Skip to content

Skip to secondary menu

Skip to table of contents

Resioning er a Jehovah

Palauan

Ngerang Mera el Lolisechakl a Biblia?

BEBIL ER A OMESODEL

1914—A Klou a Ultutelel el Rak er a Ulaoch er a Biblia

1914—A Klou a Ultutelel el Rak er a Ulaoch er a Biblia

NGBETOK el rak er a uchei er ngii, e a rengalek er a skuul er a Biblia a uluuchais el kmo ngmo er ngii a ileakl el tekoi el mo duubech er a rak er a 1914. Aika ngmle ngerang e ngera el tekoi a millutk el mo er a 1914 el kmo ngmle klou a ultutelel el rak?

A doltirakl er a Lukas 21:24, e a Jesus a dilu el kmo: “Ma Jerusalem a mo merderd rar Chisentail, el dimerkmo le bo le mecherrungel a taem rar Chisentail.” A Jerusalem a mle mats er a renged er a Judea, el mle delengcheklir a remo mengedereder er a blil a King el David. (Psalm 48:1, 2) Engdi tirka el king a mle ileakl er a rebek el king er a beluulechad, e le te mle dengchokl er a “kingall er omerreder el le kildmeklii a RUBAK” me te ulemtechei er a Dios el mengedereder. (1 Kronika 29:23) Me a Jerusalem a ulemtechei er a omengederederel a Jehovah.

Ngmekerang e oingerang e a omengederederel a Dios a “merderd rar Chisentail”? Tiang a dilubech er a rak er a 607 B.C.E. er a Jerusalem er a lemengai er a rechad er a Babilon. Seikid e a “kingall er omerreder el le kildmeklii a RUBAK” a mlo bechachau, me a kleking el oeak a uldidellel a rasech er a David a meldeb. (2 King 25:1-26) Tia el ‘omerderd’ ngdi melemolem el diak a ulebengelel? Ngdiak, e le ulochel a Esekiel el kirel ngike el mlo ulebongel el king er a Jerusalem el Sedekia a kmo: “Bedobed a lechetel a bdelum ma krone er kau.…el dimerkmo le mei ngikel kirel el oungerachel, e ak mo msang.” (Esekiel 21:26, 27) E “ngikel kirel el oungerachel” er a krone er a David er a omengedereder a Kristus Jesus. (Lukas 1:32, 33) Me a ‘omerderd’ a di mo tmurk er sel bo el King a Jesus.

Oingerang e tia el klou a ultutelel el tekoi a duubech? A Jesus a ulechotii el kmo a Rechisentael a mo mengedereder el kirel a ulterekokl a telkelel el taem. E a tekoi el llechukl er a Daniel er a 4 el Bliongel a ochotii er kid a rolel e kede mo medengei el kmo sel taem ngmo ua klemengetel a ngerang. Ngouchais el kirel a ulaoch el lulemerrous er ngii a King el Nebukadnesar er a Babilon. Ngar er ngii el berrous e ngmilsa kmal klou e metongakl el kerrekar el miltuk. E a mlo medechel el uchul ngii el kerrekar a mirrenged er a deel me a brons me ngdimlak el sebechel el meloseb a tiul. Ngmle kirel el rrengodel el “euid el rak.”―Daniel 4:10-16.

A Biblia sel lebebil e ngousbech a kerrekar el omtechei a omerreder. (Esekiel 17:22-24; 31:2-5) Me sel kerrekar el miltuk a ulemtechei er a blekerdelel a omengederederel a Dios, el mlocholt el uleak a reking er a Jerusalem, a bo lemeterob el mengederederer. Engdi sel ues a mileketeklii el kmo a ‘omerderd er a Jerusalem’ a di kirel a tedeb el taem, el di “euid el rak.” Engdi aikang a mle rak er a otutel a ulaoch. Me ngmle ua klemengetel a ngerang ngii el rak?

A Chocholt 12:6, 14 a meketeklii el kmo a edei me a tedobech el rak er a ulaoch a ua klemengetel a “tal telael ma cherul dart ma chokolem el sils.” Me a leuaisei, e a “euid el rak” a eru el taem el chachisois er tiang, me a lechub e ng 2,520 el sils. Engdi a Rechisentael a dimlak el meterob el ‘merderd’ er a omengederederel a Dios er a 2,520 el sils er a uriul er a lemetemall a Jerusalem. Me ngbleketakl el kmo tia el ulaoch a millutk el kirel a lmuut el mle kemanget el taem er a reksi. E a doltirakl er a Ulecherangel 14:34 me a Esekiel 4: 6, el dul melekoi el kirel a “tal sils el kirel a tal rak,” e a klemengetel a “euid el rak” er a otutel a ulaoch a 2,520 el rak.

Aike el 2,520 el rak a ulemuchel er a Ongeteruich el Buil er a rak er a 607 B.C.E., er a taem er a rechad er a Babilon a letemellii a Jerusalem e lenguu a king er a klengelakel er a David el oridii er a kingall. Ngii el taem a mlo merekui er a Ongeteruich el Buil er a rak er a 1914. Seikid el taem, e a “taem rar Chisentail” a mlo merek e a Jesus a mildalem el mo King er a Dios el ngar er a eanged.*―Psalm 2:1-6; Daniel 7:13, 14.

Me ngua lulemlaoch a Jesus, sel be lduum el ua King el ngar er a eanged e ngmo er ngii a betok el tekoi el mo duubech er a beluulechad el mo olengchelel, el ua mekemad, bosech, desiu, me a bekoiueiuul el rakt. (Matteus 24:3-8; Lukas 21:11) Ngii el tekoi a mesisiich el olechotel a klemerang er tia el kmo sera rak er a 1914 e a Rengedel a Dios a mlo omuchel el mengedereder el ngar er a eanged, me a “ikel uriul sils ra belulechad” a ulemuchel.―2 Timoteus 3:1-5.


*  Ngar er a Ongeteruich el Buil er a 607 B.C.E. el mo er a Ongeteruich el Buil er a 1 B.C.E. e ngngar er ngii a 606 el rak. E diak a zero el rak, me ngngar er a Ongeteruich el Buil er a 1 B.C.E. el mo er a Ongeteruich el Buil er a 1914 C.E. e ngngar er ngii a 1,914 el rak. Me a omodekiar a 606 el rak er a 1,914 el rak, e ke nguu a uldekial a 2,520 el rak.

“EUID EL [TAEM]”
2,520 el rak
606 1/4 el rak
October 607 B.C.E. el mo er a
December 31, 1 B.C.E.
1,913 3/4 el rak
January 1, 1 C.E. el mo er a
October 1914
607

“[A] Jerusalem a mo merderd rar Chisentail”

Jerusalem el mocha metemall
←B.C.E. C.E.→ 1914

“[Ng]mei ngikel kirel el oungerachel”

Jesus Kristus el King

← Momes er a medung el bliongel