Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

A Jesus Ngmilechell er a Ongeteruich me a Ongeru el Buil?

A Jesus Ngmilechell er a Ongeteruich me a Ongeru el Buil?

A BIBLIA a diak el louchais er kid el kmo a Jesus ngmilechell er a oingerang. Engdi ngmeskid a ungil el uchul e ngsebeched el oumerang el kmo a cherellel a dimlak el ngar er a Ongeteruich me a Ongeru el Buil.

Ka molatk er a blekerdelel a eanged er seikid el taem er a rak er a chelsel a Bethlehem, el lemlechell er ngii a Jesus. A buil er a Rechijudea el Chislev (osisiu ngii me a November/December) a kmal mle mekelekolt e klou a chull er ngii. E a buil er a uriul er isei a mle Tebeth (December/January). Tiaikid sel buil el kot el mle mekelekolt er a chelsel a ta el rak, el lebebil e ngmo er ngii a yuki er aike el mekedidai el basio. Ka me domes el kmo ngera ngouchais er kid a Biblia el kirel a blekerdelel a eanged er sel basio.

A Esra, el ta er a milluches er a Biblia a olecholt el kmo a Chislev a mera el buil el ble lodengelii a rechad el kmo ngmle mekelekolt e klou a chull er ngii. Uriul er a louchais el kmo a seked a mlo cheldull er a Jerusalem “er a lluich el kebesengil a ongetiu el buil [Chislev]” e ngdilu el kmo, “a re bek el chad el mlar sei a ulemritel…el kmal mle klou a chull” a uchul. Me a lolekoi el kirel a blekerdelel a eanged er seikid el taem er a rak, e tirka el mle kldibel el chad a dilu el kmo: ‘Ngkmal klou a chull, me ng diak el sebecham el dechor er tial di chelelluut el ua itiang.’ (Esra 10:9, 13; Jeremia 36:22) Tiaikid a uchul me a reklekar a charm el kiliei er tia el beluu a mle kerekikl me sel lebo el Ongeteruich me a Ongerung el Buil e ngdimlak a delebechel er tir el di bad er rikl sel leklebesei.

Reklekar me a chermir el sib

A Jesus er sera lemechell e a reklekar a charm me a delebechel er tir a mla er a ked er a klebesei

Engdi a Biblia a ouchais el kmo a reklekar a charm a mla er a ked el olab a delebechel er tir er a klebesei er a taem er a lemechell a Jesus. E a Lukas el ta er a remilluches er a Biblia er seikid el taem, a millekoi el kmo, ng “mlarngii ar mengkar a charm el ngara ked ra klebesei, el mengkar a delebechel el sib” er a bita er a Bethlehem. (Lukas 2:8-12) Mutebengii tia el kmo a reklekar a charm a milengkar a delebechel el sib, el dimlak el kora di merorael a lemellomes el merekong. Me a delebechel er tir a lullab el ngar er a ked er a klebesei. Chouaisei el tekoi ngmle sebechir el meruul er ngii er a Ongeteruich me a Ongerung el Buil el mle blsechel a kelekolt me a chull er a Bethlehem? Ngulterekokl el diak. Me a blekeradel el mla er ngii er a taem er a cherellel a Jesus a meketeklii el kmo ngdimlak el mechell er a Ongeteruich me a Ongerung el Buil.

A Tekingel a Dios a ouchais er kid er a ulterekokl el taem el lemlad er ngii a Jesus, engdi ngmeskid a kekerei el omesodel a kmo ngmlechell er a oingerang. Tiang a mekkeltkid er a tekoi el ledillii a King el Salomon el kmo: “A ungil chisel a chad a kuk ungil er a mekreos el chilt, me sel sils el le mad er ngii a kuk ungil er sel sils el le mlechell er ngii.” (Olisechakl 7:1) Me ngdiak el mechas a rengud a lsekum a Biblia a ouchais er kid a betok el komakai el tekoi el kirel a urerel me a kodellel a Jesus engdi kmal di mekesai el tekoi a lolekoi el kirel a cherellel.

← Momes er a medung el bliongel