Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

A “Kloul Babilon” a Obeketakl

A “Kloul Babilon” a Obeketakl

A BABIER er a Chocholt a ngar er ngii a betok el omesodel a tekoi el kired el mo medengei el kmo ngera ngomtechei. El ua tiang, ngmelekoi el kirel a ta el redil el llechukl a ngakl el “Kloul Babilon” er a medal a bdelul. Ngika el redil a lolekoi el kmo ngdengchokl er a bebul a “seked, ma renged.” (Chocholt 17:1, 5, 15) Ngdiak a mera el chad el redil el sebechel el meruul er tiang, a uchul e a Kloul Babilon a ngar er ngii a lomtechei er ngii. Me a leuaisei, e ngika el okesiu el tingaol el dil ngomtechei a ngerang?

Ngar er a Chocholt 17:18, e ngika el osisiu el redil a losaod el kirel el kmo, “ngii a sel kloul mats el mengedereder rar king ra belulechad.” A tekoi el “mats” a olecholt er a uleketmokl el cheldebechel er a rechad. Me tia el “kloul mats” el mengedereder “rar king ra belulechad” a uchul me ngika el redil el ngklel a Kloul Babilon a locha mla er ngii a klou el klisichel el cheldebechel er a beluulechad. Me ngsebechel el okedongall el cheldebechel er a beluulechad el rokir. Engdi ngua ngerang el cheldebechel? Ngcheldebechel er a klechelid. Ka mutab a bebil er a tekoi el lolekoi a babier er a Chocholt el sebechel el rullid el mo omdasu er tiang.

A cheldebechel a sebechel el kirel a balatiks, siobai, me a lechub e ngklechelid. E ngike el redil el ngklel a Kloul Babilon a diak el cheldebechel er a balatiks e le Tekingel a Dios a melekoi el kmo “ar king ra belulechad” me a lechub a chelechad er a balatiks er a beluulechad “a mlora deleboes tir me ngiil redil.” A deleboes el loruul er ngii a melekoi el kirel a deleuill el bla el rruul el lobengterir a remerreder er tia el beluulechad, misei a uchul me ngokedongall el “tingaol dil.”―Chocholt 17:1, 2; Jakobus 4:4.

A Kloul Babilon a diak el sebechel el cheldebechel er a re “ngara belulechad el mengereker,” el omtechei er a chelechad er a siobai, e le te mo lmangel el mekngit a rengrir sel lemetemall. A reking me a rechad er a siobai a losaod er tir el “dechor er cheroid” e omes er a Kloul Babilon. (Chocholt 18:3, 9, 10, 15-17) Sei a uchul me ngoeak a ungil el urebetellel a omesaod sel dolekoi el kmo a Kloul Babilon a diak el cheldellel a balatiks me a ka lesiobai, e ngbai cheldellel a klechelid er a beluulechad el rokir.

A olengchelel a Kloul Babilon el ua klechelid a lmuut el mengal obeketakl el oeak a tekoi el kmo ngmengeuid a bek el renged el oeak a ‘choleiul.’ (Chocholt 18:23) Me seikid el rokui el bedengel a tekoi er a olai a chelsechusem er a tekoi er a klechelid me a remekngit el anghel, e ngdiak el mechas a rengud er a Biblia a lomekedong er a Kloul Babilon el “delengcheklel a mekngit el [anghel].” (Chocholt 18:2; Duteronomi 18:10-12) Tia el cheldebechel a losaod er ngii el kmo ngomtok er a mera el klechelid, e omekcharm er “ar profet mar mechedaol.” (Chocholt 18:24) A Kloul Babilon a mera el imis el ouketui er a mera el klechelid me ngmeringel el loldechelakl e omekoad er “ar ucholt ra Jesus.” (Chocholt 17:6) Me ngika el redil el ngklel a Kloul Babilon a bleketakl el omtechei a cheldellel a klsuul el klechelid er a beluulechad el rokir, el uldimukl er ngii a rokui el klechelid el omtok er a Jehovah el Dios.

← Momes er a medung el bliongel