Bai na kontenido

BEIBEL TA KAMBIA BIDA DI HENDE

Mi Tabata Hiba un Bida Deskontrolá

Mi Tabata Hiba un Bida Deskontrolá
  • Nasí Na Aña: 1971

  • Pais Natal: Tonga

  • Su Pasado: Mal uso di droga, prizòn

MI PASADO

Mi famia ta di Tonga, un pais ku ta konsistí di mas o ménos 170 isla, ku ta keda na e parti zùitwèst di Oséano Pasífiko. Nos tabata biba simpel na Tonga, sin koriente i sin outo. Pero nos tabatin awa i algun galiña. Durante nos fakansinan di skol, ami i mi dos otro ruman hòmbernan tabata yuda mi tata traha den nos kunuku. Nos tabatin palu di bakoba, batata dushi, taro (un otro tipo di batata dushi) i yuka. E trabou di plantashon i algun otro trabou chikí a yuda mi tata gana un tiki sèn. Meskos ku hopi di e habitantenan di e isla, nos famia tabatin rèspèt profundo pa Beibel i nos tabata bai misa regularmente. Apesar di esei, nos tabata pensa ku, pa nos por tin un mihó bida, nos mester a muda bai biba na un pais mas riku.

Tempu mi tabatin 16 aña di edat, un tio di mi a hasi trámite pa nos muda bai biba na California, Merka. E kambio di kultura ei tabata masha difísil pa nos! Aunke nos situashon finansiero a mehorá, nos tabata biba den un bario pober kaminda tabatin hopi violensia i uso di droga. Hopi biaha durante anochi, nos tabata tende zonido di tiru di skopèt, i mayoria di nos bisiñanan tabatin miedu di e gangnan kriminal. Hopi hende tabatin arma di kandela pa defendé nan mes òf pa regla kuenta ora tin diskushon. Te ainda mi tin un bala den mi pechu debí di un diskushon asina.

Na skol sekundario, mi tabata ke pa e otro muchanan gusta mi. Gradualmente, mi a kuminsá bai fiesta ku hopi bebementu, violensia i uso di droga. Ku tempu mi a bira adikto na kokaina. Pa kumpra droga, mi a kuminsá hòrta. Apesar ku mi mayornan tabata fiel baidó di misa, nunka mi a haña e yudansa nesesario pa yuda mi evitá di hasi malu i yuda mi trata ku preshon di pareu. Hopi bes, mi tabata ser arestá pa mi komportashon violento. Mi tabata hiba un bida deskontrolá! Finalmente mi a kai será.

BEIBEL A KAMBIA MI BIDA

Na aña 1997, ora mi tabata den prizòn, un otro prizonero a ripará ku mi tabatin un Beibel den mi man. Tabata temporada di Pasku, un temporada ku mayoria di hende na Tonga ta konsiderá masha sagrado. El a puntra mi si mi sa kiko Beibel ta bisa tokante nasementu di Kristu, pero mi no tabatin niun idea. El a mustra mi kiko Beibel ta bisa di e nasementu di Kristu i mi a mira ku hopi di e tradishonnan di Pasku no ta ni ser menshoná den Beibel. (Mateo 2:1-12; Lukas 2:5-14) Mi a keda masha asombrá i mi a puntra mi mes kiko mas tin den Beibel ku mi no sa di dje. E mener akí tabata asistí na e reunionnan semanal ku Testigunan di Yehova tabata tene den prizòn i mi a disidí di djòin nan. Nan tabata studiando e buki Revelashon. Aunke mi no tabata komprondé tur loke tabata bisa, mi a realisá ku tur kos ku nan a siña mi tabata saká for di Beibel.

Mi a keda kontentu ora e Testigunan a ofresé mi un estudio di Beibel. Pa promé biaha, mi a siña ku Beibel ta primintí ku hende por biba pa semper den paradeis riba tera. (Isaías 35:5-8) A bira opvio ku pa mi agradá Yehova, mi mester a hasi kambio. Mi a realisá ku Yehova Dios lo no a permití mi biba den e futuro paradeis si mi no a stòp ku mi bisionan. (1 Korintionan 6:9, 10) Pues mi tabata determiná pa dominá mi mal beis i stòp ku bebementu di mas, humamentu i droga.

Na 1999, promé ku mi a kaba di sinta mi kastigu, e outoridatnan a transferí mi na un kampo di konsentrashon. Pa mas ku un aña, mi no tabatin kontakto ku e Testigunan. Pero mi tabata determiná di sigui hasi kambio. Na aña 2000, gobièrnu a kanselá mi pèrmit pa keda na Merka i mi a ser deportá pa Tonga.

Ora mi a yega Tonga bèk, mesora mi a buska e Testigunan di Yehova pa mi sigui studia. Mi tabata gusta loke mi tabata siñando i mi a keda impreshoná ora mi a mira ku e Testigunan riba e isla tabata mustra mi tur kos for di Beibel, meskos ku e Testigunan na Merka.

Mi tata tabata konosí den komunidat pasobra e tabatin un puesto di hopi responsabilidat den misa. Pues promé, mi famia tabata tur konfundí i iritá pa motibu ku mi tabata anda ku e Testigunan di Yehova. Pero despues, mi mayornan a keda kontentu ku e prinsipionan di Beibel a yuda mi drecha mi bida.

Manera ta e kustumber di hopi hende na Tonga, mi a pasa hopi ora ta bebe kava

Un di e kambionan di mas grandi ku mi mester a hasi tabata di stòp di bebe un bibida ku ta masha konosí den nos kultura. Hopi hende hòmber na Tonga ta keda hopi ora ta bebe kava, un bibida trankilisante ku nan ta traha di e simianan di e mata di peper. Awor ku mi ta bèk na mi pais, mi tabatin e kustumber di bai un klup di kava tur anochi, pa bebe e kava akí te ora mi bira inkonsiente. Parti di e problema tabata mi amigunan ku no tabata wòri ku e prinsipionan di Beibel. Finalmente, ku yudansa mi a bin mira ku mi hábitonan tabata ofendé Dios. Mi a hasi e kambionan nesesario pa mi por haña Dios su bendishon i aprobashon.

Mi a kuminsá bai tur e reunionnan di Testigunan di Yehova. Ora mi a kuminsá anda ku hende ku sí tabata purba di agradá Yehova, mi por a resistí tentashon. Na aña 2002, mi a batisá komo Testigu di Yehova.

KON MI A BENEFISIÁ

Mi a benefisiá di Dios su pasenshi manera ta pará skirbí den Beibel: “Yehova . . . tin pasenshi ku boso pasobra e no ta deseá pa ningun hende ser destruí, ma e ta deseá pa tur haña chèns di arepentí.” (2 Pedro 3:9) Dios por a kaba ku e mundu malbado akí masha tempu kaba, pero el a permití e mundu sigui eksistí sufisiente tempu pa hende manera mi por kultivá un bon amistat kuné. Mi ta gusta e idea ku awor e ta usa ami pa yuda otro hende hasi meskos.

Ku yudansa di Yehova, mi a logra pa mi bida no sigui un rumbo deskontrolá. Mi no ta hòrta mas pa sigui ku un adikshon ku ta kaba ku mi mes i ku otro hende. En bes di esei, mi ta purba di yuda mi bisiñanan pa nan tambe bira bon amigu di Yehova. Den kongregashon di e Testigunan di Yehova, mi a konosé mi esposa, Tea. Huntu ku mi yu hòmber, nos ta un famia felis. Huntu nos ta siña hende kiko Beibel ta siña enkuanto biba pa semper den un paradeis di pas.