A rebebil el chad a meringel er tir el mo oubltikerreng el mo er a Dios. Tirka el chad a omes er a Dios el kmal cheroid e dirrek el mekngit a blekerdelel. Momtab aika el uldesuir a rechad:

• “Ak milluluuch el mo er a Dios el kirel a ngeso, e a osisiu el taem, e ak ulemdasu el kmo ngkmal cheroid me ngdiak el sebechel el rongesid. Ngdimlak kumdasu el kmo a Dios a di ua chad el sebechel lomelechesiu a tekoi.”​—Marco, Italy.

• “Me alta ngkmal mle soak el mesiou er a Dios, engdi ngii a ua lesal kmal mle cheroid. Ak ulemdasu el kmo a Dios a meringel a tekingel e di omals er kid. Ngdimlak kuumerang el kmo a Dios a medemedemek a rengul.”​—Rosa, Guatemala.

• “Sera kngalek, e ak uluumerang el kmo a Dios a di osiik a telemelled, e kltmokl el omals er kid a lsekum e kede rredemelel a blals. E a uriul, e ak ulemes er ngii el kora kmal cheroid. A Dios a mle ua merreder er a beluu el omtebechel a urerir a rechad er a belual, engdi ngdiak el semeriar er tir.”​—Raymonde, Canada.

E kuk ua ngera uldesuem? Omomdasu, ngdiak el sebeched el mo betik a rengud er a Dios? A Rekristiano a mla oker er tia el ker el betok el rak. Nguaisei, sera rak er a 500 el mo er a 1500 er a taem er kid, e a ruumesingd el leko te Kristiano a dimlak loluluuch el mo er a Dios el Olab a Bek el Klisiich. E ngera me ngdiak? A rechad a kmal mle medakt er ngii. A chad er a reksi el Will Durant a mesaod er ngii el kmo: “Ngmekerang a chad el mirruul a klengit e sebechel el meluluuch el mo er a kmal ngarbab e cheroid el kingall er omerreder?”

Ngmilekerang a rechad e mo omes er a Dios el ua le “kmal ngarbab e cheroid”? Ngerang mera el lolisechakl a Biblia el kirel a Dios? Ngsebechel a omesubel a klemerang el kirel a Dios e ngosukau el mo betik a rengum er ngii?