Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGETRUICH ME A ONGETIU EL BLIONGEL

Molemolem el Ngar er a Bltikerreng er a Dios

Molemolem el Ngar er a Bltikerreng er a Dios

Ngera belkul a bo lebetik a rengud er a Dios?

Ngmekerang a dolemolem el ngar er a bltikerreng er a Dios?

A Jehovah ngua ngera lomekngeltengat er tirke el melemolem el ngar er a bltikerreng er ngii?

MOLATK er kau el lekong meses a eolt e ke merael er a rael. A eanged a mocha chedelekelek, e ngar er ngii a bisebusech me a derumek, e ngii a ongmengmii a chull. Me ke orreched el osiik er a bo momdor er ngii. E a omomes er a bkul ngii el rael, e ke mesang a ungil el omderungel, el kora kmal mesisiich, e medidirt, el kmal ungil a obo er ngii. Ke ulterekokl el kmal dmeu a rengum el kirel!

A chad el chemiis er a ses el eolt me a chull el osiik a omderungel

A Jehovah ngmo omertelem er aika el taem er a ses el eolt?

2 Kid a kiei el ua dengar er a ses el eolt. A blekeradel er a beluulechad a mekngit e mengal el merael el mo mekngit. Engdi ngngar er ngii a omderungel el sebechel el omekerreu er kid er a tellemall. Tiang ngerang? Mutab a lolisechakl a Biblia el kmo: “[A chad] a sebechel dmu [er a Jehovah] el kmo, ‘Kau osebecheklek e klekerengek! Kau a Dios er ngak; ak uumeral ulsirs er kau.’ ”—Psalm 91:2.

3 Ka molebedebek er tiang! A Jehovah, el Ngike el Ulemeob e Oba Uldekial a Omerreder er a eanged me a chutem a sebechel el mo sebechekled. Ngsebechel el omekerreu er kid e le ngkuk mesisiich er a ngii di el techang me a lechub a ngii di el ngerang el me omtok er kid. Me a demetemall e ngsebechel el remuul el mo ungil a rokui el mekngit el dilubech el mei er kid. Kede mekerang e rullii el mo chosebechekled? Ngkired el otuil a klaumerang er kid er ngii. A Tekingel a Dios a dirrek el mengelechel el kmo: “Momekedelad er kemiu ra chelsel a bltikerreng ra Dios.” (Judas 21) Nguaisei, ngkired el melemolem er a klaubltikerreng er kid me a Demad el ngar er a eanged. Seikid e ngmo ulterekokl a rengud el kmo ngsebechekled. Engdi kede mekerang e sebeched el mekur a chouaisei el deleuill?

BO MOLECHESUAR E MONGER ER A BLTIKERRENG ER A DIOS

4 A dolemolem el ngar er a bltikerreng er a Dios, e ngkired el mo oba omereng el saul el kirel a ochotel a bltkil a rengul a Jehovah el mei er kid. Ka molebedebek a bebil er a osisecheklel a Biblia el bla msuub er tia el babier. A Jehovah el Ngike el Ulemeob, a milskid a beluulechad el mo delengchekled. Ngmilekekii er a obdois el kall me a ralm, kerruul el mengai er a lukel a klengar, bek el bedengel a charm, me a klebokel er a osenged el basio. A Dios, el mle uchul a omelechesel a Biblia, a ullecholt er a ngklel me a blekerdelel el mei er kid. A Tekingel a dirrek el olecholt el kmo nguldureklii a Jesus el betik er a rengul el Ngelekel el mei er a beluulechad, e milecherei me ngmo chuarm e mad el kired. (Johanes 3:16) A chouaisei el sengk a meskid a omelatk er a ungil el klengar er a ngar er a medad.

5 A omeltked er a ngar er a medad a dirrek el ultuil er a tekoi el rirellii a Jehovah el ngii a kabelment el ngar er a eanged, el Rengedel a Messias. Ngdi kmedung e ngmo torob a rokui el ringel e mo rullii tia el chutem el mo paradis. Ka di molatk er tiang! Ngmo sebeched el kiei el ngar er a budech me a deurreng el mo cherechar. (Psalm 37:29) Engdi chelechang, e a Dios a mla meskid a ulekrael el kmo ngmekera dekiei el oltirakl er a kot el ungil el rolel a klengar. Ngmla meskid a sengk er a nglunguuch, el ngii a techall er a mimokl el cheldecheduch el obengkel. Aikang a di bebil er aike el rolel e a Jehovah a olecholt er a bltikerreng er ngii el mei er a klechad me a derta el chad el uai kau.

6 A klou a ultutelel el ker el kirem el mo melatk er ngii a kmo: Ngmekera kunger er a bltikerreng er a Jehovah? Te betok a mo kmo, “Ngkirek el di mo betik a renguk er a Jehovah.” Kau me ke omdasu el uaisei? A Jesus a dilu el kmo tiaikid a kot el ngarbab er a rokui el llach el kmo: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” (Matteus 22:37) Ngar er ngii a betok el uchul e ngmo betik a rengum er a Jehovah el Dios. Engdi sel momdasu el kmo ngngar er ngii a chouaisei el bltikerreng er kau, engdi seikid a omousbech er ngii el mo betik a rengum er a Jehovah er a rengum el rokir, klengar er kau el rokir, me a uldesuem el rokir?

Tane er a apple

7 El ua losaod a Biblia, a bltikerreng el mo er a Dios a diak el di luldasu. E le alta ngklou a ultutelel, engdi tiang a dirk uchelel sel mera el bltikerreng el bo dolechesuar el mo er ngii. Ngsebeched el omekesiu er ngii el ua tiang, a tane er a apol a klou a ultutelel el kirel a okedbechel tia el ourodech el kerrekar. Engdi a lsekum e ngsoam el menga apol, e ngulterekokl el diak el soam a di lebeskau a tane er ngii. Ngar er a osisiu el rolel, a uldasu el kmo ngbetik a rengud er a Dios a dirk uchelel. A Biblia a olisechakl el kmo: “Tial tekoi el kmo, ngbetik a rengud ra Dios, a melekoi ra bo dolab a llechul. E ngiil llechul a diak le meringel.” (1 Johanes 5:3) Me a bo lemerang e a bltikerreng er kid el mo er a Dios a kirel el mo ourodech a ungil el rodech el mocholt el oeak a omeruul.—Matteus 7:16-20.

8 Kede olecholt a bltikerreng er kid el mo er a Dios sel doltirakl a llechul e doltaut er a chelsel a klengar er kid. Ngdiak el sal meringel a doruul el uaisei, e le llechul a Jehovah a rruul el mo olengeseu er kid el mo kiei el dmeu a rengud e ungil a klengar er kid. (Isaia 48:17, 18) Sel dekiei el oltirakl a ulekrael er a Jehovah, e kede ochotii el mo er a Demad el ngar er a eanged el kmo kede mera el oba omereng el saul el mo er aike el bla el rruul el mei er kid. Ngklengiterreng e le te mekesai er a chelechang a olecholt a omereng el saul. Ngdiak el soad el mo diak doreng a saul, el ua rechad el kiliei er a taem el dirk el ngar tia el beluulechad a Jesus. A Jesus a ulemekungil er a reteruich el kemkom, engdi ngdi mle ta er tir a mlo oureng a sulel. (Lukas 17:12-17) Kede ulterekokl el soad el mo ua ngike el uleba omereng el saul, e diak el soad el mo uai tirke el tetiu!

9 Me ngngera el llechul a Jehovah a kired el mo oltirakl? Kede mla suub a betok er ngii er a chelsel tia el babier, engdi hall e bo domelekl a bebil. A doltirakl a llechul a Dios e ngngosukid el mo melemolem el ngar er a bltikerreng er ngii.

MLUUT EL MENGAL MO KMEED ER A JEHOVAH

10 Omesuub el kirel a Jehovah a klou a ultutelel el bakes el olekeed er kid er ngii. A lengar er ngii a ngar er a kelekolt er rikl el mekerasem me ngmilseb er a ngau e ngmecherei ngii el ngau me ngmad? Ngdiak, nglocha bai di omelecha idungel me ngmelemolem el kmard e mekeald. Me ngua idungel el meruul er a ngau me ngdi kmard, e a “klemedengei er a Dios” a meruul er a bltikerreng er kid el mo er a Jehovah me ngdi mesisiich.—Osisechakl 2:1-5.

A bltikerreng er kau el mo er a Jehovah a ua ngau el kirem el olsiu er ngii me ngdi melemolem el kmard

A chad el mengeald er ngii er bita er a ngau

11 A Jesus a mle soal a rulebengkel a lolemolem a bltikerreng er tir el mo er a Jehovah me a mekreos el Tekingel er a klemerang me di lengar el mesisiich el kmard. Uriul er a okisel, e ngullisechakl er a reteru er a redisaiplo er ngii a bebil er a ulaoch el ngar er a chelsel a Chuodel el Renged el tilaut er ngii. Me ngngera dilubech? Uriul e te dilu el kmo: “Sera longedecheduch er kid ra rael, me sera loledaes a chedaol Llechukl e ngkora kilard a rengud?”—Lukas 24:32.

12 Sera omkot el mo medengei a mera el lolisechakl a Biblia, e ke ulterekokl el kmal mlo dmeu a rengum, e blak a rengum, e mlo betik a rengum er a Dios. Te betok a dirrek el mlo melechesiu el uaisei. Engdi a omelsemai er a chelechang a kmo, ngmekera e melemolem el mesisiich a bltikerreng er kid e mekera dengesuir el mo mukeroul. Ngdiak el soad el oltirakl er a blekeradel er tia el beluulechad el lullekoi er ngii a Jesus el kmo: “Ngmo mekelekolt a bltikerreng rar betok.” (Matteus 24:12) Ke mekerang e a bltikerreng er kau el mo er a Jehovah me a klemerang er a Biblia a diak el bo lemekelekolt?

13 Molemolem el melai a klemedengei el kirel a Jehovah el Dios me a Jesus Kristus. (Johanes 17:3) Molebedebek aike el mosuub el ngar er a Biblia e di lekau el oker el kmo: ‘Tia ngngera ngosisecheklak el kirel a Jehovah el Dios? Ngera lmuut el bebil er a uchul el lebeskak el mo betik a renguk er Ngii el oba renguk el rokir, uldesuek el rokir, me a klengar er ngak el rokir?’ (Psalm 77:12) A chouaisei el omelebedebek a rullii a bltikerreng er kau el mo er a Jehovah me ngdi mesisiich el kmard.

14 A ta er a rolel e ngmongeseu a bltikerreng er kid el mo er a Jehovah me ngdi melemolem el kmard a oeak sel deblechoel el meluluuch. (1 Thesalonika 5:17) Ngar er a 17 el Bliongel, e kede silubii el kmo a nglunguuch a mekreos el sengk el mla er a Dios. Ngua deleuill er a rechad el mo mesisiich el oeak a mimokl el cheldecheduch er a delongelir, a deleuill er kid me a Jehovah a melemolem el mekereker sel deblechoel el meluluuch el mo er ngii. Ngklou a ultutelel a debechei a nglunguched me lak di bo el ua lebechachau el omelekoi el di domelekl el diak a mera el belkul. Ngkired el mengedecheduch er a Jehovah el ua ngalek a longedecheduch er a betik er a rengul el chedam. Ngsoad el mo mengedecheduch el oba omengull, engdi ngdirrek el kired el siojiki e mimokl el ouchais aike el ngar er a rengud. (Psalm 62:8) Nguaisei, a omesubed er a Biblia el di kid el tang me a nglunguuch el ngar er a rengud a meklou a ultutelel el telengtengil a omengull er kid, e ngosukid el mo melemolem el ngar er a chelsel a bltikerreng er a Dios.

BO EL DEU A RENGUM EL NGAR ER A OMENGULL ER KAU

15 A omesubed er a Biblia el di kid el tang me a nglunguuch a rolel a omengull el doruul el di kid. Engdi chelechang, e bo dosaod er a ta er a telengtengil a omengull el doruul er a buai: sel dongedecheduch er a rebebil el kirel a klaumerang er kid. Kau ngmla ta el moruul er tiang? A leuaisei, e ke ulterekokl el mle dmeu a rengum er tia el ungil el techall. Sel douchais a klemerang el bla desuub el kirel a Jehovah el Dios, e kede meruul er tia el kmal klou a ultutelel el ngerachel el mloterekokl er a rokui el mera el Kristiano, el ngii a berkel a ungil el chais er a Rengedel a Dios.—Matteus 24:14; 28:19, 20.

16 A apostol el Paulus a ulemes er a omesiungel el kmal mle mekreos. (2 Korinth 4:7) Sel omongedecheduch er a rechad el kirel a Jehovah me a moktek er ngii sei a kot el ungil el ureor el sebechem el meruul er ngii. E le ke mesiou er a kot el ungil el Mastang, el sebechel el mo uchul a kot el ngarbab el klungiolem. Sel omteloi er tia el ureor, e ke olengeseu er a remelemalt a rengrir el mo olekeed er tir er a Demad el ngar er a eanged e mo merael er a rael el mo er a diak a ulebengelel el klengar! Ngera ngodech el odeu a rengud el ureor el ua tiang? Me a lmuut el tang, a omouchais el kirel a Jehovah me a Tekingel e ngkilungii a klaumerang er kau e smisichii a bltikerreng er kau el mo er ngii. Me a Jehovah a dmeu a rengul er aike el omoruul. (Hebru 6:10) Sel omechesang el meruul er a chouaisei el ureor e ke mongeseu el mo melemolem el ngar er a chelsel a bltikerreng er a Dios.—1 Korinth 15:58.

17 Ngklou a ultutelel a dolatk el kmo tia el ureor er a berkel a klumech a orechudel er a chelechang. E ngerang? A Tekingel a Dios a kmo: “A kloul sils er a RUBAK a kmedang, ng kmal kmeed me ng di mereched el mei.” (Sefania 1:14) Nguaisei, sel taem a kmal di mereched el mei sel lokngemedii tia el blekeradel er a beluulechad a Jehovah. Me ngkmal kired el mo mengelechel er a rechad! Ngkirir el mo medengei el kmo chelechang e ngmla mo taem el lolilt er a Jehovah el mo Merredelir. E le ulebongel a “diak bo le meoud.”—Habakuk 2:3.

18 A Jehovah a soal a dongull er ngii el ngar er a buai el teloi er a remera el Kristiano. A uchul me a Tekingel a kmo: “E bo de kasisiich el omekses a bltikerreng ma ungil lomeruul, e lak de ua blekerdelir a bebil rar chad el mengoit chongdibel er kid, e bai de kachelechel, e domes er ngiil Sils lolekeed, me de mengal mo uaisei.” (Hebru 10: 24,25) Sel dobengterir a rekldemed el ngar er a omengull er a ongdibel er a Rekristiano e ngmeskid a kmal ungil el techall el sebeched el mo mengebkall e mengull er a betik er a rengud el Demad. Kede dirrek el kateketek e kasisiich.

19 Sel dobengterir a rebebil er a remesiungel a Jehovah, e kede smisichii a bltikerreng me a klausechelei er kid el ngar er a chelsel a ongdibel. Ngklou a ultutelel a domes a ungil el blekerdelir a rebebil, el uai a Jehovah el omes a ungil er kid. Lak momdasu el kmo a rekldemem er a klaumerang a mecherrungel. Molatk el kmo a rokui el chad a melasem el omekeroul er a ungil el deleuill er tir el obengkel a Dios, engdi ngkakerous a dauch er a okurulir. Ngdirrek el diak dobes el kmo a rokui el chad a mo er a cheleuid. (Kolose 3:13) Sel omolasem el omak a kmes el deleuill el obengterir tirke el betik a rengrir er a Jehovah, e ke mo melechesuar el kmo ke mukeroul el mo klou el chad er a Tekingel a Dios. Nguaisei, a omongull er a Jehovah el obengterir a rekldemem er a klaumerang e ngngosukau el mo melemolem el ngar er a chelsel a bltikerreng er a Dios. Ngmekera Jehovah a lomesterir a omeksullir tirke el blak a rengrir el mengull er ngii me te melemolem el ngar er a chelsel a bltikerreng er ngii?

MODERSAU EL MO MELAI ER A "MERAL KLENGAR”

20 A Jehovah a omesterir a omeksullir a reblak a rengrir el mesiungel a klengar, engdi ngua ngera el klengar? Kau ke mera el ngar er a chelechang? Oumesingd er kid a medengei el kmo ngbleketakl a nger er tiang, e le kede outeliil, e mengang, e melim, me kede ulterekokl el ngar. Me sel sal dmeu a rengud, e ngsebeched el kmo, “Tiaikid a mera el klengar!” Engdi, a Biblia a ochotii a klou a ultutelel el tekoi el kmo ngdiak a chad er a chelechang el mera el ngar.

A ongalek el oldeu a rengrir er a blekeradel er a chelsel a paradis

A Jehovah a soal obo moldeu er a rengum er a "meral klengar.” Kau ke kongei er a okedongel?

21 A Tekingel a Dios a mengelechel er kid el mo “nguu a klengar, el meral klengar.” (1 Timoteus 6: 19) Aikang a ochotii el kmo a “meral klengar” a dolatk el mo nguu er a ngar er a medad el taem. Nguaisei, sel bo demecherrungel, e kede mo melechesuar er sel mera el belkul a tekoi el ngar, e le kede mocha kiei el oltirakl er sel mle mera el telbilel a Dios el kired. Me sel bocha dekiei el ngar er a paradis el chutem el cherrungel a klisichel a bedenged, e ngar er a budech, e dmeu a rengud, e seikid e kede mocha oldeu a rengud er a “meral klengar,” el ngii a diak a ulebengelel el klengar. (1 Timoteus 6:12) Tiang diak el sal kmal ungil el omelatk?

22 Kede mekerang e “nguu a klengar, el meral klengar”? Ngar er a osisiu el bades e a Paulus a milengelechel er a Reksritiano “me loruul a ungil” e "bo le merau ra ungil lurreor.” (1 Timoteus 6:18) A leuaisei e ngbleketakl el kmo ngklou er ngii a ultuil er a bo doltaut a klemerang el bla desuub er a Biblia. A tekingel a Paulus a dimlak el belkul a kmo kede oureor el mengereker er tia el "meral klengar” el oeak a omerelled er a ungil el ureor. E le tia el mengasireng el omelatk er a klengar el bo denguu a di ultuil er a “grazia ra Dios.” (Rom 5:15) Engdi, a Jehovah a dmeu a rengul el lomesterir a omeksullir tirke el blak a rengrir el mesiou er ngii. Ngsoal el mesekau el mo kiei el oba “meral klengar.” A chouaisei el ngar er ngii a deurreng er ngii e budech el diak a ulebengelel el klengar, a medechel er a ngar er a medad el kirir tirke el melemolem el ngar er a chelsel a bltikerreng er a Dios.

23 A derta me a derta er kid a sebeched el di kid el oker er kid el kmo, ‘Ngak ak mesiou er a Dios er sel rolel el lolecholt er ngii a Biblia?’ A dekerekikl el meruul er a nger er kid me di el choi er a bek el sils, e kede ngar er a melemalt el rael. Ngsbeched el mo ulterekokl a rengud el kmo a Jehovah a omerteled e mo omekerreu er a reblak a rengrir el chedal el mo engelakl er aika el mekngit el taem er tia el mekngit el blekeradel. Ngdirrek el mo osebelid el osisebid er a beches el blekeradel el di kmedang. Ngmera el mo dmeu a rengud er isei el taem! E ulterekokl el meral mo dmeu a rengud e le kede rirellii a melemalt el omelilt er a chelechang! A omoruul el uaisei e ke mo oldeu a rengum er a "meral klengar,” el klengar el diak a ulebengelel el oltirakl er sel telbilel a Jehovah el Dios!

AIKE EL LOLISECHAKL A BIBLIA

  • Kede olecholt a mera el bltikerreng el mo er a Dios sel dolab a llechul e doltirakl a omellach el mla er a tekingel.—1 Johanes 5:3.
  • A dosuub a Tekingel a Jehovah, e doluluuch el mo er ngii el mera el ngar er a rengud, e dolisechakl er a rebebil el kirel, e dongull er ngii el ngar er aike el miting er a Rekristiano, e kede mongeseu el mo melemolem el ngar er a chelsel a bltikerreng er a Dios.—Matteus 24:14; 28:19, 20; Johanes 17:3; 1 Thesalonika 5:17; Hebru 10:24, 25.
  • Tirke el melemolem el ngar er a chelsel a bltikerreng er a Dios a ngar er ngii a omeltkir el mo oldeu a rengrir er a “meral klengar.”—1 Timoteus 6:12, 19; Judas 21.

Aike el Ker er a Suobel

1, 2. Chelecha el sils e kede metik a ungil el omderungel er ker?

3. Kede mekerang e rullii a Jehovah el mo chosebechekled?

4, 5. Ngera bebil er a rolel e a Jehovah a ullecholt er a bltikerreng el mei er kid?

6. Ngmekera monger er a bltikerreng er a Jehovah el eko er kau?

7. A uldesued el kmo ngbetik a rengud er a Dios, ngdi seikid a usbechall? Mosaod.

8, 9. Ngmekera dolecholt er a bltikerreng me a omereng el saul er kid el mo er a Dios?

10. Msodii el kmo ngera me ngklou a ultutelel el dolemolem el melai a klemedengei el kirel a Jehovah el Dios.

11. A osisecheklel a Jesus ngera ngrirellii er a rulebengkel?

12, 13. (a) Ngua ngera bltkil a rengrir a ruumesingd el chad er a chelechang el mo er a Dios me a Biblia? (b) Kede mekerang e a bltikerreng er kid a diak el bo lemekelekolt?

14. Ngmekera nglunguuch e ngosukid el meruul er a bltikerreng er kid el mo er a Jehovah me ngdi mesisiich?

15, 16. Ngera me ngmelemalt a domes er a ureor er a berkel a klumech el kmo ngmekreos e techall el demlukngeltengat er ngii?

17. Ngera me a berkel a klumech a kmal orechudel er a chelecha el sils?

18. Ngera me ngkired el mengull er a Jehovah el ngar er a buai el teloi er a remera el Kristiano?

19. Ngmekera doureor el melisiich er a bltikerreng er a chelsel a ongdibel er a Rekristiano?

20, 21. Ngera “meral klengar,” e ngera me ngkmal ungil el omelatk?

22. Ke mekerang e “nguu a klengar, el meral klengar”?

23. Ngera me ngklou a ultutelel el dolemolem el ngar er a bltikerreng er a Dios?

MOSUUB A LMUUT EL BETOK

Molengit a Diak Locheraol el Omesubel a Biblia

Ngera Me Ngkirem el Mesuub er a Biblia?

A Biblia a olengeseu er a rebetok el miliol el chad el meliuekl er a beluulechad el mo medengei a nger el kirel a meklou a ultutelel el ker er a klengar. Kau ngsoam el mo ta er tir?