Bai na kontenido

BEIBEL TA KAMBIA BIDA DI HENDE

E Mihó Premio di Mi Bida

E Mihó Premio di Mi Bida
  • NASÍ NA AÑA 1967

  • PAIS NATAL FINLANDIA

  • SU PASADO HUNGADÓ DI TÈNIS PROFESHONAL

MI PASADO

Mi a lanta den un bario trankil i ku vegetashon bèrdè, pafó di e stat Tampere, na Finlandia. Mi famia no tabata masha religioso, pero bon edukashon i un bon manera di trata hende tabata importante pa nan. Mi mama ta di Alemania, i tempu mi tabata chikitu mi a yega di bai Wèst Alemania, kaminda mi wela i tawela tabata biba.

Semper mi a gusta deporte. Na chikitu, mi a praktiká tur tipo di deporte. Pero ora mi tabatin rònt di 14 aña, mi a disidí di konsentrá riba tènis. Ku 16 aña, mi tabata train dos te tres biaha pa dia: dos training tabata lès profeshonal, i anochi mi tabata train riba mi mes. Mi tabata fasiná ku e diferente aspektonan di e wega. Tènis tabata un manera pa mi desafiá mi mes, tantu mentalmente komo físikamente. Aunke mi tabata gusta sali ku mi amigunan i dal un serbes de bes en kuando, nunka mi no a haña mi den problema pa motibu di droga òf alkohòl. Mi bida tabata drei rònt di tènis; esei tabata mi prioridat.

Ora mi tabatin 17 aña, mi a kuminsá partisipá den e torneonan di ATP. * Mi a gana vários torneo i a bira famoso den mi pais. Ku 22 aña mi tabata entre e 50 mihó tenistanan na mundu.

Pa hopi aña, mi a biaha rònt mundu pa hunga tènis profeshonal. M’a mira lugánan fasinante, pero tambe mi a realisá ku tabatin hopi problema na mundu, manera droga, kriminalidat i kontaminashon di e medio ambiente. Por ehèmpel ora nos tabata na Merka, nan tabata bisa nos pa no bai na sierto partinan di algun stat, pasobra nan ta hopi peligroso. Tur esei a hasi mi tristu. Ademas, maske mi tabata hasi algu ku mi ta stima, na final di dia mi tabata sinti un bashí.

BEIBEL A KAMBIA MI BIDA

Mi namorada, Sanna, a kuminsá studia Beibel ku e Testigunan di Yehova. M’a keda asombrá di mira ku e tabata gusta kos religioso, pero mi no tabatin nada kontra pa e studia. Nos a kasa na 1990, i e siguiente aña el a batisá komo Testigu di Yehova. Mi no tabata konsiderá mi mes un persona religioso, aunke mi tabata kere den Dios sí. Mi ta kòrda ku mi wela aleman tabata lesa Beibel hopi, i el a asta siña mi hasi orashon.

Un dia, un pareha Testigu di Yehova a invitá ami ku Sanna na nan kas. E esposo, Kari, a mustra mi e profesia di Beibel tokante “e último dianan.” (2 Timoteo 3:1-5) Esei a impreshoná mi, pasobra awor m’a komprondé dikon tin asina tantu kos malu ta pasa rònt mundu. E dia ei nos no a papia mas tokante religion. Pero despues di esei, mi a kuminsá kòmbersá regularmente ku Kari tokante Beibel. Tur loke mi tabata siña tabata zona lógiko. Komo ku mi tabatin un bida drùk i tabata biaha hopi, nos no por a papia regularmente, pero Kari no a entregá. E preguntanan ku mi tabata hasi durante nos periodo di estudio, e tabata kontestá via karta. Mi a ripará ku Beibel tabata kontestá tur pregunta profundo di bida na un manera masha lógiko. Pokopoko mi a kuminsá komprondé e tema prinsipal di Beibel, esta, ku e Reino di Dios lo sòru pa Dios su propósito kumpli. Un otro kos ku tabatin un impakto grandi riba mi tabata ora m’a siña e nòmber di Dios, Yehova, i a mira tur loke el a hasi pa nos. (Salmo 83:18, NW) Loke a impreshoná mi mas tantu tabata e sakrifisio di reskate; esei no tabata djis un formalidat legal, sino un ekspreshon di Dios su amor. (Huan 3:16) M’a siña tambe ku mi por ta amigu di Dios i biba pa semper den un paradeis kaminda tin pas. (Santiago 4:8) M’a puntra mi mes: “Kon mi por demostrá mi gratitut?”

Mi a kuminsá pensa riba loke mi tabata hasi den mi bida. Mi a siña den Beibel ku e felisidat di mas grandi ta bini di duna, i mi tabatin masha gana di papia ku otro hende tokante mi kreensia. (Echonan 20:35) Komo atleta profeshonal, mi tabata pasa un 200 dia pa aña leu for di kas, partisipando den torneo. Henter e bida di mi famia tabata drei rònt di ami: mi training, mi rutina, mi karera. Mi a realisá ku mi tabatin ku hasi kambio.

Mi tabata sa ku masha poko hende lo por a komprondé mi desishon si mi a stòp ku un karera deportivo prometedor pa motibu religioso. Pero e oportunidat di siña konosé Yehova mihó i haña bida eterno tabata hopi mas importante pa mi ku kualke premio ku mi por a gana den e mundu di tènis; pues, tabata fásil pa mi disidí. Mi tabata determiná pa no wòri ku loke hende bisa, ya ku esaki tabata mi desishon. Un teksto di Beibel ku a yuda mi resistí e preshon tabata Salmo 118:6, ku ta bisa: “SEÑOR ta ku mi; lo mi no tin miedu; kiko hende por hasi mi?”

Rònt di e tempu ei, mi a haña un oferta masha bon mes serka algun spònser, un oferta ku lo a permití mi hunga tènis profeshonal i biba sin niun preokupashon pa hopi aña. Pero ya mi a tuma mi desishon kaba, pues mi a nenga e oferta. Ku tempu, mi a stòp di partisipá den e torneonan di ATP. Mi a sigui studia Beibel, i dia 2 di yüli 1994 mi a batisá komo Testigu di Yehova.

E BENEFISIONAN

Den mi kaso, no ta un tragedia personal a pone mi pensa riba Dios. Ni tampoko mi no a konsiderá mi mes un persona ku tabata buska e bèrdat. Mi tabata haña ku mi bida ta bon i ku mi no tabata falta nada. Pero diripiente, mi a deskubrí ku bida tin un propósito. Ta komo si fuera e bèrdat di Beibel tabata warda mi hañ’é. Awor mi bida ta hopi mas mihó ku hamas mi por a imaginá! Nos famia ta mas uní ku nunka. I mi ta masha kontentu ku mi tres yu hòmbernan a sigui mi pasonan, no komo deportista, sino komo kristian.

Ainda mi ta gusta hunga tènis. Atraves di añanan, mi a logra gana mi pan di kada dia ku aktividatnan relashoná ku tènis. Mi a traha komo entrenadó i atministradó di un klup di tènis. Pero mi bida no ta drei rònt di deporte mas. Ántes, mi tabata train hopi ora tur siman pa bira un mihó hungadó di tènis, un kampeon. Awor, komo un predikadó fultaim, mi ta gusta usa mi tempu pa yuda otro hende siña i apliká e prinsipionan di Beibel ku a kambia mi bida. Mi felisidat di mas grandi ta ora mi ta duna prioridat na mi relashon ku Yehova Dios i ora mi ta konta otro hende tokante e speransa di un futuro maravioso.—1 Timoteo 6:19.

^ par. 10 ATP ta para pa Asosiashon di Tenista Profeshonal. E asosiashon ei ta dirigí e sirkuito profeshonal di tènis maskulino. ATP ta organisá vários torneo profeshonal kaminda e tenistanan por gana punto i premio di plaka kèsh. E total di punto ku kada hungadó akumulá durante e torneonan ta determiná kua puesto lo e tin riba e klasifikashon mundial.