Bai na kontenido

BEIBEL TA KAMBIA BIDA DI HENDE

“Mi No Tin Bèrgwensa Mas di Mi Mes”

“Mi No Tin Bèrgwensa Mas di Mi Mes”
  • NASÍ NA AÑA: 1963

  • PAIS NATAL: México

  • SU PASADO: Mi tabata biba riba kaya i tabata sinti ku mi no ta bal nada

MI PASADO

Mi a nase na Obregón, un stat na e parti nort di México. Nos ta nuebe ruman i ami ta e di sinku yu. Nos tabata biba pafó di e stat kaminda mi tata tabatin un kunuku. Tabata dushi pa biba einan i nos famia tabata uní i felis. Lamentablemente, ora mi tabatin sinku aña di edat un orkan a pasa i a destruí henter e kunuku. Pa e motibu ei, nos mester a muda bai biba na un otro stat.

Mi tata tabata gana basta sèn einan. Pero, na mes momento, el a bira alkohóliko. Esei a afektá su matrimonio pero tambe nos komo mucha. Ami i mi dos ruman hòmbernan a kuminsá huma sigaria ku nos tabata hòrta for di mi tata. Ora mi tabatin seis aña di edat, mi a bira fuma pa promé biaha. Djis despues, mi mayornan a separá i mi adikshon a bira pió.

Ora mi mama a bai biba ku un otro hende hòmber, nos tur a bai kuné. E hòmber no tabata duna mi mama niun depchi i nos no por a perkurá pa nos mes ku e tiki plaka ku mi mama tabata gana. Pues, ami ku mi rumannan a kuminsá traha, hasiendo loke nos por, pa gana un tiki plaka. Pero esei apénas tabata yega pa kumpra e kosnan básiko. Mi tabata limpia sapatu, bende pan, korant, bals i algun kos mas. Mi tabata asta buska kuminda den barí di sushi den bario di e hendenan riku.

Ora mi tabatin dies aña di edat, un hende hòmber a pidi mi pa bai traha kuné den stat na e lugá di tira sushi. Mesora mi a stòp ku skol, bandoná kas i a bai traha kuné. E tabata paga mi dies peso mehikano pa dia i tabata duna mi kuminda ku el a piki na e lugá di tira sushi. Mi tabata biba den un kasita ku mi a traha banda di e sushinan. E hendenan ku tabata biba band’i mi tabata papia hopi palabra malu i tabata masha inmoral. Hopi di nan tabata adikto na droga i alkohòl. Esei tabata e temporada di mas malu den mi bida. Mi tabata yora tur anochi di miedu. Debí ku mi tabata masha pober i no tabatin bon edukashon, mi tabatin bèrgwensa di mi mes. Mi a biba tres aña na e lugá di tira sushi. Despues, mi a muda bai biba na un otro stat na México. Einan, mi tabata traha den plantashon di flor i katuna i tambe den plantashon di kaña i batata.

Mi a biba tres aña na un lugá di tira sushi manera esaki

Kuater aña despues, mi a muda bèk na e stat Obregón. Einan, un tanta di mi, ku tabata kurandero, a laga mi keda na su kas. Mi a kuminsá haña hopi mal soño i a bira asina deprimí ku mi tabatin gana di mata mi kurpa. Un anochi, mi a resa na Dios i a bisa: “Señor, si bèrdat bo ta eksistí, laga mi siña konosé bo i lo mi adorá bo pa semper. Si tin un religion berdadero, mi ke sa ta kua e ta.”

BEIBEL A KAMBIA MI BIDA

Semper mi tabata interesá den Dios. For di mucha, mi tabata bai diferente religion, pero mi tabata masha desapuntá den nan. Ningun di nan no tabata papia mashá di Beibel i nan no a yuda mi satisfasé mi nesesidat spiritual. Algun di nan a enfoká muchu riba plaka, miéntras ku e otronan tabata masha inmoral.

Ora mi tabatin 19 aña di edat, un di mi suanan a mustra mi kiko Testigunan di Yehova a siñ’é den Beibel tokante uso di imágen pa adorá Dios. El a lesa Éksodo 20:4, 5 pa mi. E teksto ta bisa ku nos no mester traha ningun imágen grabá pa nos mes. Versíkulo 5 ta bisa: “No adorá nan ni sirbi nan, pasobra ami, SEÑOR bo Dios, ta un Dios yalurs.” Despues mi sua a puntra mi: “Si Dios tabata usa imágen pa hasi milager òf si e ke pa hende usa imágen pa ador’é, dikon e no ke pa nos traha nan?” Esei a pone mi pensa. Despues di esei, nos a kòmbersá vários biaha mas tokante algun tema di Beibel. Mi tabata disfrutá asina tantu di e kòmbersashonnan ei ku tempu tabata pasa masha lihé.

Despues mi a bai un reunion di Testigunan di Yehova kuné. Mi a keda mashá impreshoná di loke mi a mira i tende einan. Asta e hóbennan tabata partisipá i tabata papia ku fluides for di plataforma! Mi a pensa ‘Esta un bon edukashon nan tabata haña einan!’ Ademas, aunke mi tabatin kabei largu i tabata mal bistí, e Testigunan a duna mi un kaluroso bon biní. Un famia a asta invitá mi pa bai kome ku nan despues di e reunion!

Durante mi estudio di Beibel ku e Testigunan, mi a siña ku Yehova Dios ta un tata amoroso ku ta interesá den nos, sin importá nos situashon finansiero, nos posishon sosial, nos rasa òf nos edukashon. Di bèrdat e ta imparsial. (Echonan 10:34, 35) Por fin, mi tabata satisfasé mi nesesidat spiritual. Mi no tabata sinti bèrgwensa mas di mi mes.

E BENEFISIONAN

Mi bida a kambia drástikamente! Mi a stòp ku humamentu, mal uso di alkohòl i papiamentu di palabra malu. E sintimentu di kulpa ku mi tabatin for di mucha a kuminsá bai i tambe mi mal soñonan. Mi a stòp di pensa ku mi no ta bal nada, debí na e kosnan ku mi a pasa aden i mi falta di edukashon.

Awor mi tin un bon esposa ku ta stima Yehova i ku ta un gran sosten pa mi. Mi ta sirbi awor komo superintendente biahero di Testigunan di Yehova i ta bishitá diferente kongregashon pa animá i siña mi famia spiritual. Danki na Beibel i e ekselente edukashon ku Dios ta duna nos, mi no tin bèrgwensa mas di mi mes.

Ami i mi esposa gusta yuda otro hende meskos ku nan a yega di yuda mi