Bai na kontenido

BEIBEL TA KAMBIA BIDA DI HENDE

“Mi A Koba Mi Mes Graf”

“Mi A Koba Mi Mes Graf”
  • Nasí na Aña: 1978

  • Pais Natal: El Salvador

  • Su Pasado: Miembro di Gang Violento

MI PASADO

“Si realmente bo ke siña mas tokante Dios, keda huntu ku e Testigunan di Yehova”. M’a keda asombrá ora mi a tende e komentario ei. Na e momento ei, mi tabatin un poko tempu ta studia ku Testigunan di Yehova. Pero pa yuda bo komprondé mi reakshon, mi ta bai konta bo un tiki di mi bida.

Mi a nase na Quezaltepeque, un stat na El Salvador. Mi tabata e di seis di 15 yu. Mi mayornan a kria mi i a siña mi pa ta onesto i obediente na lei. Ademas, Leonardo i otro Testigunan di Yehova tabata bin pa siña nos enkuanto di Beibel. Pero m’a ignorá loke m’a siña i a tuma un kantidat di mal desishon ún tras di otro. Ora mi tabatin 14 aña, mi a kuminsá bebe alkohòl i usa droga ku mi amigunan di skol. Ún pa ún, nan a kita for di skol pa djòin un gang i m’a sigui nan mal ehèmpel. Nos a pasa nos dianan riba kaya, a preshoná hende pa duna nos sèn i a hòrtá pa por a sigui kumpra droga.

E gang a bira mi famia. Mi tabata pensa ku mi a debe nan lealtat. Por ehèmpel, un dia un miembro di gang ku tabata bou di influensia pisá di droga a ataká un di mi bisiñanan. Durante e pelea akí, mi bisiña a logra dominá mi amigu i a yama polis. M’a bira furioso i a kuminsá bati e outo di mi bisiña ku klòp pa oblig’é laga mi amigu bai. Mi bisiña a roga mi pa stòp segun ku mi tabata kibra un bentana tras di otro i bati e outo kibra, pero mi no kier a tende.

Tempu mi tabatin 18 aña, nos gang tabatin un konfrontashon ku polis. Mi tabata kla pa tira un bòm trahá na kas, ma e la eksplotá den mi man. Kon bin, mi no sa. Mi ta kòrda solamente ku mi a mira mi man tur destrosá, i despues m’a bai flou. Ora m’a bini bei den hospital, mi a realisá ku mi a pèrdè mi man drechi i mi oido na banda drechi i ku mi a bira kasi siegu na mi wowo drechi.

Apesar di mi heridanan, tòg mi a bolbe bai bèk den mi gang ora mi a sali hospital. Pero djis despues di esei, polis a arestá mi i sera mi den prizòn. Den prizòn mi relashon ku e gang a bira mas fuerte. Nos a pasa nos tempu ta hasi tur kos huntu, for di desayuno, ora nos a dal nos promé sigaria di mariwana, te ora ku nos bai drumi.

BEIBEL A KAMBIA MI BIDA

Ora mi tabata den prizòn, Leonardo a bishitá mi. Segun ku nos tabata kòmbersá, e la mustra riba e tatú ku mi tin riba mi man drechi. E la puntra mi: “Bo sa kiko e tres puntonan di e tatú ei ta nifiká?” Mi di: “Konpolaga, sèks, droga i rock and roll.” Pero Leonardo a kontestá: “Ami lo bisa bo ku nan ta nifiká hospital, prizòn i morto. Bo tabata den hospital, pero awor bo ta den prizòn, i bo sa kiko ta bini despues.”

Loke Leonardo a bisa a shòk mi. E tabatin rason. Ku mi manera di biba, mi tabata kobando mi mes graf. Leonardo a ofresé mi un estudio bíbliko i mi a aseptá. Loke mi a siña for di Beibel a konvensé mi pa kambia mi bida. Por ehèmpel, Beibel ta bisa ku “mal kompania ta daña bon kustumber”. (1 Korintionan 15:33) Pues, un di e promé kosnan ku mi tabatin ku hasi ta buska amigunan nobo. Pa logra esei, mi a stòp di bai e reunionnan di gang i na lugá di esei mi a kuminsá bai e reunionnan ku Testigunan di Yehova tabata tene den prizòn. Na e reunion akí, mi a topa un prezu ku yama Andrés, ku a batisá komo Testigu di Yehova den prizòn. El a invitá mi pa desayuná huntu kuné. Djei padilanti, mi no a kuminsá mi dia mas ku sigaria di mariwana. Na lugá di esei, nos tabata trata un versíkulo di Beibel tur mainta.

E miembronan di gang a kuminsá ripará ku mi a kambia. P’esei un di e lidernan di e gang kier a papiá ku mi. Mi a spanta. Mi no tabata sa kiko lo e hasi ku mi ora e haña sa ki intenshon mi tabatin, pasobra ta kasi imposibel pa sali for di un gang. E la bisa mi: “Nos a ripará ku bo no ta bini nos reunionnan mas i en bes di esei bo ta bai e reunionnan di e Testigunan di Yehova. Ki intenshon bo tin?” M’a bis’é ku mi ke sigui studia Beibel i ku mi ke kambia mi bida. Pa mi sorpresa, e la bisa mi ku e gang lo respetá mi basta mi demostrá ku di bèrdat mi ke bira un Testigu di Yehova. Despues e di: “Si di bèrdat bo ke siña tokante Dios, keda huntu ku e Testigunan di Yehova. Nos ta ferwagt ku bo ta stòp di hasi kos malu. Mi ta felisitá bo. Bo ta riba e bon kaminda. E Testigunan por ègt yuda bo. Mi a studia ku nan na Merka i algun di mi famianan ta Testigu di Yehova. No tene miedu. Sigui asina.” Mi tabatin miedu ainda, pero na e mesun momento, mi tabata masha kontentu. Mi a gradisí Yehova di kurason. Mi a sinti mi manera un para ku a sali liber for di kouchi. Mi a komprondé e palabranan di Hesus ora el a bisa: “Boso lo konosé e bèrdat, i e bèrdat lo hasi boso liber.”​—Huan 8:​32.

Algun di mi amigunan di ántes tabata purba di tèst mi i tabata ofresé mi droga. Mi tin ku atmití ku tabatin bes ku mi a sukumbí i a aseptá. Pero ku tempu, despues di hopi orashon ferviente, finalmente mi a logra vense mi bisionan.​—Salmo 51:10, 11

Despues ku mi a sali for di prizòn, hopi hende a pensa ku lo mi a bai bèk na mi manera di biba di ántes, pero nò. Al kontrario, vários biaha mi a bai bèk n’e prizòn sí, pero pa kompartí loke m’a siña for di Beibel. Finalmente, mi amigunan di ántes a mira ku m’a ègt kambia. Lamentablemente, esei no tabata e kaso ku mi enemigunan di pasado.

Un dia mi a sali pa bai prediká, i diripiente algun miembro armá di un gang rival di ántes a rondoná ami i mi kompañero den sirbishi, i nan kier a mata mi. Mi kompañero ku kurashi a splika nan na un manera nèchi ku mi no ta un miembro mas di gang. Miéntras tantu, ami a purba di keda trankil. Anto nan a bati mi i a menasá mi pa no drenta e área ei mas, i despues a baha nan arma i a laga nos bai. Beibel realmente a kambia mi bida. Den pasado lo mi a purba di buska vengansa. Pero awor, mi ta apliká e konseho di 1 Tesalonisensenan 5:​15, ku ta bisa: “Sòru pa ningun di boso no paga malu ku malu, ma semper sigui tras di loke ta bon pa otro i pa tur sobrá hende.”

Fo’i dia m’a bira Testigu di Yehova mi ta hasi esfuerso pa ta un hende onesto. Esei no tabata fásil. Pero ku yudansa di Yehova, e konsehonan di Beibel i e yudansa di mi amigunan nobo, mi a logra. Nunka mas lo mi ke bolbe na mi aktonan di pasado.​—2 Pedro 2:​22

E BENEFISIONAN

Mi tabata un hende violento i yen di rabia. Mi tin sigur ku lo mi no tabata na bida si mi a sigui hiba e bida violento ei. Loke m’a siña for di Beibel a kambia mi. Mi a stòp ku mi mal kustumbernan. Mi a siña pa ta na pas ku e enemigunan ku mi tabatin. (Lukas 6:​27) I awor mi ta disfrutá di amistat ku ta yuda mi desaroyá bon kualidat. (Proverbio 13:20) Mi ta felis i mi bida tin propósito, sirbiendo un Dios ku tabata dispuesto pa lubidá tur e kosnan malu ku mi a hasi.​—Isaías 1:​18.

Den 2006, mi a bai e skol di entrenamentu spesial pa predikadó kristian soltero. Algun aña despues, mi a kasa ku mi esposa stimá, i huntu nos ta lanta nos yu muhé. Awor mi ta usa mayoria di mi tempu pa siña otro hende e prinsipionan di Beibel ku a yuda mi. Tambe mi ta sirbi komo ansiano den e kongregashon lokal i mi ta purba di yuda e hóbennan pa evitá di kometé e mesun fayonan ku ami a kometé tempu mi tabatin nan edat. En bes di koba mi mes graf, mi ta traha awor pa e bida eterno den futuro ku Dios ta primintí den Beibel.