Bai na kontenido

BEIBEL TA KAMBIA BIDA DI HENDE

Porfin, Mi Ta Bon ku Mi Tata

Porfin, Mi Ta Bon ku Mi Tata
  • NASÍ NA AÑA: 1954

  • PAIS NATAL: Filipinas

  • SU PASADO: Mi no tabata bon ku mi tata abusadó

MI PASADO

Hopi turista ta bishitá e famoso waterval pegá ku e stat Pagsanjan na Filipinas. Mi tata, Nardo Leron, a biba einan i a krese den pobresa. Debí na e korupshon ku e tabata mira den gobièrnu, kuerpo polisial i na su trabou, el a bira amargá i rabiá.

Mi mayornan a traha duru pa lanta nan ocho yunan. Hopi biaha nan a keda for di kas durante un periodo largu pa kultivá aros den e serunan. Konstantemente, ami ku mi ruman hòmber mayó, Rodilio, mester a perkurá pa nos mes i nos a pasa hamber. Komo mucha, masha poko nos por a hunga manera e otro muchanan. Ku shete aña, kada un di nos mester a kuminsá traha den kunuku. Nos tabatin ku karga saku di koko pisá riba kaminda den seru steil. Si e karga tabata muchu pisá pa hisa, nos a haña nos ta lastr’é bai kuné.

Nos tabatin ku soportá maltrato físiko di nos tata, pero loke tabata mas doloroso tabata pa wak kon e tabata bati nos mama. Nos tabata purba di stòp e, sin por logra. Ami ku Rodilio a palabrá den sekreto ku ora nos bira grandi nos ta mata nos tata. Mi tabata anhelá di tin un tata ku a stima nos!

Frustrá i rabiá debí na mi tata su aktitut violento, mi a bandoná kas ku 14 aña di edat. Pa un tempu mi a biba riba kaya i a kuminsá huma mariwana. Despues mi a kuminsá traha komo guia riba boto i a hiba turista na e waterval.

Algun aña despues, mi a kuminsá studia na e universidat na Manila. Pero debí ku mi tabata bai Pagsanjan bèk den wikènt, mi no tabatin masha tempu pa mi estudio. Mi bida a bira difísil i sin sentido, manera un sírkulo visioso, i mariwana no tabata kalma mi ansiedatnan mas. Mi a kuminsá eksperimentá ku metanfetamina, kokaina i heroina. Droga hopi bes a hiba mi na inmoralidat seksual tambe. Mi tabata rondoná ku pobresa, inhustisia i sufrimentu. Mi tabatin rabia riba e gobièrnu i a kulp’é pa tur e problemanan ei. Mi a puntra Dios, “Dikon bida ta asina?” Pero mi no a haña niun kontesta den e diferente religionnan ku mi a investigá. Mi a usa mas droga pa skonde mi desesperashon.

Na aña 1972, e studiantenan na Filipinas a organisá vários protesta kontra e gobièrnu. Mi a partisipá den un di e protéstanan ei ku a bira masha violento. Hopi hende a ser arestá, i algun luna despues, nan a establesé un lei militar kontra tal tipo di protesta den henter e pais.

Un biaha mas mi a bin terminá riba kaya, pero e biaha akí ku miedu pa outoridat pasobra mi a partisipá den e rebelion. Pa finansiá mi adikshon na droga, mi a bolbe kuminsá hòrta i finalmente a ofresé servisio di seksual na hende riku i na estranhero. No tabata interesá mi si mi a biba òf muri.

Mientrastantu, mi mama i mi ruman hòmber mas yòn a kuminsá studia Beibel ku e Testigunan di Yehova. Mi tata a rabia mashá i a kima nan literatura bíbliko. Pero, tur dos a perseverá i a batisá komo Testigu di Yehova.

Un dia, un Testigu di Yehova a papia ku mi tata tokante e promesa bíbliko di un futuro den kua lo tin hustisia tur kaminda riba tera. (Salmo 72:12-​14) E speransa akí a atraé mi tata asina tantu ku el a disidí di investigá esei pa su mes. Den Beibel el a haña no solamente Dios su promesa di un gobièrnu hustu, sino tambe Dios su rekisitonan pa esposo i tata. (Efesionan 5:​28; 6:4) Djis un poko tempu despues, mi tata i tur mi rumannan a bira Testigu. Debí ku mi tabata leu for di kas mi no tabata sa nada di esaki.

BEIBEL A KAMBIA MI BIDA

Na aña 1978 mi a muda bai Australia. Pero asta den e pais pasífiko i próspero ei, mi no a haña pas mental. Mi a sigui usa droga i alkohòl. Mas despues den e aña ei, e Testigunan di Yehova a bishitá mi. Mi a gusta loke nan a mustra mi den Beibel tokante un mundu pasífiko, pero tabata difísil pa mi konfia den nan.

Djis un poko despues, mi a bai Filipinas bèk pa un par di siman. Mi rumannan a bisa mi ku mi tata a hasi hopi esfuerso pa bira un mihó persona, pero mi tabatin asina tantu renkor ku mi a evitá tur kontakto kuné.

Mi ruman muhé mas yòn a siña mi for di Beibel dikon bida ta yen di sufrimentu i inhustisia. Mi a keda asombrá kon un mucha muhé tiner ku masha poko eksperensia di bida por a duna mi kontesta riba mi preguntanan. Promé ku mi a bai mi tata a duna mi e buki Bo por biba pa semper den Paradijs riba tera. * El a bisa: “Stòp di buska. E buki akí lo yuda bo haña bo kontestanan.” El a animá mi pa buska e Testigunan di Yehova ora mi yega Australia.

Mi a sigui mi tata su konseho i a haña un Salòn di Reino serka di mi kas na Brisbane. Mi a aseptá un estudio di Beibel. E profesianan di Beibel, manera esnan na Daniel kapítulo 7 i na Isaías kapítulo 9, a mustra mi ku Dios su Reino, ku ta liber di korupshon, lo goberná riba nos den futuro. Mi a siña ku nos lo disfrutá di un paradeis aki riba tera. Mi a realisá ku pa mi ta aseptabel den Dios su bista mi mester a dominá mi emoshonnan, stòp di hasi mal uso di droga i alkohòl, i stòp di hiba un bida inmoral. Mi a terminá e relashon ku e mucha muhé ku mi tabata biba kuné i a stòp ku mi adikshonnan. Segun ku mi konfiansa den Dios a sigui krese, mi a pidié den orashon pa yuda otro hende tambe pa hasi kambio.

Gradualmente, mi a nota ku loke mi ta siña di bèrdat por transformá un persona. Beibel ta bisa ku si nos hasi esfuerso, nos por bisti e “personalidat nobo.” (Kolosensenan 3:9, 10) Segun ku mi tabata purba di hasi esaki, mi a realisá ku loke mi a tende di mi tata tokante e kambio di su personalidat por ta bèrdat. En bes di sinti rabia i renkor, mi kier a hasi pas kuné. Porfin mi a pordoná mi tata i a kita e odio ku mi tabatin kontra dje for di infansia.

E BENEFISIONAN

Komo hóben, hopi bes mi a imitá e mal kondukta di otronan. E spièrtamentu di Beibel a resultá di ta bèrdat den mi kaso—mal kompania a hiba mi den mal kaminda. (1 Korintionan 15:33) Pero mi a haña berdadero amigu entre e Testigunan di Yehova, i nan a yuda mi bira un mihó persona. Entre nan tambe mi a konosé mi kerida esposa Loretta. Huntu nos ta siña otro hende kon Beibel por yuda nan.

Mi ta kome un kuminda ku mi kasá i amigunan

Danki na Beibel mi a mira mi tata bira un persona ku nunka mi a pensa ku lo e bira—un esposo amoroso pa mi mama i un kristian humilde ku ta stima pas. Ora ku nos a topa na aña 1987 despues ku mi a batisá komo Testigu di Yehova, mi tata a brasa mi pa promé biaha den mi bida!

Pa mas ku 35 aña, mi tata a sigui traha huntu ku mi mama, i a kompartí e speransanan di Beibel ku otro hende. El a bira un hòmber diligente i kariñoso, konosí komo un persona ku gusta yuda. Durante e añanan ei mi a siña respet’é i stim’é. Mi ta orguyoso di ta su yu! El a fayesé na aña 2016, pero mi tin grato rekuerdo di dje, sabiendo ku tantu e komo ami a hasi kambio grandi den nos personalidat ora ku nos a apliká e prinsipionan di Beibel. Mi odio a disparsé por kompleto. Mi ta masha gradisidu ku mi a konosé mi Tata selestial, Yehova Dios, kende a primintí di pone fin na tur loke ta kousa angustia den famia tur kaminda.

^ par. 20 Publiká pa Testigunan di Yehova, pero e no ta disponibel mas.