Bai na kontenido

Kiko un Kurso di Beibel Ta Enserá?

Kiko un Kurso di Beibel Ta Enserá?

Testigunan di Yehova ta ofresé un kurso di Beibel ku ta kontestá vários pregunta, manera:

  • Ken Dios ta?

  • Dios ta realmente interesá den mi?

  • Kon mi por ta un mihó esposo òf esposa?

  • Kon mi por haña felisidat den bida?

Aki bou bo ta haña kontesta riba pregunta ku hopi hende sa hasi tokante nos programa di estudio di Beibel.

Kon nos ta dirigí un kurso di Beibel? Nos ta konsiderá un tópiko manera “Dios” òf “matrimonio” i analisá e diferente tekstonan di Beibel ku tin di haber ku e tópiko. Ora nos kompará e tekstonan akí ku otro, nos por mira kiko Beibel den su totalidat ta siña riba e tópiko akí, i den e manera ei nos ta laga Beibel splika su mes.

Pa yuda nos dirigí un estudio di Beibel, nos ta usa e buki Kiko Beibel Ta Siña Realmente? E buki akí ta presentá na un manera kla i komprendibel kiko Beibel ta siña riba tópikonan manera Dios, Hesus i nos futuro.

Kuantu un kurso di Beibel ta kosta? E estudio ta grátis, i nos no ta kobra pa e bukinan.

Kuantu tempu kada seshon ta tuma? Hopi hende ta dediká mas òf ménos un ora pa siman pa studia Beibel ku nos. Pero nos ta fleksibel, i nos ta adaptá nos mes na bo sirkunstansianan.

Kiko ta pasa ora mi pidi un kurso di Beibel? Un Testigu di Yehova lo bishitá bo riba un dia i na un ora ku bo ta deseá pa mustra bo den un par di minüt kon un estudio di Beibel ta tuma lugá. Si e ta na bo agrado, bo por kuminsá e estudio.

Sí mi aseptá un kurso di Beibel, esei ke men ku mi tin ku bira un Testigu di Yehova? Nò. Testigunan di Yehova ta gusta siña otro hende tokante Beibel, pero nos no ta fòrsa ningun hende pa bira un miembro di nos religion. Mas bien, na un manera respetuoso nos ta splika hende kiko Beibel ta siña, i nos ta konsiente ku kada ken tin derecho pa disidí pa su mes kiko e ta kere aden.—1 Pedro 3:15.