Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

A Belkul me a Usbechel a Chedaol el Ngklel a Dios

A Belkul me a Usbechel a Chedaol el Ngklel a Dios

NGAR er a oidel a Biblia el mousbech er ngii, e ngua ngerang a oidel a Psalm 83:18? A New World Translation of the Holy Scriptures a oleiuid er tia el bades el kmo: “Me a rechad bo lodengelkau el kmo a ngklem a Jehovah, e di kau el tang a Kot el Ngar er Bab er bebul a beluulechad el rokir.” Ngar er ngii a lmuut el bebil er a oidel a Biblia el dirrek el melekoi a osisiu el tekoi. Engdi, ngbetok a diak el lousbech er a ngakl el Jehovah, e omtechei er ngii er a dui el ua “Rubak” me a “Dios.” Me ngngera kirel ngar er a chelsel tia el bades? Ngdui me a lechub e ngngakl el Jehovah?

Ngklel a Dios er a tekoi er a Hebru

Ngklel a Dios el llechukl er a Hebru

Tia el bades a melekoi el kirel a ngakl. Ngar er a kot el tekoi er a Hebru el luluusbech el meluches er a klou el tedebechel a Biblia, e a ileakl el ngakl a luluusbech er ngii er tiang. A llecheklel a mle יהוה (YHWH) el llechukl er a Hebru. Ngar er a tekoi er a Merikel e tia el ngakl a mloiuid el mo "Jehovah.” Tia el ngakl kede metik er ngii er a di ta el bades er a Biblia? Ngdiak. Ngar er aike el kot el llechukl er a Hebru el Bades er a Chuodel el Renged e tia el ngakl a debetik er ngii el bekord el 7,000 el taem!

Ngua ngera klungel a ultutelel a ngklel a Dios? Ka bo molebedebek er a kerebai el nglunguuch el lebilskid a Jesus Kristus. Ngomuchel el kmo: ”A Demmam el ngara eanged, le mechedaol a ngklem.” (Matteus 6:9) Uriul, e a Jesus a milluluuch el mo er a Dios el kmo: ”Chedam, mkebkellii a ngklem!” Me a longer er ngii e a Dios a mla er a eanged e kmo, “Ak mla kobkellii, e lmuut el mo kobkellii.” (Johanes 12:28) Me ngbleketakl el kmo a ngklel a Dios a kmal klou a ultutelel. Me ngngera me a rebebil er a ruleiuid a babier a omtechei er a ngklel a Dios er a chelsel a Biblia er tir el lolab a dui?

Ngua lengar er ngii a teblo el uchul. A kot e te betok a melekoi el kmo tia el ngakl a diak el kired el ousbech er ngii e le kot el omengiuel a diak a medengelii. A tekoi er a Hebru er a irechar a lulluches el dimlak lousbech a omechelel a tekoi el ua a,e,i,o,u. Sei a uchul me ngdiak a chad er a chelechang el sebechel el ulterekokl el melekoi el kmo ngua ngerang a omengiuel a YHWH. Engdi, a chouaisei el tekoi ngkirel el torebengid me ngmo diak dousbech er a ngklel a Dios? Ngar er a taem er a omelechesel a Biblia, e tia el ngakl el Jesus a locha lulenguiu er ngii el Yeshua me a lechub e ngmle Yehoshua el dirrek el diak a medengelii a ulterekokl el omengiuel er a chelechang. Engdi a beluulechad el rokir a ousbech a kakerous el omengiuel tia el ngakl el oltirakl a omelekingir. Alta ngdiak lodengelii a mera el omengiuel er a kot el dart el rak, engdi ngdiak lomai er a rengrir el lousbech er ngii. Me ngdi osisiu, kau sel obo er a ta er a beluu e ngsebechem el mesa el kmo a omengiuir a rechad er a ngklem a telkib el ngodech el oltirakl a omelekingir. Me a tekoi el kmo ngdiak dodengelii a omengiuel a ngklel a Dios er a irechar a diak el kirel el mo uchul me lak dousbech er ngii el ngakl.

A ongeru el uchul me a rechad a oltobed er a ngklel a Dios er a chelsel a Biblia er tir a oltirakl er a mle siukang er a Rechijudea er a kemanget el taem. Ngbetok er tir a millekoi el kmo ngkmal diak el kirel medung er a ngered a ngklel a Dios. Tia el klaumerang a mle ultuil er a cheleuid el otutel a llach el ngar er a Biblia el kmo: “Lak morrekakl er a ngklel a Jehovah el Dios er kau, e le Jehovah a ulterekokl el mo omals er ngike el merrekakl er a ngklel.”―Exodus 20:7, NW.

Tia el llach a ullekebai er a omerrekakl er a ngklel a Dios. Engdi ngullekebai er a usbechel el ngar er a omengull? Ngdiak. A remilluches er a Biblia el Tekoi er a Hebru (“Chuodel el Testament”) a rokui el mle blak a rengrir el chad el kiliei el oltirakl a Llechul a Dios el lebilsterir a Rengalek er a Israel er a irechar. Engdi te mle blechoel el ousbech er a ngklel a Dios. El ua tiang, te uluusbech er ngii er a chelsel a betok el chelitakl el lulengitakl el dmak el ngar er a chelsel a omengull er tir. A Jehovah el Dios a dirrek el dilu er a remengull er ngii el mo omekedong er a ngklel, me a reblak a rengrir el mesiungel a ullengesenges er tiang. (Psalm 148:5, 13; Rellir 2:21) Me a Rekristiano er a chelechang a diak lomai er a rengrir el loeak a omengull e te ousbech er a ngklel a Dios el ua lurruul a Jesus.―Johanes 17:26.

Sera lutechir a ngklel a Dios el lolab a dui, e a ruleiuid er a Biblia a rirellii a kmal klou el cheleuid el tekoi. A Biblia a melisiich er a rechad el mo “ousechelei” er a Jehovah, engdi te mla rullii el kmal cheridang el dikea sebechel el mo kmeed er ngii. (Psalm 25:14) Ka molatk er a kmal ungil el sechelim. Ngua ngera kesengel a deleuill er kemiu a lemlak bo modengelii a ngklel? Me ngdi osisiu, a lsekum a rechad a diak bo lodengelii a ngklel a Dios el Jehovah, e te mekera e mera el mo kmeed er ngii? Me a lmuut el tang, a lak lousbech er a ngklel a Dios, e ngdiak a klemedengei er tir er sel mengasireng el belkul. Tia el chedaol el ngklel a Dios ngngera belkul?

A Dios a di mle ngii el smodii a belkul a ngklel el mo er a blak a rengul el mesiungel er a Moses. A Moses er a loker er a ngklel a Dios, e a Jehovah a ulenger el kmo: “Ngak a Ngak.” (Exodus 3:14) A Rotherham el oidel a Biblia a uleiuid aika el tekoi el kmo: “Ak mo ngii di el techang el soak el mo ngii.” Me a Jehovah a sebechel el mo ngii di el techang el usbechall el mo oltaut a moktek er ngii.

A lsebechem el mo ngii di el chad el soam, e ngngera ke mo rullii el kirir a resechelim? A bo el secher a tang, e ngsebechem el mo toktang e omekungil er ngii. Me a lsekum ngmla er ngii a chebuul er a udoud, e ke mo merau el chad e ngosuir. Engdi a klemerang a kmo ngdi klebechel a sebechem el remuul. A omolemolem el mesuub er a Biblia, e ngmo mechas a rengum el kmo ngmekerang a Jehovah a lebo lengii di lechad el usbechall el mo oltaut a telbilel. E dmeu a rengul el ousbech er a klisichel el kirir a rebetik a rengrir er ngii. (2 Kronika 16:9) Aikaikid el klebekelel a omerellel a Jehovah a diak lutab a rechad el diak lodengelii a ngklel.

Ngbleketakl tia el ngakl el Jehovah el kirel el ngar er a Biblia. Me a dodengelii a belkul e dousbech er ngii er a omengull e kede mongeseu el mo kmeed er a Demad el ngar er a eanged el Jehovah.

← Momes er a medung el bliongel