Bai na kontenido

BEIBEL TA KAMBIA BIDA DI HENDE

“Mi Tabata Masha Agresivo”

“Mi Tabata Masha Agresivo”
  • Nasí Na Aña: 1975

  • Pais Natal: México

  • Su Pasado: Agresivo; sentensiá na prizòn

MI PASADO

Mi a nase na San Juan Chancalaito, un pueblito den e stat Chiapas, México. Mi famia ta pertenesé na e tribu Chol, un grupo étniko di desendiente Maya. Ami ta e di sinku di 12 yu. Tempu mi tabata mucha, ami i mi rumannan a studia Beibel ku e Testigunan di Yehova. Lamentablemente, mi no a apliká e konsehonan di Beibel durante mi hubentut.

Ora ku mi tabatin 13 aña, mi a kuminsá usa droga i hòrta. Ku e edat ei mi a bandoná kas i a keda bai di un lugá pa otro. Ku mi 16 aña mi a kuminsá traha na un plantashon di mariwana. Mi a traha einan kasi un aña. Un anochi nos tabata transportando un karga grandi di mariwana riba boto i algun hòmber bon armá di un otro trafikante di droga a ataká nos. Pa mi por a skapa e tirunan di skopèt, mi a bula den awa i a dùik leu te na otro banda di e riu. Despues, mi a hui bai Merka.

Na Merka mi a sigui transportá droga i a haña mi ku mas problema. Tempu mi tabatin 19 aña di edat, mi a ser arestá pa motibu di atrako i intento di asesinato i mi a haña un sentensia di prizòn. Den prizòn mi a djòin un gang i a kometé mas akto di violensia. Pa e motibu aki, e outoridatnan a trasladá mi na un prizòn di máksimo siguridat na Lewisburg, Pennsylvania.

Den e prizòn na Lewisburg, mi kondukta a bai di malu pa pió. Komo ku mi tabatin algun tatuahe di gang kaba, fásilmente mi a djòin e mes gang den e prizòn di máksimo siguridat akí. Mi a bira asta mas agresivo i tabata enbolbí den un pelea tras di otro. Un biaha mi tabata enbolbí den un pelea di gang den kurá di prizòn. Nos a bringa ferosmente ku otro usando bate di beisbòl i ekipo di hisa peso. E wardadónan di prezu a usa un tipo di gas pa para e pelea. Despues di esaki, e outoridatnan di prizòn a pone mi den un sekshon spesial pa prizonero peligroso. Mi tabata masha agresivo i tabata papia hopi palabra ofensivo. No tabata molestiá mi ku mi tabata bati hende. De echo, mi tabata disfrutá di esaki. Mi no tabatin kunes ku mi komportashon.

BEIBEL A KAMBIA MI BIDA

Den e sekshon di alto siguridat akí, mi tabata pasa gran parti di dia den mi sèl. Pues, pa mi mata tempu mi a kuminsá lesa Beibel. Despues un di e wardadónan di prezu a duna mi e buki “Bo por biba pa semper den Paradeis riba tera.”  * Segun ku mi tabata lesa e buki akí ku a yuda mi studia Beibel, mi a kòrda hopi kos ku mi a siña tempu ku mi tabata mucha i tabata studia Beibel ku e Testigunan. Despues mi a reflekshoná riba mi bida i a realisá kon malu mi bida tabata debí na mi karakter agresivo. Ademas, mi a kòrda riba mi famia. Komo ku dos di mi rumannan a bira Testigu di Yehova, mi a pensa: ‘Nan lo biba pa semper.’ Anto mi a puntra mi mes: ‘Dikon ami tambe no por?’ Tabata na e momento ei ku mi a tuma e desishon firme pa hasi kambio.

Pero, mi tabata sa ku mi tabatin mester di yudansa pa mi por a hasi kambio. Pues, e promé kos ku mi a hasi ta resa na Yehova Dios i rog’é pa yudansa. Despues, mi a skirbi un karta na e sukursal di Testigunan di Yehova na Merka pa pidi un estudio di Beibel. E sukursal a regla pa un kongregashon den serkania tuma kontakto ku mi. E tempu ei, den prizòn, nan no tabata permití bo risibí bishita si no tabata famia. P’esei, un Testigu di Yehova di e kongregashon a kuminsá manda mi karta di animashon i literatura bíbliko via pòst. Esei a pone ku mi deseo pa hasi kambio a bira asta mas fuerte.

Mi a dal un paso grandi ora mi a disidí di bandoná e gang ku mi tabata pertenesé na dje pa hopi aña. E lider di e gang tabata será den e mes departamento ku mi, pues mi a aserk’é durante un di nos pousanan di rekreo i a bis’é ku mi ke bira un Testigu di Yehova. Pa mi sorpresa el a bisa: “Si ta kos serio bo ta papia, hasié. Mi no por stroba Dios. Pero si ta djis sali bo ke sali for di e gang, bo sa kiko ta e konsekuensia.”

Durante e siguiente dos añanan, e personal di prizòn a ripará kambio den mi personalidat. Esaki a pone ku nan a kuminsá tene mas konsiderashon ku mi. Por ehèmpel, e wardadónan di prezu a stòp di bui mi man ora nan tabata saka mi for di sèl pa hiba mi baño. Un di nan a asta animá mi pa sigui hasi e kambionan ku mi tabata hasiendo. Ademas, durante mi último aña di enkarselashon, e outoridatnan di prizòn a trasladá mi pa un sekshon di siguridat mas leve situá den serkania di e prizòn prinsipal. Na 2004, despues di tabata será pa dies aña, nan a laga mi bai i a deportá mi. Nan a hinka mi den un bùs di prizòn rumbo pa México.

Manera mi a yega México, mi a buska un Salòn di Reino di Testigunan di Yehova. Mi a bai mi promé reunion ku unifòrm di prizòn bistí; e úniko paña desente ku mi tabatin. Apesar di mi aparensia, e rumannan a duna mi un kaluroso bon biní. Ora mi a mira kon bon nan tabata trata mi, mi a sinti ku mi tabata entre e kristiannan berdadero. (Hua 13:35) Na e reunion ei, e ansianonan di kongregashon a regla pa mi haña un estudio di Beibel. Despues di un aña, dia 3 sèptèmber 2005, mi a batisá komo Testigu di Yehova.

Na yanüari 2007, mi a kuminsá den e trabou di tempu kompleto, dedikando 70 ora tur luna na siña hende Beibel. Na 2011, mi a gradua na e Skol Bíbliko pa Ruman Hòmber Soltero (awe yamá Skol pa Predikadó di Reino). E skol akí a yuda mi masha bon mes. E skol a yuda mi kumpli ku mi responsabilidatnan den kongregashon.

Awor, mi ta disfrutá di por siña otro hende pa ta pasífiko.

Na 2013 mi a kasa ku mi esposa stimá, Pilar. Ku un smail riba su kara e ta bisa ku ta difísil pa e kere e kosnan ku mi ta kont’é di mi pasado. Nunka mas mi a bolbe na mi kustumbernan di pasado. Tantu ami komo mi kasá ta konvensí ku e persona ku mi ta awe ta un ehèmpel bibu ku Beibel por kambia bida di hende.​—Romanonan 12:2.

E BENEFISIONAN

Mi ta sinti ku e palabranan di Hesus na Lukas 19:10 ta apliká na mi. Einan e ta bisa: “E Yu di hende a bini pa buska i salba esnan ku ta pèrdí.” Mi no ta sinti mi pèrdí mas. Ni mi no ta kana hasi hende daño mas. Danki na Beibel, mi bida tin berdadero propósito. Mi ta na pas ku otro hende i mas ku tur kos, mi tin un bon relashon ku mi Kreadó, Yehova.

[FOOTNOTE]

^ par. 13 Ántes e buki akí tabata ser publiká pa Testigunan di Yehova pero awor e no ta disponibel mas. E buki pa yuda bo komprondé Beibel awor ta Kiko Beibel Ta Siña Realmente?