Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGEUID EL BLIONGEL

A Mera el Omelatk el kirir a Remla Mad el Betik er a Rengum

A Mera el Omelatk el kirir a Remla Mad el Betik er a Rengum

Kede mekera e medengei el kmo ngmera el mo er ngii a okiis?

Ngua ngerang a uldesuel a Jehovah el kirel a okisir a rulekoad?

Te rua techang a mo mokiis er a kodall?

MOLATK er kau el leko ke chemiis er a kmal mekngit el cheraro, el mesisiich e bekerurt er kau. Ke ungil medengei el kmo ngdiak el chubechubechad e le ke mla mesang el mekodeterir a rebebil er a resechelim. Ke kmal merengum el chemiis, engdi ngii a di merael el merma kmeed er kau, me ngkmal dikea omeltkem. E ngii a kiul duum er bita er kau a chad el mle olsobel er kau. Ngkmal klou el cheroid a klisichel er ngika el cherrouem, e iaksok er kau el kmo ngmo olengeseu er kau. Ngulterekokl tia el tekoi el rullau el mo ungil a rengum!

2 Kau a di ua loltoir er kau a cheraro. Kid el rokui a uaisei. Ngua aike el desiluub er sel mlo merek el bliongel, a Biblia a omekedong er a kodall el kmo ngcheraro. Ngdiak a ngii di el ta er kid el sebechel el chemiis el mo cheroid er ngii me a lechub el mochib er ngii. Oumesingd er kid a mla mesa ngika el cheraro a lengai a klengar er a rebetik er a rengud. Engdi a klisichel a Jehovah a lmuut el kmal ngarbab er a klisichel a kodall. A Jehovah a ngike el betik a rengul el chad el me Olsobel, e iaksok el mo tomellii ngii el cheraro, el kodall, me ngdiak el lluut el mo er ngii. A Biblia a olisechakl el kmo: “E ngikel mo kot luriul el cherarou el mo nguemed a kodall.” (1 Korinth 15:26) Tia mera el ungil el chais!

3 Ka domes er ngika el cheraro el kodall a lolemall er kid. A doruul er tiang, e ngsebechel el ngosukid el mo oba omereng el saul el kirel a telbilel a Jehovah el kmo a rulekoad a lmuut el mo ngar. (Isaia 26:19) Ngoeak a omelatk er a okiis, e te lmuut el me ngar.

SEL LEMAD A BETIK ER A RENGUM

4 Ngngar er ngii a betik er a rengum el mla mad? A ringel, klengiterreng, me a uldasu el mla tmurk er a bek el cheldechuul a rokui el kmal mo diak el mutekangel. Chouaiseikid el taem, e ngkmal kired el mo er a Tekingel a Dios el kirel a ongelaod. (2 Korinth 1:3, 4) A Biblia a ngosukid el mo bleketakl a rengud er a uldesuel a Jehovah me a Jesus el kirel a kodall. A Jesus, el kmal mle cherrungel el okesiul a Demal, a mle medengelii a rengelel a lemad a betik er a rengud. (Johanes 14:9) A Jesus sel ngar er a Jerusalem e ngmle blechoel el mo oldingel er a Lazarus me a ruchedal, er a Maria me a Martha, el kiliei er a di mle kmeed el beluu er a Bethany. Te kmal mle ungil el sechelei, e le Biblia a kmo: “A Jesus a mle betik a rengul ra Martha ma merrengel, ma Lazarus.” (Johanes 11:5) Engdi ngdi ua aike el desiluub er sel bliongel er a uchei, a Lazarus a mlad.

5 Ngmle ua ngerang a uldesuel a Jesus er a lemad a sechelil? A bades a ouchais er kid el kmo a Jesus a mlo obengterir a rechedal me a resechelil a Lazarus el ngar er a klengiterreng. A Jesus er a leseterir e ng “kmal mlo meringel ra rengul el mekngit a rengul.” Ngii el bades a melemolem el kmo, “Ma Jesus a lilangel.” (Johanes 11:33, 35) A Jesus ngmle mekngit a rengul e le ngii el kmal dikea omeltkel? Ngdiak, e le ngmle medengei el kmo ngdi kmedung e a kmal mengasireng el tekoi a mo duubech. (Johanes 11:3, 4) Engdi ngdirk millechesuar a klengiterreng el mlo er ngii el kodall a uchul.

6 Tia el kngtil a rengul a Jesus a sebechel el melisiich a rengud. Ngosischeklid el kmo a Jesus me a Demal el Jehovah a ouketui a kodall. Engdi a Jehovah el Dios a sebechel el omtok e mo mesisiich er ngii el cheraro! Me ka me bo desang el kmo a Dios ngrirellii a Jesus el mo sebechel el meruul a ngerang.

“LAZARUS, BE MTOBED!”

7 A Lazarus a mle delekull er a chelsel a ii, me a Jesus a ullengit me lenguu sel bad el mle tengetengel a siseball er ngii el ii el oridii. A Martha a ullekebai er tiang, e le uriul er a eua el klebesei e a bedengel a Lazarus a locha mla omuchel el merael el mo mechut. (Johanes 11:39) A domes er tiang el ngar er a osengel a klechad, e ngkol ngera el omelatk a dirk ngar er ngii?

8 A bad a miltitai, e a Jesus a uleldiu el klou a ngerel el kmo: “Lazarus, be mtobed!” Me ngngera dilubech? “Me ngikal mlad a tobedang.” (Johanes 11:43, 44) Ngsebechem el mesa sel deuil a rengrir tirke el chad el mla er sei? A Lazarus a ble lochederir, ngchederir, ngsechelirir, me a lechub e ngkiliei er a bita er tir, tir el rokui el mle medengei el kmo ngmlad. Engdi, ngkakid el luueta el merma dechor el teloi er tir. Te betok el chad a ulterekokl el kmal ulemechull er a Lazarus el dmeu a rengrir. Ngmera el klou el klisiich er a bebul a kodall a mlocholt er tiang!

A okisel a Lazarus er a kodall a mlo uchul a kmal klou el deurreng.—Johanes 11:38-44

Jesus el olekiis er a Lazarus

9 A Jesus a dimlak el du el kmo ngdi mle ngii e rullii tia el mengasireng el tekoi. Ngar er a nglunguchel er a uchei er a lomekedong er a Lazarus el me tuobed, e ngmileketeklii el kmo a Jehovah a mle Uchul a okisir a rulekoad. (Johanes 11: 41, 42) A okisel a Lazarus a di ta er aike el etiu el osisiu a blekerdelel el ongasireng el llechukl er a Tekingel a Dios.* Me ngmo dmeu a rengud a donguiu e dosuub ngii el tekoi. Ngosisecheklid el kmo a Dios a diak el longetukl er a rechad, e le tirke el milekiis a ngar er ngii er tir a rengeasek me a remechuodel, me a resechal me a redil, me a rechad er a Israel me a rediak. Ngmera el klou el deurreng a desa er aika el cheldecheduch! El di ua tiang, a Jesus er a lokisii a ngeasek el ekebil er a kodall, e a demal me a delal a “kmal mlo imis el dmeu a rengrir.” (Markus 5:42, NW) Nguaisei, a Jehovah a milsterir a ungil el uchul a deuil a rengrir me ngulterekokl el diak el mereched el obes er ngii.

10 Me nguaisei, engdi tirke el lulekisterir a Jesus a liluut el mad. Tiang belkul a kmo ngdimlak a belkul a lolekiis er tir er a kodall? Ngkmal diak leuaisei. Aika el cheldecheduch er a Biblia a olterekokl er a kmal klou a ultutelel el klemerang e meskid a omelatk.

A TEKOI EL DESUUB ER A CHISEL A OKIIS EL MLA ER NGII

Elias, a mellakl el dil, me a mla mekiis er a kodall el ngelekel el sechal

A Elias a ulekisii a ngelekel a mellakl el dil.—1 King 17:17-24

11 A Biblia a olisechakl el kmo a rulekoad a "diak a ngeral lodengei.” Te mla mad me ngdikea el ngar er a ngii di el ker. A cheldechedechal a Lazarus a meketeklii tiang. Uriul er a lluut el me ngar, e a Lazarus nguldeu a rengrir a rechad el kirel a omesodel a klengar el ngar er ngii er a eanged? Me a lechub ngulemekdakt er tir er a kdekudel el chisel a beluu er a ngau? Ngdiak. Ngdiak a ngerang el ngar er a Biblia el ouchais a chouaisei el tekingel a Lazarus. Chelsel aike el eua el klebesei el ble lulekoad, e ngdimlak a "ngeral lodengei.” (Olisechakl 9:5) A Lazarus a di milechiuaiu el ngar er a kodall.—Johanes 11:11.

12 A cheldechedechal a Lazarus a dirrek el olisechakl er kid el kmo a okiis a mera el tekoi el ngar er ngii el diak di el kora di cheldecheduch el chelid. A Jesus a ulekisii a Lazarus er a mederir a rebetok el ocholt. Ngmo lmuut er a remengeteklel a klechelid el uluuketui er a Jesus me ngdimlak el sebechir el loumededenger er tia el ongasireng. Me te bai millekoi el kmo: “Ngikal chad [el Jesus] ngrulla betok lolangch. E kid a mekerang?” (Johanes 11:47) Te betok a mlo omes er ngika el mlokiis er a kodall el chad. Tia mlo uchul e ngliluut el mo betok el chad a mlo olecholt a klaumerang er tir er a Jesus. Te mle sebechir el mesang er a tekoi el dilubech el mo er a Lazarus el kmo, a Jesus a mera el mlodurokl er a Dios el mei. Tia el tekoi a kmal mle bleketakl a uchul me a rebebil er a remengeteklel a klechelid er a Rechijudea a mlo melib a kodellel a Jesus me a Lazarus.—Johanes 11:53; 12:9-11.

Petrus el olekiis er a Dorkas

A apostol el Petrus a ulekisii a Kristiano el redil el ngklel a Dorkas.—Rellir 9:36-42

13 Tia ngkora klebelung a dekengei el kmo a okiis a mera el mla er ngii? Ngdiak, e le Jesus a ullisechakl el kmo a ta er a klebesei e “tirikel rokui el ngara debull” a mo mekiis. (Johanes 5:28) A Jehovah a Ulemeob a rokui el klengar. Me a leuaisei, e ngkol meringel er kid el mo oumerang el kmo ngsebechel el olutii a osisiu el klengar el msa chad? Ngulterekokl el klou er tia el omeruul a di mo ultuil er a omelebedebekel a Jehovah. Ngika ngsebechel el lotketerir tirke el betik er a rengud el ulekoad? Ngngar er ngii a diak lemochur a ildisel el btuch el ngar er a eanged, engdi a Dios a ulemngakl a dersta me a dersta er ngii! (Isaia 40:26) Me a leuaisei, e a Jehovah a ulterekokl el sebechel el dobedebek a bek el komakai el teletelir a rebetik er a rengud, e kltmokl el mo olluut a klengar er tir.

14 Engdi ngua ngera osengel a Jehovah el kirel a okisir a rulekoad? A Biblia a olisechakl el kmo ngkmal semeriar el mo olekiis er a rulekoad. A melemalt el chad el Job a uleker el kmo: “A lsekum ng mad a chad, e ng sebechel lmuut el mo chad?” (Job 14:14) A Job a milsaod el kirel a omengiil el ngar er a debull el mo er sel taem el Dios a mo lotkii el lmuut el okisii. Me ngdilu er a Jehovah el kmo: “Ke mo omekedong, e ngak a mo onger er kau. E le ngkesos a rengum el kirel a urerel a chimam.”—Job 14:15, NW.

15 Ka di molebedebek er tiang! A Jehovah a kmal oureng el mo olekiis er a rulekoad el lmuut el me ngar. Tia ngdiak el sal oldeu a rengud sel bo dodengei el kmo nguaisei a uldesuel a Jehovah? Engdi kuk mekerang a okiis er a ngar er a medad el klebesei? Te rua techang a mo mekiis, e mekiis el mo er ker?

“TIRIKEL ROKUI EL NGARA DEBULL”

16 A omesodel a okiis el ngar er a Biblia a olisechakl er kid a betok el kirel a okiis el mo er ngii er a ngar er a medad el taem. A rechad el mloluut a klengar er tir a mlo sebechir el liluut el mo dmak tir me a rebetik er a rengrir. A okiis er a kodall el mo er ngii er a ngar er a medad el taem a lmuut el mo ungil. Ngdi ua aike el desiluub er a 3 el Bliongel, a moktek er a Dios a mle soal a beluulechad el rokir a bo el paradis. Me seikid, e a rulekoad a diak bo el bekiis el mo er a chelsel a beluulechad el ngar er ngii a mekemad me a delengerenger me a secher er a chelsel. Ngmo er ngii a techellir el mo kiei el mo cherechar el ngar er a chelsel a beluulechad el ngar er a budech me a deurreng.

17 Te rua techang a mo mekiis? A Jesus a dilu el kmo “tirikel rokui el ngara debull” a me tuobed. (Johanes 5:28, 29) Ngdi osisiu, a Chocholt 20:13 a melekoi el kmo: “Ma daob a ulelteterir tirikel mlad el ngara chelsel, ma Kodall ma Hades me ngulelteterir tirikel mlad el ngara chelsel.” A “Hades” a melutk el mo er a debellel a klechad. (Momes er a Bebil er a Omesodel.) A debull a mo bechachau. E le tirke el betok el biliol el olengull el ngar er ngii a rokui el lmuut el me ngar. A apostol el Paulus a millekoi el kmo: “Ngmorngii chokiis rar melemalt mar diak le melemalt.” (Rellir 24:15) Tia ngngera belkul?

18 A ‘remelemalt’ a uldimukl er tir tirke el betok el chad el donguiu el kirir el ngar er a chelsel a Biblia, el kiliei er a uchei er a lemei er a beluulechad a Jesus. Nglocha sebechem el mo lotkii a Noah, Abraham, Sarah, Moses, Ruth, Esther me a relmuut el bebil. A bebil er tirkaikid el sechal me a redil el ullecholt a klaumerang er tir el mo er a Dios a losaod er tir a Hebru er a 11 el bliongel. Engdi a ‘remelemalt’ a dirrek el uldimukl er tir tirke el mesiungel a Jehovah el mlad er a chelecha el taem er kid. Kede oba omereng el saul el kirel a omelatk er a okiis e le ngsebechel el rullid el mo mimokl er a dekted el mad.―Hebru 2:15.

Ngar er a paradis, e a rulekoad a lmuut el mo mekiis e mo dmak tir me a rebetik er a rengrir

A rechad el llueta el mekiis er a kodall er a chelsel a Paradis

19 E kuk mekerang tirke el chad el dimlak el losiou er a Jehovah el dimlak a ta el bo lodengelii? Tirka el betok el biliol el "diak le melemalt” a diak el obes er tir. Tir me te dirrek el mo mokiis er a kodall e mo er ngii a techellir el mo mesuub el kirel a mera el Dios e mo mesiou er ngii. Ngar er a chelsel a ta el telael el rak, e a rulekoad a mo mekiis e mo er ngii a techellir el mo teloi er a ruumerang el ngar tia el chutem el mesiou er a Jehovah. Tia kmal mo ungil el taem. Tiaikid sel taem el lomekedong er ngii a Biblia el kmo ng Sils er a Kerrekeriil.#

20 Tiang belkul a kmo a rokui el chad el mle ta el lengar, te rokui el lmuut el mo mekiis er a kodall? Ngdiak. A Biblia a melekoi el kmo a rebebil er a rulekoad a ngar er a “Gehenna.” (Lukas 12:5) A Gehenna a ngiluu a ngklel er a blil a ulenguotel el mla er a ikrel a Jerusalem er a irechar. A cheklechir a rulekoad me a ulenguotel a lullul er isei. A cheklechir a rechad el mlechoit er sei a lulemes a Rechijudea el kmo ngdimlak el rredemelel a omelakl me a okiis. Me seikid, e a Gehenna a mle melemalt el okesiul a diak a ulebengelel el tellemall. Me alta e a Jesus a ngar er ngii a ngerechelel el mo oukerrekeriil er a redi ngar me a rulekoad, engdi a Jehovah ngii ngike el mo olterekokl er a kerrekeriil. (Rellir 10:42) Me ngdiak bo lolekiis er a rechad el bla loukerrekeriil er tir el kmo te mekngit el chad e diak el sebechir el mengodech a blekerdelir.

A “OKIIS EL MO ER A EANGED”

21 A Biblia a dirrek el melekoi el kirel a kuk ta er a okiis, el ngii a “okiis el mo er a eanged.” Ngdi chimo el uaisei el okiis a losaod er ngii a Biblia, el ngii a okisel a Jesus Kristus.

22 Uriul er a lokodir a Jesus, e a Jehovah a dimlak el becherei ngika el blak a rengul el Ngelekel me lolemolem el ngar er a chelsel a debull. (Psalm 16:10; Rellir 13:34, 35) A Dios a ulekisii a Jesus el me ngar engdi ngdimlak el oba bedengel a klechad. A apostol el Petrus a mesaod el kirel a Kristus el kmo “ngmlo chad e mokoad, e mlukngar” me bo el sebechel el mo er a di mla blekerdelel a klengar er ngii er a lengar er a eanged. (1 Petrus 3:18) Tia mera el ongasireng e le Jesus a luueta el mocha ngar el ua mesisiich el anghel! (1 Korinth 15:3-6) A Jesus a mle kot el chad el ngiluu chouaitia el chetengakl el blekerdelel a okiis. (Johanes 3:13) Engdi ngdiak el di el ngii el tang a mekiis el uaisei.

23 A Jesus a mle medengei el kmo ngdi kmedung e nglmuut el mo er a eanged, me ngdilu er a reblak a rengrir el obengkel el kmo ngmo ‘mengedmokl’ er a basio el kirir er isei. (Johanes 14:2) A Jesus a millekoi el kirir tirkaikid el mo er a eanged el obengkel el kmo te “kekerel delebechel.” (Lukas 12:32) Te tela el chad a uldimukl er a chelsel itia el kekerei el cheldebechel er a reblak a rengrir el Kristiano? Ngar er a Chocholt 14:1, e a apostol el Johanes a melekoi el kmo: “E a ksal omes, e mesang, a Ngelekel a sib [el Jesus Kristus] a dechor ra Rois el Zion, ma dart ma chokouang ma cheual telael el chad el obengkel, el ngarngii a ngklel a Ngelekel a sib ma ngklel a Demal el llechukl ra medal a bderrir.”

24 Tirka el 144,000 el Kristiano, el uldimukl er a reblak a rengrir el apostol er a Jesus, a mo mekiis el mo nguu a klengar el ngar er a eanged. A okisir, ngmo er ngii er a oingerang? A apostol el Paulus a milluches el kmo ngmo duubech er a taem er a demiel a Kristus. (1 Korinth 15:23) Ngdi ua aike el bo mosuub er a 9 el Bliongel, kid a kiei er a chelsel ngii el taem er a chelechang. Me tirke el dirk medechel el ngar er a ulecherangel er a 144,000 er a chelecha el taem er kid sel lemad, e ngdi obutek a mederir e tir a mekiis er a kodall el mo nguu a klengar el ngar er a eanged. (1 Korinth 15:51-55) Engdi tia el klou el ildois er a klechad a oba omelatk el mo mekiis er a kodall er a ngar er a medad el taem el mo kiei er a chelsel a Paradis el chutem.

25 A Jehovah a ulterekokl el mo mesisiich er a cherroued el kodall, me ngmo okngemedii el mo cherechar! (Isaia 25:8) Engdi ke locha mo melebedebek el kmo, ‘A remekiis el mo nguu a klengar el ngar er a eanged, ngngera te mo meruul er sei?’ Te mo uldimukl er a mengasireng el omengederederel a Renged. Kede mo mesuub a lmuut el betok el kirel ngii el kabelment el ngar er a ongingil el bliongel.

AIKE EL LOLISECHAKL A BIBLIA

  • A omesodel a okiis el ngar er a Biblia a meskid a ulterekokl el omelatk.—Johanes 11:39-44.
  • A Jehovah a kmal kesos a rengul el mo olekiis er a rulekoad el lmuut el me ngar.—Job 14:13-15.
  • Tirke el rokui el ngar er a debull a mo mekiis er a kodall.—Johanes 5:28, 29.

*  Aike el bebil er a omesodel a okiis a debetik er a 1 King 17:17-24; 2 King 4:32-37; 13:20, 21; Matteus 28:5-7; Lukas 7:11-17; 8:40-56; Rellir 9:36-42; me a 20:7-12.

#  Kirel a lmuut el betok el omesodel a Sils er a Kerrekeriil me a tekoi el bo el ultuil er ngii e oukerrekeriil, e momes er a Bebil er a Omesodel.


Aike el Ker er a Suobel

1-3. Ngera el cheraro a oltoir er kid el rokui, e ngera uchul me a domes a lolisechakl a Biblia e ngmeskid a telkib el ongelaod?

4. (a) Ngera me a blekerdelel a Jesus el bedul a mlad el betik er a rengul a olisechakl er kid a uldesuel a Jehovah? (b) A Jesus ngmilkdebechii a ngera el ileakl el klausechelei?

5, 6. (a) Ngmilekerang a Jesus er a lomes er a rechedal me a resechelil a Lazarus el ngar er a klengiterreng? (b) Ngera uchul me a kngtil a rengul a Jesus a smisiich a rengud?

7, 8. Ngar er a osengir a rechad, e sel blekerdelel a Lazarus ngera uchul me ngkora ua el sal mlo diak a omelatk el kirel, engdi ngerang mirruul er ngii a Jesus?

9, 10. (a) A Jesus ngmilekerang er a lomeketakl er ngike el uchul a klisiich el olekiis er a Lazarus? (b) Ngera mo klungioled a bo donguiu a lolekoi a Biblia el kirel a okiis?

11. A chisel a okisel a Lazarus, ngmekera lolterekokl er a klemerang el lolekoi er ngii a Olisechakl 9:5?

12. Ngera uchul me ngsebechel el ulterekokl a rengud el kmo a okisel a Lazarus a mera el dilubech?

13. Ngera me ngsebeched el oumerang el kmo a Jehovah a mera el sebechel el olekiis er a rulekoad?

14, 15. Ngdi ua ledilung a Job, ngua ngera uldesuel a Jehovah el kirel a okisir a rulekoad?

16. A rulekoad te mo mekiis el mo er a ua ngera el blekeradel?

17. Ngmo ua ngera klungel a okiis el mo er ngii?

18. Te rua techang a uldimukl er a ‘remelemalt’ el mo mekiis, e tia el omelatk ngera ngrullii el eko er kau?

19. Te rua techang tirke el “diak le melemalt”? Me a Jehovah ngoeak a klechubechub e omesterir a ngera el techall?

20. Ngerang a Gehenna, e rua techang a mo er ngii?

21, 22. (a) Ngera kuk ta er a bedengel a okiis el ngar er ngii? (b) Ngtecha ngike el mle kot el nguu a okiis el mo er a eanged?

23, 24. Te rua techang a rullii a “kekerel delebechel” er a Jesus, e mo tela ildisir?

25. Ngera mo soadel er a ongingil el bliongel?