Den e luna di ougùstùs 2014, Testigunan di Yehova rònt mundu a distribuí un tratado pa duna publisidat na e website jw.org. Komo resultado, durante e luna ei kasi 65 mion hende a bishitá e website, 20 porshento mas ku normal. Na tur, kasi 10.000 hende a pidi un kurso di Beibel via di e website, 67 porshento mas ku e luna promé. Pues, e kampaña akí tabata un yudansa pa tur tipo di hende.

Yudansa pa hende ku ta buska kontesta pa e preguntanan importante di bida

Den left, un Testigu na Canada a kumindá un señora ku yama Madeline i a mustr’é un tratado di e kampaña: Unda Bo Por Haña Kontesta pa e Preguntanan Importante di Bida? Madeline a bis’é ku e anochi promé, ora e tabata den su balkon, el a roga Dios pa yud’é haña kontesta pa preguntanan asina. Den pasado el a yega di yama vários misa pa pidi un kurso di Beibel, pero niun di nan no a yam’é bèk. Awor el a kuminsá haña un kurso di Beibel serka e Testigunan.

Yudansa pa hende ku no konosé Beibel

Na Filipinas, un Testigu ku yama Rowena a papia ku un hòmber chines ku tabata pará dilanti di un restorant fast-food. El a dun’é un tratado i a splik’é ku Testigunan di Yehova ta duna hende kurso di Beibel grátis.

E hòmber a bis’é ku nunka el a mira un Beibel. E kòmbersashon a motiv’é p’e asistí na un asamblea di Testigunan di Yehova. Despues di esei el a bisa ku e tabatin gana di haña sa mas tokante Beibel i ku e tabata ke download e for di nos website.

Yudansa pa hende surdu

Guillermo, un Testigu surdu di Spaña, a topa Jorge, un eks kompañero di skol ku tambe ta surdu. Jorge a kont’é ku su mama a kaba di fayesé i ku e tabatin hopi duda i pregunta. E ora ei Guillermo a dun’é un tratado i a splik’é ku riba jw.org e por haña informashon den idioma di seña ku lo por kontestá hopi di su preguntanan. Tambe el a invitá Jorge na un reunion na nan Salòn di Reino. Jorge a bai, i for di e dia ei e no a falta niun reunion, apesar ku e ta biba 60 kilometer leu for di e salòn.

Yudansa pa hende ku ta biba na lugánan aislá

Dos pareha Testigu na Grunlandia a hasi un biahe kostoso di seis ora den un boto chikí pa bai na un pueblo di 280 habitante. Ei nan a prediká, parti tratado i laga e hendenan wak un vidio riba jw.org den e idioma grunlandes. Tambe nan a kuminsá un kurso di Beibel ku un pareha ku nan a topa. Awor nan ta dirigí e kurso ei dos biaha pa siman via telefòn.

No ta na Polo Norte so e esfuersonan akí a ser hasí. E Testigunan di Nicaragua tambe a plania pa parti e tratado akí pa hende di e idioma mayangna ku ta biba den e selvanan ku ta keda na e banda di Laman Karibe. Pa yega einan, nan mester a kore 20 ora nònstòp den un bùs ròkòtòkò riba un kaya yen di buraku i despues mester a kana 11 ora largu riba un kaminda ku na sierto parti tabata yen di lodo. Ora nan a yega, nan a parti tratado pa e hendenan ku ta biba den e área ei, kendenan a keda hopi asombrá i tambe kontentu di por a wak algun vidio den nan idioma.

Na Brazil, un Testigu ku yama Estela a ofresé e tratado na un hòmber ku tabata nabegá i ku a pasa na un stat chikí den e selva di Amazona. E hòmber a tuma e tratado, pero e no a mustra muchu interes den dje i a hink’é den su saku. Riba kaminda pa kas, e motor di su boto a daña i el a keda pegá riba e riu. Miéntras ku e tabata warda yudansa bini, el a lesa e tratado. Despues el a usa su selular pa subi jw.org, lesa vários artíkulo i download algun vidio. Algun dia despues e hòmber a topa kasá di Estela i a pidié p’e gradisí Estela. E di: “E artíkulonan ku mi a lesa a yuda mi keda trankil miéntras mi tabata warda un boto bin reskatá mi. Mi yunan gusta e vidionan di Kalèb. Lo mi sigui bishitá jw.org.”