Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGETERUICH ME A ONGEUID EL BLIONGEL

Mokedau er a Dios el Ngar er a Nglunguuch

Mokedau er a Dios el Ngar er a Nglunguuch

Ngera me ngkired el meluluuch el mo er a Dios?

Ngera kired el meruul me bo de morenges er a Dios?

Ngmekerang a Dios a longer a nglunguched?

A DOMEKESIU er ngii er tia el klou el melidiul, e a beluulechad a kmal imis el kekerei. Me ngngar er a osengel a Jehovah, el “ngikel milebii a eanged ma chutem,” e aika el renged er a klechad a di ua telngimech er a chimo el baket el ralm. (Psalm 115:15; Isaia 40:15) Engdi a Biblia a kmo: “Ng kmeed er tirkel rokui el omekedong er ngii, el tirkel mera er a rengrir omekedong er ngii. Ng mesterir a lousbech tirkel rokui el meluu er ngii; ng orrenges ongterir.” (Psalm 145:18, 19) Ka di bo molebedebek er a belkul tiang! A mesisiich el Ulemeob a kmeed er kid e orrenges er “tirkel mera er a rengrir omekedong er ngii.” Kede mera el ngeltengat er a techall el sebeched el mo er a medal a Dios el ngar er a nglunguuch!

2 Engdi a lsekum e ngsoad a Jehovah a lorrenges a nglunguched, e ngkired el meluluuch el ngar er a rolel el kengei er ngii. Kede mekerang e uaisei a lak dodengei a lolisechakl a Biblia el kirel a nglunguuch? Ngklou a ultutelel a bo dodengei el kmo a Biblia ngngerang melekoi el kirel, e le nglunguuch a ngosukid el mo kmeed er a Jehovah.

NGERA ME KEDE MELULUUCH EL MO ER A JEHOVAH?

3 A ta er a klou el uchul e ngkired el meluluuch el mo er a Jehovah a ngii el melisiich er kid el mo meruul el uaisei. A Tekingel a kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit. Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu el ngara Kristus Jesus.” (Filipi 4:6, 7) Me ngulterekokl el diak el soad el di choitii a chouaisei el oeak a klechubechub e a Dios a kiltmeklii el tekoi el kired!

A redil el meluluuch

“Ngikel milebii a eanged ma chutem” a kongei el orrenges a nglunguched

4 A lmuut el ta er a uchul a kmo a deblechoel el meluluuch el mo er a Jehovah e ngsmisichii a deleuill er kid me ngii. A remera el kausechelei a diak di el chadecheduch sel lebo er ngii a lousbech, e te bai kausemeriar me a klausechelei er tir a mengal mo mesisiich sel lemimokl el kaiuecholt a uldesuir el kelatk e lekaukerreu. A deleuill er kid me a Jehovah me ngkmeed el osisiu. Ngoeak tia el babier, e ke mla suub a betok el lolisechakl a Biblia el kirel a Jehovah me a blekerdelel me a moktek er ngii. Ke mla suubii el kmo ngsebechel el mo er ngii a deleuill er kau me ngii. A nglunguuch a meskau a techall el mo olecholt a uldesuem me aike el ngar er a rengum el mo er a Demam el ngar er a eanged. Sel omoruul el uaisei, e ke olekeed er kau er a Jehovah.—Jakobus 4:8.

NGERA KIRED EL MERUUL?

5 A Jehovah ngorrenges a rokui el nglunguuch? Ka molatk a tekoi el dilung el mo er a rulemtok el ngalek er a Israel er a temel a profet el Isaia el kmo: “Cho msal kmal meluluuch, me ngak a di diak bo kurrenges, ele chimomiu a chelsechusem er a klengit.” (Isaia 1:15) Me ngngar er ngii a bebil er a blekeradel el sebechel el rullii a Dios el mo diak el orrenges a nglunguched. Me a nglunguched a bo lemorrenges er a Dios, e ngngar er ngii a bebil er a tekoi el kired el meruul.

6 A kot e ngkired el mo oba klaumerang. (Markus 11:24) A apostol el Paulus a milluches el kmo: “Ma lak a kloumerang e ngdiak el sebechel mo dmeu a rengul a Dios, ele tirikel sorir lolekeed er tir er ngii a diak le iit loumera el kmo ngngarngii a Dios, e dirrek loumera el kmo tirikel osiik er ngii a le besterir chomeksulir.” (Hebru 11:6) A doba mera el klaumerang e ngdiak el belkul a kmo kede di mo medengelii a Dios el kmo ngngar er ngii, e orrenges e onger a nglunguched e merekong. Ngbai mocholt el oeak a omerelled, me ngkirel a blekerdelel a klengar er kid er a bek el sils el omeketakl er tiang.—Jakobus 2:26.

7 A Jehovah a dirrek el soal a rechad el meluluuch el mo er ngii a bo loba klengariourreng e lolekoi a tekoi el mera el ngar er a chelsel a rengrir. Kid ngdiak el ngar er ngii a ungil el uchul e kede olecholt a klengariourreng a dongedecheduch er a Jehovah? A rechad sel lebo er ngii a techellir el mo er a medal a king me a lechub e ng president, e te mong el olecholt er a omengull er tir el kirel sel ngarbab el deruchellel. A teleteled a debo er a medal a Jehovah a kirel el olecholt er a lmuut el dmolch el omengull! (Psalm 138:6) E le ngii a “Dios el Olab a Bek el Klisiich.” (Genesis 17:1) Me sel doluluuch el mo er a Dios, e a blekerdeled a debo er a medal a kirel el olecholt el kmo kede oba klengariourreng e melechesuar a deruchelled er medal el kmal diak dengerang. A chouaisei el klengariourreng a rullid el mo meluluuch el mera el ngar er a rengud, el diak di domelekl a nglunguched el di omasech a tekoi el mla mo kse er kid el melekoi.—Matteus 6:7, 8.

8 A lmuut el ta er a kired el meruul er ngii me lemorenges a nglunguched er a Dios, a kired el meruul a tekoi el oltirakl a nglunguched. El ua tiang, a doluluuch el kmo, “Beskemam er chelechal sils a kelel a tal sils,” e ngkired el mo er a tkurrebab el sebeched el meruul a ngii di el ureor el ngar er ngii el sebeched. (Matteus 6:11; 2 Thesalonika 3:10) Me a doluluuch el mo mesisiich er a chelitechetud, e ngkired el kerekikl el mengeroid er kid er a tekoi el sebechel choitikikid. (Kolose 3:5) Obengkel aike el dousbech er a bek el sils, e ngdirrek el ngar er ngii a ker el kirel a nglunguuch el soad a lemonger.

KER EL KIREL A NGLUNGUUCH A MONGER

9Kede meluluuch el mo er a techang? A Jesus a ullisechakl er a rulebengkel el mo meluluuch el mo er a ‘Demad el ngar er a eanged.’ (Matteus 6:9) A leuaisei, e a nglunguched a kirel el di mo er a Jehovah el Dios e merekong. Engdi, a Jehovah a soal a doluluuch el melechesuar er sel deruchellel a di ta el ngelekel el Jesus Kristus. Me ngua desiluub er a 5 el Bliongel, a Jesus a mlodurokl el mei er a beluulechad el me olubet el melubet er kid er a cheungel a klengit me a kodall. (Johanes 3:16; Rom 5:12) Ngii a ngike el mlengilt el Ngarbab el Prist e Chad er a Kerrekeriil. (Johanes 5:22; Hebru 6:20) Sei a uchul, me a Biblia a omekrael er kid el mo oldars a nglunguched el oeak a Jesus. Ngii el Jesus a dilu el kmo: “Ngak a rael, e klemerang, e klengar; me ngdiak a chad el mora Chedam a lak lokiu ngak.” (Johanes 14:6) A bo lemorenges a nglunguched, e ngkired el meluluuch el di mo er a Jehovah el loeak a Ngelekel.

10Ngkirel el ngar er ngii a ileakl el teleteled a doluluuch? Ngdiak. A Jehovah a diak longerechir a ulterekokl el teleteled e le Biblia a olisechakl el kmo ngsebeched el meluluuch el ngar er a betok el kakerous el teletael, el uldimukl er ngii a dedengchokl, deterrob, doutubuach, me a lechub e kede dechor. (1 Kronika 17:16; Nehemia 8:6; Daniel 6:10; Markus 11:25) A klou a ultutelel a diak el sel teletelel a doluluuch el meues er a rechad, e ngbai sel melemalt el uldasu el dobang. Ngar er a urered er a bek el sils me a lechub e ngsel bo dechebangel a bkaischembrungel, e kede blechoel el di ngar er aike el dengar er ngii e meluluuch er a chelsel a rengud, alta e ngdimlak a chad el medengei, engdi a Jehovah a orrenges a uaisei el nglunguched.—Nehemia 2:1-6.

11Ngerang a sebeched el meluluuch el kirel? A Biblia a kmo: "A dolengit a ngiidi le ngeral tekoi el oltirakl a uldesuel a Dios e ngrongesii ngiil ongtid.” (1 Johanes 5:14) Me ngsebeched el meluluuch el kirel a ngii di el tekoi el oltirakl er a soal a Dios. Ngsoal a Dios a doluluuch el kirel a tekoi el dolatk? Chochoi! A doluluuch el mo er a Jehovah e ngdi ua dongedecheduch er a ungil el sechelid, el sebeched el mimokl el ‘subedii er a ikel ngar a rengud.’ (Psalm 62:8) Ngmelemalt el tekoi a dolengit er a oureor el klisichel a Dios me lengesukid el mo meruul a llemalt. (Lukas 11:13) Ngdirrek el sebeched el olengit a ulekrael el mo meruul a mellomes el omelilt me a klisiich el mo outekangel a meringel el taem. (Jakobus 1:5) A debo er a klengit, e ngkired el olengit a klausubes el loeak a tengetengel a Kristus. (Efesus 1:3, 7) Engdi ngdiak el soad el di meluluuch el kirel a tekoi el di kired el merekong. Kede dirrek el meluluuch el kirir a rebebil, el ua telungalek er kid me a rekldemed er a omengull.—Rellir 12:5; Kolose 4:12.

A rechad el meluluuch el ngar er a kakerous el blekeradel

A nglunguchem a sebechel el morenges er a ngii di el taem

12 A tekoi el kirel a Jehovah a kirel el mo kot el meklou a ultutelel er a chelsel a nglunguched, e le ngngar er ngii a ungil el uchul e kede oldanges er ngii e oureng a sulel er a rokui el klungiolel. (1 Kronika 29:10-13) A Jesus a milskid a kerebai er a nglunguuch, el ngar er a Matteus 6:9-13, el lolisechakl er kid el mo meluluuch el kirel me a kot e a ngklel a Dios bo lemechedaol. E a ongingil, e a Rengedel a Dios lemei me a uldesuel a rengul lemeruul er a chutem el uai a omerellel er a eanged. Uriul er aika el meklou a ultutelel el tekoi el kirel a Jehovah, e ngmlochu omasech a tekoi el ike el di kired. Me a deruul a tekoi el kirel a Dios el mo meklou a ultutelel el tekoi er a chelsel a nglunguched, e kede olecholt el kmo ngdiak dolatk a di klungioled.

13Ngkirel el ua ngerang a klemengetel a nglunguched? A Biblia a diak el loluk a klemengetel a nglunguchel a chad a di lengii el tang me a loluluuch el ngar er a buai. A nglunguuch a sebechel el di kedeb er a uchei er a blengur, me a lechub e ngkemanget el louchais aike el ngar er a rengud el mo er a Jehovah. (1 Samuel 1:12, 15) Engdi a Jesus a ulemtok er a rechad el merruul a mekemanget el nglunguuch el di kirel a ues. (Lukas 20:46, 47) A chouaisei el nglunguuch a diak el kengei a Jehovah. A klou a ultutelel a kmo kede meluluuch el ngar er a rengud, me a klemengetel a nglunguuch el kengei a Dios a di mo ultuil er a blekeradel el ngar er ngii me a usbechellel er sel taem.

14Ngua ngerang a kdemel a nglunguched? A Biblia a melisiich er kid el ‘diblechoel el meluluuch’ e ‘lak demekimd el meluluuch.’ (Lukas 18:1; Rom 12:12; 1 Thesalonika 5:17) Nguaisei, engdi aika el tekoi a diak el belkul a kmo ngkmal kired el meluluuch el mo er a Jehovah er a bek el bung er a klok. Ngbai mengelechel er kid a Biblia el mo blechoel el meluluuch, el oureng a sulel a Jehovah el kirel a klungiolel el mei er kid e osiik er ngii el kirel a ulekrael me a ongelaod me a klisiich. Ngungil a rengud e le kede medengei el kmo a Jehovah a diak loluk er a klemengetel me a kdemel a lsebeched el mengedecheduch er ngii el oeak a nglunguuch. A lsekum e kede mera el oba omereng el saul el kirel a techall er a nglunguuch, e ngulterekokl el mo er ngii a betok el techelled el meluluuch el mo er a Demad el ngar er a eanged.

15Ngera me ngkired el kmo "Amen” er a ulebongel er a nglunguuch? A tekoi el “amen” a belkul a kmo “nguaisei” me a lechub e ng “bo leuaisei.” A okesiu el ngar er a Biblia a ochotii el kmo ngmelemalt a dedu “Amen” er a ulebengelel a nglunguched me a nglunguuch el ngar er a buai. (1 Kronika 16:36; Psalm 41:13) Sel dedu “Amen” er a ulebengelel a nglunguched, e kede melisiich el kmo a tekoi el dedilung a mera el mla er a rengud. A lekekerei me a leklou a ngered el dmu “Amen” er a nglunguchel a chad el ngar er a buai, e kede ochotii el kmo kede kongei aike el uldasu el meldung.—1 Korinth 14:16.

ROLEL A DIOS A LONGER A NGLUNGUCHED

16 A Jehovah ngmera el longer a nglunguuch? Nguaisei! Me ngulterekokl a rengud el kmo “[Ngike el] Onger a nglunguuch” a mo onger a nglunguchir a rebetok el miliol el chad el loldars el mera el ngar er a rengrir. (Psalm 65:2) A Jehovah a onger a nglunguched el oeak a betok el kakerous el rolel.

17 A Jehovah a ousbech er a rechanghel er ngii me a remesiungel el ngar er tia el chutem el mo onger a nglunguuch. (Hebru 1:13, 14) Ngbetok a rechad el milluluuch el kirel a ngeso el mo medengelii a Biblia e di mle telkib el taem er a uriul e a remesiungel a Jehovah a mlo metik er tir. A chouaisei el chais a meketeklii el kmo a rechanghel a omekrael er a ureor er a berkel a klumech. (Chocholt 14:6) Me a longer a nglunguched er a taem el demera el ousbech a ngeso, e a Jehovah a sebechel el mekrolii a ta er a Kristiano el me ngosukid.—Osisechakl 12:25; Jakobus 2:16.

18 A Jehovah el Dios a dirrek el ousbech er a oureor el klisichel me a Tekingel, el Biblia, el onger a nglunguchir a remesiungel. Ngsebechel el onger a nglunguched el kirel a ngeso el mo outekangel a omelsemai el oeak sel lomeskid a ulekrael me a omelisiich el okiu a oureor el klisichel. (2 Korinth 4:7) Ngblechoel a nger er a nglunguched el kirel a ulekrael el debetik er a Biblia, el ngar er ngii e a Jehovah a ngosukid el mo melilt a tekoi el oba llomeserreng. Kede metik a bades el ngosukid sel dosuub er a Biblia me aike el babier el mesaod a tekoi er a Biblia, el di ua tia el babier. A suobel el kired el mo melebedebek a mocholt er kid el oeak a tekoi el medung er a miting er a Rekristiano me a lechub a ta er a remechuodel.—Galatia 6:1.

A obekel el olengeseu er a chuodel el sechelirir

A longer a nglunguched, e a Jehovah a sebechel el mekrolii a ta er a Kristiano el me ngosukid

19 A lsekum a Jehovah a kora ua lemeoud el onger a nglunguched, e ngdiak el belkul a kmo ngdiak el sebechel el onger. Ngbai diak dobes el kmo ngonger a nglunguched el oltirakl er a soal me a temel. Ngmedengei a dousbech me a teletelel a lomekerreu el ngaruchei er kid. Ngmechikid me kede melemolem ‘el olengit, e osiik, e melngod er a chesimer.’ (Lukas 11:5-10) A chouaisei el telekangel a ochotii el mo er a Dios el kmo a urunguled a kmal mesisiich me a klaumerang er kid a ulterekokl. A Jehovah a dirrek el onger a nglunguched el ngar er a rolel el diak el sal bleketakl er a osenged. El ua tiang, ngsebechel el onger a nglunguched el kirel a omelsemai el dechelebangel, el diak el cheridii ngii el omelsemai, e ngbai di meskid a klisiich el mtekengelii.—Filipi 4:13.

20 Kede oba klou el omereng el saul e le Ulemeob a kmeed er tirke el meluluuch el omekedong er ngii! (Psalm 145:18) Me bo dungil el ousbech er tia el mekreos el techall er a nglunguuch. A deuaisei, e ngmo dmeu a rengud el mengal el olekeed er kid er a Jehovah, el Ngike el Onger a nglunguuch.

AIKE EL LOLISECHAKL A BIBLIA

  • A deblechoel el meluluuch el mo er a Jehovah e ngngosukid el mo kmeed er ngii.—Jakobus 4:8.
  • A bo lemorenges er a Dios a nglunguched, e ngkired el meluluuch el ngar er a klaumerang e oba klengariourreng e melekoi a tekoi el mera el ngar er a rengud.—Markus 11:24.
  • Ngkired el meluluuch el di mo er a Jehovah el oeak a Ngelekel.—Matteus 6:9; Johanes 14:6.
  • A Jehovah, el “[Ngike el] Onger a nglunguuch” a ousbech er a rechanghel er ngii, remesiungel er tia el chutem, oureor el klisichel me a Tekingel el mo onger a nglunguuch.—Psalm 65:2.

Aike el Ker er a Suobel

1, 2. Ngera me a nglunguuch a kmal klou el klengeltengat, e ngera me ngkired el mo medengei a osisecheklel a Biblia el kirel?

3. Ngera ta er a uchul me kede meluluuch el mo er a Jehovah?

4. A deblechoel el meluluuch e ngmekerang a lsisichii a deleuill er kid me a Jehovah?

5. Ngera ochotii el kmo a Jehovah a diak el orrenges a rokui el nglunguuch?

6. A bo lorrenges a nglunguched a Dios, e ngngera ngaruchei el tekoi el kirel ngar er ngii er kid, e mekerang a dolecholt er ngii?

7. (a) Ngera me ngkired el olecholt a omengull a doluluuch el mo er a Jehovah? (b) Sel doluluuch e kede mekerang e olecholt a klengariourreng e melekoi a tekoi el mera el ngar er a rengud?

8. Ngmekerang a doruul a tekoi el oltirakl a nglunguched?

9. Kede meluluuch el mo er a techang, e oeak a techang?

10. Ngera me ngdiak a ileakl el teleteled a doluluuch?

11. Ngerang a bebil er a tekoi el dolatk el melemalt a doluluuch el kirel?

12. Kede mekerang e remuul a tekoi el kirel a Jehovah el mo kot er a chelsel a nglunguched?

13. A Biblia ngolecholt a ngerang el kirel a klemengetel a nglunguuch el kengei a Dios?

14. Ngera belkul sel lolisiich er kid a Biblia me ‘lak demekimd el meluluuch,’ e ngera me tia el tekoi a mengelaod a rengud?

15. Ngera me ngkired el kmo “Amen” er a ulebengelel a nglunguched me a nglunguuch el ngar er a buai?

16. Ngera el tekoi el kirel a nglunguuch a sebechel el mo ulterekokl a rengud er ngii?

17. Ngera me ngsebeched el kmo a Jehovah a ousbech er a rechanghel me a remesiungel er tia el chutem el mo onger a nglunguched?

18. Ngmekerang a Jehovah a lousbech er a oureor el klisichel me a Tekingel el onger a nglunguchir a remesiungel?

19. Ngera kired el melatk er ngii a lsekum a nglunguched a kora ua lak lemonger?

20. Ngera me ngkired el ousbech er tia el mekreos el techall er a nglunguuch?