Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

ONGERU EL BLIONGEL

A Biblia a Babier el Mla er a Dios

A Biblia a Babier el Mla er a Dios

Ngoeak a ngera el rolel e a Biblia a ngodech er a bebil er a babier?

Ngmekera Biblia a lengesukid el mo outekangel a mondai er kid?

Ngera me ngsebechem el otilii a klaumerang er kau er aike el ulaoch el ngar er a Biblia?

NGSEBECHEM el lotkii a taem el mngiluu a kmal ungil el sengk el mla er a betik er a rengum el sechelim? Ngulterekokl el kmal mlo ungil a rengum. E le sengk el dengai a blechoel el ouchais el kmo ngomes er a klausechelei er kid el kmal mekreos. Me ke ulterekokl el kmal mlo oureng a sulel.

2 A Biblia a sengk el mla er a Dios me kede kmal oba omereng el saul el kirel. Ngolecholt er kid a tekoi el diak el sebeched el metik er a ngii di el ker. El ua tiang, ngouchais er kid er a omebelel a eanged me a chutem, me a rekot el chad. Ngngar er ngii a ulterekokl el omellach el sebechel el ngosukid el mo outekangel a mondai me a sebekreng er kid. Ngsmodii el kmo ngmekera Dios a bo el loltaut er a telbilel e lerellii a blekeradel er a klengar el mo ungil. Ngmera el ungil el sengk a Biblia!

3 A Biblia a dirrek el odeu a rengud, e le ngocholt er kid a tekoi el kirel ngike el milskid, el Jehovah el Dios. Ngulemeskid e le ngmle soal a bo dungil el medengelii. E mera el tekoi, a Biblia a sebechel el ngosukid el mo kmeed er a Jehovah.

4 A lsekum ngngar er ngii a Biblia er kau, e ngdiak di el kau el tang. A Biblia a lecherrungel a oidel me a lak, me ngii a mla meluches e merous el ngar er a betok er a 2,400 el kakerous el omelekoi me ngbekord el 95 el basent er a klechad a menguiu er ngii. Ngbetok er a ta el miliol el Biblia a merous er a bek el sandei me a betok el biliol el utsusi er ngii a mla meruul. Ngbleketakl el diak a ngii di el babier el ua Biblia.

A “New World Translation of the Holy Scriptures” a uleiuid el ngar er a betok el bedengel a omelekoi

A New World Translation el ngar er a betok el bedengel a omelekoi

5 A Biblia a milluches el loeak a ngelsuil a Dios. (2 Timoteus 3:16) El oeak a ngera el rolel? A Biblia a meketeklii el kmo a rechad a milluches el okiu a ulekrael er a oureor el klisichel a Dios. (2 Petrus 1:21) El ua tiang: A merreder er a siobai a oderchii a melechesel me ngmeluches er a babier el ouchais a uldesuel me a omesodel. Me ngbabier er ngii, el diak el babilengel a melechesel. Ngngar er a osisiu el rolel, e a tekoi el ngar er a Biblia a klemechel a Dios, el diak el klemechir a remilluches. Me a Biblia el rokir a mera el “tikingel a Dios.”―1 Thesalonika 2:13.

NGMELEKOI ER A DI TA EL TEKOI E MELEMALT

6 A Biblia a milluches er a chelsel a kuk betok er a 1,600 el rak. A remilluches er ngii a kiliei er a kakerous el taem er a reksi el mle kerous a bedengel a klengar er tir. A rebebil a mle chad er a sers me a rechad er a omenged me a reklekerengel a charm me a reprofet me a rekuk bebil. A Lukas el ta er a milluches a Evangkelio a mle toktang. Me nguaisei el mle bek el bedengel a klengar er a remelluches, engdi a Biblia a oba ta el uldasu er a uchelel el mo er a ulebengelel.*

7 A kot el babier er a Biblia a ouchais er kid el kmo ngmilekera e omuchel a mondai er a klechad. E a ulebongel el babier a ochotii el kmo tia el chutem el rokir a mo paradis. A rokui el tedebechel a Biblia a smaod a betok el telael el rak er a reksi el omeketakl er a moktek er a Dios. Me ngmechas a rengud er a kltang el meues er a omelechesel a Biblia, engdi ngkirel el uaisei e le ngii el mla er a Dios el mei.

8 A Biblia a melemalt a lolekoi. Ngmelekoi a dirkak el lebo er ngii a klemedengei er a klechad el kirel el tekoi, er sel taem er a lemeluches. El ua tiang, ngar er a Levitikus e ngngar er ngii a llach el kirir a rechad er a Israel er a irechar el kirel a tekoi er a omengikiid me a ulekerreuil a bekoiueiuul el rakt er a taem el beluulechad a dirkak bo lodengei a chouaika el tekoi. Ngdirrek el dirk mle klou a cheleuid el uldasu el kirel a beluulechad, e a Biblia a melekoi el kmo a Dios a ‘lilia beluulchad er a bechachau el melidiul.’ (Job 26:7) Engdi a Biblia a diak el ua babier er a skuul el kirel a omesubel a beluulechad. Engdi sel losaod el kirel e ngkmal melemalt a tekoi el lolekoi. Ngdiak el tiaikid sel dolatk er ngii el kirel a babier el mla er a Dios el mei?

9 A Biblia a dirrek el meskid a ulterekokl el tekoi el dilubech er a reksi e mesaod a tekoi el mo komakai.# Ngomasech a ngklir a rechad me a uldidellel a rsechir a rebebil. Ngdirrek a domekesiu er a redi chad er a reksi el blechoel el diak loluches el kirel aike el chelitechetul a rengedir, e a remelluches er a Biblia a kmal mle beches, e le ngmo lmuut er a telemellir me a chelitechetul a rengedir me te uluuchais. El ua tiang, ngar er a babier er a Ulecherangel, e a Moses a milluches el kirel a telemellel el lemluklemalt el kirel. (Ulecherangel 20:2-12) Chouaisei el teletael er a omeluches a meringel el debetik er a babier er a reksi, engdi kede metik er ngii er a Biblia e le ngii el babier el mla er a Dios el mei.

NGBABIER ER A NGAR ER NGII A BELKUL EL LLOMESERRENG

10 A Biblia a milluches el loeak a ngelsuil a Dios a uchul me “ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt.” (2 Timoteus 3:16) Me a Biblia a mera el ngar er ngii a usbechel er a klengar. Ngmeskid a klemedengei el kirel a blekerdelel a chad. E diak el mechas a rengud er ngii el tekoi, e le Jehovah a Ulemeob. Ngungil medengei a uldesued me a omelebedebeked, el kuk medengei er kid. E dirrek a Jehovah a kmal medengei el kmo ngera kede ousbech el mo dmeu a rengud e ngera el tekoi a kired el olechib er kid er ngii.

11 Ka molebedebek er a cheldechedechal a Jesus el ngar er a Matteus er a 5 el mo er a 7 el bliongel el lomekedong er ngii el kmo Cheldecheduch el ngar er a Rois. Ngar er tia el merael a chisel el osisechakl, e a Jesus a millekoi a tekoi, el uldimukl er ngii a rolel e kede metik er a mera el deurreng, e mekera dosmechokl a klautok, e doluluuch, e mo sebechel el melemalt a osenged el kirel a kerruul. Aika el tekingel a Jesus a dirk ngar er ngii a klisichel e dirk oureor er a chelecha el sils el di ua sera lekot el medung.

12 A bebil er a omellach el ngar er a Biblia a kirel a klengar er a telungalek, blekerdelel a chad a loureor, me a deleuill er ngii me a rebebil. Aika el omellach el ngar er a Biblia a motaut el mo er a rokui el chad, me a llach el ngar er ngii a meklou a ultutelel. A tekingel a Dios el oeak a Isaia a melekoi el kmo: “Ngak a RUBAK el Dios el olsisechakl er kemiu el mo ungilbesmiu.”―Isaia 48:17.

NGBABIER ER A ULAOCH

13 Ngngar er ngii a kmal betok el ulaoch er a Biblia, el oumesingd er ngii a mla mecherrungel. Ka molebedebek er tiang. Ngoeak a profet el Isaia, el kiliei er a chelsel a ongeai el dart el rak er a uchei er a taem er kid, e a Jehovah a uluuchais el kirel a telemellel a mats er a Babilon. (Isaia 13:19; 14:22, 23) A komakai el omesaod a lebilsang el olecholt el kmo ngmekerang e mo mechitechut tia el mats. A urrurt er a recherraro a mo ngimetii a omoachel er a Babilon el mo meched e mo soiseb er a mats el ka loumekemad. Ngdimlak di el ikang e lemerekong. A ulochel a Isaia a dirrek el ochotii el kmo a ngklel ngike el king el mo mesisiich er a Babilon a Sairus.―Isaia 44:27―45:2.

A ta er a remilluches er a Biblia el Isaia a uluuchais el kirel a rebetel a Babilon

A chad el merriter a tekoi el kirel a rebetel a Babilon

14 Ngbekord el 200 el rak er a uriul, el ngar er sel kesus er a 5 el kebesengil a Ongeteruich el Buil er a rak er a 539 er a uchei er a taem er kid, e a urrurt er a resoldau a mlo er a bita er a Babilon. Ngtecha mle mengeteklel ngii el urrurt? Ngchad er a Persia el ngklel a Sairus. Ngmla meketmokl a rokui el tekoi el kirel a otutel a mengasireng el ulaoch. Engdi tirka el soldau er a Sairus, te mera el di diak el loumekemad e nguu a Babilon el ua mildung er a ulaoch?

15 A rechad er a Babilon a merruul er a klou el mur er isei el kesus e milechesuar el selebechakl er a belurir el klou e mesisiich a cheotelel. Ngar er tiaikid el taem, e a Sairus a uleba llomeserreng e ultucheklii a ralm er a omoachel me ngmlo diak bo el siseb er a mats. Me ngdi mle telkib e ngmlo meched el mocha sebechir a rechedal el chemaot er ngii el mo kmeed er a cheotelel a mats. Engdi te mekera resoldau er a Sairus a bo el iuul er tia el klou el cheotelel a Babilon? Ngdiak dodengelii a uchul, engdi sel kesus e a chesmerel a siseball el mo er a mats a dimlak el chelseches.

16 Ngmildung er a ulaoch el kirel a Babilon el kmo: “Ng dikea lmuut el mo kiei er ngii. Ng diak a re merael el Arab el mo ultab er ngii, ma diak a re mengkar a charm el me omekedurs a chermir er ngii.” (Isaia 13:20) Tia el ulaoch a diak di el louchais el kirel a rebetel a Babilon e lemerekong e ngdirrek el olecholt el kmo ngdi mereko el cheloit el beluu. Ngsebechem el mes a olechotel a otutel aika el tekoi. A cheloit el mle basio er a Babilon er a irechar, el bekord el 50 el mael er a dimes er a Bagdad, Iraq a meketeklii el kmo a tekoi el dilung a Jehovah el okiu a Isaia a tilaut el kmo: “Ak mo riekii a Babilon el oba oriik el sel di remiik a rokui el tekoi.”―Isaia 14:22, 23.

A miltemall el beluu er a Babilon

Telemellel a cheloit el beluu er a Babilon

17 Me a omesaod el kmo a Biblia a babier el kirel a ulterekokl el ulaoch a kmal sebechel el melisiich a klaumerang er kid, adang diak? Me a lsekum a Jehovah a mla otaut a telbilel er a irechar, e ngngar er ngii a ungil el uchul e ngmo klou a rengud e oumerang el kmo ngdirrek el mo oltaut a telbilel el kirel a paradis el chutem. (Ulecherangel 23:19) Nguaisei, ngngar er ngii a omeltked e le “a Dios el diak lomulak a tilib a ikang ra rechuodel el kirel chomelatk ra diak a ullebengelel klengar.”―Titus 1:2.%

"TIKINGEL A DIOS A DINGAR”

18 Ngoeak aike el dulsaod, e ngbleketakl el kmo a Biblia a mera el ileakl el babier. Me nguaisei, engdi a kerresel a kuk klou el engelakl er a di kltang er a tekoi el losaod el ngar er a chelsel, me a melemalt el omesodel a beluulechad me a tekoi er a reksi, me a llomeserreng el mocholt er ngii el sebeched el ousbech er a klengar er kid er a chelecha el taem, me a ulaoch el ngar er a chelsel el sebeched el otuil a omeltked er ngii. A apostol el Paulus a milluches el kmo: “Ele tikingel a Dios a dingar e ngarngii a klisichel, e kuk kedorm ra ikel rokuil erebita medal saider.”―Hebru 4: 12.

19 A donguiu a tekingel a Dios el ngar er a Biblia, e ngsebechel el ngmodech a klengar er kid. Ngngosukid el kmal mo kerekikl el merriter er kid. Ngsebeched el melekoi el kmo ngbetik a rengud er a Dios, engdi sel osenged el kirel a tekoi el lolekoi a Biblia, sei a mo ocholt aike el mera el ngar er a uldesued me a rengud.

20 A Biblia a mera el babier el mla er a Dios el mei. Ngbabier el kired el menguiu er ngii, e mesuub er ngii, e mo betik a rengud er ngii. Mochotii a omereng el saul el kirel tia el sengk el mla er a Dios el mei el loeak sel molemolem el merriter el mo medengei a ngar er a chelsel. E a omoruul el uaisei, e ngmedechel a omereng el saul er kau el kirel a moktek er a Dios el kirel a klechad. Ngar er a ongingil el bliongel, e kede mo mesaod el kmo ngera tia el moktek e mekera e mo meketmokl.

AIKE EL LOLISECHAKL A BIBLIA

  • A Biblia a milluches el loeak a ngelsuil a Dios me ngmelemalt a tekoi er a chelsel e sebeched el otuil a rengud er ngii.―2 Timoteus 3:16.
  • A omesodel a tekoi el debetik er a chelsel a Tekingel a Dios a sebeched el ousbech er a klengar er kid er a bek el sils.―Isaia 48:17.
  • A telbilel a Dios el debetik er a Biblia a ulterekokl el mo motaut.―Ulecherangel 23:19.

*  Alta e a rebebil a melekoi el kmo a bebil er a tedebechel a Biblia a ketouch, engdi a chouaisei el omelekoi a diak debetik a uchetemel er a ngii di el ker. Ka momes er a 7 el bliongel er a babier el The Bible―God’s Word or Man’s? el mlotobed er a Resioning er a Jehovah me a lechub e ngsel babier el A Uchul Me Ngsebechem el Oumerang er a Biblia.

#  El di ua sel komakai el omesodel a uldidellel a rasech er a Jesus el ngar er a Lukas 3:23-38.

%  A telemellel a Babilon a di ta er a okesiul aike el ulaoch er a Biblia el mlo tmaut. A lmuut el bebil er a okesiu a uldimukl er ngii a telemellel a Tyre me a Nineveh. (Esekiel 26:1-5; Sefania 2:13-15) Ngdirrek, a ulochel a Daniel a ullecholt a blechebechel aike el renged el mo olab a dereder er a beluulechad er a uriul er a Babilon, el uldimukl er ngii a Medo-Persia me a Gris. (Daniel 8:5-7, 20-22) Momes er a Bebil er a Omesodel el kirel a omesodel a betok el ulaoch el kirel a Messias el ngii a tilaut er a Jesus Kristus.


Aike el Ker er a Suobel

1, 2. Ngoeak a ngera el rolel e a Biblia a kmal ungil el sengk el mla er a Dios el mei?

3. Ngera uchul me a Jehovah a milskid a Biblia, e tia el tekoi ngera uchul me ngoldeu a rengud?

4. Ngera sel chosir a rengum el kirel a omerellel me a omerusel a Biblia?

5. Ngoeak a ngera el rolel e a Biblia a milluches el loeak a ngelsuil a Dios?

6, 7. Ngera uchul me sel kltang el mocholt er a Biblia a kmal ileakl el kirel el utebengall?

8. Ka mocholt a bebil er a rolel e a Biblia a melemalt a lolekoi.

9. (a) Ngmekera Biblia e melemalt a lolekoi el oltirakl er a reksi me ngsebeched el ultuil er ngii? (b) A bleketakl el teletelel a omeluches ngngera ngochotii er kau el kirel a Biblia?

10. Ngera uchul me ngdiak el mechas a rengud el kmo a tekoi el lolekoi a Biblia a sebeched el ousbech er a klengar er kid er a bek el sils?

11, 12. (a) Ngera el suobel a lulsaod a Jesus el ngar sel Cheldechedechal el ngar er a Rois? (b) Ngera bebil er a omesodel a tekoi el ngar er a Biblia el sebeched el ousbech er a klengar? E ngera uchul me a omellach el ngar er a chelsel a diak a telkelel a usbechel?

13. A Jehovah ngulemekrael er a profet el Isaia el mo meluches a ngera el komakai el tekoi el kirel a Babilon?

14, 15. Ngmlekera e tilaut a bebil er a komakai el ulochel a Isaia el kirel a Babilon?

16. (a) A Isaia ngera ngulemlaoch el kirel a mo ulebengelel a Babilon? (b) Ngmlekera ulochel a Isaia el kirel a telemellel a Babilon e tilaut?

17. Ngmekera e a otutel a ulaoch er a Biblia e melisiich a klaumerang er kid?

18. Ngera el mesisiich el tekoi a ledillii a apostol el Paulus el kirel a "tikingel a Dios”?

19, 20. (a) Ngmekera Biblia e ngosukau el di kau el merriter er kau? (b) Ke mekera e ochotii a omereng el saul er kau el mo er a Dios el kirel tia el Biblia el ngii a kmal ileakl el sengk?

MOSUUB A LMUUT EL BETOK

Molengit a Diak Locheraol el Omesubel a Biblia

Ngera Me Ngkirem el Mesuub er a Biblia?

A Biblia a olengeseu er a rebetok el miliol el chad el meliuekl er a beluulechad el mo medengei a nger el kirel a meklou a ultutelel el ker er a klengar. Kau ngsoam el mo ta er tir?