el kmo molemolem el olengit, me le beskemiu; e molemolem el osiik mo betik; e molemolem el melngod er a chesimer, me lobkais el kiriu.―Matteus 7:7.

5 A lsekum ke melemolem el osiik a nger er aika el ker, e ngsebechem el metik el kmo ngklou a omeksaul el bo mnguu. (Osisechakl 2:1-5) E le ngngar er ngii a nger er ngii, e sebechem el metik er a chelsel a Biblia e kmal beot el bo dodengei. E a ngarbab er ngii, ngsebechel el mo uchul a omelatk me a deurreng el kirem. Ngsebechel el ngosukau el mo er ngii a deurreng er a klengar er kau er a chelechang. Me ka me dolebedebek er a ta el ker el omekerrau a rengrir a rebetok el chad.

A DIOS NGDIAK EL OMEKERREU?

6 Te betok a omdasu el kmo nguaisei. E le te kmo, ‘A lsekum a Dios a omekerreu, e tia el beluulechad ngdiak el bai el ngodech el beluu er a chelechang?’ E le sel domes el meliuekl er kid e kede di mesa beluulechad el mui er a mekemad, klauketui, me a chelebuul. Me kid a mo smecher, e mo chuarm, me a rebetik er a rengud a mad. Me seikid e te melekoi el kmo, ‘A lsekum a Dios a mera el omekerreu er kid, e ngera me ngdiak el terob ngii el tekoi me lak el duubech?’

7 E a mekngit er ngii, a rullisechakl a tekoi er a klechelid a lebebil e te rulleterir a rechad el mo omdasu el kmo a Dios a diak el mekngit a rengul er kid. El mekera loruul el uaisei? Sel duubech a chelebuul, e te blechoel el melekoi el kmo ngkuk mlo kirel er a Dios. Chouaisei el osisechakl a ua loltelechakl er a Dios el kirel aike el mekngit el tekoi el duubech. A Dios ngmera el uaisei? Ngngerang mera el lolisechakl a Biblia? A Klengiterreng 3:33 a melekoi el kirel a Dios el kmo: “Ng diak ledeu a rengul el omekringel e omekcharm er kid.” Me a Dios a diak el luchul aika el mekngit el blekeradel er a beluulechad. (Job 34:10-12) Me nguaisei engdi ngdirk omechei aika el mekngit el blekeradel. Engdi ngngar er ngii a klou el klekakerous er a omechei a tekoi me ngngar er ngii me a meruul er ngii el tekoi.

8 El di ua tiang, ka molebedebek er a mellomes a rengul e betik a rengul el chedam el ngar er ngii a ngelekel el mla mo klou el chad e dirk obengterir. Ngii el ngalek sel bo el mekngit a omerellel e bo lomtok er tir e ltobed el mo osiik a ngodech el delengchokl, e a demal a diak lorrob er ngii. Engdi a bo el mekngit a klengar er ngii, e ngdemal a mle uchul? Ngdiak. (Lukas 15:11-13) Me ngngar er a osisiu el blekeradel, e a Dios a dimlak lorrob er a rechad er a lengiltii el mo oltirakl er a mekngit el rolel a klengar, engdi ngdimlak el ngii a ulemekdubech aike el mondai el mlo er ngii el omerellir a uchul. Me ngkmal cheleuid el tekoi a doltelechakl er a Dios el kirel a rokui el mondai el ngar er ngii er a klechad.

9 Ngngar er ngii a ungil el uchul me a Dios a omechei er a rechad me te melemolem el ngar er a mekngit el rolel a klengar. Ngii a mellomes a rengul e mesisiich el Ulemeob, me ngdiak a ultutelel el losaod er ngii er kid. Engdi ngbltikerreng er ngii a uchul e nguaisei. Ke lmuut el mo mesuub a betok el ngar er a 11 el Bliongel. Me di bo lulterekokl a rengum el kmo a Dios a diak el ngii a uchul a mondai el dechelebangel. Ngbai meskid a omelatk el kirel a semecheklel a mondai er kid.―Isaia 33:2.

10 A lmuut el tang, a Dios a chedaol. (Isaia 6:3) Tiang a belkul a kmo ngbliochel e klikiid el diak a chesechesemel a klengit er ngii. Me ngkmal sebeched el otuil a klaumerang er kid er Ngii. Tiang a lmuut el cheroid er aike el sebeched el melekoi el kirir a rechad el bebil e te kmal chebirukel a omerellir. Ngmo lmuut er ngike el kot el melemalt el merreder me ngdiak a klisichel el sumechokl a bebil er a tellemall el lukdubech a remekngit el chad. Engdi a Dios a olab a bek el klisiich. Ngsebechel, e ulterekokl el mo choroid aike el bek el telemellel a chelebirukel el ngar tia el klechad.―Psalm 37:9-11.

NGUA NGERA OSENGEL A DIOS EL KIREL CHELEBIRUKL EL DECHELEBANGEL?

11 Ngua ngera osengel a Dios el kirel aika el tekoi el ngar er ngii er a beluulechad me a dirrek el klengar er kau? A Biblia a olisechakl el kmo a Dios a ‘betik a rengul er a llemalt.’ (Psalm 37:28) Me ngkmal omekerreu el kmo ngerang a melemalt e ouketui a rokui el bedengel a chelebirukel. A Biblia a melekoi el kmo a Dios a “kmal uluuchel er a rengul” er a lomes a chelebirukel el mekekii a beluulechad. (Genesis 6:5, 6) A Dios a dirkak el mengodech. (Malakai 3:6) Ngdirk chetil el omes a ringel me a chelebuul el oberkang er a beluulechad. Ngdirrek el diak el soal el omes er a rechad el chuarm. A Biblia a kmo: ‘Ngomekerreu er kau.’―1 Petrus 5: 7.

12 Kede mekerang e medengei el kmo a Dios a mera el ouketui a ringel me a chelebuul? Aikakid a lmuut el bebil er a olechotel. A Biblia a olisechakl el kmo a chad a ulebeob el okesiul a Dios. (Genesis 1:26) Me kede olab a ungil el blekeradel e le Dios el olab ngii el ungil el blekeradel. El di ua tiang, ngkora meringel er kau el meseterir a rediak a telemellir el chad el chuarm? A lsekum ngmeringel er kau el omes a chouaisei el chelebirukel, e bo el ulterekokl a rengum el kmo a Dios a lmuut el kmal meringel er ngii.

13 A ta er a kot el ngarbab el klungioled a rechad a sel duch er kid el olecholt a bltikerreng. Tiang a dirrek el olecholt er a blekerdelel a Dios. A Biblia a olisechakl el kmo a “Dios a bltikerreng.” (1 Johanes 4:8) Kede oubltikerreng e le Dios el oubltikerreng. A bltikerreng, ngsebechel el odbechau el mo torob aika el ringel me a chelebirukel el momes er a beluulechad? A lengar er ngii a klisichem, e ke mo rullii? Ke ulterekokl el mo rullii. Me bo el ulterekokl a rengum el kmo a Dios a mo torob a ringel me a chelebirukel. Aike el telbiil el mildung er a uchelel tia el babier a diak di el ua leberrous el tekoi. A telbilel a Dios a ulterekokl el mo motaut. Engdi uchei er a omotuil a klaumerang er kau er ngii el omelatk, e ngkirem el mo medengei a lmuut el betok el kirel a Dios el mirruul ngii el telbiil.

A DIOS A SOAL A OBO MODENGELII

14 A lsekum ngsoam a chad a bo lodengelkau, e ke mekerang? Ngdiak bai mochotii a ngklem er ngii? A Dios ngngar er ngii a ngklel? Ngbetok el klechelid a onger el kmo ng “DIOS” me a lechub e ng “RUBAK,” engdi aikang a dui, el di ua “king” me a “president” el di dui. A Biblia a olisechakl el kmo a "Dios” me a "Rubak” a bebil er aike el betok el dial engdi ngngar er ngii a mera el ngklel, el Jehovah. A Psalm 83:18 a kmo: “Ng di kau el tang a RUBAK, ke ngarbab el merreder er a beluulchad el rokir.” A lsekum e tia el ngakl a diak er a Biblia el mousbech er ngii, e nglocha soam el mo omes er a Bebil er a Omesodel. A klemerang a kmo tia el ngklel a Dios a debetik er ngii el betok el telael el taem er a chelsel aike el mechuodel el llechukl el babier er a Biblia. Me a Jehovah a soal a bo dodengelii a ngklel e dousbech er ngii. Me ngousbech er a Biblia el olecholt er a ngklel er kau.

A redil el olecholt er a ngklel

A lsoam a chad a bo lodengelkau, e ngdiak mochotii a ngklem er ngii? A Dios a olecholt er a ngklel er kid el okiu a Biblia

15 A Dios a ngiluu a ngakl el kmal klou a belkul. Tia el ngakl el Jehovah a belkul a kmo ngii el Dios a sebechel el mo oltaut a ngii di el telbilel e kutmokl a ngii di el moktek el lolatk.* Tia el ngklel a Dios a kmal ileakl el diak a ngodech el uai ngii e di ngii el tang a oungakl er ngii. Me ngoeak a betok el rolel e a Jehovah a kmal ileakl. El ua ngerang?

16 Kede milsa Psalm 83:18 er a lolekoi el kirel a Jehovah el kmo: “Ng di kau el tang a RUBAK, ke ngarbab el merreder er a beluulechad el rokir.” E di ta el Jehovah a mokedong el kmo: “Rubak el Dios, el Cherrengelel a klisiich.” A Chocholt 15:3 a kmo: “Ngklou e mengasireng chomerellem! Kau el King ra rokuil renged, ngmelemalt e klemerang a rolem!” Tia el dui el "Rubak el Dios, el Cherrengelel a klisiich” a olisechakl er kid el kmo a Jehovah ingii a kot el mesisiich el di ngar el diak lemokesiu a klisichel e kot el ngarbab. Ngar er a 1 Timoteus 1:17, e a Jehovah a okedongall el “King ra ikel bek el taem, el ngikel diak le ngemed.” Tia mekltkid el kmo a Jehovah a dirrek el ileakl el ngar er a kuk ta er a rolel. Ngdi ngii el tang a di mla ngar er ngii er a irechar el mei. A Psalm 90:2 a kmo: “E kau a diak a ulebengelem el Dios, el diak a uchelem el diak a ulebengelem.” Tia el mengasireng el uldasu ngdiak el sal ochau a omengull er kid?

17 A Jehovah a dirrek el kmal ileakl e le ngdi ngii el tang a Ulemeob. A Chocholt 4:11 a kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi, ma rokuil tekoi a ngarngii luleltirakl a uldesuel a rengum e ulebeob.” Aike el rokui el sebechem el dobedebek, el ngar er a eanged el mei er a chutem el mo lmuut er a chelsel a daob me a omoachel, ngii el rokui el ngar er ngii e le Jehovah el Ulemeob.

NGSEBECHEM EL MO KMEED ER A JEHOVAH?

18 A rebebil a kora mo bekikl sel longuiu el kirel aika el betok el mengasireng el blekerdelel a Jehovah. Tomdasu el kmo a Dios a kmal ngarbab me ngdiak el sebechir el mo kmeed er ngii me a diak a ultutelir er ngii. Engdi a chouaisei el uldasu, ngmelemalt? Ngdiak, e le Biblia a melekoi el kirel a Jehovah el kmo: “E merang, ngii a diak le cheroid ra di derta er kid.” (Rellir 17:27) Ngdirrek el melisiich er kid el kmo: “Bo mkeed ra Dios me bo le keed er kemiu.”―Jakobus 4:8.

A Biblia a olisechakl el kmo a Jehovah a betik a rengul el Ulemeob a rokui el tekoi er a uldekial a eanged me a chutem

Blebelel a Dios

19 Ke mekerang e sebechem el mo kmeed er a Dios? A kot, e ke melemolem er tia el moruul er ngii er a chelechang el mesuub el kirel a Dios. A Jesus a dilu el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.” (Johanes 17:3) Me a dosuub el kirel a Jehovah me a Jesus e ngsebechel el mo uchul a “diak a ullebengelel klengar” el kired. “A Dios a bltikerreng.” (1 Johanes 4:16) Ngdirrek el ngar er ngii a lmuut el bebil er a klebokel el blekerdelel. A Biblia a melekoi el kmo a Jehovah a ‘mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng.’ (Exodus 34:6) Ngdirrek el “ungil, e ousubes a tellemall.” (Psalm 86:5) Ngklou a rengul. (2 Petrus 3:9) E oba blakerreng. (Psalm 18:25) A omolemolem el menguiu er a Biblia, e ke mesang el kmo ngmekerang a Jehovah a lolecholt aikaikid me a lmuut el betok el ungil el blekerdelel.

20 Ngklemerang, ngdiak el sebechem el mesa Dios e le ngdiak a bedengel el rruul er a tech me a rasech. (Johanes 1:18; 4:24; 1 Timoteus 1:17) Engdi sel mosuub el kirel el oeak a Biblia, e ngdi ua lullekoi a ta er a milluches er a psalm el kmo ke mo ‘mechas a rengum er a klungiolel.’ (Psalm 27:4; Rom 1:20) Me a lolengeriakl a omesubem el kirel a Jehovah, e ngmengal mo ua mera el chad er a rengum me ngmeleketek a bltkil a rengum el mo er ngii e mo soam el olekeed er kau er ngii.

Chedam me a ngelekel el sechal

Sel bltikerreng el lolechesuar er ngii a ungil el chedam el mo er a rengelekel a mekltkid er a klou el bltikerreng el oba Demad el ngar er a eanged el mei er kid

21 Ngsebechem el mo medengelii a uchul me a Biblia a olisechakl er kid el mo omdasu er a Jehovah el ua el Demad. (Matteus 6:9) Nguchul a klengar er kid e soal a kot el ungil el klengar el kired, el di ua betik a rengul el chedam el soal a ungil el klengar el kirir a rengelekel. (Psalm 36:9) A Biblia a dirrek el olisechakl el kmo ngsebeched el mo sechelil a Jehovah. (Jakobus 2:23) Ka molebedebek er kau el sebechem el mo sechelil Ngike el Ulemeob!

22 Sel molemolem er a omesubem, e a rebebil a mo melasem el merrob er kau. Engdi lak becherei a ngii di el chad me leterebengau, me bo lak momak er a kot el ungil el klausechelei el sebechem el mo obang.

23 Ngulterekokl el mo er ngii a diak el sal bleketakl er a rengum er a uchelel, engdi kele becherei a rur me leterebengau el loker. A Jesus a dilu el kmo ngungil a lengariou a rengud, el ua remekekerei el ngalek. (Matteus 18:2-4) E kid a medengelterir a rengalek el di oker a ker. A Dios a soal a lemonger a kerim. A Biblia a chemat er a rebebil el mle kerekikl el merriter a bades el omes el kmo a tekoi el lulsuub ngmera el mle klemerang me a lechub e ngdimlak.―Rellir 17:11.

24 A kot el ungil el rolel e kede mesuub el kirel a Jehovah a sel bo dorriter er a Biblia. Engdi ngoeak a ngera el rolel e ngngodech er a bek el babier? A ongingil el bliongel a mo mesaod er tia el tekoi.

AIKE EL LOLISECHAKL A BIBLIA

  • A Dios a omekerreu aike el duubech el eko er kau.―1 Petrus 5:7.
  • A ngklel a Dios a Jehovah.―Psalm 83:18. Momes er a footnote el ngar er a 3 el llel sel cherrungel el oidel a Chedaol Biblia.
  • A Jehovah a mengemedaol er kau el mo kmeed er ngii.―Jakobus 4:8.
  • A Jehovah a betik a rengul, e bekokuii, e chubechub.―Exodus 34:6; 1 Johanes 4:8, 16.

*  Ngar er ngii a lmuut el betok el omesodel a belkul me a omengiuel a ngklel a Dios el ngar er a Bebil er a Omesodel.


Aike el Ker er a Suobel

1, 2. Ngera uchul me ngungil a deblechoel el okerker?

3. Ngera uchul me a rebetok el chad a dikea el lolasem el osiik a nger er aike el meklou a ultutelel el ker?

4, 5. Ngera bebil er a meklou a ultutelel el ker er a klengar el sebeched el oker, e ngera uchul me ngkired el osiik a nger er ngii?

6. Ngera uchul me a rebetok a omdasu el kmo a Dios a diak el omekerreu a ringel el lecharm a rechad?

7. (a) Te mekerang a remengeteklel a klechelid a loruul er a rechad el mo omdasu el kmo a Dios a diak el mekngit a rengul er kid? (b) Ngerang mera el lolisechakl a Biblia el kirel aike el ringel el bo decharm?

8, 9. (a) Ngmekera omomekesiu er a klekakerous er a chad el omechei a chelebirukel me ngmelemolem el ngar er ngii me ngike el uchul a chelebirukel? (b) Ngera me ngdiak el melemalt a dosiik a telemellel a Dios e le ngii el milechititerir a rechad me te merael el ngar er a chelebirukel?

10. Ngera uchul me ngsebeched el oumerang el kmo a Dios a mo choroid aike el bek el telemellel a chelebirukel me a mekngit el omeruul?

11. (a) Ngera osengel a Dios el kirel a chelebirukel? (b) Ngua ngera osengel a Dios el kirel aike el tekoi el omcharm?

12, 13. (a) Ngera uchul me ngngar er ngii a ungil el blekerdeled el ua bltikerreng, e mekerang a bltikerreng e ngar er ngii a lerellii er a osenged er a beluulechad? (b) Ngera uchul me ngsebechel el mo ulterekokl el rengum el kmo a Dios a ngar er ngii a bo el rellii el kirel aika el mondai er a beluulechad?

14. Ngtecha ngklel a Dios, e ngera uchul me ngkired el ousbech er ngii?

15. Ngngera belkul tia el ngakl el Jehovah?

16, 17. Ngera sebeched el suubii el kirel a Jehovah sel domtab aika el dial el: (a) “Rubak el Dios, el Cherrengelel a klisiich”? (b) “King ra ikel bek el taem, el ngikel diak le ngemed”? (c) Ulemeob?

18. Ngera uchul me a rebebil a omdasu el kmo ngkmal diak el sebechir el mo kmeed er a Dios, engdi ngera ngolisechakl a Biblia?

19. (a) Kede mekerang e omuchel el olekeed er kid er a Dios? E ngera el klungiaol a mo er ngii? (b) Ngera el blekerdelel a Dios a kmal soam?

20-22. (a) A lak el sebeched el omes er a Dios e tia el tekoi ngmerrob er kid me ngdiak bo dekeed er ngii? Mosaod. (b) Te mo melasem el mekerang a rebebil er a rechad el melatk a ungil el kirem? Engdi ke mo mekerang?

23, 24. (a) Ngera me ngkirem el melemolem el oker a ker el kirel a tekoi el mosuub? (b) Ngera kede mo mesuub er a ongingil el bliongel?

MOSUUB A LMUUT EL BETOK

Molengit a Diak Locheraol el Omesubel a Biblia

Ngera Me Ngkirem el Mesuub er a Biblia?

A Biblia a olengeseu er a rebetok el miliol el chad el meliuekl er a beluulechad el mo medengei a nger el kirel a meklou a ultutelel el ker er a klengar. Kau ngsoam el mo ta er tir?